Nta mpanvu rhugwerhe y’okuwaza oku bulala abola banafunzi 70 barhaliriho amango Yesu aliri arheganya Ebilyo by’Egolo bya Waliha, oku Yesu arhalichibayemerere changwa mpu balimujahikire. Yesu alilonzeze konyine kuba haguma n’entumwa zage kw’echola chihe.

Babe abola 12 changwa abola 70, boshi baliri banafunzi ba Yesu. Burhanzi achishoga balume 12 mw’abola banafunzi banene, abayirika ntumwa. (Lu. 6:12-16) Aliri e Galilaya amango “ahamagala abola ekumi na babiri” n’oku “barhuma kuhubiri Obwami bwa Mungu n’okufumya abantu.” (Lu. 9:1-6) Buzinda, amango Yesu aliri omu Yudeya “achishoga bandi 70 n’okubarhuma babiri babiri.” (Lu. 9:51; 10:1) Bobola, Yesu aligwerhe abanafunzi omu fasi zilengene baliri bahubiri oku bimulolere.

Abayahudi babaga banafunzi ba Yesu, baligenderere kujira e Pasaka buli mwaka, nkabaga haguma n’emilala yabo. (Kut. 12:6-11, 17-20) Kasanzi kageke embere afe, Yesu n’entumwa zage baja e Yerusalemu. Aliko, arhalibwirire abanafunzi bage boshi b’omu Yudeya, e Galilaya, ne Perea bayinje bajire e Pasaka haguma. Kweri, bibonekene oku Yesu alilonzeze kuba n’entumwa zonyine kw’echola chihe. Ababwira ntya: “Naligwerhe nyorha nene y’okulya eyila Pasaka haguma nenyu embere ndibuke.”​—Lu. 22:15.

Aligwerhe empanvu nyinja y’okujira ntyo. Yesu aliri hofi kufa nka “Mwana-buzi wa Mungu w’amakulira egulu echaha.” (Yoh. 1:29) Alikwanene kufira omu Yerusalemu, ahantu bagendaga bahera Mungu enterekero. Omwana-buzi baliri balya oku Pasaka, aliri ayibusa Abaizraeli okuntu Yehova abachungulaga kurhenga omu Misiri. Aliko enchungu ya Yesu, yowe yakajirire binene kulusha. Y’akachungwire abantu boshi omu chaha n’olufu. (1 Ko. 5:7, 8) Kugerera enterekero ya Yesu, entumwa zage 12 z’akabere musinji gw’echibaga che Chikristu. (Efe. 2:20-22) Bisimisize okumenya okw’evile nchesibwa Yerusalemu egwerhe “mabale 12 m’omusinji” mayandikirweko “mazino 12, m’entumwa 12 z’Omwana-buzi.” (Ufu. 21:10-14) Bobola, entumwa bemana balikwanene kukola engabane y’akamaro omu kuyeneza omuhigo gwa Mungu. Biyunvikene oku Yesu alilonzeze kukola e Pasaka y’obuzinda haguma n’entumwa zage naho banaja bajira Ebilyo by’Egolo bya Waliha.

Balala 70 n’abandi banafunzi, barhaliriho amango m’okulya ebyola bilyo haguma na Yesu. Kweri abanafunzi boshi baliyerekene oku bali bemana, bakahikiire kuyunguka n’echola Yesu arhonderesaga, k’okuderha, Ebilyo by’Egolo bya Waliha. Balala boshi bakabere Bakristu bashigwa okw’ebisanzi yi byanagera bakajire omu ndagano y’obwami Yesu abwiraga entumwa m’obola budufu.​—Lu. 22:29, 30.