Entumwa Paulo ayandikira owabo mushamuka Timoteo ntya: “Inkubwirire embere za Mungu, embere za Yesu Kristu na bamalayika bachishogerwe, ok’okulikire obula bwerekezi buzira kabolo changwa akalondole.”​—1 Ti. 5:21.

Yirhumenya abola bamalayika bali bande, rhwaganira ku bamalayika barhakwanene kuba mw’echola chigusho ch’abola bamalayika. Omu bukweri abola bamalayika barhali mu balala 144 000. Amango Paulo ayandikira Timoteo, nta mushigwa wali wafukire n’okuja embingu. Entumwa n’abandi bashigwa barhaliza kuba bilemwa bye kiroho, chechirhumire arhali ba “bamalayika bachishogerwe.”​—1 Ko. 15:50-54; 1 Te. 4:13-17; 1 Yo. 3:2.

Kandi “bamalayika bachishogerwe” barhakaba balala bachijiraga bigamba amango me Chihonzi. Abola bamalayika balijire okulunda lwa Shetani baba bazimu na banzi ba Yesu. (Mwa. 6:2; Lu. 8:30, 31; 2 Pe. 2:4) Omu mango mayinjire bafungwa omu abiso mu myaka 1 000 na buzinda banalimbulwa haguma na Ibilisi.​—Yud. 6; Ufu. 20:1-3, 10.

“Bamalayika bachishogerwe” Paulo aderhere, bakwanene kuba bamalayika bali omu mbingu bali bemana ku “Mungu na Yesu Kristu.”

Hali mamiliyoni manene ma bamalayika bemana. (Ebr. 12:22, 23) Bibonekene oku Yehova arhaha bamalayika boshi kasi kaguma. (Ufu. 14:17, 18) Omufano, Yehova alibwirire malayika muguma yenyine ayirhe abasoda b’Abaasiriya 185 000. (2 Fa. 19:35) Aliko bamalayika banene bakahabwa engabane “y’okukula omu Bwami bwa [Yesu] ebintu byoshi byakasirhaza abandi n’abalala boshi barhakengere esheriya.” (Mt. 13:39-41) Abandi bamalayika bakahabwa engabane “y’okugusha abashigwa” omu mbingu. (Mt. 24:31) N’abandi bagwerhe engabane ‘y’okurhulanga mu buli hali.’​—Zb. 91:11; Mt. 18:10; ohuzanye na Matayo 4:11; Luka 22:43.

“Bamalayika bachishogerwe” baderherwe omu 1 Timoteo 5:21, byakashoboka eyi baligwerhe engabane y’okurhabala kushishikala echibaga. Mw’eyola hali, Paulo ah’abashamuka ehano ly’obwengehe okubilolere okuntu bakakolere engabane zabo n’okw’abandi omu chibaga bakwanene kuyerekana obukenge oku bashamuka. Abashamuka bakwanene kukola engabane zabo “buzira kabolo changwa akalondole,” barhakwanene kurhola n’esimikiro changwa kucha olubanja juba juba. Empanvu nkulu erhumire bakwanene kukulikira ehano lifuhererwe lya Paulo, eli bulala banakola eyi bali “embere za Mungu, Yesu Kristu n’embere za bamalayika bachishogerwe.” Bobola bamalayika baguma bajira engabane z’okurhabala echibaga. Baguma banalanga abakozi ba Mungu, banabarhabala omu kasi k’okuhubiri naho banaha Yehova eraporo y’ebi babwene.​—Mt. 18:10; Ufu. 14:6.