1. Kuguma n’Omwami Daudi, bichi baguma mu rhwewe bakabaza?

RHWESHI rhusima okulama akalamo karhulerere kanali m’omurhula. Nta muntu onasima achiyunve alagire. Aliko mango maguma rhwakalwisa emilago. Che chirhumire bakozi baguma ba Yehova bakabaza echibazo nk’oku Mwami Daudi naye abazaga Yehova: “Kugera mangochi nagenderera kulaga, n’okugwarha omugayo omu murhima buli lusiku?”​—Zb. 13:2.

2. Bichi rhwaganirira mu gunola mwazi?

² Chiro akaba oku rhweshi rhunachiyunva rhulagire mango maguma, hali ebintu rhwakajira yi rhupunguza oku milago yerhu. Mu gunola mwazi rhwarhanga kuganirira bintu biguma byakarhuma rhwachiyunva rhulagire. Enyuma w’aho, rhwaja rhwaganirira bintu ndarhu byakarhurhabala rhugenderere kurhulera amango rhulirhwalwisa ebibazo byerhu.

3. Bintu bihe bili byarhulaza? Ka rhuherhe obuhashe b’okubibuza?

³ Rhwakaba eyi rhugwerhe buhashe bugeke bonyine b’okumala ebintu birhulazize changwa hali oku rhwakaba eyi ntanabo. Omufano, rhurhakamenya furanga zingana gurhe rhwakolesa oku kalyo, emyambaro, n’okulipira enju buli mwaka; chiro rhurhakanagala kubuza abarhunakola nabo, abarhusoma nabo, baleke kurhushumika omu bulyalya changwa rhukole eby’obubaraga. Echindi, rhurhakagala kubuza obubandi buli bwajirika aharhulamire. Yi rhwahurana ebibazo bulala rhulamire omu gulu amawazo ma bantu banene mapingene n’amakanuni m’Ebiblia. Shetani, mungu wa linola gulu amenyere oku bantu baguma baleka emilago ya linola gulu ebabuze kugenderera kukolera Yehova. (Mt. 13:22; 1 Yo. 5:19) Che chirhumire birhakasomeza okubona okw’egulu liyunjwire  mw’ebibazo binene bilibyarhuma abantu bachiyunva balagire!

4. Gurhe rhwakajira nka rhwamayunva rhulagire bwenene eju y’ebibazo byerhu?

⁴ Hali oku rhwakayinja rhwaseza obwenge bwerhu bwenene oku bintu birhulazize hoshaho, eyi nta chindi chintu rhwachiwazako. Omufano, hali oku rhwakayubaha bwenene oku rhurhapata efuranga zitosheze z’okugula ebintu rhukenere, changwa rhulwale eyi rhurhagala kukola akasi kerhu changwa rhukaheze. Kandi rhwakayunva rhuyubahire bwenene oku rhwaheza obwimana bwerhu amango bamarhushumika rhuvune erhegeko lya Mungu. Hanola hofi-hofi Shetani ashumika balala arhegekere barhere abantu ba Mungu. Bobola rhwakachibaza gurhe nji rhwajira amango nji byaba ntyo. Hali oku rhwakaja rhwachibaza mpu; ‘Kuli kubi okuchibaza gurhe nji rhwajira amango nji barhurhera si?’

5. Bichi Yesu alonzaga kuderha amango aderha: “Muleke okulaga”?

⁵ Rhumenyere oku Yesu alibwirire abanafunzi bage ntya: “Muleke okulaga.” (Mt. 6:25) K’okuderha oku alonzaga kuderha ku nta mango n’amaguma rhwakayunva rhulagire si? Haba n’akatyu! Ahubwe bakozi baguma ba Yehova bimana ba mira, balilwisize emilago, aliko Yehova arhabalahiraga eju y’echola. * (1 Fa. 19:4; Zb. 6:3) Omu bukweri, Yesu aliri arhuhanula. Arhalisimire rhukayunva rhulagire bwenene amango rhuli rhwalwisa ebibazo by’akala kalamo, omu kuntu birhubuze kukolera Yehova. Lero si, gurhe rhwakaja rhwajira amango rhwamayunva rhulagire bwenene eju y’ebibazo?—Olole echisanduku “ Ebi Wakajira.”

6. Nk’oku olwandiko lwa Wafilipi 4:6, 7 luderhere, bichi byakarhurhuleza omu milago yerhu?

⁶ 1) Osalire buli mango. Abakristu bali omu bibazo banachiyunva barhulerere eyi basalira Yehova n’omurhima goshi. (1 Pe. 5:7) Yehova akashubiza amasala mawe omu kukuha “omurhula gwa Mungu gurhalukire obumenyi boshi bw’abantu.” (Osome Wafilipi 4:6, 7.) Yehova arhuleza amawazo merhu malagire bwenene, kugerera eroho lyage lichesibwa.​—Gal. 5:22.

7. Bichi rhukwanene kuyibuka amango rhuli rhwasalira Mungu?

⁷ Amango wamayegera Yehova omu sala, omufungulire omurhima gwawe goshi. Ntacho omubishage. Omubwire echibazo ogwerhe onamufasiriye gurhe yi wachiyunva eju yacho. Akaba hali ok’owazize wakamala echibazo chawe, omuheme emisi n’obwengehe b’okujira ntyo. Akaba echola chibazo chikuchubukire, oheme Yehova akurhabale orhavaga wakabya omu kuchiyubaha. Amango wamaderha ebintu wazi omu masala mawe, buzinda wanabona gurhe Yehova akushubize. Akaba echishubizo chirhayinjire han’ahola enyuma w’okusalira, orhavunikaga omurhima. Yehova arhalonzeze k’obe wazi konyine, s’analonzeze ogenderere kusalira.​—Lu. 11:8-10.

8. Bichi rhukwanene kuhira omu masala merhu?

⁸ Amango oli wakabulira Yehova emilago yawe omu sala, ochihangane kuhira mu n’ebinwa by’okumubwira koko. Kuli kwinja rhuhanze rhwayibuka emigisho rhuli rhwapata, chiro n’amango rhuli omu bibazo bikomere. Akaba hali ok’onabona nka wabulire ebinwa bikwanene by’okuderha gurhe oli wachiyunva, oyibuke oku Yehova anashubiza n’oku  masala ma ntyantya, nk’ok’omuntu akaderha mpu ‘Ontabale wekalamawe!’​—2 Ny. 18:31; Ro. 8:26.

9. Nka gurhe obulanzi b’okuli bwakabonekana?

⁹ 2) Olangalire obwengehe bwa Yehova, s’arhali obwawe wenyine. Mango maguma omu siku z’omulebi Isaya, Abayahudi baliyubahire okurherwa n’Abanyaashuru. Omu kulonza barhabahimaga, bava baja kuhema Abamisri babarhabale. (Isa. 30:1, 2) Yehova abahanula k’okulangalira Abamisri kwakabalerhere obuhanya. (Isa. 30:7, 12, 13) Yehova akolesa Isaya omu kubwira abantu gurhe obulanzi b’okuli bwakabonekana. Aderha ntya: “Mwaba n’emisi mukagenderera kurhulera n’okugwarha obulangalire” mu Yehova.​—Isa. 30:15b.

10. Mu hali zihe ziguma rhwakayerekanamo oku rhulangalire Yehova?

¹⁰ Nka gurhe rhwakayerekana oku rhulangalire Yehova? Rhulole mifano miguma. Rhuderhe nka bamaguha akasi kaherhe mushahara gunene, aliko kakuhemere bisanzi binene omu kuntu orhagala kukola byoshi by’ekiroho okwanene kukola. Changwa rhuderhe oku muntu muguma munakola naye akalonza akushambaze aliko ey’arhali mukozi wa Yehova obatizwe. Changwa rhuderhe ok’omuntu w’omu mulala gwawe ozigire bwenene amakukomereza n’okukubwira ntya: “Ochishoge akaba nyono changwa Mungu wawe.” Mw’ezola hali zoshi waba eyi oli embere w’echintu chikomere bwenene bihemere ochishoge, aliko mu buli hali Yehova akuha ehano okenere. (Mt. 6:33; 10:37; 1 Ko. 7:39) Echibazo che chinola, wanalangalira elyola hano n’okulikolesa si?

11. Ngani zihe zili omu Biblia rhwakayiga yi rhugenderera kurhulera amango rhulirhwahurana obupinzani?

¹¹ 3) Ebi wakayiga kugerera emifano minja n’emibi. Ebiblia eli mu ngani zinene ziyerekene akamaro k’okugenderera kurhulera n’okulangalira Yehova. Amango oli wayiga ezola ngani, olole bichi byarhabalaga abakozi ba Mungu bagenderere kurhulera n’okulangalira Yehova amango baliri bahurana obupinzani bukomere. Omufano, entumwa zirhaliyubahire amango olubuga lukulu lw’Abayahudi lwabalahizaga oku barhagendereraga kuhubiri. Ahubwe baderha ntya n’obushiru boshi: “Rhukwanene kukenga Mungu nka Murhegesi kulusha abantu boshi.” (Mdo. 5:29) Chiro banachimala kuzikobola, entumwa zirhajanjabalaga. Charhumaga? Bulala balimenyere oku Yehova ali haguma nabo. Ayunva bamusimisize. Na ntyo, bagenderera kuhubiri emyazi minja. (Mdo. 5:40-42) Konakuguma, amango omwanafunzi Stefano aliri hofi kufa, aligenderere kurhulera, omu kuntu amalanga mage maliri mabonekana “nka malanga ma malaika.” (Mdo. 6:12-15) Charhumaga? Bulala alichizerere oku Yehova amuyemerere.

12. Nk’oku olwandiko lwa 1 Petro 3:14; 4:14 luderhere, bulagurhe rhwakagwarha obusime amango balibarhulibuza?

¹² Haliri ebintu byaliri byayemeza entumwa oku Yehova ali haguma nabo. Alibahere emisi y’okukola ebisomerene. (Mdo. 5:12-16; 6:8) Rhwewe rhurhaherhe obola buhashe b’okukola ebisomerene zene. Chiro akaba ntyo, kugerera Echinwa chage, Yehova arhunihize oku rhukagenderera kurhulera amango rhuli rhwalibuzwa eju y’okunali, rhwaba eyi rhuli rhwamusimisa, naye agenderera kurhurhabala kugerera eroho lyage. (Osome 1 Petro 3:14; 4:14.) Che chirhumire ahali h’okuseza obwenge bwerhu omu kuntu nji rhwajira amango m’obupinzani bwayinjire, rhukwanene kuseza obwenge bwerhu oku birhwakagala kujira zene yi rhukomeza obulangalire omu buhashe bwa Yehova b’okurhurhabala  n’okurhuyokola. Kuguma n’okw’abanafunzi ba Yesu bajiraga, rhukwanene kulangalira echila chilagane cha Yesu: “Nji nabaha ebinwa n’obwengehe abapinzani benyu boshi haguma nji barhagala kuhima changwa kuhakana.” Rhugwerhe echilagane rhuchizerere: “Kugerera okulembera kwenyu, nji mwayokola akalamo kenyu.” (Lu. 21:12-19) Orhanahira okayibagira oku Yehova ab’ayibukire emyazi yoshi elolere abakozi bage bafire banali bimana embere zage. Nj’abafula bulala ayibukire ntyo.

13. Bunguke buchi rhwakapata amango rhwamayiga engani za balala bagambwaga kugenderera kurhulera n’okulangalira Yehova?

¹³ Emifano y’abantu bagambwaga kurhulera n’okulangalalira Yehova, nayo yakashuba kurhuyigiriza binene. Okuyiga engani zishambere eju y’eyola mifano mibi, kwarhurhabala rhumenye rhurharhogera omu magosa mali nk’amabajiraga. Omufano, amango Omwami Asa we Yuda ahwanzaga kurhegeka, alilangalire Yehova amango ajaga kulwa n’omuhule gw’abasoda, na Yehova amugisha, ahimana. (2 Ny. 14:9-12) Aliko, buzinda amango echigusho chigeke ch’abasoda ch’Omwami Baasha we Izraeli chiyinja kumulwisa, Asa ahonga abasoda ba Banyasiriya bayinje bamurhabale, ahali h’okulangalira Yehova nk’okwajiraga burhanzi. (2 Ny. 16:1-3) N’amango aliri hofi kufa, amango alwalaga bwenene, arhalangaliraga Yehova amurhabale.​—2 Ny. 16:12.

14. Bichi amagosa ma Asa makarhuyigiriza?

¹⁴ Burhanzi, Asa alilangalire Yehova amango aliri ahurana n’ebibazo. Aliko buzinda afunda kuhema Mungu wage oburhabale, ahubwe achishoga kubilwisa yenyine nk’okw’anabwene. Burhanzi, byalibonekene nk’omupango gwa Asa g’okuhema Abanyasiriya bamurhabale kulwisa Abaizraeli, gwaliri gwinja bwenene. Aliko omurhula gw’Abayuda gurhagendereraga. Yehova abwira Asa ntya kugerera mulebi muguma: “Obola walilangalire omwami we Siriya wafunda kulangalira Yehova Mungu wawe, abasoda be Siriya bakufulumukire.” (2 Ny. 16:7) Rhukwanene rhuchilange rhurhava rhwayunva rhuchilangalire omu kulwisa ebibazo byerhu nk’okurhunabwene, n’okubula kukenga amahano Yehova ali arhuha kugerera Echinwa chage. Chiro rhwahurana echibazo chihemere okujira juba-juba, rhukwanene kulangalira Yehova eyi rhunarhulerere, naye arhurhabala rhuchihime.

15. Gurhe rhukwanene kujira amango rhulirhwasoma Ebiblia?

¹⁵ 4) Obike amandiko me Biblia omu rhwe. Nka wamagera oku mandiko m’Ebiblia mayerekene gurhe wakapata emisi amango wamagenderera kulangalira Yehova, ochihangane omabike omu rhwe. Okumagalukira buli mango n’omulenge, n’okumayandika kwakakurhabala omafarhe omu rhwe. Yehova alibwirire Yoshuwa agenderere kusoma echitabu ch’amarhegeko oku kahunda n’oku mulenge gw’eshishi y’akola n’obwengehe. Ebyakasomere omu chitabu ch’amarhegeko byakamurhabere ahime obuba anagwarhe obushiru b’okuyerekeza olubaga lwa Mungu. (Yos. 1:8, 9) Binwa binene bili omu chinwa cha Mungu byakarhuleza obwenge n’omurhima gwawe amango oli omu bibazo bikulazize changwa oyubahire.​—Zb. 27:1-3; Mez. 3:25, 26.

16. Gurhe Yehova anakolesa echibaga omu kurhurhabala rhugenderere kurhulera n’okumulangalira?

¹⁶ 5) Oyegere abantu ba Mungu. Yehova anakolesa bene-berhu na bali-berhu omu kurhurhabala rhugenderere kurhulera n’okumulangalira. Oku mbuganano zerhu, rhunayunguka bwenene n’amajambo, ebishubizo  binahanwa, n’enganiro rhunajira na bene-berhu na bali-berhu embere changwa enyuma w’embuganano. (Ebr. 10:24, 25) Rhwakashuba kuhirwa omurhima bwenene amango rhwamabwira mwira werhu rhulangalire omu chibaga gurhe rhuli rhwachiyunva. “Echinwa chikwirire” mwene-werhu akarhubwira, chakarhurhabala rhurhavaga rhwachiyunva rhuyubahire bwenene.​—Mez. 12:25.

17. Nk’oku olwandiko lwa Waebrania 6:19 luderhere, nka gurhe obulangalire bwerhu b’Obwami bwakarhurhabala rhurhahehwaga amango rhuli omu bibazo?

¹⁷ 6) Ogenderere kukomeza obulangalire bwawe. Obulangalire bwerhu b’Obwami bunakola “nka nanga y’obuguma-guma,” enarhurhabala rhumenye rhwahehwa amango m’ebibazo changwa amango amawazo marhuchubukire. (Osome Waebrania 6:19.) Owaze oku bilagane bya Yehova by’amango mayinjire amango nta bintu bibi byoshi-byoshi nji byachirhulaza. (Isa. 65:17) Owaze omu bwenge woyo wenyine gurhe oli mw’elyola gulu lihyahya ly’omurhula, egulu lirhakachiba chiro mu chintu n’echiguma ch’okurhugayisa. (Mik. 4:4) Washuba kukomeza obwemere bwawe amango oli waganira n’abantu eju y’amola mango mayinjire. Ochihangane ojire okwawe koshi wakagala omu kasi k’okuhubiri n’okujira abanafunzi. Nk’ojirire ntyo, “wagwarha obwizere bukomere b’obulangalire kugera oku buzinda.”​—Ebr. 6:11.

18. Bibazo bihe rhwakahurana nabyo amango mayinjire na gurhe rhwakabihima?

¹⁸ Okw’elila gulu libi lili lyayegereza obuzinda bwalyo, rhwagenderera kuhurana ebibazo by’okurhulaza. Olwandiko lwerhu l’omwaka gwa 2021 lwakarhurhabala rhugenderere kurhulera, arhali mpu kugerera emisi yerhu rhwenyine, si kugerera obulangalire rhuherhe ku Yehova. Mu gunola mwaka, muleke rhuyerekane kugerera ebijiro byerhu okurhuherhe obwemere mw’echila chilagane cha Yehova: “Mwaba n’emisi mukagenderera kurhulera n’okugwarha obulangalire.”​—Isa. 30:15.