“Mango maguma muzala wani ampwanza kw’entambala, namufarha omumiro nahwanza okumuniguza. Nalilonzeze imuyirhe.”​—Paul.

“Ahambuga eyi hakanabere hityu hingayisize , intagendaga nalegama kusungubira. Naliri naberangula ebintu by’omunju, amakuse, changwa buli choshi nakabere infarhire omu fune.”​—Marco.

Abanene mu rhwewe rhurhavire rhwakaliha kuchubusya olugero kangana ahola. Aliko rhweshi hali amango binarhukomerera okuderha oku rhuchigale. Ech’oburhanzi chirhuma byaba ntyo kuli okuba rhwashokwere oborhere b’okugoma kurhenga oku muntu w’oburhanzi, Adamu. (Ro. 5:12) Hali baguma, nka Paul na Marco, bagwerhe echibazo ch’okurhagala kugalula oborhere bwabo. Abandi bakabona nka chibazo okugala kuyerekeza amawazo mabo bwinja. Banayorha bayunjulirene oburhe changwa kuzigana kuyunva bakorogerwe n’amawazo mabihire. Kandi abandi bakaba eyi bagwerhe echibazo ch’okuhima enyorha y’okujira obubaraga, y’okulaluka, n’okukolesa amafumu m’okuheza obwenge.

Balala banayemera amawazo, enyifinjo zabo zibi n’ebijiro byabo bibarhegeke ahali ha bowe oku birhegeka, banayirha busha akalamo kabo. Aliko rhwakachiyasa eyola ngaruka. Nka gurhe? Omu kukuza engeso y’okuchigala. Omu kurhurhabala kuyikuza, leka rhuganire ku bibazo bisharhu: 1) Okuchigala k’ogurhe? 2) Bulagurhe kuli kw’akamaro? 3) Gurhe rhwakakuza eyola ngeso nguma y’omu “lehe ly’eroho”? (Gal. 5:22, 23) Hanola rhukala kulola ebi buli muguma akajira akaba hali amango rhurhachigala.

Omuntu oherhe engeso y’okuchigala arhajira echi ajira amango ayunvirhe oburhe. S’ahubwe, anachibuza kuderha n’okujira ebyakagayisa Mungu.

Yesu alirhuyerekere okuchigala kuhirirwe mu bichi na bichi. Ebiblia ederhere ntya: “Amango aliri adukangwa arhagendaga agalula ebidusi. Amango aliri alibuka arhagendaga arhingana, s’achileka omu fune z’olala Muguma onacha olubanja omu kunali.” (1 Pe. 2:23) Yesu alikoleseze mene okola kuchigala eyi abashombanyi bage bali bamusuzagura amango alibambirwe oku murhi. (Mt. 27:39-44) Burhanzi, abaga ayerekene okuchigala kusomeze amango abakulu b’amadini bakalihire baliri balonza bamufarhire omu binwa byage. (Mt. 22:15-22) Kandi olwiganyo alilekere amango Bayahudi baguma bakalihire barholagulaga amabale balonza bamulikize mo, lwalikwirire bwenene! Arhali ntyo si? Ahali h’okubagalulira, “Yesu achibisha agenda embuga w’ehekalu.”​—Yoh. 8:57-59.

Rhwakagala kuyiganya Yesu si? Nechi, hali aharhwakagezeza kumuyiganya. Entumwa Petro yaliyandikire ntya: “Yesu alilibukire eju yenyu, abalekera olwiganyo yi mukulikira entambu zage hofi-hofi.” (1 Pe. 2:21) Chiro akaba oku rhurhashinganene, rhwakayiganya olwiganyo lwa Yesu l’okuchigala. Bulagurhe bili by’akamaro bwenene rhujire ntyo?

Birhuhemere rhugwarhe engeso y’okuchigala yi rhuyemerwa na Yehova. Chiro akaba rhwakolere Yehova oku bwimana myaka minene, rhwakayirha obwira bwerhu haguma naye nka rhurhalolere bwinja ebi rhuli rhwajira n’okuderha.

Yibuka Musa, yi waliri “mwirhonzi bwenene kulusha abantu boshi oku gulu” omu chihe chage. (Hes. 12:3) Enyuma w’amakumi me myaka y’okulembera entonganyi z’Abaizraeli, Musa aheza okuchigala. Ayunva oburhe amango kandi bachirhonganyaga eju y’echibula chamenji. Abwira abantu n’oburhe bunene aderha: “Muyunve, lero, mwe bigamba mwe! Ka rhubakulire amenji m’olula lubale?”​—Hes. 20:2-11.

Musa agambwa kuchigala. Arhahaga Yehova obukuze yewe nka shoko y’echola chisomerene ch’okulerha amenji. (Zb. 106:32, 33) Eju y’echola, Yehova arhamuyemerera aja omu chihugo chilaganano. (Hes. 20:12) Olusiku l’okufa kwage akwanene kuba eyi aliri achiganya kurhe ahezaga engeso y’okuchigala.​—Kum. 3:23-27.

Bichi birhuyigirize? Chiro akaba rhwamalegama rhuli omu bukweri, rhurhakwanene kuderha buzira bukenge ku balala barhugayisize changwa abakwanene bahanulwe. (Efe. 4:32; Kol. 3:12) Kweri, eyi rhuli rhwayinja rhwashaja, hali amango byakahwanza kurhukomerera kulembera. Aliko oyibuke Musa. Rhurhakwanene haba n’eliguma kuyirha busha erenge lyerhu linja ly’akasi rhwakolere siku zinene oku bwimana, eju y’okubula kuchigala konyine. Gurhe rhwakajira yi rhukuza eyola ngeso y’engenzi bwenene?

Osalire Yehova aguhe eroho lichesibwa. Bulagurhe? Bulala okuchigala chili chigabi ch’etunda ly’eroho lya Mungu, na Yehova anaha eroho lyage balala bamuhemere lyo. (Lu. 11:13) Kugerera eroho lyage, Yehova anarhuha emisi rhukenere. (Fil. 4:13) Akarhurhabala rhukuze ebindi bigabi by’etunda ly’eroho, nk’obuzigire bwakarhurhabala birhuyanguhire kuyerekana engeso y’okuchigala.​—1 Ko. 13:5.

Ochiyase buli choshi chakarhuma byakukomerera kuyerekana engeso y’okuhchigala. Omufano, oyake adrese z’enternete n’ebintu by’okuchisimisa binayerekena emihekere mibi. (Efe. 5:3, 4) K’okuderha rhukwanene rhuchiyase buli choshi chakarhuma rhwakola amabi. (Mez. 22:3; 1 Ko. 6:12) Omufano, omuntu onayunva juba-juba enyifinjo zibi z’obubaraga aka  kana liguma na liguma okurhayemera alola omu bitabu changwa amafilme makamulerhera enyifinjo zibi.

Rhwakabona nka bikomere okukolesa eyila mpanulo. Aliko, nka rhuchihanganire bwenene Yehova akarhuha emisi rhukenere yi rhuchigala. (2 Pe. 1:5-8) Akarhurhabala rhulole bwinja amawazo, ebinwa n’ebijiro byerhu. Echiyerekene ntyo kwanza, Paul na Marco rhwarhangaga kuderha ko, bombi bayigire kuchigalula omu borhere bwabo b’obubandi. Shuba owaze ku mwene-werhu muguma kandi wagendaga wazigana kufundwa kuchigala amango ali atembeza, amango amajira obuhaka n’abandi. Gurhe alijirire kuyerekera eyola ngeso? “Nasalira bwenene buli lusiku. Nayiga emyazi elolere okuchigala n’okufarha omu rhwe amandiko me Biblia makantabala. Chiro akaba oku byalimpemere indwise bwenene eyola ngeso oku myaka minene, okujira ntyo kunachintabala kuhwanza buli lusiku n’omuhigo g’okuyorha intuzize. Kandi inanchihangana kuba nagenda embere ahampangire kuja yintaba ey’indi juba-juba juba-juba.”

Hali amango byakarhukomerera kuchigala. Nka byamaba ntyo, rhwakayunva eshoni z’okuyegera Yehova omu sala. Aliko echola che chihe birhuhemere rhusalire ahubwe bwenene. Che chirhumire nka byamaba ntyo wanalibirhira juba-juba emunda Yehova ali omu sala. Omuheme obonjo, olonze oburhabale bwage, ona chirhume kurhahira kugalukira amola magosa. (Zb. 51:9-11) Yehova arhakakabulira amasala mawe marhengere oku murhima m’okuhema obonjo. (Zb. 102:17) Entumwa Yowane erhuyibwise oku eshagama ya Mugala wa Mungu “erhucheseze kurhenga omu chaha choshi.” (1 Yo. 1:7; 2:1; Zb. 86:5) Oyibuke oku Yehova anabwira abantu banamukolera oku bagenderere kubabalira. Che chirhumire rhwakachizera oku naye arhujirira oko kon’okola.​—Mt. 18:21, 22; Kol. 3:13.

Yehova aligayire amango Musa agera amango aheza engeso y’okuchigala omu rungu. Chiro akaba ntyo, Yehova alimubabalire. Ne Chinwa cha Mungu chiderhere oku Musa aliri lwiganyo lwinja l’obuyemere. (Kum. 34:10; Ebr. 11:24-28) Yehova arhaliyemerere Musa alabarha omu chihugo chilaganano, aliko nji ayankirira Musa omu Paradiso oku gulu n’okumuha obulangalire b’okulama esiku n’amango. Nerhu rhwakasimira obola bulangalire nka rhuchihanganire kugenderera kulwisa okwerhu koshi yi rhukuza eyola ngeso y’engezi, k’okuderha okuchigala.​—1 Ko. 9:25.