1. Kangana gurhe embuganano yabaga omu mwaka gwa 1935 yalihumire oku murhima gwa murhabana muguma?

MURHABANA muguma aliherhe myaka 18 amango abatizwaga omu mwaka gwa 1926. Abazere bage baliri Banafunzi b’Ebiblia; intyo kw’Abahamirizi ba Yehova baliri bayirikwa mw’amola mango. Baliherhe barhabana basharhu na banyere babiri balembaga banabayigiriza gurhe bakakolera Yehova Mungu n’okuyiga omufano gwa Yesu Kristu. Kuguma n’Abanafunzi boshi be Biblia ba mw’ezola siku, oyola murhabana mwimana naye aliri alya omugati n’okunywa edivai buli mwaka oku Lwibuko. Aliko, obulangalire bwage bwahindamukaga loshi, amango ayunviriza ejambo ly’akamaro bwenene lirhakayibagirwa lyaliherhe erhwe liderhere “Echigusho Chinene.” Mwene-werhu Rutherford yewagezaga elyola jambo omu mwaka gwa 1935 oku mbugananano nkulu yabaga omu Washington, États-Unis. Bichi Abanafunzi b’Ebiblia balibishulirwe kw’eyola mbuganano?

2. Bukweri buhe busimisize Mwene-werhu Rutherford ayigirizaga omu jambo lyage?

² Omu jambo lyage, Mwene-werhu Rutherford ayerekana abantu bakabere bali omu “chigusho chinene” baderherwe omu lwandiko lwa Ufunuo 7:9. Kugera amola mango Abanafunzi be Biblia baliri bawaza oku echigusho chinene, chili chigusho ch’abantu bakajire embingu aliko barhagwerhe obwemere bukomere kuguma n’abashigwa. Mwene-werhu Rutherford akolesa amandiko omu kuyerekana okw’echigusho chinene barhali bantu bachishogerwe mpu baje embingu, si bali Bakristu  b’ezindi ntama * nji bafuma amalibuko makulu n’okulama esiku n’amango oku gulu. (Ufu. 7:14) Yesu alilaganyize ntya: “Ingwerhe ezindi ntama zirhali za mw’echila chigusho, nazo nkwanene kuzilerha, nazo zayunva omulenge gwani n’okuba chishumba chiguma, mungeri muguma.” (Yoh. 10:16) Ezola zindi ntama bali Bahamirizi ba Yehova bimana baherhe obulangalire b’okulama esiku n’amango omu paradizo oku gulu. (Mt. 25:31-33, 46) Muleke rhulole nka gurhe amola mafasiriyo mahyahya m’ekiroho malihindamwire akalamo ka bakozi banene ba Yehova, baheberwe mu n’olala murhabana wa myaka 18 rhwaderhaga.​—Zb. 97:11; Mez. 4:18.

3-4. Bichi bantu banene balirhegerere oku mbuganano yabaga omu mwaka gwa 1935, na bichi byarhumaga?

³ Kw’eyola mbuganano, byalisimisize bwenene amango omwigiriza abazaga abonviriza ntya: “Akaba byashoboka, balala boshi bagwerhe obulangalire b’okulama esiku n’amango oku gulu, mwakayumanga si?” Nk’oku muntu muguma waliri kw’eyola mbuganano aderhaga, mu bonviriza 20000 baliri kw’eyola mbuganano, bantu barhalwise 10000 bayumanga. Mwene-werhu Rutherford aj’aderha: “Mulole! Echigusho chinene!” Amalire kuderha ntyo abantu boshi bakubira n’obusime bunene. Balala bayumangaga bamenya oku gasi Mungu arhalichishogere bo oku baje embingu. Bamenya oku barhashigwaga n’eroho lya Mungu. Olusiku lwakulikiraga ho lw’embuganano, Bahamirizi bahyahya 840 babatizwa, na banene mu bo baliri b’omu zindi ntama.

⁴ Enyuma w’elyola jambo, ola murhabana rhwaderhaga n’ebindi bihumbi binene by’abantu balekeraho kulya omugati n’okunywa edivai oku Lwibuko. Mwene-werhu muguma ayerekana oku bwirhohye gurhe yewe yenyine na bantu banene balichiyunvirhe, amango aderhaga: “Nalyaga omugati n’edivai ob’obuzinda oku Lwibuko l’omwaka gwa 1935. Nayinja menya oku gasi Yehova arhampaga obulangalire b’okuj’embingu kugerera eroho lyage lichesibwa; s’ahubwe naliherhe obulangalire b’okulama esiku n’amango omu gulu lihyahya, n’okurhabala oku kasi k’okulijira libe paradizo.” (Ro. 8:16, 17; 2 Ko. 1:21, 22) Kurhenga amola mango, abantu b’echigusho chinene bali bayushuka, banali bakola haguma n’abashigwa bayorhere. *

5. Gurhe Yehova anabona balala balekere kulya omugati n’okunywa edivai oku Lwibuko?

⁵ Gurhe Yehova alibwene balala balekaga kulya omugati n’okunywa edivai enyuma w’omwaka gwa 1935? Na zene, gurhe kandi Yehova anabona Omuhamirizi obatizwe onalya omugati n’okunywa edivai amango m’Ebilyo by’Egolo bya Waliha, aliko buzinda anayinja kumenya oku gasi arhali mushigwa? (1 Ko. 11:28) Baguma banalya omugati n’okunywa edivai bulala barhamenyere bwinja obulangalire bwabo. Aliko nka bamarhegera oku bali bajira amagosa na ntyo bakaleka kulya omugati n’okunywa edivai, bakanagenderera kukolera Yehova oku bwimana, kweri abaganja omu zindi ntama. Chiro akaba oku barhalya omugati n’okunywa edivai, banagenderera kugera oku Lwibuko bulala basimisizwe bwenene n’ebi Yehova na Yesu babajirire.

6. Bichi Yesu abwirire bamalayika bajire?

⁶ Bulala amalibuko makulu mali hofi bwenene, kuli kwinja rhushube rhugerereze eby’olwandiko lwa Ufunuo sura ya 7 luderhere eju y’Abakristu bashigwa na balala b’echigusho chinene ch’ezindi ntama. Yesu ahere ba malaika erhegeko ly’okugenderera kufarhirira bihusi bine by’okulimbula. Bakwanene bagenderere kubifarhirira birhashurhaga egulu, kugera amango Abakristu bashigwa boshi nji baba baheberwe kw’echimenyeso ch’obuzinda ch’okuyerekana oku Yehova abayemerere. (Ufu. 7:1-4) Eju y’obwimana bwabo, bene-berhu na bali-berhu b’abashigwa nji bahabwa oluhembo l’okuba bami na badahwa omu mbingu. (Ufu. 20:6) Yehova, Yesu na bamalaika nji basima bwenene okubona bashigwa 144000 bapata oluhembo lwabo omu mbingu.

7. Nk’oku olwandiko lwa Ufunuo 7:9, 10 lushambere, bande Yowane abonaga omu chibonekezi, na bichi baliri bajira? (Olole efoto eli oku chiganda.)

⁷ Amalire kushambala eju ya bami na badahwa 144000, Yowane ashuba kubona echindi chintu chisimisize bwenene, “echigusho chinene” ch’abantu bafumire Armagedoni. Ebyola bigusho byombi birhali kuguma bulala echigusho cha kabiri chili mu bantu banene bwenene na ntaye wakagala kubaganja. (Osome Ufunuo 7:9, 10.) “Bayambere amakanzo (bishuli) m’omweru,” k’okuderha oku bagenderere “kuchiyasa n’ezinga” ly’egulu lya Shetani n’okugenderera kuyorha bimana embere za Mungu na Kristu. (Yak. 1:27) Balibaderha oku mulenge gunene oku bapatire obuchunguke kugerera ebi Mungu na Kristu bakolere. Kandi bafarhire emirhabi y’emirhanda omu fune eyerekene oku bayemerere n’obusime Yesu nka Mwami Yehova ashimikire.​—Ohuzanye na Yohana 12:12, 13.

8. Bichi olwandiko lwa Ufunuo 7:11, 12 lurhubwirire oku bilolere omulala gwa Yehova g’omu mbingu?

⁸ Osome Ufunuo 7:11, 12. Bichi byalibere embingu amango abaliyo babonaga echigusho chinene? Yowane abona omulala gwa Yehova goshi gw’embingu guyunjulirene busime bunene, gwaha Mungu obukuze. Buli muntu omu mbingu nj’ayunva asimire bwenene amango ebyola bibonekezi nji byayenera, n’okubona echigusho chinene chafuma amalibuko makulu.

9. Nk’oku olwandiko lwa Ufunuo 7:13-15 luderhere, bichi balala bali omu chigusho chinene bali bajira zene?

⁹ Osome Ufunuo 7:13-15. Yowane ayandikire okw’abantu bali omu chigusho chinene “bameshere amakanzo mabo omu shagama y’Omwana-buzi.” Okola kuli kuderha oku bagwerhe ezamiri zichere, na Yehova asimisizwe n’ebi bali bakola. (Isa. 1:18) Bali Bakristu bachihanire emwa Mungu, babatizwe banagenderere kuyerekana obwemere bukomere omu nterekero y’enchungu ya Yesu, banaherhe obwira bukomere haguma na Yehova. (Yoh. 3:36; 1 Pe. 3:21) Che chirhumire Mungu asimisizwe n’ebi bali bakola banali bamukolera akasi kachesibwa ebudufu n’ezuba hanola oku gulu. Zene baherhe bushiru bunene banali baheba akasi k’okuhubiri n’okujira abanafunzi oku nafasi y’oburhanzi, bulala bamenyere oku Obwami bwa Mungu bobugwerhe akamaro kulusha ebyabo bowe bonyine.​—Mt. 6:33; 24:14; 28:19, 20.

10. Bichi abantu bali omu chigusho chinene bachizere na chilagane chihe nji babona chayenera?

¹⁰ Abantu bali omu chigusho chinene bachizerere oku nji bafuma amalibuko makulu bulala Yehova nj’agenderera kubashishikala. Nechi, “Olala oyikere oku chirhi ch’obwami nj’abalambulira kw’ehema lyage.” Echila chilagane ezindi ntama zaliri zalingiriza oku nyorha nene, nji chaba eyi chamayenera: “Mungu  nj’ashangula emiziga yoshi omu masu mabo, n’olufu lurhakachibaho, changwa emishibo, endulu, changwa amalumwa birhakachibaho chiro n’akatyu.”​—Ufu. 21:3, 4.

11-12. a) Nk’oku olwandiko lwa Ufunuo 7:16, 17 lushambere, migisho michi abantu bali omu chigusho chinene nji bapata? b) Bichi ezindi ntama zakajira oku Lwibuko, na bulagurhe?

¹¹ Osome Ufunuo 7:16, 17. Zene, baguma omu bakozi ba Mungu bali balibuka bwenene n’enzara bulala barhagwerhe efuranga zitosheze z’okugula ebi bakenere, changwa eju y’ebibazo bilerherwe n’evita. Abandi bali bashwekwa eju y’obwemere bwabo. Aliko balala bali omu chigusho chinene baherhe obusime b’okumenya okw’amango elila gulu libi nji lyalimbulwa, esiku zoshi nji baba eyi bagwerhe ebilyo bitosheze by’ekiroho n’eby’omubiri. Amango elila gulu libi lya Shetani nji lyalimbulwa, abantu bali omu chigusho chinene nji bayaswa “echuka chikalihire” ch’oburhe Yehova nj’asheshera oku bantu b’amashanja. Hanola amalibuko makulu nji maba mamahwa, Yesu nj’ayerekeza aba nji bafuma emunda “amenji m’akalamo [k’esiku n’amango]” mali. Ba nka wawaza: Abantu b’echigusho chinene baherhe obulangalire bukwirire bwenene. Amamiliyoni m’abantu barhakahonja olufu, hali oku nji barhanachifire!​—Yoh. 11:26.

¹² Ab’ezindi ntama bagwerhe obulangalire bukwirire bwenene burhumire bagwerhe eshukurani ku Yehova na Yesu! Chiro akaba oku Yehova arhachishogaga bo yi baja kulama embingu, abazigire kuguma nk’okw’azigire abashigwa. Abantu bali mw’ebyola bigusho byombi bakwanene bakuze Mungu na Kristu. Njira nguma banajiramo ntyo, kuba kugera oku Lwibuko l’Olufu lwa Yesu.

13-14. Bulagurhe buli muntu akwanene ahike oku Lwibuko l’olufu lwa Kristu?

¹³ Omu myaka ya hanola hofi-hofi egerere, hofi muntu 1 ku 1000 omu banaja oku Lwibuko, ye nalya omugati n’okunywa edivai. K’okuderha oku mu bibaga binene murhali chiro na muntu muguma w’okulya omugati n’okunywa edivai. Banene bwenene omu banahika oku Lwibuko baherhe obulangalire b’okulama oku gulu. Bichi birhuma si baja bayinja oku Bilyo by’Egolo bya Waliha? Banayinja nka kulala abantu banaja oku buhya bwa bera-babo.  Banaja oku buhya omu kulonza bayerekane obuzigire, banarhabale omusole n’omunyere bashabene. Konakuguma, ezindi ntama zinaja oku Lwibuko omu kulonza ziyerekane obuzigre bwabo, n’okurhabaka Kristu n’abashigwa. Kandi ezindi ntama zinaja oku Lwibuko omu kulonza bayerekane eshukurani oku nterekero ya Yesu erhumire byashobokana oku nji balame esiku n’amango oku gulu.

¹⁴ Eyindi mpanvu y’akamaro erhuma ab’ezindi ntama bagera oku Lwibuko, kuli kukenga erhegeko lya Yesu. Amango Yesu ahwanzisaga Ebilyo by’Egolo bya Waliha haguma n’entumwa zage, ababwira ntya: “Mugenderere kujira ntya omu kunyibuka.” (1 Ko. 11:23-26) Che chirhumire bagenderere kuhika oku Lwibuko l’olufu lwa Yesu bulala bashigwa baguma bachili oku gulu. Bobola ezindi ntama zinahamagala buli muntu ayinje kw’eyola mbuganano haguma nabo.

15. Nka gurhe buli muguma werhu akakuza Mungu na Kristu oku Lwibuko?

¹⁵ Oku Lwibuko, rhunapata akasanzi k’okukuza Mungu na Kristu kugerera olwimpo n’esala. Erhwe ly’ejambo nji lyagera mu gunola mwaka liderhere ntya: “Oyerekane ok’Osimisizwe n’Ebi Mungu na Kristu Bakujirire!” Inji lyakomeza eshukurani yerhu ku Yehova na Yesu. Ok’omugati n’edivai nji byaba bilibyagera, nji byarhuha akasanzi k’okuwaza oku by’eyola mifano eshushanyize, k’okuderha omubiri n’eshagama ya Yesu. Nji rhwayibuka oku Yehova ayemeraga Omugala afe ahali herhu yi rhupata akalamo. (Mt. 20:28) Buli muntu osimire Darha w’embingu n’Omugala nj’ayunva asimire agere oku Lwibuko.

16. Mu njira zihe abashigwa n’ezindi ntama boshi bali kuguma?

¹⁶ Mu njira ziguma abashigwa n’ezindi ntama boshi bali kuguma. Yehova arhazigira chigusho chiguma kulusha echindi. Ebyola bigusho byombi biherhe akachiro kanene emalangambere mage. N’ahanene, alipaga beyi liguma, k’okuderha akalamo k’Omugala muzigirwa, y’agula abola bashigwa, n’ezola zindi ntama. Echirhali kuguma mw’ebyola bigusho bibiri, buli bulangalire bwabo. Abantu b’ebyola bigusho byombi bakwanene bayorhe bimana embere za Mungu n’embere za Kristu. (Zb. 31:23) Onayibuke okw’eroho lya Mungu lyakarhuha obuhashe buli kuguma rhweshi. K’okuderha oku Yehova anaha eroho lyage lichesibwa buli muntu nk’okw’alikenere; abe mushigwa changwa yindi ntama.

17. Bichi abashigwa bayorhere balangalire?

¹⁷ Abakristu bashigwa barhaburhwana n’obulangalire b’okuja embingu. Mungu ye baha obola bulangalire. Banawaza eju y’obulangalire  bwabo, banasalira eju yabo, baherhe n’enyorha nene y’okuhabwa oluhembo lwabo l’okuja embingu. Aliko barhakamenya gurhe emibiri yabo y’eroho nji yaba embingu. (Flp. 3:20, 21; 1 Yo. 3:2) Chiro akaba ntyo, balangalire okubona Yehova, Yesu, bamalaika n’abandi bashigwa. Basimire bwenene okuba haguma nabo omu Bwami bw’embingu.

18. Bichi ezindi ntama zilangalire?

¹⁸ Ezindi ntama zisimire bwenene obulangalire b’okulama esiku n’amango oku gulu. Buli muntu ajira eyola nyorha. (Muh. 3:11) Yi balingiriza amango nji barhabala oku kasi k’okujira egulu lyoshi libe paradizo. Arhali banji balorha olusiku lwahika nji bayumbaka enju zabo bonyine, babyale emyaka yabo, n’okulemba abana babo omu magala mashinganene. (Isa. 65:21-23) Balangalire okulambagira omu gulu, kuja kulola emisozi, ebibala, enyanja, n’okuyiga binene bwenene eju y’obulemi bwa Yehova. N’ech’akamaro kulusha, baherhe obusime bwenene okumenya ok’obwira bwabo haguma na Yehova nji bwagenderera kukomera bwenene.

19. Olwibuko luhere buli muntu akasanzi k’okujira bichi, na mangochi nji rhwalujira mu gunola mwaka?

¹⁹ Yehova ahere buli yeshi wachihanire emwage obulangalire bwinja bw’amango mayinjire. (Yer. 29:11) Olwibuko l’Olufu lwa Yesu luhere buli muguma mu rhwewe akasanzi k’okukuza Mungu na Kristu ku bilala byoshi barhujirire yi rhupata akalamo k’esiku n’amango. Nta ngangane, Olwibuko kali kasanzi k’akamaro bwenene kanarhuma Abakristu b’okuli boshi baba haguma. Olwibuko lwa gunola mwaka nji lwaba Lweboso, Siku 27 Mwezi gwa 3, 2021 ezuba liyusa kuzika. Gunola mwaka bantu banene nji bahika kw’eyola mbuganano y’akamaro bwenene buzira chibazo. Abandi nji bagera kw’eyola mbuganano chiro akaba oku bali bahurana obupinzani. Hali abandi nji bajira Olwibuko eyi banali omu pirizo. Oku Yehova, Yesu, bamalaika, n’abashigwa bafukire nji baba bali balola, buli chibaga, buli chigusho, na buli muntu; mweshi nji mugeze olusiku lwinja bwenene l’Olwibuko!