1-2. Myazi michi eli y’akamaro bwenene oku Bahamirizi ba Yehova?

RHWESHI rhuli embere w’ebibazo by’akachiro bwenene mu zinola siku​—oburhwali bukulu n’obuhamirizi. Rhwabo nka Bahamirizi ba Yehova, rhunasima okuganirira ebyola bibazo bihumire oku murhima. Aliko si, hali ah’oburhwali bwa Yehova n’obuchesi bw’ezino lyage bilekene si? Haba n’ehityu.

² Rhweshi rhwarhegerere oku bihemere ezino lya Mungu lichesibwe. Rhwashubire kuyiga ok’oburhwali bwa Yehova, changwa ok’obulyo bwage b’okurhegeka b’obukwanene buyerekanwe oku b’obwinja. Rhukwanene kukenga ebyola byoshi, binahemere rhubiwazeko bwenene.

3. Bichi ezino Yehova liheberwe mo?

³ Okuderha okuli, ezino Yehova lifunwire binene eju ya Mungu werhu, kuheba han’obulyo bwage b’okurhegeka. Bobunola, nka rhuderhere oku okuchesa ezino lya Yehova kuli kw’akamaro bwenene, eyi rhwanaderhere oku n’obulyo bwage b’okurhegeka b’obukwanene bube eyi bukwirire. Ezino lya Yehova lifarhenene bwinja-bwinja n’obulyo anarhegeka mo nka Murhwali oherhe misi minene.​—Olole echisanduku “ Echibazo ch’Akamaro Bwenene Chiheberwe mu Bichi.”

4. Bichi olwandiko lwa Zaburi 135:13 luderhe oku bilolere ezino lya Mungu, na bibazo bihe rhwashubiza ko mu gunola mwazi?

⁴ Ezino Yehova lili lyago-lyago. (Osome Zaburi 135:13.) Bichi bijirire ezino lya Mungu libe ly’akamaro ntyo? Gurhe lyarhangaga kushobekwa? Gurhe Mungu ali alichesa? Na gurhe rhwakarhabala omu kuderhera ezino lyage? Leka rhugashe ebyola bibazo.

5. Bichi bantu baguma bakabaza amango bamayunva oku bihemere ezino lya Mungu lichesibwe?

⁵ “Ezino lyawe lichesibwe.” (Mt. 6:9) Yesu aliderhere oku echola che chintu ch’akamaro bwenene rhukwanene kusalira eju ya cho. Aliko si, bichi ebinwa bya Yesu biderhere? Okuchesa echintu kuli kuderha okuchijira chichesibwa, chichere, changwa buzira zinga. Aliko, bantu baguma bakabaza, ‘k’ezino lya Yehova lirhaba liyorhere eyi lichesibwa, lichere, na buzira zinga si? Omu kushubiza, bihemere rhuwaze oku bilolere ebi ezino liyerekene.

6. Bichi binajira ezino libe ly’akamaro?

⁶ Ezino, arhali mpu herufi zinene zifire chakuyandikwa oku karatasi, changwa z’okufa chakuderhwa oku mulenge konyine. Yunva ebi Ebiblia ederhere: “Kuli kwinja okuchishoga ezino linja ahali h’okuchishoga bikulo binene.” (Mez. 22:1; Muh. 7:1) Bulagurhe ezino liherhe akamaro bwenene ntyo? Bulala liyerekene erenge n’obulyo abandi banawaza eju y’omuntu oyirikirwe kw’elyola zino. Kumbe okuntu ezino liyandikirwe oku karatasi, changwa okuntu liderhwa arhali by’eby’akamaro; s’ahubwe ech’akamaro, ali nde n’ebi elyola zino ligwisize omu bwenge n’omu mirhima y’abandi.

7. Gurhe abantu balirherere ezino lya Mungu?

⁷ Amango abantu bamaderha obubeshi eju ya Yehova, banaba eyi bamarhera erenge lyage. Amango bamarhera erenge lyage, banaba eyi bamazingisa ezino lyage. Ezino lya Mungu n’erenge lyage byarherwaga ob’oburhanzi oku abantu banamala kulemwa ntya. Rhulole eby’echola chirhero chirhuyigirize.

8. Bichi Adamu na Eva balimenyere, na bibazo bihe birhengerere?

⁸ Adamu na Eva balimenyere ezino lya Mungu, banalimenyere bintu binene by’akamaro eju yage. Balimumenyere nka Mulemi; yenyine Muguma wabahaga akalamo, Eparadizo nyinja y’okulama mo, na nka mwira oshinganene. (Mwa. 1:26-28; 2:18) Chiro akaba ntyo, banaligenderere kukolesa obwenge bwabo bushinganene omu kuwaza kw’ebyola byoshi Yehova abajiriraga si? Baligenderere okukuza obuzigire n’eshukurani yabo ku Yehova si? Ebishubizo byabonekanaga wazi amango omushombanyi wa Mungu abageregezaga.

9. Nk’oku olwandiko lwa Mwanzo 2:16, 17; 3:1-5 luderhere, bichi Yehova alibwirire omulume n’omukazi b’oburhanzi, na gurhe Shetani arhindibuzaga obukweri?

 ⁹ Osome Mwanzo 2:16, 17; 3:1-5. Omu kujira nka njoka yeli yaderha, Shetani abaza Eva echibazo: “Kweri si Mungu anaderhere oku murhakwanene kulya oku malehe ma buli murhi g’omu bustani si?” Shetani abaza echibazo chaliri m’obubeshi oku biyerekere Mungu, na Eva arhondera kuwaza kubi eju ya Mungu. Ebi Mungu abaga aderhere byaliri oku balikwanene balye oku malehe ma mirhi minene, olekere murhi muguma gonyine. Okuderha okuli, Adamu na Eva balikwanene balye oku malehe ma mirhi menene. (Mwa. 2:9) Kweri, Yehova yelumba kuhana. Aliko chiro akaba ntyo, Mungu alikabirize Adamu na Eva oku barhalyaga amalehe ma murhi muguma Abayerekaga. Si echibazo cha Shetani cha rhindibuza obukweri. Shetani alijirire bibonekane oku Mungu aba kafumbasi. Nkabaga Eva alichibazize, ‘Hanali echindi chintu chinja Mungu ambishire si?’

10. Gurhe Shetani ashobekaga ezino lya Mungu, na bichi ebyola byalerhere?

¹⁰ Mu akola kasanzi, Eva alichili abona Yehova nka Murhegesi wage. Ashubiza Shetani omu kumubwira erhegeko lya Mungu lili wazi. Ayongera oku barhakwanene oku huma k’ogola murhi. Alimenyere oku okurhakenga erhegeko lya Mungu kwakayerekeze oku lufu. S’aliko Shetani ashubiriza: “Murhakafa haba n’ehityu.” (Mwa. 3:2-4) Shetani arhalichikengere Yehova. Ahola ayurukira ashobeka ezino lya Mungu, omu kubwira Eva oku Yehova ali mubeshi. Shetani av’aba ibilisi, chanaga mukomezi. Eva av’abeshwa burundu; achizera Shetani. (1 Ti. 2:14) Achizera bwenene Shetani kulusha Yehova. Echola charhuma Eva achishoga kubi bwenene. Achishoga okurhakenga Yehova. Av’alya elehe Yehova ababuzaga barhalyaga ko. Kisha, aha na Adamu.​—Mwa. 3:6.

11. Bichi abazere berhu b’oburhanzi balijirire na bichi baligambirwe kujira?

¹¹ Rhurhange rhuwaze hityu oku bi Eva akabwirire Shetani. Obe nka wawaza nk’aderhaga ntya: “Intamenyere oli nde, nyono menyere Darha, Yehova; imuzigira, inachizera ye. Arhuhere nyono na Adamu byoshi rhuherhe. Nka gurhe oli wamuderha kubi? Rheng’aha!” Gurhe Yehova akachiyunvirhe omu kuyunva ebinwa bilokere by’omunyere muzigirwa! (Mez. 27:11) S’aliko Eva arhaliherhe obuzigire b’okuli ku Yehova; na Adamu naye intyo konako arhayerekanaga eyola ngeso. Omu kubula obola buzigire ku Eshe, Adamu na Eva barhaderheraga ezino lya Mungu kw’echola chisobe.

12. Gurhe Shetani asimaga emburho zibi omu bwenge bwa Eva, na bichi Adamu na Eva barhajiraga?

¹² Nk’oku rhwabibwene, Shetani ahwanza kusima emburho zibi omu bwenge bwa Eva; omu kurhuma ahwanza kuchibaza akaba kweri Yehova anali Eshe mwinja. Nantyo, Adamu na Eva barhaderheraga ezino n’erenge lya Yehova. Bava bayemera ebi Shetani ali ababwira n’okuchihenula ku Eshe. Shetani ali akolesa ezola njira zibi zinali nk’ezila zene. Ali arhera  ezino lya Yehova omu kulishobeka. Abantu bagwerhe obwemere omu bubeshi bwa Shetani banafarhwa juba-juba omu kukabulira erhegeko ly’okunali lya Yehova.

13. Gurhe Ezekieli 36:23 eyerekene oburhumwa bukulu bwe Biblia?

¹³ Yehova anayemera echisobe chili ntyo buzira kuchilwako si? Nanga, arhaka pima ayemera! Engani yoshi ye Biblia ekazize oku kuntu Yehova akolere omu kukula echisobe oku zino lyage chahanzizaga omu Edeni. (Mwa. 3:15) Nantyo, rhwakaderha oku bugeke oburhumwa bukulu bwe Biblia ntya: Yehova anachesa ezino lyage kugerera obwami burhegekerwe n’Omugala n’okulerha okunali n’omurhula oku gulu. Ebiblia eherhe emyazi yakarhurhabala rhuyunve bulagurhe Yehova ayeneza okucheswa kw’ezino lyage.​—Osome Ezekieli 36:23.

14. Nka gurhe okuntu Yehova ashubizaga oku bugamba omu Edeni, kwalicheseze ezino lyage?

¹⁴ Shetani ajirire oku agalire koshi yi ayumanza Yehova arhamalirizaga omuhigo gwage. S’aliko Shetani agambirwe kandi na kandi. Engani ye Biblia eyerekene gurhe Yehova alijirire, kandi eyerekene oku nta windi oli kuguma na Yehova Mungu. Kweri, obugamba bwa Shetani na balala boshi bachihebere oku lunda lwage, bwalumire Yehova oku murhima bwenene. (Zb. 78:40) Aligenderere, kubuyabuya amaliriza echola chirhero oku bwengehe, omu kulindira, n’omu kunali. Ashubire kuyerekana obuhashe bwage bw’emisi mu njira zinene. Enjira nkulu muzo, ayerekene obuzigire ku byoshi ajirire. (1 Yoh. 4:8) Yehova arhakafa alekere kuchesa ezino lyage.

15. Gurhe Shetani ali ashobeka ezino lya Mungu zene, na bichi okola kuli kwalerha?

¹⁵ Zene, Shetani ali agenderera kushobeka ezino lya Mungu. Ahebere abantu omu hali y’okurhachizera oku Mungu ali munya-misi, w’okunali, mwengehe, na munya buzigire. Omufano, Shetani ali apima kuyemeza abantu oku Mungu arhali Mulemi. Kandi, nk’abantu bayemerere okubaho kwa Mungu, Shetani anahigirira abayemeze oku Mungu n’amarhegeko mage ntacho bamalire, n’oku barhali b’okunali. Ali agenderera kuyigiriza abantu oku Yehova ali munizi, Mungu onagulumiza  abantu omu muliro gw’amalibuko. Amango bamayemera echola chisobe, banayurukira barhola eyindi ntambu; k’okuderha okulahira okukwanana k’oburhegesi bwa Yehova. Kugera amango Shetani aharabiswa, agendereza akampanye kage k’obukomezi, kandi agenderera kupima alole akaba akagala kukuhindamula nawe. Anagala si?

16. Bichi wakajira Adamu na Eva bagambwaga kukola?

¹⁶ Yehova achishogere abantu barhabale omu kuchesa ezino lyage, chiro akaba oku barhalikwanene. Nantyo, wakajira ebi Adamu na Eva bagambwaga kukola. Chiro akaba ebili byakolwa oku gulu lyoshi n’abantu bali bashobeka n’okuzingisa ezino lya Yehova, ogwerhe obuhashe b’okuyumanga n’okuderha obukweri oku Yehova ali muchesibwa, munya-misi na munya-buzigire. (Isa. 29:23) Wakayerekana oku osimire yebage Murhegesi wawe. Wakarhabala abantu bamenye bwinja oku oburhegesi bwa Yehova bobuherhe emisi, n’oku bonyine bunji bwalerha omurhula n’obusime oku bantu boshi.​—Zb. 37:9, 37; 146:5, 6, 10.

17. Gurhe Yesu aliri ajira ezino ly’Eshe limenyikane?

¹⁷ Amango rhwamaderhera ezino lya Yehova, rhwanakulikira olwiganyo lwa Yesu Kristu. (Yoh. 17:26) Yesu arhamenyesaga ezino ly’Eshe omu kukolesa elyola zino konyine, s’ahubwe n’omu kuyigiriza abantu Yehova ali muntu wa nyabachi. Omufano, alipingire Abafarisayo mu njira zinene baliri babona Yehova nka muntu okomere, ochiyenza, ochiyahula oku bandi orhanajira lukogo. Yesu alirhabere abantu babone Eshe oku ali mwinja, olindira, w’obuzigire, na munya bubabale. Alishubire kurhabala abantu bamenye Yehova kugerera obulyo ayiganyaga mo engeso z’Eshe omu kalamo kage koshi.​—Yoh. 14:9.

18. Gurhe rhwakapinga obubeshi n’echisobe Yehova ahekere?

¹⁸ Kuguma na Yesu, rhwakabwira abantu ebi rhumenyere eju ya Yehova, rhwakayigiriza abantu nka gurhe Mungu ali munya-buzigire na mwinja. Nka rhujirire ntyo, rhwanaba eyi rhuli rhwapinga obubeshi n’echisobe Yehova ahekere. Rhunachesa ezino lya Yehova, omu kulijira lichesibwa omu bwenge n’omu mirhima y’abantu. Nerhu rhwakayiganya Yehova. Okola kwakagalikana chiro akaba rhurhali bashinganyanya. (Efe. 5:1, 2) Amango  ebinwa n’ebijiro byerhu byamayereka abantu Yehova ali muntu wa nyabachi, eyi rhwamarhabala omu kuchesa ezino lyage. Rhunahamiriza elyola zino omu kurhabala abantu bakule amawazo mabi bakaba baligwerhe eju yalyo omu bwenge. * Rhwanashuba kuyerekana oku abantu barhashinganene bakagala kuyorha bimana embere za Mungu.​—Yob. 27:5.

19. Gurhe olwandiko lwa Isaya 63:7 lurhurhabere rhubone bichi bikwanene okuba muhigo gukulu gw’enyigirizo zerhu?

¹⁹ Hali echindi chintu ch’akamaro rhwakajira omu kuchesa ezino lya Yehova. Amango rhuli rhwayigiriza abandi obukweri bwe Biblia, rhunakaziza oburhwali bwa Mungu, oku Yehova yekwanene arhegeke byoshi alemere; n’obola bonabukweri. Chiro akaba oku bili by’akamaro okukaziza oku marhegeko ma Mungu, omuhigo gwerhu gukulu kuli kurhabala abandi babe eyi bakala bazigira Yehova Darha, n’okuyorha bimana embere zage. K’okuderha oku rhukenere okuyerekana engeso zinja za Yehova, omu kuyerekana Muntu wa nyabachi ezino Yehova liyerekene. (Osome Isaya 63:7.) Amango rhwamayigiriza ntyo, rhwarhabala abandi bazigire Yehova n’okumukenga bulala basimire babe bimana embere zage.

20. Bichi nji rhwaganirira omu mwazi gukulikire ho?

²⁰ Lero si, gurhe rhwakayemeza ok’oborhere n’enyigirizo zerhu binayerekana bwinja ezino lya Yehova n’okukulula abandi emunda ali? Omwazi gukulikire ho nji gwaganirira echola chibazo.