1. Okuyubaha Mungu k’okuderha gurhe, na bulagurhe kuli kw’engenzi kubalala bazigira Yehova?

ABAKRISTU banazigira Mungu n’okumuyubaha. Ku bantu baguma, ebyola byakabonekana nka birhayunvikene. Aliko, rhurhali rhwaganirira obuba bw’okukudirhimanya. Rhwaganirira oku bwindi buko b’obuba. Abantu bagwerhe obola buko b’obuba bali bantu basomezwa na Mungu banamukengere n’omurhima goshi. Barhasimire bakagayisa Eshe w’embingu bulala barhalonzeze kubihya obwira bwabo haguma naye.​—Zb. 111:10; Mez. 8:13.

2. Omu kukolesa ebinwa by’Omwami Daudi bili omu Zaburi 86:11, bintu bihe bibiri rhwaganirira ko?

² Osome Zaburi 86:11. Nk’owazize kw’ebila binwa, wakabona oku Omwami mwimana Daudi alimenyere bwinja-bwinja akamaro k’okugwarha obuba bukwanene. Leka rhulole nka gurhe rhwakakolesa ebinwa bya Daudi biyerekezwe n’eroho lichesibwa. Ech’oburhanzi, rhwabona bintu biguma birhumire byaba eyi birhuhemere okukenga bwenene ezino lya Mungu. Echa kabiri, rhwaganirira gurhe rhwakayerekana oku rhukengere bwenene ezino lya Mungu omu kalamo kerhu koshi.

3. Bichi Musa abonaga byakamurhabere agenderere kuyubaha ezino lya Mungu?

³ Waza gurhe Musa alichiyunvirhe amango alichigonyeze omu muhola gw’ebale linene n’okubona echibonekezi ch’obukuze  bwa Yehova bwagera. Echitabu Étude perspicace des Écritures chiderhere oku “byakashobokana oku che chintu chisomeze bwenene chachigerere kubaho oku bantu embere Yesu ayinje.” Musa ayunva ebinwa biderhere ntya: “Yehova, Yehova, Mungu w’obonjo n’olukogo, orhayunva oburhe juba-juba onayunjulirene obuzigire bwimana n’okuli, onayerekana obuzigire bwimana oku bihumbi, obabalira egosa, obugomi n’echaha.” Bibonekene oku malayika wabiderhaga. (Kut. 33:17-23; 34:5-7) Byakashoboka oku Musa agendaga ayibuka olola lusiku amango moshi aliri akolesa ezino Yehova. Kurhasomeze okubona Musa ajaga akomereza buzinda Abaizraeli, “bayubahe elila ezino liherhe obukuze linaherhe echubahiro.”​—Kum. 28:58.

4. Ngeso zihe, okuziwako bwenene kwakarhushunika rhukenge Yehova loshi?

⁴ Eyi rhwakengera oku zino Yehova, rhwanawaza bwenene kunyinalyo. Rhukwanene kuyibuka engeso zage nka: emisi yage, obwengehe, okunali n’obuzigire bwage. Okuwaza bwenene kw’ezola ngeso n’ezindi kwakarhushunika rhumukenge loshi.​—Zb. 77:11-15.

5-6. a) Bichi ezino lya Mungu liderhere? b) Nk’oku olwandiko lwa Kutoka 3:13, 14 n’olwa Isaya 64:8 luderhere, mu njra zihe Yehova anajira ebintu birhengerere?

⁵ Bichi rhumenyere oku bilolere ebi ezino lya Mungu liderhere? Basomi banene bayemerere oku ezino Yehova lyakaba liderhere “Ajira Kube.” Ebi elyola zino liderhere binarhuyibusa oku ntacho chakabuza Yehova kukola echintu ashondere kukola, akajira ebintu birhengerere changwa bibe. Nka gurhe?

⁶ Yehova anajira ebintu birhengerere omu kuhinduka buli choshi chikenerwe y’ayeneza obulonza bwage. (Osome Kutoka 3:13, 14.) Ebitabu byerhu bizigana kurhuyibusa rhuwaze bwenene oku bumuntu bwa Mungu. Yehova akashuba kujira abakozi bage barhashinganene bahinduke byoshi bikenerwe yibamukolera n’okuyeneza obulonza bwage. (Osome Isaya 64:8.) Intyo ku Yehova anajira obulonza bwage bujirike. Ntacho chakamubuza kuyeneza emihigo yage.​—Isa. 46:10, 11.

7. Bichi rhwakajira yi rhusimiswa n’okukenga Darha w’embingu bwenene?

 ⁷ Rhwakayunva rhusimisizwe bwenene na Darha w’embingu, omu kuwaza bwenene oku by’ajirire n’ebi arhurhabere rhugale kukola. Omufano, amango rhwamawaza bwenene ku byoshi alemere, rhwanayunva rhusomezwe bwenene na buli choshi Yehova alemere. (Zb. 8:3, 4) N’amango rhwamawaza kangana gurhe Yehova arhurhabere rhugale kukola obulonza bwage, rhwanagenderera kumukenga bwenene. Kweri, ezino Yehova liherhe echubahiro! Liheberwe mu koshi Darha ali, byoshi ajirire, na byoshi nj’ajira​—Zb. 89:7, 8.

8. Bichi olwandiko lwa Kumbukumbu la Torati 32:2, 3 lumenyeseze oku bilolere okuntu Yehova anabona ezino lyage?

⁸ Oku Abaizraeli banalonza kugera omu Chihugo Chilaganano, Yehova ayigiriza Musa emyazi y’olwimpo. (Kum. 31:19) Musa naye, ayigiriza abantu olola lwimpo. (Osome Kumbukumbu la Torati 32:2, 3.) Nka rhuwazize bwenene oku mustari gwa 2 n’ogwa 3, byakabonekana oku Yehova arhalonzeze ezino lyage likabishwa, changwa okubona nk’okuliderha guli muziro. Alonzeze ezino lyage limenyikane na buli yeshi! Okuderha okuli, lwaliri lukengwa lunene oku bantu okuyunva Musa ali abayigiriza oku bilolere Yehova n’ezino lyage liherhe obukuze! Ebi Musa aliri abayigiriza byaliri byakomeza obwemere bwabo n’okubaheba omurhima, kuguma n’oku ehivula hinashishisa emyaka. Gurhe rhwakachiyemeza ok’obulyo bwerhu b’okuyigiriza ntyo ku buli?

9. Gurhe rhwakarhabala omu kuchesa ezino lya Yehova?

⁹ Amango rhuli omu mahubiri m’enju oku nju changwa m’efasi z’abantu banene, rhwakakolesa Ebiblia yerhu omu kuyereka abantu ezino lya Mungu lyage-lyage, Yehova. Rhwakabahereza ebitabu byerhu bisimisize, evideo zinja, n’obwindi buhirhi buli oku adrese yerhu ye Enternete enakuuza Yehova. Oku kasi, oku masomo, changwa omu lugenzi, rhwakalonza obulyo rhwakaganirira eju ya Mungu werhu muzigirwa n’okuntu aba. Amango rhwamabwira balala rhwabuganire oku bilolere emihigo y’obuzigire Yehova aherhe eju y’abantu n’egulu, eyi rhwamabanyofolera eju ya Yehova n’echola chakaba chihyahya bwenene emunda bali. Amango moshi rhuli rhwabwira abandi obukweri oku bilolere Darha w’obuzigire, rhunaba eyi rhuli rhwagwasa oku kuchesa ezino lya Mungu. Rhunarhabala abantu bamenye bwinja oku bayigirizwe bubeshi bunene oku bilolere Yehova. Ebi rhunayigiriza abantu birhengere omu Biblia, by’ebintu birhulezeze bwenene bakafa bapatire.​—Isa. 65:13, 14.

10. Amango rhuli rhwaongoza amafunzo me Biblia, bulaguhe kurhali kwinja okufa chakuyigiriza abanafunzi berhu amarhegeko ma Mungu konyine?

¹⁰ Amango rhuli rhwaongoza amafunzo me Biblia, rhunasima kurhabala abanafunzi berhu bamenye banakolese ezino lya Yehova. Ahanene, rhunasima kubarhabala babone ebi ezino lyage liyerekene. Rhwakagala kujira ntyo nka rhufire chakuhana amahano, amakanuni ma Mungu n’amarhegeko m’okuchigendesa konyine si? Omwanafunzi mwinja akakula esomo oku marhegeko ma Mungu, amango amasimire loshi. Aliko si, omwanafunzi akengere Yehova bulala amuzigire? Oyibuke oku Eva alimenyere erhegeko lya Mungu, aliko arhapimaga kuzigira owahebaga h’elyola rhegeko, chiro na Adamu arhapimaga. (Mwa. 3:1-6) Kumbe rhukwanene kujira binene bwenene ahali h’okuyigiriza konyine abandi amakanuni n’amarhegeko m’okunali ma Mungu.

11. Amango rhuli rhwayigiriza oku bilolere amarhegeko n’amakanuni ma Mungu, gurhe rhwakarhabala abanafunzi berhu bazigire owahebaga h’amola marhegeko?

¹¹ Amakanuni n’amarhegeko ma Yehova marhaba makwiririre ndalo. (Zb. 119:97, 111, 112)  Aliko abanafunzi berhu barhakafa babwene ntyo nka barhamenyere bwinja oku Yehova ahebaga h’amola marhegeko bulala arhuzigire. Bobola rhwakabaza abanafunzi berhu ntya: “Owazize oku bulagurhe Mungu abwirire abakozi bage bajire echila changwa baleke okujira echila? Bichi ebyola birhuyigize eju yage?” Nka rhurhabere abanafunzi berhu bawaze eju ya Yehova n’okuluza obuzigire b’okuli oku zino lyage ly’obukuze, rhwanaba eyi rhuli rhwabahuma oku murhima bwenene. Abanafunzi berhu baluha banasima arhali mpu amarhegeko monyine, s’ahubwe n’owamahebaga ho. (Zb. 119:68) Bakula omu bwemere n’okurhabalwa bagale kulembera ebigeregezo bikomere bili embere.​—1 Ko. 3:12-15.

12. Gurhe Daudi agambwaga kugenderera kuheba omurhima gwage haguma, na bichi ebyola byalilerhere?

¹² “Ohebe omurhima gwani haguma,” g’omustari gw’akamaro gubonekene omu Zaburi 86:11. Omwami Daudi aliyerekezwe n’eroho lya Mungu amango ayandikaga ebyola binwa. Omu kalamo kage koshi, alibwene gurhe bilembere okulekerera omurhima gugabulike. Lusiku luguma, amango aliri oku etage yage, abona muka-bene ali ayoga. Mw’akola kasanzi, omurhima gwage gwaliberere haguma changwa gwaligabulikire si? Alimenyere erhegeko lya Yehova liderhere ntya: “Orhakwanene kuchifinja muka-bene.” (Kut. 20:17) Aliko kweri agenderera kulola. Omurhima gwage gwaba nyantega-rhubiri; achifinja Betsheba, analonza asimise Yehova aho han’ahola. Chiro akaba Daudi alizigire n’okuyubaha Yehova, achilekerera omu nyifinjo zage zibi. Mw’akola kasanzi, Daudi akulikiranya echintu chibihire bwenene. Azingisa ezino lya Yehova. Ashuba kulerhera olubaga lurhaherhe gosa echibazo chikomere bwenene, kuheba han’omulala gwage.​—2 Sa. 11:1-5, 14-17; 12:7-12.

13. Gurhe rhumenyere oku omurhima gwa Daudi gwalishubire kuja haguma?

¹³ Yehova alihanire Daudi, na Daudi achigaluka ko. (2 Sa. 12:13; Zb. 51:2-4, 17) Daudi aliyibukire obuhanya bwarhengereraga amango alekaga omurhima gwage gugabulike. Ebinwa byage bili omu Zaburi 86:11 byakashuba kuderhwa ntya: “Ompe omurhima gurhakagabulika.” Yehova analirhabere Daudi ahebe omurhima gwage haguma, changwa gurhagabulikanaga si? Nechi da, bulala echinwa cha Yehova chaliluhire chaganirira eju ya Daudi nka muntu “omurhima . . . gwaliyenere eju ya Yehova Mungu wage.”​—1 Fa. 11:4; 15:3.

14. Bichi buli muguma akachibaza, na bulagurhe?

¹⁴ Omufano gwa Daudi gwakaba somo emunda rhuli, gwakanarhukomereza. Obulyo arhogeraga omu chaha chikomere, kukomereze abakozi ba Mungu zene. Rhube  rhuhwanzize kukolera Yehova bona-buno changwa rhwahwanzaga mira, buli muguma akachibaza ntya, ‘Inahima amashumi ma Shetani m’okulonza kugaba omurhima gwani si?’

15. Nka gurhe obuba bukwanene bwakarhulanga amango rhwamabona efoto z’okulerha enyifinjo zibi?

¹⁵ Omufano, gurhe wakajira nka wamabona efoto oku Televisiyo changwa oku enternete yakarhuma wapata enyifinjo zibi? Byakaba bilembere okuwaza oku eyola foto changwa efilime erhavire yaba pornografi. Amola mawazo marhayerekene emisi ya Shetani y’okulonza kugaba omurhima gwawe si? (2 Ko. 2:11) Eyola foto yakaba kuguma n’echiropora ch’echuma omuntu anakolesa omu kubeza echisinde. Anarhanga kuhira olunda luyondere lw’echiropora omu chisinde. Buzinda, oku ali agenderera kukomanga mw’echola chiropora, echola chisinde chanasharhuka. Efoto y’okulerha enyifinjo zibi, enalingene n’olunda luyondere lw’echiropora si? Ebintu binarhondera kubuya-buya binabonekene nka nta chibazo biherhe, byakayerekeza omuntu juba-juba ewa kujira ebyaha bikomere by’okugaba omurhima gwage n’okumala obwimana bwage. Che chirhumire orhazigaga haba n’echintu n’echiguma chirhakwanene chaja omu murhima gwawe! Oguhebe haguma omu kuyubaha ezino lya Yehova!

16. Amango rhuli rhwashumikwa, bibazo bihe rhukwanene kuchibaza?

¹⁶ Olekere efoto z’okulerha enyifinjo zibi, Shetani ali arhulerhera ebindi bigeregezo binene. Gurhe rhunajira? Byakaba bilembere okuwaza oku ebyola birhavire byabiha. Omufano, rhwakachibwira mpu: ‘Kweri, Intakava nachibwa omu chibaga mpu okuba najirire echila, chirhavire chakomera bwenene mani.’ Okuwaza ntyo kuli kubi bwenene. Rhwakajira bwinja nka rhuchibazize ebibazo bili nk’ebila: ‘Shetani ali pima kukolesa amala mashumi omu kugaba omurhima gwani si? Inkachilekerera  omu nyifinjo zibi, intazingisa ezino lya Yehova si? Echila chijiro champeka oku bushwekerezi haguma na Mungu, changwa chankula haguma naye si?’ Owaze kw’ebyola bibazo. Osalire n’obwengehe y’obishubizako nk’oku bihemere, buzira kuchiganya buzinda. (Yak. 1:5) Okujira ntyo, bwakaba bulanzi bukulu. Kwakurhabala olekane n’amashumi oku bwizere, kuguma na Yesu amango aderhaga ntya: “Rhenga aha, Shetani!”​—Mt. 4:10.

17. Nka gurhe omurhima gugabulikire ntacho gumalire? Lerha omufano.

¹⁷ Omurhima gugabulikire ntacho gumalire. Waza oku ekipe eli mu bajuwere barhayunvikene. Baguma basimire bonyine babahabwage obukuze, abandi nabo barhasimire kusharha nk’oku amarhegeko maderhere, n’olwindi luganjo luli lwabonerera koche bwenene. Arhali kwa juba-juba ekipe eli nk’eyola yakahima omu mache. Tofauti n’okola, ekipe eli m’obuguma ekwanene kuhima. Omurhima gwawe gwakaba kuguma n’eyola ekipe yakahima nk’amawazo mawe, enyifinjo, n’enkengero zawe bili haguma omu kukolera Yehova. Oyibuke oku Shetani asimire agabe omurhima gwawe. Arhakabaga amawazo mawe, enyifinjo, n’enkengero zawe bikafunda yunvikana n’okushombana n’amarhegeko ma Yehova. S’aliko woyo, amango moshi, omurhima gwawe gunalonza guje haguma omu kukolera Yehova. (Mt. 22:36-38) Orhahira okayemera Shetani agaba omurhima gwawe!

18. Nk’oku emyazi eli omu Mika 4:5 ederhere, bichi ohigirire kukola?

¹⁸ Osalire Yehova kuguma na Daudi waderhaga ntya: “Ohebe omurhima gwani haguma yi nyubaha ezino lyawe.” Ojire okwawe koshi y’olama kulingana n’elyola sala omu kalamo kawe koshi. Buli lusiku, okane oku omuhigo gwawe omu higeke changwa hinene, kuli kuyerekana oku oyubahire onakengere ezino lichesibwa lya Yehova bwenene. Okajira ntyo woyo nka muguma w’Abahamirizi ba Yehova, wakengesa elyola zino. (Mez. 27:11) Kandi rhweshi rhwaba tayari kuderha kuguma n’omulebi Mika waderhaga ntya: “Rhwalambagira omu zino lya Yehova Mungu werhu esiku n’amango.”​—Mik. 4:5.