Aliko si, wanasomere bwinja amagazeti m’Omunara g’Omulanzi ma gunola mwaka? Lolaga akaba wakagala kushubiza kw’ebila bibazo bikulikireho:

Mufano guhe Yehova arhulekere okubilolere okuntu rhwakakolera abakazi?

Yehova anakolera abakazi buzira kalondole, babe balume changwa bakazi boshi anabakolera kuguma. Mungu anayunviriza abakazi, analaga oku kuntu yi bachiyunva n’oku bibalagirire. Anaba achizerere oku bakola akasi kage bwinja.​—w24.01, buk. 15-16.

Gurhe rhwakakolesa olwandiko lwa Waefeso 5:7 luderhere ntya: “Mumenye mwakakomerana nabo”?

Entumwa Paulo aliri arhuha omukonge g’okurhakomerana n’abantu bakarhuma byarhukomerera kukenga amakanuni ma Mungu. Abantu bagwerhe olugenzi luli nk’olola lurhachere bakaba balala rhunabuganana nabo masu oku masu changwa aba rhunageza ebisanzi nabo oku Enternete.​—w24.03, buk. 22-23.

Ngani zanyabachi z’obubeshi rhukwanene kuchilangako?

Rhukwanene kuba merangwe oku ngani zirhasuzumirwe bwinja zirhengere ku bera berhu, amamesaje m’abantu rhurhamenyere, n’oku myazi ebonekene nk’eli y’obukweri erhengere oku bigamba by’obwemere.​—w24.04, buk. 12.

Bichi rhumenyere na bichi rhurhamenyere okubilolere okuntu Yehova nj’achira Mwami Sulemani olubanja, balala bafaga e Sodoma ne Gomora n’abalala bafaga amango m’Echihonzi?

Rhurhamenyere akaba kweri Yehova abalimbwire esiku n’amango. Aliko rhumenyere okw’ayinji byoshi okubibalolere n’okw’agwerhe bubabale bunene.​—w24.05, buk. 3-4.

Okuderha oku Mungu ali “lubale” bichi birhumire rhwachizera? (Kum. 32:4)

Rhukwanene kujira Yehova malibirhiro merhu. Aliwakuchizerwa, n’amango moshi anayeneza ebilagane byage. Arhashaganyika, anali mwimana omu borhere bwage n’oku bilagane byage.​—w24.06, buk. 26-28.

Bichi byakakurhabala kukomera omu chibaga chihyahya?

Olangalire Yehova wakurhabala nk’okwarhabalaga abakozi bage b’omu mango magerere. Orhahuzanyaga echibaga warhengagamo n’echokala olimo. Ogwarhe binene by’okukola omu chibaga chawe chihyahya, onachihangane kulonza abera bahyahya.​—w24.07, buk. 26-28.

Bichi rhwakayiga kugerera mifano esharhu eli omu chitabu cha Matayo sura ya 25?

Omu mufano gw’entama n’empene guderhere akamaro k’okuba beshwekerezi na bemana. Omufano gw’ababikira bengehe n’ab’ebihwinja guyerekene akamaro k’okuchirheganya n’okuba merangwe. N’omufano gw’etalanta guyerekene akamaro k’okukola bwenene n’okugwarha obushiru.​—w24.09, buk. 20-24.

Gurhe everanda y’ehekalu lya Sulemani ya mira yalilehere?

Omu 2 Mambo ya Nyakati 3:4, baguma omu bakopororaga olula lwandiko bamira bayerekene “maboko-ngokola 120,” ch’echarhumaga y’aba veranda ya metre 53 z’obule. Aliko amandi mandiko maliyerekene “maboko-ngokola 20,” changwa metre mwenda z’obule. Eyila y’obuzinda ebonekene nka ye y’okuli.​—w24.10, buk. 31.

Okuderha ok’omugwasi wakasi abe ‘mulume wa mukazi muguma’ bichi biderhere? (1 Ti. 3:12)

Echola chiyerekene okw’akwanene kuba mulume wa mukazi muguma, arhanakwanene kujira obugonyi haban’akatyu. Kandi arhakwanene kusimiswa n’owindi mukazi haban’akatyu.​—w24.11, buk. 19.

Bulagurhe rhwakaderha ok’olwandiko lwa Yohana 6:53 lurhaliri lwaderhera Ebilyo by’Egolo bya Waliha?

Yohana 6:53 haderhere akamaro k’okulya omubiri n’okunywa eshagama ya Yesu. Yesu aderhaga ebyola binwa omu mwaka gwa 32 N.K.Y. omu Galilaya oku Bayahudi balikenere kugwarha obwemere muye. Aliko, Ebilyo by’Egolo bya Waliha byarhondereswaga mwaka muguma enyuma waho omu Yerusalemu. Ahola Yesu aliri aderha okubilolere balala bakarhegekere haguma naye omu mbingu.​—w24.12, buk. 10-11.