1. Bichi Yehova ahere buli mukozi wage mwimana?

OBUZIGIRE bwa Yehova bwamushunikire aleke ngasi mukozi wage mwimana abe omu chibaga chage. Chiro akaba buli muguma agwerhe akasi kalebe akakola omu chibaga, rhweshi rhugwerhe akamaro na buli muguma akenere owabo. Entumwa Paulo erhurhabere rhumenye elyola somo ly’akamaro. Nka gurhe?

2. Nk’oku olwandiko lwa Waefeso 4:16 luderhere, bulagurhe rhukwanene kukengana, kuzigirana n’okukola haguma?

² Nk’oku olwandiko luyimangire gunola mwazi luderhere, Paulo aderhere oku ntaye wakalola owabo mukozi wa Yehova n’okuderha ntya: “Ntakukenere.” (1 Ko. 12:21) Akaba rhusimire omurhula gube omu chibaga, rhukwanene rhumenye oku ngasi muntu ali w’akamaro rhunakwanene kukola haguma. (Osome Waefeso 4:16.) Amango rhwamakola haguma omu chinya-buguma, ngasi muguma anachinyunva azigirwe, n’echibaga chanagwarha emisi.

3. Bichi rhwayiga mu gunola mwazi?

³ Mu njira zichi zilebe rhukwanene kuyerekana oku rhukengere aberhu Bakristu omu chibaga? Mu gunola mwazi, rhwashambala nka gurhe abashamuka bakayerekana oku bakengere ababo bashamuka. Enyuma w’aho, rhwashambala nka gurhe rhweshi rhwakayerekana oku rhukengere n’okuzigira bene-berhu na bali-berhu bali balamba. N’oku buzinda, rhwayiga nka gurhe rhwakayerekana oku rhukengere n’okuzigira balala barhamenyere bwinja olulimi lwerhu.

4. Hano lihe lya Paulo lili omu lwandiko lwa Waroma 12:10 abashamuka bakwanene kukulikira?

⁴ Abashamuka boshi b’echibaga bashimikirwe n’eroho lichesibwa  lya Yehova. Aliko, ngasi muguma agwerhe empano n’obuhashe bwage. (1 Ko. 12:17, 18) Baguma bakaba eyi bashimikirwe harhazigera siku zinene n’ahala banaba eyi barhaza kugera mu binene kuguma n’abandi bashamuka. Abandi bakaba eyi barhachigwerhe emisi y’okukola binene bulala bakala bashajire changwa bagwerhe ebibazo by’amagala. Aliko, nta mushamuka wakalola owabo mushamuka n’okuva amubwira ntya: “Ntakukenere.” Ahali h’okuderha ntyo, ngasi mushamuka akwanene akulikire ehano lya Paulo lili omu lwandiko lwa Waroma 12:10.—Osome.

5. Nka gurhe abashamuka banayerekana oku bakengere ababo bashamuka, na bulagurhe kuli kw’akamaro bajire ntyo?

⁵ Abashamuka banayerekana oku bakengene omu kuyunviriza ababo bwinja-bwinja. Okujira ntyo kuli kw’akamaro bwenene amango abashamuka bamabuganana bali baraza ly’abashamuka eju y’okushambala oku bintu by’akamaro bilolere echibaga. Bulagurhe? Olole eby’Omunara g’Omulanzi gwa lusiku 1 Mwezi gwa 10, 1 988, gwaderhaga: “Abashamuka bakwanene bamenye oku kugerera eroho lichesibwa, Kristu akayerekeza obwenge bwa mushamuka mulebe omu baraza ly’abashamuka alerhe kanuni kalebe karhengere omu Biblia kakenerwe kukoleswa eju y’okumala bibazo bilebe changwa kurhabala kujira mihigo milebe y’akamaro. (Mdo. 15:6-15) Eroho lichesibwa linarhabala abashamuka boshi, si lirharhabala mushamuka muguma yenyine omu chibaga.”

6. Bichi byakarhabala abashamuka bakole haguma omu chinya-buguma, na nka gurhe echibaga chakapata enyungu amango bamajira ntyo?

⁶ Omushamuka okengere ababo bashamuka arhaba wa burhanzi kuderha ngasi mango omu mbuganano y’abashamuka. Arhaderha ngasi kasanzi amango bali bashambala, arhanawaza oku amawazo mage mali menja ngasi mango. S’aliko, anaderha amawazo mage oku bwirhohye n’olugero. Anayunvuriza bwinja amango ababo yi bashambala. N’ech’akamaro bwenene, agwerhe omurhumambo g’okushambala n’ababo eju y’ehano lirhengere omu Biblia n’okukulikira oburongozi burhengere “emw’omuja mwimana onakengukire.” (Mt. 24:45-47) Amango abashamuka bali bashambala omu hali y’obuzigire n’obukenge, eroho lichesibwa lya Mungu  linaba ahakarhi kabo n’okubayekereza bahikire emihigo yakakomeza echibaga.—Yak. 3:17, 18.

7. Yesu aligwerhe mawazo machi eju y’abalamba?

⁷ Zene, omu chibaga muli abalume n’abakazi bashabene, muli n’emilala. Aliko kandi, muli bene-berhu na bali-berhu banene bali balamba. Nka gurhe rhukwanene kubona balala bali balamba? Waza gurhe Yesu aliri abona abalamba. Yesu arhashabaga amango aliri akola akasi kage k’okuhubiri hanola oku gulu. Abera mulamba aseza amawazo n’akasanzi kage koshi oku kasi kage k’okuhubiri. Yesu arhayigirizaga oku Omukristo akwanene ashabe changwa akwanene abere mulamba. Aliko, aliderhere oku Bakristu balebe bakachishogere okubera balamba. (Mt. 19:11, 12; olole amahugulo m’eshishi mashambere eju ya Matayo 19:12.) Yesu alikengere abalamba. Arhasuzaguraga abalamba n’okubona oku barhagwerhe kamaro kuguma n’abashabire changwa n’abashabirwe, changwa mpu ababona oku babulire bintu bilebe bulala bali balamba.

8. Nk’oku olwandiko lwa 1 Wakorinto 7:7-9 luderhere, bichi Paulo alihirire Abakristu omurhima bawazeko?

⁸ Kuguma na Yesu, entumwa Paulo yaligenderere kuba mulamba amango aliri akola akasi kage k’okuhubiri. Paulo arhayigirizaga chiro n’akatyu oku kuli kubi amango Omukristo amashaba changwa amashabwa. Alimenyere oku omuntu yenyine ye kwanene achishoge akaba abera mulamba changwa nanga. Aliko Paulo ahira Abakristu omurhima oku akaba byakashobokana, bakolere Yehova eyi banali balamba. (Osome 1 Wakorinto 7:7-9.) Kweri, Paulo arhasuzaguraga Abakristu baliri balamba. Aliko, achishoga omusole Timoteo, waliri mulamba akole akasi k’akamaro bwenene omu kasi ka Yehova. * (Flp. 2:19-22) Bobola, kurhakaba kwinja okuwaza oku mwene-werhu arhayeneze changwa mpu ayeneze ebihemerwe y’ahabwa lukengo lulebe omu chibaga bulala ashabire changwa bulala ali mulamba.—1 Ko. 7:32-35, 38.

9. Bichi rhwakaderha eju y’okushaba changwa okushabwa, n’obulamba?

⁹ Abe Yesu changwa Paulo, ntaye waliyigirize oku Abakristu bakwanene bashabe changwa bashabwe, changwa bakwenene kubera balamba. Aliko si, bichi rhwakaderha eju y’okushaba changwa kushabwa n’okubera mulamba? Omunara g’Omulanzi gwa lusiku 1, Mwezi gwe 10, 2012, gwalihanire echishubizo chinja amango guderha ntya: “Okuderha okuli, byoshi [okushaba changwa okushabwa n’obulamba] byakabonwa  oku zili mpembo zirhengere emwa Mungu. . . . Yehova arhabona [obulamba] oku chili chintu ch’okulerha eshonyi changwa amaganya.” Amango rhuli rhwayibuka ntyo, rhukwanene okubona oku bene-berhu na bali-berhu bali balamba oku bali b’akamaro omu chibaga.

10. Nka gurhe rhwakayerekana oku rhukengere bene-berhu na bali-berhu bali balamba?

¹⁰ Nka gurhe rhwakayerekana oku rhukengere amawazo n’ehali za bene-berhu na bali-berhu bali balamba? Kuli kwinja rhuyibuke oku Bakristu balebe bali balamba bachishogere bonyine kubera balamba. Abandi balamba bakasima bashabe changwa bashabwe, s’aliko barhazipata omuntu okwanene bashondere kushabana naye. Nkabaga abandi bafisize omulume changwa omukazi. Mw’ezola hali zoshi, ka kunali kwinja abali omu chibaga bayinje babaziriza Abakristu bali balamba bulagurhe barhashabire changwa barhashabirwe, changwa bababwire oku babarhabala kupata eyi bashabana naye si? Kweri, balamba baguma bakakenera obola burhabale. Aliko si, nka barharhubwirire rhubarhale, gurhe bene-berhu na bali-berhu bali balamba bakachiyunva nka rhwamababwira ntyo? (1 Te. 4:11; 1 Ti. 5:13) Lekaga rhushambale oku binwa bene-berhu na bali-berhu b’abalamba bimana baderhere.

11-12. Nka gurhe rhwakavuna abalamba omurhima?

¹¹ Mwimangizi muguma w’omuzunguluko oli mulamba oli akola bwinja omu kasi kage, abwene ok’okubera mulamba kunalerhe nyungu zinene. Aliko, aderha oku byakavuna omurhima amango bene-berhu na bali-berhu barhagwerhe mihigo mibi banamubaza ntya: “Bichi birhumire orhashaba?” Mwene-werhu muguma oli mulamba onali akolera oku biro ly’omurhabi aliderhe ntya: “Mango maguma bene-berhu na bali-berhu banarhuma nawaza oku omulamba ali muntu w’okuyunvirwa obonjo. Okola kwakarhuma byabonekana oku obulamba guli muzigo si lurhali luhembo.”

¹² Mwali-werhu mugumu oli mulamba onali okolera oku Beteli nguma aliderhere ntya: “Bene-berhu na bali-berhu baguma banawaza oku abalamba boshi yibashonda eyi bashaba changwa owabashaba, n’oku abalamba boshi banabona oku ngasi mbuganano yoshi kali kasanzi k’okushonda eyi bashaba changwa owabashaba. Burhanzi amango mbalamira omu yindi eneo y’echihugo cherhu eju y’okukolera oku Beteli, naja oku mbuganano nguma ebudufu. Mwali-werhu muguma naliri ahamwage ambwira oku hali bene-berhu babiri mw’echola chibaga rhulikuguma nabo. Ambwira oku arhali andonzeza omulume. Aliko aho han’aho, enyuma y’okurhenga omu Chumbi ly’Obwami, ampeka emunda abola bene-berhu bali mpu rhushambale nabo. Okuderha okuli, rhweshi okurhwaliri basharhu rhwafane eshonyi.”

13. Mifano mihe yalihirire mwali-werhu muguma omurhima?

¹³ Owindi mwali-werhu oli mulamba oli wakolera oku Beteli aliderhere ntya: “Imenyere bapainiya baguma bali balamba bayumangire ekiroho, bagwerhe emihigo minja, bali juba-juba kurhabala abandi, bagwerhe n’omwishingo. Bali burhabale bunene omu chibaga. Bagwerhe amawazo menja eju y’obulamba bwabo, barhachibwene oku bali b’akamaro bwenene bulala baberere balamba changwa babulire bintu bilebe bulala barhashabire changwa barhashabirwe, changwa mp’okuba barhagwerhe bana.” Che chirhumire guli mwishingo gunene okuba omu chibaga emunda ngasi muntu akengere owabo n’okumuzigira. Omenye oku bene-benyu na bali-benyu barhakuyunvirhire obonjo changwa obongwa, barhakusuzagwire barhanawazize oku oli w’akamaro bwenene kubalusha. Omenye oku bakuzigire.

14. Nka gurhe wakayerekana oku okengere abalamba?

¹⁴ Bene-berhu na bali-berhu bali balamba bakasima nka rhubabwene oku bali b’akamaro eju y’engeso zabo zinja; aliko arhali mpu bulala bashabire changwa bashabirwe  changwa bali balamba. Ahali h’okubayunvira obonjo, rhukwanene okubabona oku bali b’akamaro eju y’obwimana bwako. Bobola, bene-berhu na bali-berhe bali balamba barhakachiyunva chiro n’akatyu nka rhuli rhwababwira: “Ntakukenere.” (1 Ko. 12:21) S’aliko, bamenya oku rhubakengere rhunabasimire bulala bali omu chibaga.

15. Mpindamuko zichi baguma bajirire yi bajira binene omu kasi k’okuhubiri?

¹⁵ Omu myaka egerere, bahubiri banene bachihebere h’omuhigo g’okuyiga olulimi luhyahya yi bagalihya akasi kabo k’okuhubiri. Okujira ntyo kubahemere bahindamule bintu binene omu kalamo. Abola bene-berhu na bali-berhu balekere echibaga banaganira m’olulimi lwabo lw’akaburhano chaziga tu bagende kukolera omu chibaga banaganira m’olwindi-lwindi lulimi chinakenere bwenene oburhabale bw’abahubiri b’Obwami. (Mdo. 16:9) Ogola guli muhigo buli muntu anachirholera yenyine, gu n’abola Bakristu bachirholere yi bahira embere akasi k’Obwami omu kalamo kabo. Chiro akaba oku byabahema myaka minene yi bamenya olulimi luhyahya bwinja, bali barhabala echibaga mu njira zinene bwenene. Engeso zabo zinja n’obumenyi bagwerhe, bili byaheba bene-berhu na bali-berhu bali omu chibaga emisi. Ego bene-berhu na bali-berhu, mumenye oku okola kuchihana ntyo kurhusimisize bwenene!

16. Bichi bikwanene kuyerekana oku mwene-werhu akaba mushamuka changwa mugwasi w’akasi?

¹⁶ Ebaraza ly’abashamuka lirhakwanene kuderha oku mwene-werhu arhakaba mushamuka changwa mugwasi w’akasi mp’okuba arhenji kuderha bwinja olulimi lw’echibaga. Abashamuka bagerereza mwene-werhu eyi bali bachiseza oku borhere Ebiblia ederhere omushamuka changwa omugwasi w’akasi akwanene abe eyi agwerhe, s’arhali okuntu anaderha bwinja olulimi luganirwa omu chibaga.—1 Ti. 3:1-10, 12, 13; Tit. 1:5-9.

17. Bichi abazere bakwanene kuchishoga amango omulala gwamahamira omu chindi chihugo?

¹⁷ Hali milala miguma y’Echikristu yahamire omu chindi chihugo y’elekana na bibazo biguma-biguma yaliri yahurana nabyo omu chihugo chabo changwa eju y’okulonza akasi. Omu hali eli nk’eyola, byahema abana babo bayinje basoma omu lulimi lw’echola chihugo. Byahema abazere nabo bayige olola lulimi yibapata akasi mw’echola chihugo. Gurhe bakajira nk’ahola hali echibaga changwa echigusho ch’olulimi lwabo lw’akaburhano? Mu chibaga chihe omulala gukwanene gujemo? Chikwanene chibe chibaga banaganira m’olulimi lw’echihugo changwa chikwanene chibe chibaga banaganira m’olulimi lw’akaburhano l’ogola mulala si?

18. Omu kukolesa ebinwa bili omu Wagalatia 6:5, gurhe rhwakayerekana oku rhukengere okuntu erhwe ly’omulala lyachishogere?

¹⁸ Erhwe ly’omulala likwanene kuchishoga chibaga chihe omulala gwajamo. Bulala guli muhigo omuntu akwanene kuchirholera yenyine, akwanene achishoge ebyasimisa omulala gwage. (Osome Wagalatia 6:5.) Rhukwanene rhukenge  okuntu erhwe ly’omulala lyachishogere. Koshi-koshi akaba achishogere, rhuyemere ko omu kuyegereza bwinja ogola mulala omu chibaga cherhu n’omu kuguyereka oku rhuguzigire bwenene.—Ro. 15:7.

19. Bichi erhwe ly’omulala likwanene kuwazako bwenene n’okusalira eju yacho?

¹⁹ Kandi, milala miguma yakaba eyi enakolera omu chibaga ch’olulimi lw’akaburhano lw’abazere, aliko eyi abana babo bowe barhenji bwinja olola lulimi. Akaba echola chibaga chili ahantu olulimi lw’echihugo luganirwa, byakaba bikomerere abana okuyunva embuganano barhakanajira amaja-mbere m’ekiroho. Bulagurhe ntyo? Bulala abana bakaba eyi banasoma omu lulimi lw’echihugo, s’arhali omu lulimi lw’akaburhano lw’abazere. Omu hali eli nk’eyola, erhwe ly’omulala likwanene kuwaza bwenene n’okusalira y’amenye bichi bihemere omu kurhabala abana bagwarhe obwira bukomere haguma na Yehova n’olubaga lwage. Byahema abazere bayigirize abana babo olola lulimi yi nabo balumenya bwinja, changwa nkabaga bakahamira omu chibaga ch’olulimi abana bayunva bwinja. Koshi-koshi erhwe ly’omulala lyachishoga, echibaga ogola mulala gwahamira mo chikwanene kumuyereka yewe n’omulala gwage obukenge n’obuzigire bunene.

20. Gurhe rhwakayerekana oku rhukengere bene-berhu na bali-berhu bali bayiga olulimi luhyahya?

²⁰ Eju y’empanvu zoshi rhwabwene, mu bibaga binene mwaba eyi muli bene-berhu na bali-berhu bali bachihangana kuyiga olulimi luhyahya. Byakaba bibakomerere okuderha amawazo mabo. Aliko nka rhurhafire kuyinja rhwachiseza oku bulyo bali baderha olulimi lwabo luhyahya, rhwabona kangana gurhe bazigire Yehova, n’enyorha bagwerhe y’okumukolera. Nka rhulemere rhwachiseza oku ngeso zabo zinja, rhwakomeza obuzigire n’obukenge kw’abola bene-berhu na bali-berhu. Rhurhayinja rhwaderha mpu “Ntakukenere” mp’okuba tu barhenji kuderha bwinja olulimi lwerhu.

21-22. Lukengo luhe lunene rhugwerhe?

²¹ Yehova arhuhere lukengo lunene l’okuba rhugwerhe echirhumalire omu chibaga chage. Rhube rhuli balume changwa bakazi, balamba changwa rhushabire n’okushabwa, bakulu changwa badorho, changwa rhube eyi rhuyinji lulimi lulebe bwinja changwa rhuli rhwaluchagulanga, rhweshi rhuli b’akamaro embere za Yehova n’embere za buli muguma n’owindi.—Ro. 12:4, 5; Kol. 3:10, 11.

²² Rhujage rhwagenderera kukolesa ebi rhwayigire kurhenga oku chishushanyo Paulo akolesaga ch’omubiri g’omuntu. Rhukajira ntyo, rhwabona kangana gurhe rhugwerhe echirhumali n’okubona oku abandi nabo bagwerhe echibamalire omu chibaga cha Yehova.