MWAZI G’OKUYIGA 48
OLWIMPO 97 Echinwa cha Mungu k’Akalamo
Ebi Rhwakayiga Kugerera Echisomerene cha Yesu ch’Emigati
“Nyono nye mugati gw’akalamo. Buli yeshi wankulikira arhayunva enzara haban’akatyu.”—YOH. 6:35.
EBIRHWAYIGA
Rhwaganira oku ngani ya Yesu eli omu chitabu cha Yohana sura ya 6 eyerekene gurhe Yesu ahaga bantu kamama emigati n’efi, rhwalola na bichi birhuyigirize.
1. Omu Biblia bichi omugati gushushanyize?
OMU mango Ebiblia yaliri yayandikwa, omugati kaliri kalyo abantu baliri bazigana kulya. (Mwa. 14:18; Lu. 4:4) Kweri bili by’akamaro bwenene okubona Ebiblia ekoleseze echinwa “mugati” omu kuderha okubilolere ebilyo. (Mt. 6:11) Yesu alikoleseze emigati omu bisomerene byage bibiri bimenyikene bwenene. (Mt. 16:9, 10) Ngani nguma mw’ezola ebonekene omu Yohana sura ya 6. Oku rhunali rhwaganira kw’eyola ngani, rhwayiga gurhe rhwakayikolesa omu kalamo kerhu zene.
2. Mangochi ebihumbi by’abantu byalikenere ebilyo?
2 Mango maguma entumwa za Yesu zarhenga omu mahubiri zichokere, Yesu agenda nabo omu bwarho oku lwindi lunda lw’Enyanja ye Galilaya yi bahumuka. (Mk. 6:7, 30-32; Lu. 9:10) Bagera omu fasi eli bwihunze omu eneo ye Betsaida. Aliko abantu bayunva oku Yesu ajire eyola munda. Naho ebihumbi by’abantu byamubuganayo. Yesu arhabasuzaguraga. Arhola ebisanzi by’okubayigiriza okubilolere Obwami, afumya n’abalwala. Bulala bwalibwamayinja bwayira, abanafunzi bage barhondera kuchibaza gurhe abola bantu bakapata eby’okulya. Nkabaga baguma mubo balichiyikire rhulyo rhugeke, aliko banene balikenere kuja kugula ebibakalya omu ma vilaje. (Mt. 14:15; Yoh. 6:4, 5) Gurhe Yesu akajirire?
ECHISOMERENE CH’OKUHANA EMIGATI
3. Bichi Yesu alibwirire entumwa zage zijirirage abola bantu kamama? (Olole n’efoto y’oku chiganda.)
3 Yesu abwira entumwa zage ntya: “Birhahemere oku bagende, mubahereze ebibalya.” (Mt. 14:16) Birhaliyorohere bulala haliri hofi balume bahikire ku 5 000. Na kuhebamo abakazi n’abana, balikwanene kuhereza bantu bahikire ku 15 000 ebilyo. (Mt. 14:21) Andreya aderha ntya: “Hanola hali omwana w’oburhabana ogwerhe migati erhano na bufi bubiri. Aliko si ebila byakayenera abala bantu bangan’aha?” (Yoh. 6:9) Abakene n’abandi bantu babagendaga bazigana kulya emigati y’eshayiri n’obufi bugekegeke buyumire buli m’omunyu. Aliko ebilyo oyola mwana w’oburhabana aligwerhe birhakatosheze bantu bangan’aho!
Yesu alihere abantu eby’ekiroho n’eby’omubiri balikenere (Olole echifungo cha 3)
4. Bichi rhwakayiga kugerera olwandiko lwa Yohana 6:11-13? (Olole n’efoto.)
4 Omu kulonza kuyereka abola bantu kamama engeso y’okuhana, Yesu abwira abola bantu bayikale bigusho-bigusho omu byasi. (Mk. 6:39, 40; osome Yohana 6:11-13.) Naho Yesu asalira omu kubwira Eshe koko kw’eyola migati n’ezola fi. Omu kujira ntyo ayerekana oku Mungu y’eshoko y’ebyokulya n’okwagwerhe eshukrani kw’ebyola bilyo. Kuli kw’akamaro okuyiga omufano gwa Yesu omu kusalira embere rhulye, rhube rhuli rhwenyine changwa rhuli n’abandi. Naho Yesu agabira abola bantu ebyola bilyo, balya bayugurha n’ebindi byasigala eby’arhalonzaga oku bife busha. Bobola Yesu abwira abanafunzi bage bagushe ebyola byasigere omu kuntu babikolese amandi mango. Yesu arhulekere omufano gwinja g’okukolesa ebintu byerhu oku bwengehe. Akaba oli muzere, bulagurhe orhakagalukira eyila ngani haguma n’abana bawe, n’okuganira bichi ebayigirize okubilolere esala, okukaribisana n’okuhana?
Ochibaze ntya, ‘nanyiganya omufano gwa Yesu omu kusalira embere y’okulya?’ (Olole echifungo cha 4)
5. Bichi abantu balilonzeze kujira enyuma y’okubona ebintu bisomeze Yesu abajiriraga olola lusiku, aliko bichi alijire ajira?
5 Abantu balisimisizwe bwenene n’okuntu Yesu aliri ayigiriza n’ebisomerene byage. Omu kumenya oku Musa alilaganyize oku Mungu akalerhere omulebi orhali kuguma n’abandi, nkabaga balichibazize ntya: ‘Yesu y’oyola mulebi si?’ (Kum. 18:15-18) Bakawazize oku Yesu akabere murhegesi osomeze, wakagalire chiro kuhereza buli muntu omu Izraeli eby’okulya. Na ntyo abola bantu kamama balonza “kufarha [Yesu] bamujire mwami.” (Yoh. 6:14, 15) Nka Yesu ayemeraga bamujire mwami, akabere ey’amaja omu politike y’Abayahudi yaliri eshishi y’oburhegesi bw’Abaroma. Aliko arhajiraga ntyo, gurhe alijirire? Ebiblia ederhere ‘okw’alibirhira oku musozi.’ Chiro akaba akahidiko k’abantu, arhachihebaga omu by’epolitike. Ogola guli mufano gwinja bwenene!
6. Gurhe rhwakayerekana oku rhulonzeze kukulikira omufano gwa Yesu? (Olole n’efoto.)
6 Kweri abantu barhakarhubwira rhubahereze ebilyo kugerera echisomerene, oku rhufumye abalwala, changwa kurhujira mwami wabo. Aliko bakarhuhidika rhuchihebe omu politike yirhuchagula changwa rhushigikire muntu mulebe bawazize okw’akakwiza ebintu. Aliko omufano gwa Yesu guli wazi. Alilahire kuchiheba omu by’epolitike n’enyuma waho aderha ntya: “Obwami bwani burhali chigabi cha linola gulu.” (Yoh. 17:14; 18:36) Rhwabo nka Bakristu, rhukwanene kugwarha amawazo mali kuguma n’ama Yesu n’okuyiganya omufano gwage. Rhunahubiri, rhunasalira n’okushigikira obola Bwami. (Mt. 6:10) Lekaga rhushube rhuganire oku ngani ya Yesu y’okuhana emigati kugerera echisomerene rhulole na bichi bindi y’akarhuyigiriza.
Yesu arhalichihebere omu by’epolitike ya Bayahudi, nerhu rhukwanene kukulikira omufano gwage (Olole echifungo cha 6)
“EBY’EMIGATI ESHUSHANYIZE”
7. Bichi Yesu n’entumwa balijirire? (Yohana 6:16-20)
7 Enyuma y’okuhereza bantu kamama emigati, entumwa za Yesu zarhenga mw’eyola eneo barhola obwarho bagaluka e Kapernaumu na Yesu arhenga oku musozi emunda alibirhiraga amango balonzaga kumujira mwami. (Osome Yohana 6:16-20.) Amango entumwa zaliri zavugama, harhengerera omulaba gwalerha chihusi chinene n’ebivundu. Naho Yesu ayinja emunda bali ey’ali alambagira oku nyanja. Ahamagala entumwa Petro naye alambagire oku nyanja. (Mt. 14:22-31) Yesu agerere omu bwarho ntya, omulaba gwachika. Abanafunzi bage basomerwa n’okuderha ntya: “Kweri oli Mugala wa Mungu.” a (Mt. 14:33) Aliko barhabonaga gurhe echola chisomerene chipatene n’ebyabaga amango ahereza bantu kamama ebilyo. Marko ayongerere ntya okubilolere echola chihe: “[Entumwa] zalisomerwe bwenene, bulala barhamenyaga bichi eyola migati yalishushanyize, aliko emirhima yabo erhayunvaga juba juba.” (Mk. 6:50-52) Kweri barhaliza kumenya obuhashe Yehova alihere Yesu b’okujira ebisomerene. Mango mageke enyuma waho, Yesu ashuba kuderha okubilolere echisomerene ch’emigati, arhuyigiriza na chintu chilebe.
8-9. Bulagurhe bantu kamama bakulikiraga Yesu? (Yohana 6:26, 27)
8 Abantu kamama Yesu ahaga eby’okulya balichisezeze oku bintu by’omubiri balikenere n’enyifinjo zabo. Nka gurhe? Olusiku lwakulikiragaho, babona gurhe Yesu n’entumwa zage bagenda. Bobola abola bantu kamama barhola marho maguma marhengere e Tiberia, naho mabaheka e Kapernaumu omu kukulikira Yesu. (Yoh. 6:22-24) Bamukulikiraga si omu kulonza kumenya binene okubilolere Obwami? Nanga. Balilonzeze konyine Yesu abahereze eyindi migati. Gurhe rhumenyere ntyo?
9 Lola ebyarhengereraga amango abola bantu kamama babugana Yesu hofi ne Kapernaumu. Yesu ababwira wazi oku bilyo by’ebibalerhere. Alimenyere “oku balilire emigati banayugurha ebilyo byakaharibika.” Ababwira oku balikwanene kukola yi bapata “ebilyo birhakaharabika by’akalamo k’esiku n’amango.” (Osome Yohana 6:26, 27.) Yesu aderha okw’Eshe akahanire ebilyo bili nk’ebyola. Okuderha okw’ebilyo byakayerekeza ew’akalamo k’esiku n’amango, bikwanene kuba yibyalisomeze! Bilyo byanyabachi byakayerekeza omuntu ebw’akalamo k’esiku n’amango na gurhe abonviriza ba Yesu bakabipatire?
10. Bichi abantu balikwanene kujira yi bapata akalamo k’esiku n’amango?
10 Abola Bayahudi balilonzeze kumenya bichi bali kwanene kujira yi bapata ebyola bilyo. Nkabaga baliwazize oku “bintu” Esheriya ya Musa yalibahemere bajire. Naho Yesu ababwira ntya: “Kanola k’akasi ka Mungu, mugwarhe obwemere omu y’arhumaga.” (Yoh. 6:28, 29) Balikwanene kugwarha obwemere mu Yesu “yi bapata akalamo k’esiku n’amango.” Yesu abaga ashambere kw’echola embere. (Yoh. 3:16-18, 36) N’enyuma waho ashuba kuderha binene okubilolere okuntu rhwakapata akalamo k’esiku n’amango.—Yoh. 17:3.
11. Gurhe Abayahudi baliyerekene oku bilyo byonyine bi baliri balonza? (Zaburi 78:24, 25)
11 Abola Bayahudi barhayemeraga Yesu abayigiriza okubilolere “akasi kahyahya ka Mungu.” Bamubaza ntya: “Chimenyeso chihe wajirire rhuchibone rhunakuyemere?” (Yoh. 6:30) Bayerekana oku b’eshekuliza omu mango ma Musa baliri bapata amana makahuzenye n’omugati. (Ne. 9:15; Yoh. 6:31; osome Zaburi 78:24, 25.) Kweri balichigenderere kuseza obwenge bwabo oku mugati nyamugati. N’amango Yesu ashuba kuderha okubilolere omugati g’okuli gurhaliri kuguma n’amana gwakabahere akalamo k’esiku n’amango, barhamubazaga chiro bichi aliri alonza kuderha. (Yoh. 6:32) Balichigenderere kuseza obwenge bwabo oku bintu by’omubiri bakenere, n’echola charhuma bafundwa kuchiseza oku bukweri bw’ekiroho Yesu aliri achihangana kubayigiriza. Bichi eyola ngani yakarhuyigiriza?
EBI RHUKWANENE KUHEBA OKU NAFASI Y’OBURHANZI
12. Gurhe Yesu aliyerekene ebili by’akamaro bwenene?
12 Tala echintu ch’akamaro ku rhwabo chili omu Yohana sura ya 6. Ebi rhukwanene kuheba oku nafasi y’oburhanzi buli bulagirire bwerhu bw’ekiroho. Oyibuke oku Yesu aliderhere okubilolere echola amango ahima echigeregezo cha Shetani. (Mt. 4:3, 4) N’omu mahubiri mage m’oku Musozi, aliyerekene kangana gurhe bili by’akamaro ku rhwabo okugwarha obwira bukomere haguma na Mungu. (Mt. 5:3) Bobola rhwakachibaza ntya: ‘Okuntu ndamire kuyerekene oku nampeba enyungu z’Obwami oku nafasi y’oburhanzi kulusha enyungu z’omubiri?’
13. a) Bulagurhe kurhali kubi okusimira akalyo? b) Bichi Paulo alirhuhere k’omukonge? (1 Wakorinto 10:6, 7, 11)
13 Kurhali kubi okusalira okubilolere ebintu by’omubiri rhukenere n’okubisimira. (Lu. 11:3) Ebiblia ederhere oku kuli kwinja oku muntu, “okulya, okunywa” n’okupata obusime omu kasi kage kakomere, n’ebyola binarhenga omu fune ya Mungu w’okuli.” (Muh. 2:24; 8:15; Yak. 1:17) Aliko rhukwanene kuheba ebintu by’omubiri oku nafasi yabyo. Rhwakayiga binene kugerera eby’entumwa Paulo ayandikiraga Abakristu. Aliderhere okubilolere omufano gubi gw’Abaizraeli amango baliri omu rungu kuhebamo n’ebibajiraga hofi n’Omusozi Sinayi. Alihere Abakristu omukonge “oku barhagwarhaga enyifinjo y’okujira ebintu bibi eli kuguma n’eya [Baizraeli] baligwerhe.” (Osome 1 Wakorinto 10:6, 7, 11.) “Yehova alihereze Abaizraeli ebilyo kugerera echisomerene. Aliko eju y’enyifinjo yabo y’okusima ebilyo, babona okw’ebi Yehova abahaga kugerera echisomerene bili “bintu bibi.” (Hes. 11:4-6, 31-34) Amango Abaizraeli baliri baharamya akamasha k’eoro, baliri bayerekana oku basimire ebilyo, okunywa n’okuchisimisa bwenene kulusha ebi baliri bajira omu kukenga Yehova. (Kut. 32:4-6) Paulo alikoleseze eyola mifano omu kuha Abakristu omukonge amango Yerusalemu n’ehekalu lyayo byaliri hofi kulimbulwa omu mwaka gwa 70 N.K.Y. Zene rhulamire hofi n’obuzinda bwa linola gulu libi, bobola rhukwanene kubona ehano lya Paulo oku liri ly’akamaro.
14. Bichi Ebiblia ederhere okubilolere ebilyo omu gulu lihyahya?
14 Amango aliri aderha okubilolere “omugati gwerhu gwa zene,” Yesu aliri aderhera oku mango obulonza bwa Mungu nji bwajirika “oku gulu nk’omu mbingu.” (Mt. 6:9-11) Gurhe owazize egulu nji lyaba mw’agola mango? Ebiblia eyerekene ok’obulonza bwa Mungu oku gulu buheberwemo ebilyo binja. Nk’ok’olwandiko lwa Isaya 25:6-8 luyerekene, nji haba bilyo binene bwenene nji rhwasimira omu Bwami bwa Yehova. Zaburi 72:16 ederhere ntya: “Nji haba embeke zinene oku gulu, nji zafulagira oku masongi m’emisozi.” Oli walindira amango nji wakolesa ziguma mw’ezola mbeke omu kukola obuko b’omugati osima changwa kuvuya ebindi bindi bilyo orhasaga kulyako si? Olekere na ntyo, nkabaga nji wasimira amatunda m’emizabibu wahingaga. (Isa. 65:21, 22) Arhanali wenyine we nji wasimira ebyola.
15. Aba nji bafuka bichi nji bayiga? (Yohana 6:35)
15 Osome Yohana 6:35. Abalyaga emigati n’efi Yesu abahaga bichi nji basimira? Omu mango m’obufuke bwayinjire, nkabaga nji wabuganana na baguma mubo. Chiro akaba ok’omu mango magerere barhayerekanaga obwemere, nkabaga nji bafuka. (Yoh. 5:28, 29) Aliko nji baja bayunva bwinja binola binwa bya Yesu: “Indi mugati gw’akalamo. Buli yeshi wayinja emunda ndi arhayunva enzara haban’akatyu.” Nji byabahema bagwarhe obwemere omu nterekero y’enchungu ya Yesu, n’okuyemera okw’ahanire akalamo kage eju yabo. Aliko mw’agola mango nji haba eprograme y’enyigirizo z’ekiroho ku balala bafukire n’oku bana boshi nkabaga nji baburhwa mw’agola mango. Nji bwaba busime bunene bwenene b’okukola kw’akola kasi k’okuyigiriza! Okujira ntyo nji kwaba kwinja bwenene kulusha okulya omugati nyamugati. Kweri, ebintu by’ekiroho byenji byaba by’akamaro bwenene.
16. Bichi rhwayiga omu mwazi gukulikireho?
16 Rhwaganirire oku chigabi ch’engani eli omu chitabu cha Yohana sura ya 6, aliko Yesu aligwerhe binene by’okuyigiriza okubilolere “akalamo k’esiku n’amango.” Abayahudi balikwanene kuseza obwenge kw’ebyola Yesu abayigirizaga, nerhu ntyo kubirhuhemere rhujire. Rhwagenderera kuyiga okubilolere echitabu cha Yohana sura ya 6 omu mwazi gukulikireho.
OLWIMPO 20 Wahaanire Mugala Wawe Muzigirwa
a Y’omenya binene okubilolere eyola engani, olole echitabu, Yesu—ni Njia, Kweli na Uzima, bukurasa 131, n’echitabu Tuige Imani Yao, bukurasa 185.
