RHWESHI rhuyemerere oku Yehova agenderere kuyerekeza n’okufarhira olubaga lwage ekiroho mu zinola “siku z’obuzinda.” (2 Ti. 3:1) Okuderha okuli, bihemere buli muguma werhu ayemere. Rhwakaba nka rhwahuzanya ehali yerhu n’eyi Abaizraeli balirimo amango baliri omu rungu. Bakazaga kuhuduka amango baliri bayunva omulenge gw’empanda.

Yehova alibwirire Musa akole mpanda ebiri, azikolese arja echulirwe (mabale m’akachiro) “z’okuhamagaza embuganano n’okushanda enkambi.” (Hes. 10:2) Abadahwa baliri babanda omu mpanda omu njira zigerene mo y’abantu bamenya bichi bakwanene kujira. (Hes. 10:3-8) Zene, abantu ba Mungu bali bahabwa enyibuso mu njira zinene. Mu gunola mwazi, rhwaganirira kw’esharhu omu njira rhuhabwa mw’enyibuso n’okuzihuzanya n’empamagalo y’empanda y’omu Izraeli ya mira. Halaga ezola njira esharhu: amango rhuhamagezwe oku mbuganano zikulu, amango abashamuka bahamagezwe bayigirizwe, n’amango enyibuso zilolere ebibaga byoshi zamahindamulwa.

Amango Yehova alisimire “olubaga loshi” lushimanane omu lunda lw’emahulukiro lw’etabernakulo, abadahwa baliri babanda mu mpanda ebiri. (Hes. 10:3) Amoko moshi malihandire oku nyunda ene z’etabernakulo, maliri mayunva eyola mpamagazi egerene mo. Balala balihandire hofi-hofi n’etabernakulo bakagalire kuhika juba-juba. Balala bowe baliri hale, byalihemere emisi, akasanzi n’okuchihangana bwenene yi bahika. Babe baliri hale changwa hofi, Yehova aliri asima boshi bahike.

Zene, rhurhachishimanana oku tabernakulo, s’aliko rhunachihamagazwa rhubuganane n’abantu ba Mungu. Ebyola eheberwe mw’embugnano z’eneo, n’ebindi bihe by’engenzi bwenene rhuhabwa kw’enyigirizo n’enyibuso zinja. Omu bihugo byoshi bili oku gulu, abantu ba Yehova bali basimiira nyigirizo ziguma boshi. Kweri, balala banayemera eyola mpamagalo y’embuganano, banachibona oku bali omu chigusho ch’obusime. Baguma banarhenga hale kulusha abandi. Chiro akaba ntyo, balala bayemerere empamagalo, banabona oku okuchihangana bagere kuherhe akachiro.

Bichi si rhwakaja rhwaderha oku bilolere ebigusho bilamire hale birhakabona gurhe byahika ku nguma omu mbuganano zikulu? Waza oku teknoloji eli zene; kugerera kuyo, bantu banene mw’abola bagwerhe obuhashe b’okuyunguka n’ezola nyigirizo n’okuba nk’abanalihikire ko. Omufano, amango omurhumwa w’ebaraza lirhambwire ajaga kurhangula omurhabi gwe Bene, eyola Beteli yajira okuntu abantu b’omu Arlit, Niger, vile enarhenga mw’amatiyere y’omu Rungu lye Sahara, bagale kubakulikira. Bantu 21 baheberwe mu bene-berhu na bali-berhu haguma n’abasimisizwe babuganana. Chiro akaba oku baliri hale bwenene, bachiyunva nka banali haguma  na bantu 44 131 baliri oku mbuganano nkulu. Mwene-werhu muguma ayandika ntya: “Koko bwenene okubona mwakajira bigalikane rhukulikire eyila programe. Echola chashubire kurhuyereka kangana gurhe murhubikire omu mirhima yenyu.”

Amango abadahwa b’Abaizraeli bamashurha omu mpanda liguma lyonyine, “bashefu bonyine, abakulu baliyimangire bantu egana,” bonyine balikwanene bayinje oku hema ly’embugananano. (Hes. 10:4) Ahola Musa anabaha emyazi n’enyigirizo. Echola chalikwanene kubarhabala bagale kukola bwinja akasi kabo omu moko mabo. Nka waliri muguma mu abola bashefu, orhakajirire okwawe koshi y’ohika ku ezola mbuganano n’okuyunguka n’ezola nyigirizo si?

Zene, abashamuka b’echibaga barhali “bashefu”; barhanali bawaliha oku chibaga cha Mungu balangire. (1 Pe. 5:1-3) Aliko kweri banajira okwabo koshi bagalire omu kulanga echibaga. Nantyo, banahuduka amango bamahamagalwa bahabwe ezindi nyigirizo, nk’oku Masomo m’Akasi k’Obwami. Amango m’ebyola bihe, abashamuka banayiga gurhe kwindi bakashuba kukwiza bwenene okuntu banaheka byoshi bilolere echibaga. Ebyola binarhengerera n’okuba abashamuka boshi bali bantu b’ekiroho bwenene. Chiro akaba oku orhaza kuja ku mene amola masomo, aliko oli wayunguka okubona gurhe balala bamajire ko yibakolesa ebibayigire omu chibaga.

Hali amango abadahwa b’Abaizraeli baliri bashurha omu mpanda omu bulyo b’okuzihiiriza. Echola chaliri chamenyesa oku Yehova alonzeze enkambi yoshi ehame. (Hes. 10:5, 6) Amango olubaga lwaliri lwahamisa enkambi, lwaliri lwaba eyi lupangirwe bwinja bwenene omu bulyo busomeze, aliko echola chalihemere buli muguma alwise bwenene. Hali n’okuntu baguma omu baizraeli baliri bachiyunva barhavire basima okushuba kuhama. Bulagurhe?

Inkabaga baguma baliri babona nk’empamagazi y’okuhama yamava yaba ya buli mango n’omu kuntu barhalivire bawaza oku byaba. “Hali amango baliri bayorha ahantu kurhenge esezi kugera egolo honyine.” Hali agandi mango “zaliri zaba siku ebiri, omwezi, changwa kurhalusa” embere bahame. (Hes. 9:21, 22) Echindi, enkambi yahamisizwe kanga nyine? Hesabu sura 33 eyerekene fasi hofi 40 abaizraeli balihandire ko.

Hali amango baguma kandi bakabwene nk’ahabahamire hali embehema. Echola chakabere chisimisize chiro ahubwe mw’elyola “rungu ligalihire linayubahisize.” (Kum. 1:19) Okuba ahola, kwakarhumire bageregezwa kuhiga bawaza ok’okushuba kuhama kwabaheka ahantu harhakwirire.

Amago amoko mamahwanza kuhama, baguma bakabwene nka bikomere okulindira eturu yabo y’okuhama ehike. Boshi baliri bayunva omulenge gw’empanda guli gwazihiiriza aliko boshi barhakagalire kugendera liguma. Ogola mulenge gw’empanda guli gwazihiiriza gwaliri gwakemera oku amoko mahandire emahulukiro, k’okuderha Yuda, Isakari, na Zebuloni makwanene magende. (Hes. 2:3-7; 10:5, 6) Bayusa kugenda, abadahwa banashuba kuziha empanda eturu ya kabiri y’echindi chigabi cha moko masharhu chihandire eside nacho chigenda. Abadahwa banagenderera ntyo-ntyo mpaka enkambi yoshi egende.

Byakashoboka eyi wachigerere kuyunva orhavire wasima okuntu biguma-biguma byahindamwire omu lubaga lwa Mungu. Wakayunva nka byamakuchubuka nka hamaba binene byamahindamulwa nk’oku orhaliwazize. Changwa kandi inkabaga waliri wayunva mipango miguma ekusabukire n’okusima oku erhahindamulwaga. Bibe oku byakaba, byaba eyi bikuhemere ogeze okulembera kwawe, n’ebisanzi bigere y’oshuba koomera. K’okuderha, rhukachihangana kujira nk’okurhubwene rhukwanene rhujire, rhwachibonera emigisho ya Mungu.

Omu siku za Musa, Yehova aliyerekeze emiliyoni y’abalume, abakazi, abana omu rungu. Buzira kubalwako n’okubayerekeza barhakahafumire. Zene, Yehova y’arhuyerekeza mw’ezila siku zizinda zidarhabere. Ali arhurhabala rhuyorhe hofi naye n’okukomeza obuyemere bwerhu. Che chirhumire, buli muguma werhu akane okushubiza oku mpamagazi y’empanda kuguma n’Abaizraeli baliri bimana!