Olola lwandiko luyerekene ngeso mwenda z’echikiristu: “Etunda ly’eroho liheberwe m’obuzigire, obushagaluke, omurhula, okulembera, olukogo, abwinja b’omurhima, obwemere, obwirhonzi, okuchigala.” S’aliko rhurhakwanene kubona oku ezola ngeso mwenda zonyine z’eroho lya Mungu lyakarhurhabala kukuza.

Lola eby’entumwa Paulo yayandikaga omu mistari y’embere: “Sasa ebijiro by’omubiri . . . bili: obubaraga, obuchafu, okuchigendesa kubi buzira shoni, okuharamya ebishushanyo, okuganira n’abazimu, obushombanyi, obuhaka, omujinya, obukali, omulyagane, obuchomanganyi, envulindi, enyifinjo zibi, obulalu, efete zirhalwise olugero, n’ebindi bili nk’ebyola.” (Gal. 5:19-21) Paulo amalaga n’echinwa “n’ebindi bili nk’ebyola,” bulala arhayerekanaga ebintu byoshi bili “bijiro by’omubiri” nk’oku biyerekenwe omu Wakolosai 3:5. Konakuguma, achimalire kuyerekana engeso mwenda zinja, ayandika ntya omu mustari gwa 23: “Nta rhegeko liheberweho oku bintu bili nk’ebyola.” Ahala Paulo arhavaga ayerekana engeso zoshi zinja rhwakakuza kugerera oburhabale by’eroho lichesibwa.

Rhwakayunva ebyola bwinja amango rhwamabihuzanya n’emyazi Paulo ayandikiraga echibaga che Efeso: “Etunda ly’obumoleke lili; buli mbero y’obwinja b’omurhima, okunali, n’okuli.” (Efe. 5: 8, 9) Berhuwe, “obwinja b’omurhima” haguma n’okunali n’okuli bili bigabi “ch’etunda ly’obumoleke,” chinali chigabi “ch’etunda ly’eroho.”

Konako, Paulo alihanwire Timoteo oku “akulikiranye okunali, obushwekerezi ku Mungu, obwemere, obuzigire, okulindira, n’obwirhonzi;” k’okuderha ngeso ndarhu. (1 Ti. 6:11) Ahala, ngeso esharhu zonyine (obwemere, obuzigire n’obwirhonzi) zeziyerekenwe nka bigabi “by’etunda ly’eroho.” Timoteo alikwanene kuba eyi akenere oburhabale by’eroho y’agala kukuza ezindi ngeso nk’okunali, obushwekerezi ku Mungu, n’okulindira.​—Ohuzanye na Wakolosai 3:12; 2 Petro 1:5-7.

Kweri, olwandiko lwa Wagalatia 5:22, 23 lurhali mw’engeso zoshi omukristu akwanene kukuza. Eroho lya Mungu lyakarhurhabala rhukuze ngeso mwenda ziyerekenwe nka “ly’etunda ly’eroho.” Aliko hali ngeso zinene zinja bihemere rhukuze yirhuba bantu bakulire ekiroho “n’okuyambala obumuntu buhyahya bwalemwaga oku bunvikane b’obulonza bwa Mungu omu kunali k’obukweri n’obushwekerezi.”​—Efe. 4:24.