1-2. Gurhe abazere bakajira amango abana babo bamababaza ebibazo okubilolere Mungu ne Biblia?

 BANENE bayemerere ok’okulemba abana kali kasi kanene bwenene. Akaba oli walemba omwana ochiri mudorho, rhukubwirire koko bwenene okubona oli wakola bwenene y’okomeza obwemere bwage. (Kum. 6:6, 7) Okw’anali akula, omwana wawe akarhondera kubaza ebibazo bikomere okubilolere obwemere bwerhu buyumangire oku Biblia, kuhebamo n’amakanuni me Biblia malolere olugenzi.

² Hali oku wakarhondera kuwaza ok’omwana wawe y’abaza ebibazo bili nk’ebyola bulala arhagwerhe obwemere butosheze mu Mungu n’omu Biblia. Aliko okw’abana yi banakula, bibahemere babaze ebibazo yi bakomeza obwemere bwabo. (1 Ko. 13:11) Bobola nta mpavu y’okuyubaha. Okwanene kubona ebibazo byoshi omwana wawe y’abaza okubilolere obwemere bwerhu nka rozo l’okumurhabala akuze obuhashe bwage b’okuwaza.

3. Bichi rhwaganirako mu gunola mwazi?

³ Mu gunola mwazi rhwaganira oku kuntu abazere bakarhabala abana babo 1) kukuza obwizere bwabo, 2) basime amakanuni me Biblia okubilolere olugenzi, 3) banagale kufasiriya bwinja obwemere bwabo. Rhwashuba kuganira bulagurhe kuli kwinja abana babaze ebibazo, rhwabona n’amakasi maguma mwakakola haguma n’abana benyu makabarhabala mupate orozo l’okuganira okubilolere obwemere bwerhu.

ORHABALE ABANA BAWE BAKOMEZE OBWIZERE BWABO

4. Bibazo bihe omwana akabaza, na bulagurhe?

⁴ Abazere b’Abakristu bamenyere ok’obwemere mu Mungu chirhali chintu chilebe omwana akashokola. Murhaburhwaga eyimuherhe obwemere mu Yehova. Intyo ku binali n’oku bana  benyu. Okw’esiku yizanagera, omwana akachibaza ebibazo bili nk’ebila: ‘Gurhe nakamenya oku Mungu abaho? Nakachizera si kweri ebye Biblia ederhere?’ Kweri Ebiblia erhuhebere omurhima rhukolese ‘obuhashe bwerhu b’okuwaza’ “n’okuchizera ebintu byoshi.” (Ro. 12:1; 1 Te. 5:21) Bobola si, gurhe wakarhabala omwana wawe akomeze obwemere bwage?

5. Bichi abazere bakajira yi barhabala omwana wabo akomeze obwemere bwage omu Biblia? (Waroma 12:2)

⁵ Orhabale abana bawe bachibonere obukweri buli omu Biblia. (Osome Waroma 12:2.) Amango omwana wawe amabaza ebibazo, okolese akola kasanzi omu kumurhabala gurhe akabona ebishubizo, omu kukolesa ebikoleso byerhu by’okulonza emyazi, nke Index des publications des Témoins de Jéhovah changwa Musaada wa Kutafuta Habari kwa Ajili ya Mashahidi wa Yehova (Oburhabale oku Bahamirizi ba Yehova b’Okulonza Emyazi.) Omufano, wakabarhabala balonze emyazi changwa amavideo mabarhabala babone okwe Biblia chirhali chitabu konyine chayandikwaga n’abantu, s’aliko chiri “Chinwa cha Mungu.” (1 Te. 2:13) Omufano, akalonza emyazi okubilolere e vile ya mira ye Ashuru y’omu Ninawi. Omu mango magerere, basomi baguma be Biblia baliri baderha okw’evile ye Ninawi erhachigeraga yabaho. Aliko omu mwaka gwa 1850, abavuluzi bavulula ebiguka by’eyola vile ya mira ye Ninawi omu budaka, ebyola byayerekana okwe Biblia yaliderhere obukweri. (Sef. 2:13-15) Y’opata myazi minene okubilolere okuntu okulimbulwa kw’evile ye Ninawi kwayenezaga obulebi bwe Biblia, olole omwazi “Walimenyere Si?” omu Munara g’Omulanzi gwa Mwezi gwe 11, 2021. Ohebe omwana wawe omurhima ahuzanye ebye Biblia ederhere n’ebiderherwe omu bitabu byakachizerwa. Okujira ntyo kwarhabala omwana wawe akomeze obwemere bwage omu Biblia n’okuchizera okw’eby’ederhere bili by’okuli.

6. Gurhe abazere bakarhabala abana babo babone okw’ebiderherwe omu Biblia bili byakuchizerwa? Lerha omufano. (Olole n’efoto.)

⁶ Orhabale abana bawe babone okw’ebiderherwe omu Biblia bili byakuchizerwa. Abazere bagwerhe njira zinene bakarhonderesa mw’enganiro esimisize haguma n’abana babo okubilolere Ebiblia changwa okubilolere okugwarha obwemere mu Mungu. Bakajira ntyo amango bamalambagirira enju y’okubika mw’ebintu bya mira, ebustani nyinja changwa oku Beteli y’Abahamirizi ba Yehova. Omufano, amango mwamalambagirira enju y’okubika mw’ebintu bya mira masu oku masu changwa oku video conferanse, wakayereka omwana wawe okuntu echintu, changwa echihe ch’omu mango ma mira chipatene na chintu chilebe chiderherwe omu Biblia. Echola chakarhabala omwana wawe abone okw’ebye Biblia ederhere bili by’okuli. Nkabaga wakayigiriza omwana wawe okubilolere ebale lye Moabu. Elyola bale ligwerhe myaka  3 000 liyandikirwe ku n’ezino lya Yehova. Elyola bale lye Moabu liba omu chihugo che France omu nju y’okubika mw’ebintu bya mira. Kandi efoto y’elyola bale lye Moabu ebonekene ahabanayerekana ebintu byamira hayirikirwe “Ebiblia n’Ezino lya Mungu” oku Biro Bikulu bya Bahamirizi ba Yehova omu Warwick, New York. Ebale lye Moabu liyerekene oku Mwami Mesha we Moabu alichijirire chigamba oku Baizraeli. Intyo ku ne Biblia nayo enaderhere. (2 Fa. 3:4, 5) Amango omwana wawe amachibonera yewe yenyine okw’ebye Biblia ederhere bili by’okuli, obwemere bwage bwakomera.​—Huzanya na 2 Mambo ya Nyakati 9:6.

7-8. a) Bichi rhwakayiga kugerera ebintu binja bibonekene omu mahanga? Lerha omufano. (Olole n’efoto.) b) Bibazo bihe byakarhabala omwana wawe akomeze obwemere bwage omu Mulemi?

⁷ Orhabale abana bawe bawaze okubilolere ebintu bisomeze Yehova alemere. Amango muli mwakola omu shwa changwa muli omu bustani, orhabale abana bawe babone ebintu by’obulemi bisimisize bibonekene turu zinene ahamuli. Bulagurhe? Bulala okujira ntyo kwakarhabala abana bawe babone oku hali Mungu ogwerhe bwenge bunene walemaga ebyola bintu. Omufano, bintu binene omu mahanga biba bipangirwe kulala enyungu ziba zipangirwe omu chisapo. Musomi muguma w’ebiyoloji oyirikirwe Nicola Fameli afasiriye ok’okala waganja bintu binene bili nk’ebyola bibonekene omu mahanga, wakabona buko bunene by’ebintu bipangirwe ntyo. Ebyola by’ebiyirikirwe Séquence de Fibonacci (Mukololo gwa Fibonacci.) Ebintu bili nk’ebyola bichizingire, binabonekana mu bintu binene nk’amagalagsi, oku chigogorho ch’echinyashongo, oku bibabi by’emirhi n’omu bisapo. a

⁸ Oku masomo omwana wawe akayiga binene okubilolere ebintu bichizingire bili omu mahanga. Omufano, buli kabale k’olubula kajira eforme y’omuzunguluko. Ebyola bindi bintu by’omuzunguluko bili kamama omu mahanga. Ebyola bintu byoshi bikwirire bibonekene omu mahanga, inde wabilemaga? Amango omwana wawe amawaza bwenene oku bintu bisomeze Yehova alemere, byamurhabala akuze obwemere bukomere anachizere oku Mungu yewalemaga ebyola bintu byoshi. (Ebr. 3:4) Wakamubaza echibazo chili nk’echila: “Akaba Mungu ye warhulemaga, owazize okw’amahano akarhuha okubilolere olungezi makarhulerhera obusime?” Wakaja wamufasiriya ok’omu Biblia muli mahano manene makarhulerhera obusime.

ORHABALE ABANA BAWE BASIMISWE N’AMAKANUNI ME BIBLIA MALOLERE OLUGENZI

9. Bichi byakarhuma omwana wawe abaza echibazo eju y’amakanuni me Biblia malolere olugenzi?

⁹ Akaba omwana wawe agwerhe ebibazo okubilolere akamaro k’amakanuni me Biblia malolere  olugenzi, ochihangane omenye bichi binarhuma achibaza ebyola bibazo. Abazize ntyo bulala arhachizerere okw’ebye Biblia ederhere bili by’okuli si? Changwa kurhagala kufasiriya abandi eju y’obwemere bwage si? Mu buli hali yoshi yoshi wakarhabala omwana wawe amenye bulagurhe kuli kw’akamaro okukenga amakanuni ma Yehova. Wakajira ntyo omu kuyiga haguma naye echitabu Siimira Akalamo Esiku n’Amango! b

10. Gurhe wakarhabala omwana wawe awaze okubilolere obwira bwage bwa hofi haguma na Yehova?

¹⁰ Orhabale abana bawe basimiswe n’obwira bwabo bwa hofi haguma na Yehova. Amango oli wayiga Ebiblia haguma n’omwana wawe, ochihangane omubaze ebibazo byarhuma alerha amawazo mage, okolese n’amafoto mali omu chitabu Siimira Akalamo Esiku n’Amango! (Mez. 20:5) Omufano, esomo lya 8 lihuzenye Yehova n’omwira mwinja onarhuhereza enyibuso zakarhulanga n’okurhulerhera enyungu. Omu kumala kuganira oku lwandiko lwa 1 Yohana 5:3, wakamubaza ntya: “Okumenya oku Yehova aba mwira mwinja, gurhe kwakarhuma rhwabona ebyarhubwirire rhujire?” Hali oku wakabona nka chiri chibazo chabusha busha, aliko okubaza omwana wawe echola chibazo kwakamurhabala abone oku Yehova arhuhere amarhegeko bulala arhuzigire.​—Isa. 48:17, 18.

11. Gurhe wakarhabala omwana wawe abone akamaro k’amakanuni me Biblia? (Mezali 2:10, 11)

¹¹ Muganire oku nyungu rhunapata amango rhwamakenga amakanuni me Biblia. Amango yi mwasoma Ebiblia changwa yi mwasuzuma olwandiko l’olusiku haguma, muganire okubilolere okuntu amakanuni me Biblia marhabere omulala gwenyu. Omufano, omwana wawe anabona akamaro k’okugwarha omwete n’okuba munihirwa si? (Ebr. 13:18) Kandi wakamufasiriya okuntu amahano me Biblia manarhurhabala rhugwarhe amagala menja n’obusime. (Mez. 14:29, 30) Okuganira oku makanuni mali nk’amola, kwarhabala omwana wawe asimiswe bwenene n’amahano me Biblia.​—Osome Mezali 2:10, 11.

12. Gurhe mulume muguma na mukage banarhabala mugala wabo abone akamaro k’okukolesa amahano me Biblia?

¹² Mulume muguma w’omu chihugo che France oyirikirwe Steve, afasiriye okuntu yewe na mukage banarhabala omwana wabo oli omu myaka y’olubiruko oyirikirwe Ethan, abone oku Yehova anarhuhereza esheriya bulala arhuzigire. Steve aderhere ntya: “Rhunamubaza ebibazo bili nk’ebila: ‘Bulagurhe Yehova arhubwirire rhukenge amakanuni mage? Gurhe echola chiyerekene okw’arhuzigire? Bichi byakarhengerera nka rhurhakoleseze amakanuni mage?’” Enganiro zili nk’ezola zarhabere Ethan kugwarha obwemere bukomere okw’ebi Yehova anaderha biba by’okuli. Steve ayongerere ntya: “Omuhigo gwerhu guli g’okurhabala Ethan abone ok’omu Biblia muli obwengehe bw’elugulu bwenene kulusha obwengehe bw’abantu.”

13. Lerha omufano guyerekene gurhe abazere bakakomeza abana babo kukolesa amakanuni me Biblia.

¹³ Okomeze abana bawe kukolesa amakanuni me Biblia. Mango maguma omwana wawe akahabwa edevware y’okusoma chitabu chilebe ch’amasomo. Echola chitabu chakaba eyi chili mw’ewazo liyerekene okw’abantu bakwanene kuyiga omufano gw’abanajira eby’obubaraga changwa abajira ebisirani binene. Wakabwira omwana wawe awaze okubilolere okuntu Yehova anachiyunva amango amabona abantu yi bajira changwa yi baderha ebintu bili ntyo. (Mez. 22:24, 25; 1 Ko. 15:33; Flp. 4:8) Echola ch’akarhabala omwana wawe ahubiri mwalimu wage changwa ababo banafunzi amango baba bali baganira k’ogola mwazi.

 ORHABALE ABANA BAWE BAGALE KUFASIRIYA OBWEMERE BWABO

14. Bichi byakayubahisa abana bali Bakristu, na bulagurhe?

¹⁴ Mango maguma abana bali Bakristu bakagambwa kufasiriya obwemere bwabo. Bakayunva bayubahire amango yi bayiga okubilolere eby’empindamuko oku masomo. Bulagurhe? Abalimu bakabayigiriza okw’eby’empindamuko bili by’obukweri. Akaba oli muzere, gurhe wakarhabala amwana wawe ayorhe buzira kushaganyika omu bwemere bwage?

15. Bichi byakarhabala omwana oli Mukristu achizere eby’ab’ayemerere?

¹⁵ Orhabale abana bawe bachizere ebi baba bayemerere. Omwana wawe arhakwanene kuyunva eshoni bulala ayinji obukweri okubilolere obulemi. (2 Ti. 1:8) Bulagurhe? Bulala chiro n’abasomi banene b’esiyanse bayemerere bwinja bwinja okw’akalamo karhafaga chakurhengerera ntya ntya. Abola basomere eby’esiyanse, bagwerhe ebinabayemeza oku hali muntu mulebe walemaga ebintu. Okuntu binaja byaba, abola basomere eby’esiyanse barhayemera enyigirizo z’empindamuko zinayigirizwa oku masomo omu gulu lyoshi. Omwana wawe akakomeza obwizere bwage omu kukengera oku mpanvu zayemezaga abandi bene-berhu na bali-berhu okw’akalamo kalemwaga. c

16. Gurhe abazere bakarhabala abana babo bafasiriye obwemere bwabo okubilolere Omulemi? (1 Petro 3:15) (Olole n’efoto.)

¹⁶ Orhabale abana bawe bamenye gurhe bakafasiriya obwemere bwabo okubilolere Omulemi. (Osome 1 Petro 3:15.) Wakabona oku bili by’akamaro woyo n’abana bawe mulole emyazi oku jw.org ederhere okubilolere obulemi n’empindamuko. Naho omwana wawe akachishoga mafasiriyo malebe akakolesa omu kufasiriya abandi bamenye oku haba Omulemi. Muganire kw’amola mafasiriyo haguma n’omwana wawe. Omuyibuse oku birhamuhemere okujira obuhaka n’ababo banafunzi. Omuhebe omurhima akolese amafasiriyo mayorohere manayunvikene amango hali omuntu wayemerere baganire okubilolere mwazi gulebe. Omufano, owabo mwanafunzi akaderha ntya: “Imbanchizerere ebinambona byonyine, nta mango nabwene ku Mungu.” Omwana oli Mukristu akamushubiza ntya: “Ba nka wawaza oli walambagira omu muzirhu guli hale n’ah’abantu balamire, wanabugana  echisima chiyumbakirwe n’amabale. Gurhe wakawaza? Hakwanene kuba eyi hali muntu mulebe wayumbakaga echola chisima. Kweri ntyo kon’oko okubilolere egulu n’ebintu byoshi bilamire biliko, hakwanene kuba omuntu wabilemaga!”

17. Gurhe abazere bakaheba omwana wabo omurhima alonze orozo l’okuganira n’abandi okubilolere obukweri bwe Biblia? Fasiriya.

¹⁷ Ohebe omwana wawe omurhima alonze orozo l’okuganira n’abandi oku bukweri bwe Biblia. (Ro. 10:10) Wakahuzanya okuyigiriza abandi okubilolere Ebiblia n’okuntu omuntu anayiga kukolesa echikoleso ch’okuziha omuziki. Okumurhondero, wakarhonderera oku nyimpo zirhakomere kuziha, aliko okw’esiku yizanagera wabona ok’okuziha omuziki kurhachikomere. Intyo kon’oko omwana oli Mukristu akarhondera kuhubiri omu njira ziyorohere. Omufano, akabaza owabo mwanafunzi ntya: “Oyinji si okw’ahanene ba enjeniyere bazigana kuyiganya ebintu bili omu mahanga? Lekaga nkuyereke evideo esimisize.” Enyuma y’okumuyereka evideo eli omu chigabi Echi Chintu Chalemwaga Si? Omubaze ntya: “Akaba abantu basomere eby’esiyanse bakabwirwa koko oku bintu bakolere omu kulolera oku bintu byarhulaga bibaho, inde okwanene kusingizwa okubilolere ebintu byoshi rhunabona omu mahanga?” Nkabaga oyola mwanafunzi akaja alonza kuyiga binene okubilolere Yehova.

OGENDERERE KURHABALA ABANA BAWE BAKOMEZE OBWEMERE BWABO

18. Gurhe abazere bakagenderera kukomeza obwemere bw’abana babo mu Mungu?

¹⁸ Rhulamire omu gulu liyunjwire mw’abantu barhagwerhe obwemere mu Mungu. (2 Pe. 3:3) Bazere we, amango muli mwayiga haguma n’abana benyu, mubarhabale bayige emyazi yarhuma bayongera obukenge bwabo oku Chinwa cha Mungu n’oku makanuni mage malolere olugenzi. Obarhabale bakengere bwenene n’okukomeza obwemere bwabo mu Yehova, n’okuganira n’abandi okubilolere obulemi bwa Yehova. Obarhabale bayunve bwinja obulebi bwe Biblia busomeze bwamalire kuyenera. N’ech’akamaro bwenene osalire haguma nabo onabahebe omu sala. Amango wamajira ntyo, wakachizera oku Yehova akulipa ku byoshi oli wajira y’orhabala abana bawe bakomeze obwemere bwabo.​—2 Ny. 15:7.