Naburhwaga omu 1927 omu vile ngeke hofi ne Chicago, omu Illinois, États-Unis. Darha na nyama baliburhire bana 5, k’okuderha, Jetha, Don, nyono, Karl, na Joy. Rhweshi rhwalihigirire kukolera Yehova n’obuguma-guma bwerhu boshi. Jetha asomaga esomo lya kabiri lye Gileyadi omu 1943. Don, ajaga kukola oku Beteli ye Brooklyn, New York, omu 1944. Karl aja oku Beteli omu 1947, Joy naye omu mwaka gwa 1951. Omufano gwabo gwinja n’ogw’abazere bani byalinshunikire nkole binene omu kasi ka Yehova.

Darha na nyama baliri basomi be Biblia bazigire Mungu, banaliri barhuyigiriza nerhu kumuzigira. Aliko darha amalire kukola nka musoda omu Erope amango m’Evita ly’Oburhanzi ly’Egulu Lyoshi, av’aheza olukengo aliherhe omu kanisa. Nyama aligwerhe busime bunene okubona darha arhafirire oku vita, ava amubwira ntya: “Karl, rhugende oku kanisa nk’okurhwanagendaga rhwajira.” Darha amushubiza: “Nakuherekeza, aliko nyono ntajamo.” Nyama amubaza: “Bulagurhe?” Amushubiza: “Amango m’evita, abakulu b’amadini bamubuli chihugo bali mu dini liguma, baliri bagisha abasoda bali oku lunda lwabo yi baja kulwa n’ababo basoda n’obo boshi bali badini liguma! Basoda balunda luhe Mungu alishigikire?”

Enyuma waho amango nyama aliri oku kanisa, Bahamirizi ba Yehova babiri bayinja ahamwerhu. Bahereza darha bitabu bibiri biyirikirwe Lumière, byaliderhere eju y’echitabu cha Ufunuo. Darha asimiswa bwenene ayemera n’ebyola bitabu. Amango nyama abona ebyola bitabu, arhondera kubisoma. Lusiku luguma abona envitasiyo ehamagere abantu bakasima bayige Ebiblia kugerera echitabu Lumière. Av’achishoga kujayo. Amango agerayo, mugekulu muguma afungula omulyango. Nyama aligwerhe chitabu chiguma mw’ebyola, amubaza ntya: “Munayiga chinola chitabu hanola si?” Oyola mugekulu amushubiza? “Nechi mwira, yingira.” Eboso lyakulikiragaho, nyama arhuheka eyola munda rhweshi, n’enyuma waho rhwarhondera kujayo buli mango.

Oku mbuganano nguma, owaliri ayigiriza ambwira nsome olwandiko lwa Zaburi 144:15, luderhere okw’abali bakolera Yehova bagwerhe obusime. Nasima bwenene olola lwandiko kuguma n’olwandiko  lwa 1 Timoteo 1:11, luderhere oku Yehova aba “Mungu w’obusime,” na Waefeso 5:1, lurhubwirire “rhube banya-kuyiganya Mungu.” Nabona oku bimpemere nsimiswe na byoshi nkwanene kukolera Omuleni wani n’oku mubwira koko k’olola lukengo, k’okuderha, obukweri bwayinjaga kuba chintu ch’akamaro omu kalamo kani.

Echibaga chaliri hofi bwenene nerhu, chaliri ku bilometre 32 omu Chicago. Chiro akaba ntyo, rhwaliri rhwajayo n’obumenyi bwani bwe Biblia bwakula. Inyibukire gurhe mango maguma owaliri ayigiriza ahemaga Jetha ahane echishubizo. Okunandi namuyunviriza, nachibwira ntya: ‘Menyere ejibu. Nali namaheba efune elugulu.’ Narhondera kurheganya n’okuhana ebishubizo. N’ech’akamaro bwenene, kuguma na bakulu bani 2 na badorho bani 2 nani nayegera Yehova. Nabatizwa omu 1941.

Inyibukire ahanene embuganano ye eneo omu Cleveland, Ohio omu 1942. Fasi zirhalukire 50 omu États-Unis zaliri konegte oku telefone. Omulala gwerhu gwaliri gwakulikira embuganano haguma n’eyindi milala minene eyi bali omu mahema hofi n’efasi embuganano yakolerwaga. Evita lya Kabiri ly’Egulu Lyoshi lyalichigenderere, n’Abahamirizi ba Yehova baliri bagenderera kulibuzwa bwenene. Egolo, nabona echigusho cha bene-berhu eyi bayandikire oku mitugari yabo ntya: Mugaluke omu nkambi. Boshi balipatene oku babe n’owindi muntu mu buli mutugari yi bajira obulanzi obudufu boshi. Amango bakabwene echimenyeso ch’obuhanya, abola bene-berhu banakonga amatara m’embere m’omutugari omu kuntu bahumye amasu m’abola bayinjire kubarhera banashurha ehoni (klaxonner). Naho abandi bakajire baja kurhabala juba juba. Nachibwira ntya: ‘Olubaga lwa Yehova luba luchirheganyize mu byoshi!’ Nta buhanya bwalichirhengerere. Na bulala naliri nachiyunva ndi omu bulanzi, nagala kulyama.

Myaka minene enyuma waho, omu kuwaza kw’eyola mbuganano nayinja kumenya oku nyama arhagwarhaga omulago changwa obuba. Alihebere obulangalire bwage boshi mu Yehova n’omu lubaga lwage. Ntakafa nayibirire omufano gwage gwinja.

Mango mageke embere w’eyola mbuganano, nyama aba painiya w’oku kahunda. Bobola alibwene akasi k’amango moshi oku kali k’akamaro bwenene. Rhwaliri omu njira rhwagaluka eka, arhubwira ntya: “Nakasimire ngenderere n’akasi k’obupainiya, aliko ntagala kukakola n’okushishikala bwinja omulala.” Abaza akaba rhwakamurhabala. Rhwayemera, av’agabira buli muguma echumba chiguma changwa bibiri by’okukwiza embere rhuyukule. Hanola rhugenda oku masomo, anaja kusuzuma akaba rhwapangire bwinja enju naho anagenda omu mahubiri. Aliri mukazi ogwerhe binene by’okukola, aliko arhachigeraga alekerera abana bage. Buli mango rhwagendaga rhwagera ahambuga ey’aliho. Rhwagendaga rhwazigana kumuherekeza oku mahubiri enyuma w’amasomo, echola charhuma rhwayunva bwinja akasi bapainiya banakola.

Narhonderaga akasi k’obupaniya eyi gwerhe myaka 16. Chiro akaba oku darha arhaliza kuba Muhamirizi, aliri alaga oku binaliri najira omu mahubiri. Golo ligumu namubwira oku chiro akaba byoshi ndi najira, nta muntu n’omuguma nabwene  olonzeze kuyiga Ebiblia. Narhanga kusira bugeke, namubaza ntya: “Oli tayari kuyiga Ebiblia haguma nani si?” Arhanga kuwaza kasanzi kageke naho aderha ntya: “Nta mpanvu mbwene yakarhuma rhurharhondera kuyiga haguma.” Bobola efunzo yani y’oburhanzi aliri darha. Lwaliri lukengo lunene bwenene!

Rhwayiga echitabu “La vérité vous affranchira.” Okw’efunzo lyerhu lyanaliri lyagenderera, nayinja kumenya oku darha aliri antabala kuba mwanafunzi na mwalimu mwinja. Omufano, golo liguma enyuma w’okumala kusoma echifungo, aderha ntya: “Nyunvirhe eby’echitabu chiderhere, aliko gurhe omenyere okw’ebila chiderhere bili by’okuli?” Intalichirheganyize kushubiza kw’echola chibazo, naho naderha ntya: “Nta jibu ngwerhe bonabuno, aliko amandi mango rhwayiga naba eyi napatire ejibu.” Nantyo kunalijirire. Nalipatire amandiko mapatene n’echibazo chage. Enyuma waho nayiga kulonza emyazi yinchirheganya bwinja oku funzo lyerhu. Echola chalintabere kuba mwanafunzi mwinja we Biblia charhabala na darha. Alikoleseze ebyaliri ayiga abatizwa omu 1952.

Narhengaga ahamwerhu yigwerhe myaka 17. Jetha a aba misiyonere na Don aja oku Beteli. Bombi balisimire engabane zabo, ebyola byalimpumire oku murhima. Bobola najaza eformilere y’okuja oku Beteli n’eyokuja kusoma Amasomo me Gileyadi naho nabileka omufune za Yehova. Byaja byaba gurhe? Nahamagalwa oku Beteli omu 1946.

Okw’emyaka yanaliri yagera, nakolere mu makasi manene oku Beteli mantabere kuyiga ebindi bintu bihyahya. Namamala myaka 75 oku Beteli na mw’eyola myaka yoshi nayigire gurhe nakarhabala kukola ebitabu n’okukola omu kontabilite. Kandi nayigire gurhe nakagula ebintu rhukenere oku Beteli n’okuntu nakaheka ebintu eyindi fasi. Aliko ahanene, inansimiswa n’enyigirizo ze Biblia rhunapata oku Beteli amango m’obuharamye bw’esezi n’omu mandi majambo.

Nayigire n’ebindi kugerera mwene-werhu w’omuherezi, Karl, wayinjaga oku Beteli omu 1947. Aliri mwanafunzi na mwalimu mwinja we Biblia. Mango maguma bampa ejambo nageza namubwira antabale. Nafasiriya Karl oku narheganyize bintu binene aliko nagambirwe kubikolesa. Antabala kugerera echibazo, ambaza ntya: “Joel, gurhe erhwe lw’ejambo lyawe liderhere?” Ahola hanaho namenya bichi alonzeze kuderha. Nalikwanene kukolesa emyazi efasiriye erhwe lwe jambo lyani n’okulekana n’ebindi. Intasaga kuyibirira ebyola anyigirizaga.

Yirhupata obusime oku Beteli, rhukwanene kugwarha omwete omu kasi k’amahubiri. Nka rhujirire ntyo, rhwagwarha obumenyi bunene. Chiguma  omu bintu nagereremo nyibukire bwinja, charhengereraga egolo omu Vile ye New York. Nyono na mwene-werhu muguma rhwalabagirira omukazi wayemeraga Omunara g’Omulanzi ne Amkeni! Rhwarhonderesa enganiro omu kuderha ntya: “Mu linola golo yirhwarhabala abantu kuyiga ebintu bisimisize bili omu Biblia.” Ashubiza ntya: “Akaba mulonzeze rhuganire okubilolere Ebiblia, muyingire.” Rhwasoma n’okuganira ku mandiko manene me Biblia maderhere oku Bwami bwa Mungu n’egulu lihyahya ly’amango mayinjire. Ebyola byalimusimisize bwenene, bulala eboso lyakulikiragaho alihamagere banene mu bera bage babe haguma nerhu. Enyuma waho, yewe n’eba baliyinjire kuba bakozi ba Yehova bemana.

Namalire myaka hofi 10 yindi nalonza eyi nashabana naye embere mbuganane na mukani. Bichi byantabalaga kupata omukazi mwinja? Nalisalirire Yehova nawaza na kw’echila chibazo: ‘Bichi najira enyuma w’okushaba?’

Enyuma w’embuganano ye eneo omu 1953 omu Yankee Stadium, nabuganana na mwali-werhu oyirikirwe Mary Aniol. Yewe na Jetha basomaga esomo lya kabiri lye Gileyadi, Mary na mwali-werhu mudorho baliri bakola nka bamisiyonere haguma. Mary ambalira na busime bunene okubilolere akasi k’obumisiyonere omu Caraïbes n’okubilolere amafunzo aligwerhe okw’emyaka yanaliri yagera. Oku rhwanaliri rhwamenyana rhwayinja kubona oku bihemere rhugenderere kukolera Yehova haguma omu kasi k’amango moshi. Obwira bwerhu bwagenderera kukula rhwashabana Mwezi gwa 4, 1955. Mu hali zinene, Mary aliyerekene kw’ali luhembo lurhengere emwa Yehova na mufano g’okuyiga. Aliri agwarha obusime mu buli kasi aliri ahabwa. Aligwerhe omwete, aliri alaga oku bandi, na buli mango aliri aheba enyungu z’Obwami oku nafasi y’oburhanzi. (Mt. 6:33) Rhwalikolere omu kasi k’omuzunguluko mu myaka 3, n’omu 1958 barhuhamagala oku Beteli.

Nayigire binene kugerera Mary. Omufano, kurhwanamala kujira obuhya ntya rhwarhondera kujira obusomi bwerhu bwe Biblia haguma n’okuganira okubilolere hofi mistari 15. Hanola muguma amala kusoma chigabi chilebe, rhwanalerha amawazo n’okuja rhwaganira gurhe rhwakabikolesa omu kalamo kerhu. Mary agendaga azigana kumbalira okubyayigaga oku masomo me Gileyadi n’omu kasi k’obumisiyonere. Ebinayigaga kugerera Mary byaliri byantabala kugeza amajambo mani bwinja n’okumenya gurhe nakaheba bali-berhu omurhima.​—Mez. 25:11.

Mukani muzigirwa Mary afaga omu 2013. Ngwerhe nyorha nene y’okumubona omu gulu lihyahya! Okunandi nalindira, mpigirire kugenderera kuyiga n’okulangalira Yehova n’omurhima gwani goshi. (Mez. 3:5, 6) Inampata echirhulirizo n’obusime amango namawaza oku bintu abantu ba Yehova nji bajira omu gulu lihyahya. Ebyola nji byahebamo okuyiga ebintu bihyahya bya Mwalimu werhu Mukulu n’okubimulolere! Kweri ntakaleka kumubwira koko ku byoshi anyigirize kugera bunola n’oku bijiro binene by’obwinja anyerekere ntalikwanene.