1. Gurhe obuzigire bwa Mungu bunarhuma wachiyunva?

ENTUMWA Yowane yaliyandikire ntya: “Mungu buba buzigire.” (1 Yo. 4:8) Ebila binwa biyanguhire birhuyibwise obula bukweri bw’akamaro: Mungu y’eshoko y’akalamo, kandi ali shoko y’obuzigire. Yehova anarhuzigira! Obuzigire bwage bunarhuma rhwachiyunva rhuli omu murhula, rhusimire, rhunatoshekere.

2. Nk’oku olwandiko lwa Matayo 22:37-40 luderhere, marhegeko mabiri makulu bwenene, mali mahe? Na bulagurhe rhwakabona nka bikomere okukenga elya kabiri?

² Oku Bakristu, birhali byakuchishoga akaba bayerekana obuzigire changwa nanga. Lili rhegeko. (Osome Matayo 22:37-40.) Amango rhwamahikira kumenya Yehova, rhwakabona oku birhakomere okukenga erhegeko ly’oburhanzi. Yehova yewe ali mushinganyanya; anarhukolera oku bwinja n’oku lukogo. Aliko rhwakabona nka bikomere okukenga erhegeko lya kabiri. Bulagurhe? Bulala abaturanyi berhu bahofi-hofi baheberwe mu bene-berhu na bali-berhu b’omuchibaga, barhali bashinganyanya. Mango maguma bakaderha changwa bakajira ebintu birhugayisize. Yehova amenyere oku rhwahurana echola chibazo, bobola ayerekeza kugerera eroho lyage lichesibwa, bandisi baguma b’Ebiblia bayandike amahano mayerekene bulagurhe na nka gurhe rhukwanene kuzigirana buli muguma n’owindi. Yowane, ali muguma mw’abola bandisi.​—1 Yo. 3:11, 12.

3. Bichi Yowane aderhaga oku bilolere obuzigire?

³ Omu bitabu ayandikaga, Yowane alisezeze bwenene okw’Abakristu bakwanene kuyerekana obuzigire. Kweri, omu myazi ayandikaga eju y’akalamo ka Yesu, Yowane alikoleseze  bwenene ebinwa “obuzigire n’okuzigirwa” kulusha bandi basharhu bayandikaga ebitabu by’Eyinjili. Yowane aliri hofi kuyeneza myaka 100 amango ayandika Eyinjili yage n’amandi maruba masharhu. Ebyola bitabu byage biyerekene oku rhukwanene kushunikwa n’obuzigire mu buli chintu rhwakakola. (1 Yo. 4:10, 11) Aliko, haligerere kasanzi kanene yi Yowane amenya ntyo.

4. Yowane analiri ayereka abandi obuzigire amango moshi si?

⁴ Amango Yowane alichili musole, arhaliri ayerekana obuzigire amango moshi. Omufano, mango maguma Yesu n’abanafunzi bage bageraga Esamariya eyi bali babalamira Eyerusalemu. Abantu b’omu vilaje nguma y’Esamariya balahira kubayegereza. Yowane ajira gurhe? Abwira Yesu bahamagale omuliro kurhenga embingu guyinje gusingonyole abantu boshi ba mw’eyola vilaje! (Lu. 9:52-56) Mandi mango maguma Yowane agambwa kuyereka ezabo ntumwa obuzigire. Bishushire oku yewe na Yakobo mwene-wabo balirhebereze nyina aje bwira Yesu banji babage ahaburhambi bwage omu Bwami. Amango ezindi ntumwa zimenya oku ntyo ku Yakobo na mwene-wabo bajirire, zagaya bwenene! (Mt. 20:20, 21, 24) Chiro akaba oku Yowane aligwerhe obola buzamba, Yesu aligenderere kumuzigira.​—Yoh. 21:7.

5. Bichi rhwaganirira mu gunola mwazi?

⁵ Mu gunola mwazi, rhwaganira oku mufano gwa Yowane na bintu biguma omu by’ayandikaga oku bilolere obuzigire. Omu kujira ntyo, rhwayiga gurhe rhwakayereka bene-berhu na bali-berhu obuzigire. Rhwashuba kuyiga njira nguma y’akamaro erhwe ly’omulala akayerekanamo okw’azigire abantu b’omulala gwage.

6. Gurhe Yehova ayerekene okw’arhuzigire?

⁶ Ahanene rhunawaza ok’obuzigire kuli kubwira abantu ebinwa binja n’obushagaluke konyine. Aliko y’obuzigire buba b’okuli, bunakwanene kuyerekanwa kugerera ebijiro. (Ohuzanye na Yakobo 2:17, 26.) Omufano, Yehova anarhuzigira. (1 Yo. 4:19) Anarhuyereka obola buzigire kugerera ebinwa binja bili omu Biblia. (Zb. 25:10; Ro. 8:38, 39) Aliko rhuchizerere oku Mungu anarhuzigira arhali mpu kugerera eby’anaderha byonyine, s’ahubwe n’eby’anajira. Yowane ayandika ntya: “Kugerera echila obuzigire bwa Mungu bwayerekanwa eju yerhu, Mungu arhuma Omugala w’echinege omu gulu yi rhubona akalamo kugerera yewe.” (1 Yo. 4:9) Yehova ayemera Omugala alibuke n’okufa eju yerhu. (Yoh. 3:16) Ahola, ka rhwakashuba gangana oku Yehova anarhuzigira?

7. Bichi Yesu alijirire omu kurhuyereka okw’arhuzigire?

 ⁷ Yesu alibwirire abanafunzi bage okw’abazigire. (Yoh. 13:1; 15:15) Arhayerekanaga okw’abazigire n’okw’arhuzigire nerhu kugerera eby’aliri aderha byonyine, si na kugerera eby’aliri ajira. Yesu aderha ntya: “Nta muntu n’omuguma oherhe buzigire bunene kulusha obula, kugera ah’omuntu ahanira akalamo kage eju ya bera bage.” (Yoh. 15:13) Amango rhwamawaza oku bi Yehova na Yesu barhujirire, bichi byakarhushunika kujira?

8. Bichi olwandiko lwa 1 Yohana 3:18 lurhubwirire rhukwanene kujira?

⁸ Rhunayerekana oku rhuzigire Yehova na Yesu omu kubakenga. (Yoh. 14:15; 1 Yo. 5:3) Yesu alirhuhere erhegeko oku rhuzigirane buli muguma n’owindi. (Yoh. 13:34, 35) Rhurhakwanene kubwira bene-berhu na bali-berhu oku rhubazigire konyine, si rhunakwanene kubayereka ntyo n’omu bijiro. (Osome 1 Yohana 3:18.) Omu bukweri, bichi biguma rhukwanene kujira yi rhubayereka oku rhubazigire?

9. Bichi obuzigire bwashunikaga Yowane akole?

⁹ Yowane akachiberere haguma n’eshe n’okupata efuranga omu kasi kabo k’omulala k’okurhega efi. Aliko ahali h’okujira ntyo, akolesa akalamo kage koshi kaliyorhere omu kurhabala abandi bamenye obukweri eju ya Yehova na Yesu. Akalamo ka Yowane karhaliyorohere. Baliri bamulibuza bwenene, n’amango myaka 100 ya burhanzi yaliri hofi kuhwa ey’akala ashajire, bamuheka buhungiro. (Mdo. 3:1; 4:1-3; 5:18; Ufu. 1:9) Chiro n’amango aliri omu prizo eju y’akasi kage k’okuhubiri, Yowane aligenderere kuyerekana okw’azigire abandi. Omufano, amango aliri oku chizimba che Patmosi, ayandika echitabu cha Ufunuo n’okuchirhumira ebibaga yi bimenya “ebi kwanene kuba hanola hofi-hofi.” (Ufu. 1:1)Bishushire okw’achiyusa kushwekulwa, ayandika engani y’akalamo n’akasi ka Yesu, eyirikirwe Yinjili ya Yowane. Ashuba kuyandika mandi maruba masharhu y’ahira bene-berhu na bali-berhu omurhima n’okubakomeza. Gurhe wakayiga okuntu Yowane aliri achihana omu kalamo kage?

10. Gurhe wakayerekana ok’ozigire abantu?

¹⁰ Wakayerekana ok’ozigire abantu omu kuntu wakachishoga eby’osimire kukola omu kalamo kawe. Egulu libi lya Shetani lyakasima okolese abisanzi n’emisi yawe yoshi omu byawe wenyine omu kuchihangana ogwarhe furanga zinene changwa omenyikane bwenene. Chiro akaba ntyo, abahubiri b’Obwami b’omu gulu lyoshi bali bachihangana okwabo koshi kuhubiri emyazi minja n’okurhabala abantu bayegere Yehova. Na baguma mu bo bagalire kukola nka bakozi b’amango moshi omu kasi k’okuhubiri n’okuyigiriza.

11. Nka gurhe bahubiri banene bimana bali bayerekana oku bazigire Yehova na bene-babo na bali-babo?

¹¹ Bilibyahema Bakristu banene bimana bakole bwenene akasi k’omubiri yi bapata ebi bakenere bowe bonyine n’emilala yabo. Aliko chiro akaba ntyo, abola bakozi ba Mungu bimana bali barhabala olubaga lwa Mungu omu kwabo koshi bagalire. Omufano, baguma bali bagala kurhabala oku kasi k’okurhabala amango m’echinjira, abandi bakagala kurhabala oku makasi m’echiteokrasi m’okuyumbaka, na buli muntu ali ahana enshololo z’okurhabala oku kasi k’okuhubiri omu gulu lyoshi. Banajira ntyo bulala bazigire Mungu n’ababo bantu. Buli boso rhunayerekana oku rhuzigire bene-berhu na bali-berhu omu kuja oku mbuganano, rhwanashubiza n’okugeza ebipindi. Chiro akaba rhwaluhire, rhunachihangana kuhika kw’ezola mbuganano;  rhube rhuyunvirhe obuba, rhunachihangana kuhana ebishubizo. Na chiro akaba buli muguma werhu aherhe ebyage-byage bibazo, rhunachihagana kuhira abandi omurhima omu kuganira nabo embere changwa enyuma w’embuganano. (Ebr. 10:24, 25) Rhugwerhe eshukrani nene oku kasi bene-berhu na bali berhu bali bajira!

12. Yindi njira ehe Yowane aliyerekenemo okw’azigire bene-babo na bali-babo?

¹² Yowane arhaliri ayereka bene-babo na bali-babo okw’abazigire omu kubabwira koko konyine, si n’omu kubaha amahano. Omufano, Yowane alibwirire bene-babo na bali babo koko eju y’akasi kabo kenja, aliko anashuba kubaha amahano mali wazi eju y’echaha. (1 Yo. 1:8–2:1, 13, 14) Konakuguma nerhu rhukwanene rhubwire bene-berhu na bali-berhu koko oku bintu binja bali bajira. Aliko nka hali omuntu oli wakuza engeso changwa oborhere bubi rhukwanene kumuyereka obuzigire omu kumuha n’amayeri ehano akenere. Bihemere omuntu agwarhe obushiru y’agala kuhanula mwira wage, aliko Ebiblia ederhere oku abera b’okuli banarhyazana, changwa kuhanulana buli muguma n’owindi.​—Mez. 27:17.

13. Bichi rhurhakwanene kujira?

¹³ Hali amango kandi byakarhuhema kuleka kujira bintu bilebe omu kuyereka bene-berhu na bali-berhu oku rhubazigire. Omufano, rhurhagayira juba-juba ebi baderhere. Waza oku byahikaga amango Yesu alichili oku gulu. Abwira abanafunzi bage oku bihemere balye omubiri gwage n’okunywa eshagama yage. (Yoh. 6:53-57) Ebyola binwa byakwaza bwenene na banene omu banafunzi bage balekana naye. Aliko abera bage b’okuli bahirirwe mu na Yowane barhamulekaga. Bamunanira oku bwimana. Barhaliyunvirhe ebi Yesu aderhaga, binashushire oku nabo balisomere. Aliko abera bimana ba Yesu barhaliwazize okw’eby’aderhere bili bibi changwa mpu bibagayise, s’ahubwe bamulangalira bachizerere oku ali aderha okuli. (Yoh. 6:60, 66-69) Obwene kangana gurhe bili by’akamaro bwenene okurhagayira juba-juba ebi bera berhu baderhere! Ahubwe, rhwanabaha orozo, barhufasiriye ebi balonzaga kuderha.​—Mez. 18:13; Muh. 7:9.

14. Bulagurhe rhurhakwanene kushomba bene-berhu na bali-berhu?

¹⁴ Kandi Yowane alirhuhanwire rhumenye rhwakashomba bene-berhu na bali-berhu.  Nka rhurhakengere elyola hano, Shetani akarhukolesa nk’oku alonzeze. (1 Yo. 2:11; 3:15) Ebyola byalihikire bantu baguma oku buzinda bwa myaka 100 y’oburhanzi enyuma y’okufa kwa Yesu. Shetani aliri ajira okw’agalire koshi omu kulerha olushombo n’akavulindi omu bantu ba Mungu. Amango Yowane ayandikaga amaruba mage, abantu baherhe omurhima gwa Shetani babaga basheshere omu chibaga. Omufano Diotrefe aliri alerha akavulindi kakomere mu chibaga chiguma. (3 Yo. 9, 10) Arhaliri akenga abantu ebaraza lirhambwire lyayinjaga lyarhuma; n’okuhanza akabula embuga balala baliri bayegereza abantu yewe arhasimire. Aliherhe echiburi! Shetani achili achihangana zene okulerha akavulindi omu bantu ba Mungu n’okulonza barharhabalanaga. Rhurhahira rhukaziga olushombo lwarhuhenula ku bene-berhu.

15. Bichi erhwe ly’omulala akwanene kuyibuka?

¹⁵ Njira nguma erhwe ly’omulala akayerekanamo okw’azigire abantu b’omulala gwage, kuli kubahereza ebintu by’omubiri bakenere. (1 Ti. 5:8) Aliko akwanene kuyibuka okw’ech’akamaro bwenene kuli kurhabala abantu b’omulala gwage bagwarhe obwira bukomere haguma na Yehova. (Mt. 5:3) Tala olwiganyo Yesu alilekere amarhwe m’emilala. Echitabu cha Yowane chiyerekene oku amango Yesu aliri hofi kufa oku murhi gw’amalibuko, aliri ey’anachili awaza oku bantu b’omulala gwage. Yowane aliyumangire haguma na Mariya nyina wa Yesu aha bamuhanikiraga oku murhi. Chiro akaba okw’aliri alibuka bwenene, Yesu abwira Yowane ashishikale Mariya. (Yoh. 19:26, 27) Yesu aliherhe bene-babo bakashishikere Mariya omu kumuha ebintu by’omubiri akenere, aliko bishushire oku nta muguma chiro mu bo waliza kuba mwanafunzi wage. Che charhumaga Yesu arhola omupango yi haba omuntu wakashishikere Mariya n’okumuhira omurhima agenderere kukolera Yehova.

16. Kasi nyabachi Yowane aligwerhe?

¹⁶ Yowane aliherhe kasi kanene. Bulala aliri muguma omu ntumwa, alikwanene kugwarha obushiru omu kasi k’okuhubiri. Byakanashobokana okw’alishabire, n’eju y’echola alikwanene ah’abantu b’omulala gwage ebintu by’omubiri n’eby’ekiroho balikenere. (1 Ko. 9:5) Bichi omufano gwage gwakayigiriza amarhwe m’emilala zene?

17. Bulagurhe kuli kw’akamaro erhwe ly’omulala ahe abantu b’omulala gwage ebintu by’ekiroho bakenere?

 ¹⁷ Mwene-werhu oli rhwe ly’omulala akaba eyi aherhe rhwasi rhunene rhulemerere. Omufano, akwanene agwarhe obushiru omu kasi kage k’omubiri y’alerhera Yehova obukuze. (Efe. 6:5, 6; Tit. 2:9, 10) Kandi akaba ey’aherhe makasi manene omu chibaga, nk’okulambagirira bene-berhu na bali-berhu omu kubahira omurhima, n’okuhubiri n’obushiru. Aho han’aho, bili by’akamaro ayinj’ayiga Ebiblia oku kahunda haguma na mukage n’abana. Basima bwenene okubona byoshi ali akola omu kubarhabala bagenderere kugwarha amagala menja, obusime n’okubarhabala bagenderere kukolera Yehova.​—Efe. 5:28, 29; 6:4.

18. Bichi Yowane alichizerere?

¹⁸ Yowane alilamire myaka minene, analipatire bintu binene bisimisize omu kalamo kage. Alihurene ebibazo bya ngasi buko byakahezeze obwemere bwage. Aliko esiku zoshi alijirire koshi y’akenga erhegeko lya Yesu, lihirirwe m’okuzigira bene-berhu na bali-berhu. Che charhumaga Yowane achizera oku Yehova na Yesu bamuzigire n’okubakamuhere emisi y’okulembera buli chibazo. (Yoh. 14:15-17; 15:10; 1 Yo. 4:16) Ntacho n’echiguma Shetani n’egulu lyage bakajirire mpu chibuze Yowane kuyerekana obuzigire kugerera ebinwa n’ebijiro byage.

19. Bichi olwandiko lwa 1 Yohana 4:7 lurhuhebere omurhima rhujire, na bulagurhe?

¹⁹ Kuguma na Yowane, rhulamire omu gulu lirhegekerwe na Shetani, mungu wa linola gulu oherhe olushombo. (1 Yo. 3:1, 10) Chiro akaba okw’alonzeze rhuleke kuzigira bene-berhu na bali-berhu, ntako akagala kujira ntyo nka rhurhamuyemerere. Rhujage rhwahigirira okuyereka bene-berhu na bali-berhu obuzigire kugerera ebinwa na kugerera ebijiro. Amango rhwamayerekana obuzigire rhwagwarha obusime b’okuba omu mulala gwa Yehova, rhwagwarha n’omwishingo gunene omu kalamo.​—Osome 1 Yohana 4:7.