1-2. Bulagurhe rhwakaderha oku olwandiko lwa Muhubiri 11:6 lupatene n’akasi k’okuhubiri emyazi minja y’Obwami?

MU BIHUGO biguma, bantu banene bajira enyorha y’okuyiga emyazi minja y’Obwami. Banaba nk’abanaliri balingiriza kuyunva eyola myazi! Aliko omu bindi bihugo, abantu barhaba bavire basimiswa eju ya Mungu ne Biblia. Gurhe abantu b’aholamire banajira eyi bayunva emyazi y’Obwami? Koshi-koshi bakaba banajira, Yehova yewe alonzeze rhugenderere kuhubiri kugera amango aderha oku akola kasi kamahwa.

² Mira Yehova arheganyaga amango akasi k’okuhubiri kakwanene kahwe, n’ahola “obuzinda bwanayinja.” (Mt. 24:14, 36) Embere amola mango mahike, gurhe rhwakayerekana oku rhukengere ebinwa biderhere “orhalekaga okuboko kwawe kwaluhuka”? *—Osome Muhubiri 11:6.

3. Bichi rhwaganirira mu gunola mwazi?

³ Omwazi gwageraga gwaliyerekene bintu bine rhwakajira yi rhugenderera kuba “bashana [benja] b’abantu.” (Mt. 4:19) Gunola mwazi gwaganirira njira esharhu rhwakakomeza m’omuhigo gwerhu g’okugenderera kuhubiri, chiro akaba rhwakabuganana n’ebibazo bili gurhe. Rhwabona bulagurhe kuli kw’akamaro 1) okugenderera kuchiseza oku kasi k’okuhubiri, 2) rhube bantu b’okulindira, 3) n’okugenderera kugwarha obwemere bukomere.

4. Bulagurhe bihemere rhuchiseze oku kasi Yehova arhuhere?

⁴ Yesu ali alebere ebyakayerekene esiku z’obuzinda n’ebyola byakahugisize abanafunzi bage yi barhachiseza oku kasi k’okuhubiri. Alihanwire abanafunzi bage “bagenderere kuba masu.”  (Mt. 24:42) Zene rhuli rhwahurana n’ebintu by’okuhugisa, nk’ebyahugisaga abantu b’omu siku za Nowa byarhumaga barhayunviriza oburhumwa bw’amahano Nowa aliri amenyesa. (Mt. 24:37-39; 2 Pe. 2:5) Che chirhumire, rhulonzeze okuchiseza oku kasi Yehova arhuhere.

5. Gurhe olwandiko lwa Matendo 1:6-8 luyerekene ngahe akasi k’okuhubiri kakahikire?

⁵ Zene bihemere rhuchiseze oku kasi k’okuhubiri emyazi minja y’Obwami. Yesu aliderhere oku abanafunzi bage bakagenderere kuhubiri enyuma y’okufa kwage n’okubakakolere akola kasi bwenene kulusha oku yewe akakolaga amango alichiliri hanola oku gulu. (Yoh. 14:12) Enyuma y’olufu lwa Yesu, baguma omu banafunzi bage baligalukire akasi kabo k’obushana. Amango afuka, Yesu ajira echisomerene, omu kurhabala abanafunzi bage baguma bayirhe omuhule gw’efi. Enyuma w’echola chisomerene, Yesu aj’ashambala bwenene oku akasi k’okuhubiri n’okujira abanafunzi kakagwerhe akamaro bwenene kulusha akandi kasi koshi. (Yoh. 21:15-17) Embere Yesu agaluke embingu, abwira abanafunzi bage oku akasi k’okuhubiri ahwanzisaga kakahikire hale bwenene kurhaluka emibebero ye Izraeli. (Osome Matendo 1:6-8.) Enyuma ya myaka minene, Yesu ahereza entumwa Yowane echibonekezi ch’okumuyereka ebyakarhengerere “omu lusiku lwa Waliha.” * Mw’echola chibonekezi, Yowane alibwene ebintu bisomeze bwenene: Abona malaika muguma oli wayerekeza, “emyazi minja y’esiku n’amango” yayinjaga yahubiribwa “ku buli shanja na buli buko na buli lulimi na buli lubaga.” (Ufu. 1:10; 14:6) Kweri, Yehova alonzeze rhugenderere kukola kw’akola kasi k’okuhubiri omu gulu lyoshi zene, kugera amango kahwa.

6. Nka gurhe rhwakagenderera kuchiseza oku kasi k’okuhubiri?

⁶ Rhwakagenderera kuchiseza oku kasi k’okuhubiri nka rhuwazize bwenene ku byoshi Yehova y’akola omu kurhurhabala. Omufano, y’arhuha bilyo binene by’ekiroho kugerera  ebitabu byamakaratasi n’eby’echielektronike, kugerera arejistrema z’okuyunviriza n’evideo, na kugerera eyindi myazi ya JW Télédiffusion y’oku Enternete. Wazaga ku n’echila: Esite yerhu y’Enternete egwerhe emyazi mu ndimi zirhalukire 1 000! (Mt. 24:45-47) Chiro akaba oku nta bunvikane buli omu bantu oku gulu eju y’ebintu by’epolitike, eby’amadini, n’okubona baguma bali bachire n’abandi bali bakene; chirhabuzize abantu ba Mungu barhalukire miliyoni 8 barhagwarha obunvikane omu chinya-buguma cha bane-berhu omu gulu lyoshi. Omufano, Lwakarhano Siku 19 Mwezi gwa 4, 2019, Abahamirizi b’omu gulu lyoshi baliheberwe haguma bulala byalishobokene boshi balole evideo eganirire olwandiko l’olusiku. Egolo ly’olola lusiku, echigusho ch’abantu 20 919 041 chaligushirwe haguma eju y’Okuyibuka olufu lwa Yesu. Rhuhigirire okugenderera kuhubiri emyazi minja y’Obwami amango rhwamawaza oku lukengo rhugwerhe l’okubona gurhe ebyola bisomerene byoshi bili byajirika mu zinola siku, rhunali rhwabikolako.

7. Nka gurhe omufano gwa Yesu gurhurhabere rhuchiseze oku kasi k’okuhubiri?

⁷ Eyindi njira rhwakachisezamo oku kasi k’okuhubiri, kuli kuyiga omufano gwa Yesu. Arhayemeraga chiro n’echintu n’echiguma chamuhugisa okuhubiri abantu emyazi y’okuli. (Yoh. 18:37) Arhayemeraga ahimwa n’ebigeregezo amango Shetani amubwiraga oku amuha “amami moshi m’egulu n’obukuze bwamo”; arhanayemeraga ahimwa n’ebigeregerezo amango abandi bashondaga kumushimika abe mwami. (Mt. 4:8, 9; Yoh. 6:15) Arhashumikwaga n’enyorha y’okulonza obuchire; changwa mpu ayubahiswe n’obupinzani bukalihire. (Lu. 9:58; Yoh. 8:59) Amango obwemere bwerhu bwamageregezwa, rhwakagenderera okuchiseza oku kasi k’okuhubiri nka rhuyibukire ehano ly’entumwa Paulo. Alihirire Abakristu omurhima bakulikire omufano gwa Yesu “yi barhaluha n’okulekera aho”!—Ebr. 12:3.

8. Okulindira k’okuderha gurhe, na bulagurhe kuli kw’engezi bwenene zene?

⁸ Okulindira buli buhashe burhurhabala kulingiriza bwisirire oku ehali yahindamuka. Rhube rhugwerhe enyorha y’okubona gurhe hali ndebe ebihire yahwa changwa rhugwerhe enyorha y’okubona gurhe chintu chilebe rhuli rhwalingiriza kurhenga mira chayenera, rhukwanene rhube bantu b’okulindira. Omulebi Habakuki aligwerhe enyorha y’okubona gurhe obubandi bwahwa omu chihugo che Yuda. (Hab. 1:2) Abanafunzi ba Yesu balilangalire oku Obwami ‘bwakayinjire han’ahola’ n’okubachungula omu burhegesi bubi bwaliri bwabarhindibuza bw’Abaroma. (Lu. 19:11) Rhuli rhwalingiriza oku nyorha nene amango Obwami bwa Mungu bwayinja kukula obubi n’okurhuhira omu gulu lihyahya ly’abantu b’okunali. (2 Pe. 3:13) Aliko, rhukwanene rhube bantu b’okulindira n’okulinga olusiku Yehova ahebere ho l’okujira ntyo. Rhushambalage ku njira ziguma Yehova anarhuyigirizamo rhube bantu b’okulindira.

9. Mifano ehe eyerekene oku Yehova analindira?

⁹ Yehova arhuyerekere omufano gushinganene g’okulindira. Alilekere Nowa bisanzi binene y’ayumbaka esafina, y’anaba “muhubiri w’okunali.” (2 Pe. 2:5; 1 Pe. 3:20) Yehova aliyunvirize amango Abrahamu amubazirizaga eju y’omuhigo gwage g’okulimbula abantu babi balilamire omu vile ye Sodoma n’eye Gomora. (Mwa. 18:20-33) Mu myaka minene, Yehova alilindirire bwenene eshanja lye Izraeli lyaliri lyakola ebintu bibi. (Ne. 9:30, 31) Zene rhubwene oku Yehova ali alindira, bulala ahere abantu boshi alonzeze babe bera bage bisanzi binene “bahikire amango bahungama.” (2 Pe. 3:9; Yoh. 6:44; 1 Ti. 2:3, 4) Omufano gwa Yehova gurhuhere empanvu nyinja y’okulindira oku rhuli rhwagenderera kuhubiri n’okuyigiriza. Ashubire kurhuyigiriza okulindira kugerera echishushanyo chili omu Chinwa chage.

10. Nk’oku olwandiko lwa Yakobo 5:7, 8 luderhere, bichi omufano g’omuhinzi gurhuyigirize?

 ¹⁰ Osome Yakobo 5:7, 8. Omufano g’omuhinzi oli alingiriza gurhe emyaka yage yayera gwakarhuyigiriza rhube bantu b’okulindira. Okuderha okuli, hali emyaka enayera juba-juba. Aliko, myaka minene, ahanene elala y’okushalulwa, enageza bisanzi binene embere ekule. Hakazaga kugera nka myezi ndarhu ntya embere omuntu ashalule emyaka yage omu Izraeli ya mira. Omuhinzi akazaga kubyala emburho zage enyuma y’envula ntanzi ehuzenye n’ey’ahakagarhi k’Omwezi gwe 10, anakazaga shalula enyuma y’envula nzinda ehuzenye n’ey’ahakagarhi k’Omwezi gwa 4. (Mk. 4:28) Rhukwanene rhulindire nka kulala omuhinzi naye analindira. Aliko, byakaba eyi birhayorohere.

11. Nka gurhe okulindira kwerhu kwakarhurhabala omu kasi k’okuhubiri?

¹¹ Ahanene, abantu barhashinganene basima babone oku malehe m’akasi kabo juba-juba. Aliko, nka rhusimire emyaka yerhu ekule enayere, rhukwanene kuyishishikala k’okuderha oku rhukwanene rhuhinge, rhubyale, rhuyufire n’okumimira. Akasi k’okujira abanafunzi nako, kahemere okuchihangana bwenene. Bihunire bisanzi binene yirhurhabala balala rhunayigiriza Ebiblia balekane n’akabolo n’omulyagane. Okulindira kwerhu kwarhurhabala rhurhavunikaga omurhima amango rhwamahurana n’ebibazo. Amango rhwabona bantu balebe basimisizwe, rhukwanene kugenderera kulindira. Rhurhakaseza omwanafunzi we Biblia agwarhe obwemere. Chiro n’abanafunzi ba Yesu, haligerere ebisanzi eyi barhali bayunva bwinja eby’ali abayigiriza. (Yoh. 14:9) Rhuyibuke oku rhwakabyala n’okumimira, aliko Mungu yekuza.—1 Ko. 3:6.

12. Gurhe rhwakayerekana oku rhuli bantu b’okulindira amango rhuli rhwahubiri abantu b’omulala gwerhu barhali Bahamirizi?

¹² Njira nguma byakarhukomereramo rhube bantu b’okulindira, mali amango rhuli rhwahubiri abantu b’omulala gwerhu barhali Bahamirizi ba Yehova. Akanuni kali omu lwandiko lwa Muhubiri 3:1, 7 kakarhurhabala.  Kaderhere ntya: “Hali . . . akasanzi k’okusira n’akasanzi k’okuderha.” Engeso zerhu zinja zakarhabala abantu b’omulala gwerhu bayunvirize oburhumwa bwerhu, n’ahandi rhukwanene kushambala nabo eju ya Yehova. (1 Pe. 3:1, 2) Rhukwanene rhulindire abantu boshi kuheba han’abantu b’omulala gwerhu amango rhuli rhwahubiri n’okuyigiriza n’obushiru.

13-14. Mifano mihe miguma y’okulindira rhwakayiganya?

¹³ Omufano gw’abantu bimana bamira n’aba mu zinola siku gwakarhuyigiriza rhube bantu b’okulindira. Habakuki aligwerhe enyorha y’okubona gurhe obubi bwahwa, aliko ayerekana oku ali muntu w’okulindira amango aderha ntya: “Nagenderera kuyumanga oku karegerege kani.” (Hab. 2:1) Entumwa Paulo nayo yaliderhere oku yaligwerhe enyorha y’okubona gurhe “amala” akasi kage k’okuhubiri. Aliko agenderera “kuhana obuhamirizi bwinja-bwinja bw’emyazi minja” omu kulindira.—Mdo. 20:24.

¹⁴ Rhushambalage ku mufano gwa mwene-werhu muguma na mukage bamalaga kusoma amasomo me Gileyadi n’okuhabwa engabane y’okukolera omu chihugo chaliri mu Bahamirizi bageke, eyi na bantu banene ba mw’echola chihugo barhali omu dini lye Chikristu. Bantu bageke bonyine balisimire kuyiga Ebiblia. Aliko ababo banafunzi basomaga nabo amasomo me Gileyadi bayinjaga bakolera omu bindi bihugo bayinja bababwira gurhe bantu banene mw’ebyola bihugo basimire kuyiga Ebiblia, banali bajira amaja-mbere m’ekiroho. Aliko oyola mwene-werhu na mukage bagenderera kuhubiri omu kulindira chiro akaba oku bantu banene ba mw’eyola eneo barhaliri babayunviriza. Enyuma y’okuhubiri myaka munane mw’echola chihugo bantu banene barhalisimisizwe n’emyazi minja, hagera amango basima kubona muguma omu banafunzi babo be Biblia abatizwa. Bichi eyola mifano ya mira n’eya mu zinola siku erhuyigirize? Abola bantu bimana barhayolokalaga changwa mpu baleke okuboko kwabo kuluhuke, na Yehova abagisha bulala baliri bantu b’okulindira. Rhuyige ‘olwiganyo lwa balala kugerera obwemere n’okulindira, bashokwere ebilagane.”—Ebr. 6:10-12.

15. Mu njira nchi nguma obwemere bunakomeza omuhigo gwerhu g’okuhubiri?

¹⁵ Rhugwerhe obwemere omu burhumwa rhunahubiri, che chirhumire rhugwerhe enyorha nene y’okububwira ku bantu banene nk’oku byakashobokana. Rhulangalire ebilagane bili omu Chinwa cha Mungu. (Zb. 119:42; Isa. 40:8) Rhuli rhwabona gurhe obulebi bwe Biblia buli bwayenera mu zinola siku. Rhuli rhwachibonera gurhe abantu bali bahindamula akalamo kabo eyi bahwanza kukolesa amahano mali omu Biblia. Ebyola byoshi binarhuma rhwashuba kuyemera bwenene oku emyazi minja y’Obwami buli burhumwa buli muntu akenere kuyunva.

16. Nk’oku olwandiko lwa Zaburi 46:1-3 luderhere, nka gurhe obwemere mu Yehova na Yesu bwakakomeza omuhigo gwerhu g’okuhubiri?

¹⁶ Rhunagwerhe obwemere mu Yehova, ntangiriro y’oburhumwa rhunahubiri, na mw’olala ashimikire abe Mwami w’Obwami bwage, Yesu. (Yoh. 14:1) Chiro rhwahurana n’ebibazo bili gurhe, Yehova agenderera kuba malibirhiro merhu na misi yerhu. (Osome Zaburi 46:1-3.) Oku bwindi, rhuchizerere oku Yesu ali ayerekeza akasi k’okuhubiri ey’anali embingu, omu kukolesa emisi n’obukulu Yehova amuhere.—Mt. 28:18-20.

17. Mufano guhe guyerekene bulagurhe rhukwanene rhugenderere kuhubiri?

¹⁷ Obwemere bwakakomeza obwizere bwerhu oku Yehova agisha obushiru bwerhu, na bisanzi biguma omu njira rhurhaliwazize. (Muh. 11:6) Omufano, buli lusiku ebihumbi by’abantu binabona eprezantware zili kw’ebitabu byerhu. K’eyola njira y’okuhubiri eli yalerha amalehe? Nechi kweri! Ehuduma ya Ufalme yo Mwezi gwe 11, 2014 yaliganirire eju ya munyere mugumu waliri wasoma oku iniversite walonzaga kuyandika  echitabu eju y’Abahamirizi ba Yehova. Birhalimuyorohere okupata Echumbi ly’Obwami, aliko abona eprezantware yerhu eli kw’ebitabu byerhu oku masomo mabo, anapata emyazi y’okumurhabala ayandike echitabu chage. Oku buzinda aba Muhamirizi obatizwe na buno akola ali painiya w’okukahunda. Ebyola birhuhebere omurhima rhugenderere kuhubiri bulala biyerekene oku hachili abantu bakenere okuyunva oburhumwa b’Obwami.

18. Bulagurhe rhuchizerere oku akasi k’okuhubiri Obwami nji kahwa amango Yehova alonzeze?

¹⁸ Rhwakachizera oku akasi k’okuhubiri Obwami kahwa omu kasanzi kakwanene. Rhuganire oku byabaga omu siku za Nowa. Yehova aliyerekene oku anakola ebintu omu kasanzi kakwanene. Myaka 120 ntya embere Envula y’Echihonzi ehike, Yehova abaga ahebere h’ebisanzi ekwanene erhondere. Enyuma ya myaka minene, Yehova abwira Nowa oku ayumbake esafina. Nkabaga mu myaka 40 changwa 50 embere Envula y’Echihonzi erhondere, Nowa aligenderere kukola akasi kakomere bwenene. Chiro akaba oku aliri ahubiri abantu barhaliri bamuyunviriza, agenderera kuhubiri oburhumwa b’okuhanula kugera amango Yehova amubwiraga oku akasanzi k’okuheba enyama omu safina kamahika. Enyuma w’ahola, omu kasanzi kakwanene, “Yehova achinga omulyango.”—Mwa. 6:3; 7:1, 2, 16.

19. Migisho mihe rhwakalangalira nka rhurhalekere okuboko kwerhu kwaluhuka?

¹⁹ Hanola hofi-hofi, Yehova arhumenyesa oku rhwamamala akasi k’okuhubiri emyazi minja y’Obwami n’okulimbula egulu libi lya Shetani n’okulerha egulu lihyahya nji lyaba liyunjulirene mw’abantu bakengere Mungu. Oku akola kasanzi kanahika, rhuyige omufano gwa Nowa, Habakuki, n’abandi barhalekaga okuboko kwabo kwaluhuka. Rhugenderere okuchiseza oku kasi k’okuhubiri, kuba bantu b’okulindira, n’okugenderera kugwarha obwemere bukomere mu Yehova n’omu bilagane byage.