Olola lwandiko lusimisize luderhere ntya: “Nk’obwene omukene y’abonererwa mu njira yoshi-yoshi, n’okunali n’esheriya birhakengerwe ah’olamire, ebyola birhakusomezaga. Bulala omukulu ali alolwa n’omukulire, eyi hanali abandi babakulire bombi.”—Muh. 5:8.

Nka rhurhakengerere oku bi Yehova awazize eju y’ebila binwa, rhwakawaza oku olula lwandiko lushambere oku bantu bagwerhe obukulu omu burhegesi bw’abantu bonyine. Aliko nka rhuluwazizeko bwenene, lwakaba eyi lushubire kuba lugwerhe okuli kulebe eju ya Yehova, kwakarhuheba omurhima n’okurhurhuliriza.

Olwandiko lwa Muhubiri 5:8 lushambere eju y’omurhegesi onakandagira abakene n’okubayima esheriya yabo. Omurhegesi akwanene ayibuke oku hakaba hali owindi oli enyanya zage oli amulola changwa omukulire omu burhegesi. Chiro, hakanaba eyi hali abandi banabakulire bwenene bombi. Ech’okugayisa, abakulu boshi bali omu burhegesi bw’abantu, zakaba eyi zili ndyalya, n’abantu banalibuka eju y’obola bulyalya.

Aliko, chiro akaba abantu bakabona oku ntaye wakabakula mw’akola kaga, rhwakahibwa omurhima omu kumenya oku Yehova ‘ali alola chiro n’abakulu bali enyanya’ omu burhegesi bw’abantu. Rhwakahema Mungu oburhabale n’okumukabula kw’emizigo yerhu. (Zb. 55:22; Flp. 4:6, 7) Rhumenyere oku “amasu ma Yehova mali malola eyi n’eyi oku gulu lyoshi y’ayerekana emisi yage eju ya balala bagwerhe emirhima eyenere kumuyerekera.”—2 Ny. 16:9.

Bobola olwandiko lwa Muhubiri 5:8 lurhuyibusize egulu rhulamiremo; n’okumenya oku ngasi mango haba eyi hali omuntu ogwerhe bukulu bunene. Ech’akamaro bwenene, olola lwandiko lurhurhabere kumenya oku Yehova ali w’enyanya bwenene, yenali Mukulu kulusha abandi boshi. Zene, ali arhambula kugerera Omugala Yesu Kristu, Mwami w’Obwami bwage. Ogala-byoshi, oli alola byoshi, ali w’okunali loshi, na ntyo ku n’Omugala naye anali.