1-2. Hali zihe zakarhuma rhwalira?

 RHWESHI rhwachigerere kulira mango maguma. Amango rhwamahurana ehali erhulerhere busime bunene, rhwakashesha emiziga y’obusime. Nkabaga wachigerere walira amango echintu chinja chikuhikira. Omufano, amango omwana wawe aburhwa, amango oyibuka ebintu binja, changwa amango okaribisa mwira wawe muzigirwa mwaligwerhe myaka minene murhabonana.

² Aliko rhuzigana kulira amango rhuyunvirhe omugayo changwa amango rhuli rhwalibuka. Omufano, rhwakalira ahanene amango muntu mulebe arhuvunire omurhima bwenene. Rhwakashesha emiziga eju y’obulwala bugenderere, changwa amango yirhwalirira omuzigirwa werhu wafire. Rhwakachiyunva kuguma n’ok’omulebi Yeremiya achiyunvaga amango Abababiloni bafarha e Yerusalemu. Yeremiya aderha ntya: “Enindi z’amenji yizasuka omu mesho mani . . . Amesho mani yimalira buzira kusira na buzira kuhumuka.”​—Omb. 3:48, 49.

3. Gurhe Yehova anachiyunva amango y’abona abakozi bage yi balibuka? (Isaya 63:9)

³ Yehova amenyere miziga engana gurhe rhwasheshere eju y’ehali zivunire omurhima. Ebiblia ederhere okw’anamenya amango buli muguma murhwabo yalibuka, anarhuyunviriza n’amango rhwamamuhema oburhabale. (Zb. 34:15) Aliko Yehova anajira binene olekere okurhubona n’okurhuyunviriza. Ali Darha orhuzigire bwenene, bobola amango amarhubona rhuli rhwalira anachiyunva kubi bwenene anayinja na juba juba kurhurhabala.​—Osome Isaya 63:9.

4. Mifano ehe ye Biblia rhwaganirako, na bichi rhwayiga okubilolere Yehova?

⁴ Yehova arhubwirire omu Chinwa chage okuntu anachiyunva amango abakozi bage yi bashesha emiziga n’okuntu  anabarhabala. Rhwakabona gurhe anajira ntyo omu kuganira oku mufano gwa Hana, Daudi, na Mwami Hezekiya. Bichi byarhumaga bashesha emiziga? Gurhe Yehova alibashubize amango baliri bamuhema oburhabale? Naho rhwalola gurhe Yehova anarhurhuliriza amango rhuli rhwalira eju y’omugayo, okulyalihirwa changwa okubula obulangalire?

OKULIRA EJU Y’OMUGAYO

5. Gurhe ehali ya Hana yalirhumire achiyunva?

⁵ Hana aliri ahurana ehali zinene zaliri zarhuma ashesha emiziga y’omugayo. Chiguma omu bibazo byaliri byarhuma alira, aliri oku luhali na mulichabo Penina aliri amubonerera. Kandi Hana nta mwana aligwerhe aliko Penina yewe aligwerhe bana banene. (1 Sa. 1:1, 2) Penina aligenderere kubonerera Hana eju y’okurhaburha. Gurhe wakachiyunvirhe omu hali zili nk’ezola? Hana aliyunvirhe kubi bwenene “aliri alira na ntakuchilya,” anagwarha “mugayo gunene bwenene” omu murhima.​—1 Sa. 1:6, 7, 10.

6. Gurhe Hana apataga echirhulirizo?

⁶ Gurhe Hana apataga echirhulirizo? Chintu chiguma alijirire, aja kuharamya Yehova oku tabernakulo. Eyola munda, nkabaga hofi n’omulyango gw’echibuga che tabernakulo, “arhondera kusalira Yehova n’okulira buzira kusira.” Alakirira Yehova omu kuderha ntya: “Lola amalibuko m’omukozi wawe onanyibuke.” (1 Sa. 1:10b, 11) Hana alibwirire Yehova okuntu aliri achiyunva omu sala. Yehova aliyunvirhe malumwa manene amango abona amalira m’omwali muzigirwa!

7. Chirhulirizo chihe Hana alipatire bulala alifungulire Yehova omurhima gwage?

⁷ Hana alichiyunvirhe gurhe enyuma y’okufungulira Yehova omurhima gwage omu sala, n’okuyunviriza ebinwa by’obwizere Omudahwa Mukulu Eli amubwiraga? Ebiblia ederhere ntya : “Oyola mukazi agenda emwage, alya na nta mugayo alichigwerhe omu sura.” (1 Sa. 1:17, 18) Chiro akaba okw’ehali yage evunire omurhima erhaliza kuhindamuka, Hana achiyunva bwinja bwenene. Abaga arhulire Yehova k’omuzigo gwage g’okuntu aliri achiyunva. Yehova alibwene omulago gwage, ayunva amalira mage na buzinda amugisha apata abana.​—1 Sa. 1:19, 20; 2:21.

8-9. Nk’ok’olwandiko lwa Waebrania 10:24, 25 luderhere, bulagurhe rhukwanene kujira okwerhu koshi yi rhuhika oku mbuganano z’Echikristu? (Olole n’efoto.)

⁸ Ebirhwakayiga kugerera ogola mufano. Oli wahurana ehali ekomere eli yarhuma washesha emiziga y’omugayo si? Nkabaga ogwerhe akahinda eju y’okufisa omuntu w’omulala changwa mwira wawe. Omu mango mali nk’amola rhuzigana kuchiyunva nkarhulonzeze kubera rhuli rhwenyine. Aliko kuguma n’oku Hana apataga echirhulirizo n’okuhebwa omurhima eju y’okuja oku tabernakulo, nawe  wakapata echirhulirizo amango wamaja oku mbuganano z’Echikristu chiro akaba orhali wachiyunva bwinja. (Osome Waebrania 10:24, 25.) Amango rhuli rhwayunviriza amandiko marhurhulirize oku mbuganano, Yehova akarhurhabala kugombola amawazo mabi n’okugwarha amawazo menja. N’echola charhurhabala kuchiyunva bwinja chiro akaba okw’ehali erhahindamukire ahohan’aho.

⁹ Oku mbuganano zerhu, bene-berhu na bali-berhu banarhuheba omurhima, banarhuyereka kangana gurhe barhuzigire n’amango rhuli haguma nabo rhunachiyunva bwinja. (1 Te. 5:11, 14) Rhuganire oku mufano gwa mwene-werhu oli painiya ominuzize wafisaga mukage. Aderhere ntya: “Hanagera amango nanashuba kushesha emiziga. Mango maguma nanyikala ahantu ndi nyenyine nanashuba kulira. Aliko amango namaja oku mbuganano, inampata echirhulirizo nalikenere. Ebinwa binja bene-berhu na bali-berhu banambwira, n’ebishubizo binja banahana oku mbuganano kweri binantuliriza. Chiro nagwarha omulago gungana gurhe changwa nchiyunve nyubahire embere nje oku mbuganano, nanchiyunva bwinja buli mango ndi oku mbuganano.” Amango rhuli oku mbuganano zerhu, Yehova akakolesa bene-berhu na bali-berhu omu kurhurhabala.

10. Gurhe rhwakayiganya omufano gwa Hana amango rhuyunvirhe mugayo gunene bwenene?

¹⁰ Kandi Hana alipatire echirhulirizo amango abwira Yehova omu sala koshi aliri achiyunva. Nawe “wakarhula emilago yawe yoshi emwa [Yehova],” ey’ochizerere okw’akuyunviriza. (1 Pe. 5:7) Mwali-werhu ababandi bagwerhe embundi bayirhaga eba, ayibukire ntya: “Naliyunvirhe mulago gunene nanawaza oku ntakachigwarha obusime haban’akatyu. Aliko amango naliri nasalira Darha w’embingu muzigirwa Yehova, naliri nachiyunva namarhulera. Mango maguma ntaliri napata ebinwa bikwanene, aliko aliri anyunviriza. Amango naliri nayunva ngayire bwenene n’oku gwarha omulago, naliri namuhema omurhula. Naliri nayunva omurhima n’obwenge bwani birhulerere naho olusiku lwanahwa bwinja.” Amango wamalakirira Yehova n’okumubwira bichi birhumire wagwarha omugayo, anachiyunva kubi n’okuyunva kuguma n’ok’oli wachiyunva. Chiro akaba okw’echakulerheraga omugayo chichigenderere, Yehova akakurhabala ochiyunve orhulerere. (Zb. 94:19; Flp. 4:6, 7) Kandi Yehova akulipa oku bwimana bwawe n’okulembera.​—Ebr. 11:6.

OKULIRA EJU Y’OKULYALIHIRWA

11. Gurhe Daudi alichiyunvirhe amango abandi bamukolera kubi?

¹¹ Omu kalamo kage, Daudi alihurene hali zinene zikomere zarhumaga ashesha emiziga. Bantu banene baliri bamukolera kubi, chiro n’abantu alilangalire bamulyalihira. (1 Sa. 19:10, 11; 2 Sa. 15:10-14, 30) Omu mango makomere bwenene omu kalamo kage ayandika ntya: “Inchokere eju y’amalumwa m’okulira kwani, obudufu boshi nandobya obuliri bwani n’emiziga, nandobya omwishegulo gwani n’emiziga.” Bulagurhe Daudi achiyunvaga ntyo? Aderhere ntya: “Eju ya balala boshi baliri bampambarira.” (Zb. 6:6, 7) Ebijiro bibabeze abandi baliri bakolera Daudi, byalimulerhere malumwa manene marhumaga ashesha emiziga.

12. Nk’oku biyerekenwe omu Zaburi ya 56:8, bichi Daudi alichizerere?

¹² Chiro akaba ebibazo Daudi aliri ahurana, alichizerere oku Yehova amuzigire. Ayandika ntya: “Yehova ayunva omulenge gw’amalira mani.” (Zb. 6:8) Amandi mango ayandika ebinwa bili omu Zaburi 56:8. (Osome.) Ebyola  binwa biyerekene wazi oku Yehova arhuzigire bwenene n’okw’anashishikala okuntu rhunachiyunva. Daudi aliri achiyunva nka Yehova aliri aheba emiziga yage omu supa changwa kuyiyandika omu chitabu. Daudi alichizerere oku Yehova alibwene n’okuyibuka amalumwa mage. Daudi alichizerere okw’Eshe muzigirwa w’embingu arhalimenyere konyine ebyaliri ageramo s’aliko n’okuntu byalimubabeze.

13. Amango abandi bamarhuvuna omurhima ngahe rhwakakula echirhulirizo? (Olole n’efoto.)

¹³ Ebirhwakayiga kugerera ogola mufano. Oliwachiyunva ovunikire omurhima bulala muntu mulebe walilangalire akulyalihire si? Nkabaga ovunikire omurhima bwenene bulala eyi mwaliri mwashambazana naye akulahire, eyi mushabene naye akulekere changwa muntu mulebe walizigire alekere kukolera Yehova. Mwene-werhu muguma mukage ajiraga obugonyi anamuleka aderhere ntya: “Intagalaga kuyemera oku nyono ny’echola chahikire. Nalinyunvirhe ntacho malire, nayunva oburhe, nayunva n’omugayo.” Akaba muntu mulebe akulyalihire changwa akuvunire omurhima turu zinene, ochiyunve orhulirizwe n’okumenya oku Yehova arhakafa akulekerere. Oyola mwene-werhu aderhere ntya: “Nayinjire kurhegera okw’abantu barhakagenderera kubera bemana emwawe buli mango, aliko Yehova yewe nechi. Chiro harhengerera echintu chili gurhe buli mango arhurhabala. Arhaleka abemena bage.” (Zb. 37:28) Oyibuke ok’obuzigire bwa Yehova burhalukire ob’omuntu yeshi yeshi akagwarha. Amango muntu mulebe ozigire amakulyalihira, binalerha malumwa manene bwenene, aliko Yehova yewe arhahindamul okuntu anachiyunva okubikulolere, oli wakachiro emwage. (Ro. 8:38, 39) Echintu ch’akamaro rhukwanene kuyibuka chili oku: Chiro akaba omuntu akukolere gurhe, Yisho w’embigu yewe akuzigire.

14. Bwizere buhe Zaburi ya 34:18 erhuhere?

¹⁴ Amango bamarhulyalihira, rhwakarhulirizwa kandi n’ebinwa bya Daudi bihanire obwizere bili omu Zaburi 34:18. (Osome.) Chitabu chiguma ch’amareferanse chiderhere oku balala “bavunikire omurhima” bakahuzanywa “na balala barhagwerhe obulangalire.” Gurhe Yehova anarhabala balala bali bachiyunva ntyo? Kuguma n’omuzere muzigirwa obagalire n’okurhuliriza omwana wage omu mango m’omulago, Yehova “ali hofi” nerhu, k’okuderha, anarhuyunvira obonjo anali tayari kurhurhabala amango rhuli rhwachiyunva rhuvunikire omurhima eju y’okulyalihirwa changwa kufisa omuzigirwa. Aba tayari kurhurhuliriza amango rhuvunikire omurhima changwa amango rhuwazize oku  rhwalekererwe. Arhuhere na bintu binene rhuli rhwalingiriza bili byarhurhabala kulembera ebigeregezo byerhu byazene.​—Isa. 65:17.

OKULIRA EJU Y’OKUBULA OBULANGALIRE

15. Hezekiya alihurene ehali eli gurhe yarhumaga ashesha emiziga?

¹⁵ Amango Mwami Hezekiya we Yuda aligwerhe myaka 39, alwala bwenene. Yehova arhuma omulebi wage Isaya abwire Hezekiya ok’obola bulwala bwamuyirha. (2 Fa. 20:1) Bishushire oku nta bulangalire Hezekiya alichigwerhe. Amango Hezekiya ayunva eyola myazi, alira bwenene. Alakirira Yehova amurhabale.​—2 Fa. 20:2, 3.

16. Bichi Yehova alikolere Hezekiya?

¹⁶ Amango Yehova ayunva esala lya Hezekiya n’emiziga yage, amuyunvira obonjo amubwira ntya: “Nayunvirhe esala lyawe. Nabwene n’emiziga yawe. Nakufumya.” Kugerera Isaya, Yehova amuyunvira obonjo anamulaganya okw’amuyongezeza akalamo n’okw’ayokola Yerusalemu omu fune y’Abaasiriya.​—2 Fa. 20:4-6.

17. Gurhe Yehova anarhurhabala amango yirhwahurana ebibazo bikomere by’amagala? (Zaburi 41:3) (Olole n’efoto.)

¹⁷ Ebirhwakayiga kugerera ogola mufano. Gurhe wakajira akaba olwere obulwala bubonekene nka burhakafuma? Osalire emwa Yehova chiro akaba oli walira. Ebiblia erhuyemezeze oku “Darha w’obubabale bunene na Mungu w’oburhulirize boshi,” nj’arhurhuliriza omu bigeregezo byerhu byoshi. (2 Ko. 1:3, 4) Zene rhurhakalangalira oku Yehova arhukulira ebibazo byerhu byoshi, aliko amango moshi arhurhabala. (Osome Zaburi 41:3.) Kugerera eroho lyage lichesibwa, Yehova arhuhereza emisi, obwengehe n’omurhula gwa ndani yirhugala kubilwisa. (Mez. 18:14; Flp. 4:13) Kandi anarhurhuliriza omu kurhuhereza obulangalire ok’omu mango mayinjire ntaye nji walwala.​—Isa. 33:24.

18. Lwandiko luhe wabwene lwakakurhuliriza amango oli wahurana ehali ekomere bwenene? (Olole echisanduku “ Ebinwa Birhulirize By’okurhushangula Emiziga.”)

¹⁸ Hezekiya alirhulirizwe kugerera ebinwa bya Yehova. Nerhu rhwakapata echirhulirizo omu Echinwa cha Mungu. Amango rhugwerhe emilago Ebinwa bya Yehova bili omu Biblia byakarhurhuliriza n’okurhurhabala rhurhulere. (Ro. 15:4) Amango mwali-werhu w’omu Afrike y’Emazikiro bamupima obulwala bw’akansere, aliri azigana kulira. Aderhere ntya: “Lwandiko luguma nabwene luhebere omurhima luli lwa Isaya 26:3. Mango manene rhurhakagala kuhindamula ehali yerhu, aliko olola lwandiko lulaganyize oku Yehova akarhurhabala rhuchiyunve rhurhulerere n’okurhurhabala rhulembere echigeregezo choshi choshi.” Ka hali olwandiko wabwene lukurhulirize bwawe bwawe amango oli wahurana  ehali ekomere bwenene chiro n’amango orhachigwerhe obulangalire?

19. Bichi yirhwalindira?

¹⁹ Obuzinda bwa linola gulu libi buli hofi, rhumenyere oku haba n’ebindi bintu bikomere bwenene byarhulerhera amalumwa n’amalira. Aliko nk’oku rhwayigire kugerera omufano gwa Hana, Daudi, n’ogwa Mwami Hezekiya, Yehova anarhubona amango rhuli rhwalira, anachiyunva na kubi. Arhuzigire bulala rhunayorha bemana emwage chiro akaba rhuli rhwayunva amalumwa, anayibukire emiziga yerhu. Bobola amango rhuli rhwahurana ehali zirhulazize, rhunabwira Yehova byoshi birhuli oku murhima omu sala. Rhukwanene kubera hofi na bene-berhu na bali-berhu bazigirwa b’omu chibaga. N’omu kusoma Ebiblia, rhwapata echirhulirizo chirhengere emwa Yehova. Rhukwanene kuchizera oku rhukagenderera kulembera oku bwimana Yehova nj’arhuhemba. Ebyola biheberwemo echilagane chinja ch’amango nj’ashangula buli miziga yoshi omu masu merhu, ey’amalumwa, ey’okulyalihirwa n’ey’okubula obulangalire. (Ufu. 21:4) Emiziga yonyine nji rhwashesha nji yaba y’obusime.