MWAZI G’OKUYIGA 1
“Balala Banalonza Yehova nta Chinja Bebule”
OLWANDIKO LWERHU L’OMWAKA GWA 2022: “Balala banalonza Yehova nta chinja bebule.”—ZB. 34:10.
OLWIMPO 4 “Yehova ni Muchungaji Wangu”
OKU BUGEKE *
Daudi alichiyunvirhe oku ‘nta chintu chinja abulire, ’ chiro akaba oku aliri omu mango m’ebibazo (Olole echifungo cha 1-3) *
1. Bibazo bihe Daudi alihurene?
DAUDI aliri alibirha y’ayokola akalamo kage. Sauli, omwami we Izraeli waliherhe emisi alihigirire kumuyirha. Amango Daudi alikenere eby’okulya, ayimanga omu vile ye Nobu, ahema migati erhano yonyine. (1 Sa. 21:1, 3) Enyuma waho, yewe n’abalume aliri nabo balibirhira omu lukunda. (1 Sa. 22:1) Bichi byarhumaga Daudi agera mw’eyola hali?
2. Bintu bihe bibi bwenene Sauli aliri ajira? (1 Samweli 23:16, 17)
2 Sauli aliyunvirhire Daudi obongwa bulala abantu balimusimire n’okumukuuza bulala alihimire mavita manene. Kandi Sauli alimenyere ok’okurhakenga kwage kwabaga kwarhumire Yehova amujahika arhachibaga mwami we Izraeli. (Osome 1 Samweli 23:16, 17.) Chiro akaba oku Yehova abaga achishogere Daudi ye bage mwami we Izraeli ahali hage, Sauli alichili mwami we Izraeli eyi aherhe na bazoda banene, na bantu banene baliri oku lunda lwage. Daudi alikwanene alibirhe y’ayokola akalamo kage. Sauli ali wazize si oku kweri akagala kulwisa omuhigo gwa Mungu g’okujira Daudi mwami? (Isa. 55:11) Ebiblia ntacho ederhere, aliko rhwakachizera chintu chiguma: Sauli aliri ahanyagaza akalamo kage yewe yenyine. Balala balwisa Mungu banahimwa esiku zoshi!
3. Gurhe Daudi aliri achiyunva chiro akaba oku aliri omu bihe bikomeere?
3 Daudi aliri muntu mwirhohye. Arhali ye wachishogaga kuba mwami we Izraeli. Yehova yi wachishogaga ye mpu abe mwami. (1 Sa. 16:1, 12, 13) Sauli ashomba bwenene Daudi. Aliko Daudi arhazimuliraga Yehova k’obola buhanya aliri mo; arhanazimuliraga Yehova bulala aligwerhe eby’okulya bigeke, n’oku byali bimuhemere achibishe omu lukunda. Ahali h’okujira ntyo, amango alichibishire omu lukunda, nkabaga y’ayimpaga olwimpo lukwirire bwenene l’okukuuza Mungu, luli mw’ebinwa gunola mwazi gwerhu guyimangiireko: “Balala banalonza Yehova nta chinja bebule.”—Zb. 34:10.
4. Bibazo bihe rhwashambalako, na bulagurhe bili by’akamaro?
4 Zene banene omu bakozi ba Yehova barhaherhe eby’okulya bitosheze, changwa ebintu by’omubiri bakenere yi bagenderera kulama. * Ebyola byahikiire bakozi banene ba Yehova ahanene mu chinola chihe ch’obulwala b’okuyahukira. N’ebintu byagenderera kukomera oku rhunali rhwayegera “amalibuko makulu” mali embere. (Mt. 24:21) Bobola kwakaba kwinja rhushubize kw’ebila bibazo bine: Mu njira nchi Daudi “arhabulaga echintu chinja”? Bulagurhe rhukwanene kuyiga kutosheka n’ebirhugwerhe? Bulagurhe rhwakachizera oku Yehova arhushishikala? Na nka gurhe zene rhwakachirheganya oku mango mayinjire?
“NTACHO NABULA”
5-6. Gurhe Zaburi 23:1-6 erhurhabere rhuyunve bwinja bichi Daudi alonzaga kuderha amango aderha mpu abakozi ba Mungu “nta chintu chinja bebule”?
5 Bichi Daudi alilonzeze kuderha amango aderha mpu abakozi ba Yehova “nta chintu chinja bebule”? Amango Daudi ayandikaga e Zaburi ya 23 aliderhere ebinwa bili nk’ebyola. Bobola eyola zaburi yakarhurhabala rhumenye bichi Daudi ashondaga kuderha. (Osome Zaburi 23:1-6.) Daudi arhonderaga eyo zaburi omu kuderha ntya: “Yehova ali mungeri wani. Ntacho nabula.” Omu yindi mistari y’eyila zaburi, Daudi aderha ebindi bintu by’akamaro bwenene—nk’ebintu binja Yehova amuhere bulala ayemerere oku Yehova ali mungeri wage. Yehova anamuyerekeza “omu njira y’okunali,” n’oku anamurhabala oku bwimana omu mango menja n’omu mango m’ebibazo. Daudi amenyere oku akalamo kage omu “chishumba chili m’obwasi” cha Yehova karhakabula mw’ebibazo. Mango maguma akavunika omurhima, n’echola achihuzenye n’okulambagira omu “lubanda luli mw’embehema enene bwenene,” n’oku agwarha abashombanyi. Aliko bulala Yehova ali mungeri wage, “nta buhanya ayubaha.”
6 Lolaga echishubizo ch’echibazo cherhu: Mu njira nchi Daudi ‘arhalibulire echintu chinja’? Aligwerhe buli chintu alikenere y’agenderera kubera haguma na Yehova. Arhalikenere kugwarha bintu binene mpu y’agwarha obusime. Daudi alitoshekere n’ebi Yehova aliri amuhereza. Echintu ch’akamaro bwenene ku yewe, yali migisho n’obulanzi Yehova aliri amuhereza.
7. Nk’oku olwandiko lwa Luka 21:20-24 luderhere, bibazo bihe Abakristu b’omu myaka 100 ya burhanzi balilamire e Yudeya balihurene?
7 Ebinwa bya Daudi birhurhabere kumenya oku bili by’akamaro bwenene okurhabona okw’ebintu by’omubiri bili by’engenzi bwenene. Kweri rhwakasiimira ebintu by’omubiri byoshi-byoshi rhwakaba rhugwerhe aliko rhurhakwanene kubona oku bye by’akamaro bwenene omu kalamo kerhu. Echola ch’echintu ch’akamaro Abakristu balilamire omu Yudeya omu myaka 100 ya burhanzi balikwanene bamenye. (Osome Luka 21:20-24.) Yesu alibahanwire oku hakagerere amango evile ye Yerusalemu “yakagorherwe n’abasoda bahandire.” Amango echola chakarhengerere, balikwanene “balibirhire oku misozi.” Okulibirha kwabo kwakabarhabere bayokole akalamo kabo, aliko byakabahemere baleke bintu binene. Omu myaka egerere, Omunara g’Omulanzi gwaliderhere ntya: “Baleka amashwa n’ah’amwababo, barhanagushaga chiro n’ebirugu byabo omu nju. Balilangalire oku Yehova abalanga n’okubarhabala; bahira obuharamye bwage embere y’echindi chintu choshi-choshi bakabwene oku chili ch’akamaro.”
8. Chintu chihe ch’akamaro rhwakayiga kugerera ebyahikiraga Abakristu b’omu myaka 100 ya burhanzi balilamire e Yudeya?
8 Chintu chihe ch’akamaro rhwakayiga kugerera ebyahikiraga Abakristu b’omu myaka 100 ya burhanzi balilamire e Yudeya? Omunara g’Omulanzi rhwashambalagako gwaliderhere ntya: “Amango mayinjire, hali okuntu rhwakahurana ebigeregezo oku bilolere okuntu rhunabona ebintu by’omubiri; k’echola ch’echintu ch’akamaro bwenene, changwa si okuyokoka bulala rhuli bemana ku Mungu? Nechi, amango obuzinda bwayinja, hali oku nji byakarhuhema rhulembere ebibazo, n’okulekana na bintu bilebe. Nji byarhuhema rhube tayari kujira byoshi-byoshi bihemerwe, nka kulala Abakristu b’omu myaka 100 ya burhanzi balibirhaga omu Yudeya bajiraga.” *
9. Bichi ehano Paulo ahaga Abaebrania likuyigirize?
9 Wakawaza okuntu byalikomerere abola Bakristu balibirhaga n’okuleka hofi byoshi baliherhe n’okuhwanza kulama akalamo kahyahya emunda bajaga si? Byalibahemere bagwarhe obwemere n’okulangalira oku Yehova akabarhabere bagwarhe byoshi balikenere. Aliko haliri echintu chakabarhabere. Myaka erhano embere Abaroma bagorhe e Yerusalemu, entumwa Paulo abaga ahere Abaebrania mahano maguma menja: “Mumenye mwasima efuranga omu kuntu mulamire, mutosheke n’ebintu mugwerhe. Bulala aderhere: ‘Ntaka kulekerera haba nakatyu, ntakana kujahika haba nakatyu.’ Yi rhugwarha obushiru n’okuderha ntya: ‘Yehova ali murhabazi wani; ntayubaha. Gurhe omuntu akanjira?’” (Ebr. 13:5, 6) Balala bakakengere empanulo za Paulo embere Abaroma barhere e Yerusalemu, byakabayorohere kuchikoomeza kulama akalamo kayoroheze eyi banagwerhe bintu bigeke emunda bajaga. Balichizerere oku Yehova abaha ebi bakenere. Ebinwa bya Paulo birhurhabere rhulangalire oku nerhu Yehova akarhuha ebirhukenere.
“RHWATOSHEKA N’EBYOLA BINTU”
10. “Siri” ehe Paulo aliri arhubwira?
10 Paulo alihere Timoteo ehano lili nk’elyola, aliko nerhu rhwakalikolesa. Ayandika ntya: “Rhukabona ebilyo n’eby’okuyambala, rhwatosheka nebyo bintu.” (1 Ti. 6:8) K’ebyola biderhere oku rhurhakwanene kusimiira eby’okulya bikwirire, okugwarha enju ekwirire, changwa okugula emyambaro mihyahya buli mango? Arhali ebyola bi Paulo aliri aderha. Paulo ali aderha oku rhukwanene kutosheka n’ebintu by’omubiri rhugwerhe. (Flp. 4:12) Eyola ye yaliri “siri” ya Paulo. Echintu ch’akamaro bwenene mu byoshi rhugwerhe, buli bwira bwerhu haguma na Mungu, s’arhali echindi chintu choshi-choshi ch’omubiri rhugwerhe.—Hab. 3:17, 18.
Nta chintu chinja Abaizraeli balibulire’ mu myaka 40 yoshi bamalaga omu rungu. Ka rhwakatosheka n’ebirhugwerhe? (Olole echifungo che 11) *
11. Bichi rhwayigire oku bilolere okutosheka kugerera ebinwa Musa abwiraga Abaizraeli?
11 Ebi rhwakawaza oku rhukenere nkabaga arhali bi Yehova yewe abwene. Waza oku bi Musa abwiraga Abaizraeli enyuma y’okumala myaka 40 omu rungu: “Yehova Mungu wenyu abagishire mu byoshi mwajirire. Alimenyere bwinja olugenzi lwenyu loshi mw’elila rungu lizibu-zibu. Mw’eyila myaka 40, Yehova Mungu wenyu aberere haguma n’enyu, na nta chintu mwabulire.” (Kum. 2:7) Mw’eyola myaka 40, Yehova aliri ahereza abaizraeli amana m’okulya. Yehova ajira okuntu emyambaro yabo emenye yashaja, omu kuntu bakagenderere kuyambala ela myambaro yen’elala bakulaga e Misri. (Kum. 8:3, 4) Chiro akaba oku baguma balibwene oku ebyola bintu birhalibatosheze, Musa aliyibwise Abaizraeli oku baligwerhe buli chintu balikenere. Yehova asiima amango moshi rhwamayiga kutosheka n’okusimiira buli choshi ali arhuhereza eyi rhunabwene kw’eli migisho rhunamubwire koko.
OCHIZERE OKU YEHOVA AKUSHISHIKALA
12. Bichi biyerekene oku Daudi alilangalire Yehova s’arhalichilangalire yewe yenyine?
12 Daudi alimenyere oku Yehova ali mwimana n’okwanashishikala bwenene bala bamuzigire. Chiro akaba oku akalamo ka Daudi kaliri omu buhanya amango ayandika e Zaburi ya 34, n’amasu m’obwemere, Daudi alibwene “malaika wa Yehova” ahebere enkambi ahaburhambi bwage ‘omu kumuzunguluka.’ (Zb. 34:7) Nkabaga Daudi aliri ahuzanya malaika wa Yehova n’omusoda ohebere enkambi omu shwa omu kulola buli mango ngahe omwanzi ahuluka. Chiro akaba oku naye yenyine aliri mulume okomere ogwerhe emisi y’okulwa evita, na Yehova abaga amulaganyize obwami, arhalangaliraga obuhashe bwage b’okulasha ebale n’omuzareti, changwa b’okukolesa engorho omu vita. (1 Sa. 16:13; 24:12) Daudi alangalira Mungu n’okuchizera oku malaika wa Yehova ‘anayokola balala bamuyubahire.’ Kweri rhurhalangalire oku rhwapata obulanzi zene kugerera echisomerene. Aliko rhuyinji oku balala boshi balangalire Yehova nji babona akalamo k’esiku n’amango chiro bafa zene.
Amango m’amalibuko makulu, engabo za Gogu wa Magogu nji zalonza kurhurhera omu maju merhu. Aliko rhwakachizera oku Yesu na bamalayika nji baba bali babona bichi bali bajira, nji barhulwako (Olole echifungo che 13)
13. Amango Gogu wa Magogu nji arhurhera, bulagurhe nji rhwabonekana nka rhuli bakuhimwa juba-juba, aliko bula gurhe rhurhakwanene kuyubaha? (Olole efoto eli oku chiganda.)
13 Omu mango mayinjire hano hofi obulangalire bwerhu omu buhashe bwa Yehova b’okurhulanga nji bwageregezwa. Amango Gogu wa Magogu, k’okuderha, amashanja machihebere haguma, arhera abantu ba Mungu, nji rhwabona nka lero bakala kurhuyirha. Nji byahema rhuchizere oku Yehova akagala kurhulanga n’okurhuyokola. Amashanja nji marhubona nka rhuli nka bibuzi birhaherhe ow’okubilanga. (Eze. 38:10-12) Nta ntwaro nji rhwaba rhugwerhe, kandi nji rhwaba yi rhurhakoomezwaga eby’okulwa evita. Amashanja nji mabona oku makarhuhima juba-juba. Nji barhamenya oku bamalaika bali tayari kurhulwira; aliko rhwabo rhuyinji echola bulala rhugwerhe obwemere. Amashanja marhaherhe obwemere mu Mungu. Nji basomerwa bwenene okubona gurhe bamalaika b’embingu barhulwira!—Ufu. 19:11, 14, 15.
OCHIRHEGANYE ZENE OKU MANGO MAYINJIRE
14. Bichi rhwakajira zene yi rhuchirheganya oku mango mayinjire?
14 Bichi rhwakajira zene yi rhuchirheganya oku mango mayinjire? Ech’oburhanzi, rhurhakwanene kubona oku ebintu by’omubiri bili by’akamaro bwenene emwerhu. Bulala lusiku luguma, nji byarhuhema rhuleke ebyola bintu enyuma. Aliko kandi rhukwanene kutosheka n’okugwarha omwishingo gunene omu bwira bwerhu haguma na Yehova. Okurhuli rhwagenderera kumenya Mungu bwinja, ku n’obwizere bwerhu bwakomera, omu buhashe bwage b’okurhulanga amango Gogu wa Magogu arhurhera.
15. Bichi byahikiraga Daudi amango alichili musole byakamuyerekere oku amango moshi Yehova anarhabala?
15 Rhushambale oku chindi chintu charhabalaga Daudi, chakarhurhabala nerhu rhuchirheganye oku bigeregezo. Daudi aderha ntya: “Muhonje, mubone oku Mungu ali mwinja; osimire ali muntu onamulibirhira.” (Zb. 34:8) Ebyola binwa biyerekene oku Daudi aliri alangalira Yehova buli mango na Mungu wage arhamuvunaga omurhima haba n’akatyu. Amango Daudi alichili musole alwisa Omufilistini oyirikirwe Goliyati waliri muntu olehere na muzibu-zibu. Abwira oyo musoda waligwerhe misi minene ntya: “Zene-zene, Yehova akuhira omu fune yani.” (1 Sa. 17:46) Enyuma w’aho, Daudi arhondera kukolera Mwami Sauli, wayinjaga ashonda kumuyirha mango manene. Aliko “Yehova aliri haguma na” Daudi. (1 Sa. 18:12) Bulala Daudi alichibwenere okuntu Yehova abaga amurhabere amango mageraga, alimenyere oku Yehova akamurhabala ahime ebibazo aliri ageramo.
16. Mu njira zihe ‘rhwakahonja’ obwinja bwa Yehova?
16 Okurhwanagenderera kulangalira obwerekezi bwa Yehova zene, ku n’obwizere bwerhu b’okurhuyokola omu mango mayinjire bwagenderera kukomera. Bihemere obwemere n’okuba tayari kulangalira Yehova amango rhwamahema omukulu werhu w’akasi ebisanzi by’okuja oku mbuganano, embuganano zerhu zikulu, changwa amango rhwamamuhema arhuhindamulire eprograme y’akasi yi rhuyinja rhwagera oku mbuganano zoshi n’okugeza bisanzi binene omu mahubiri. Rhuderhe ok’omukulu werhu w’akasi amarhulahirira n’okuheza akasi kerhu. Ka rhuherhe obwemere oku Yehova arharhuleka changwa arhujahike haba n’akatyu, n’oku buli mango arhuha ebi rhukenere? (Ebr. 13:5) Banene bali omu kasi k’amango moshi bakabala okuntu bachibwenere gurhe Yehova abarhabala amango balilagirire abarhabale. Yehova ali mwimana.
17. Olwandiko lwerhu l’omwaka gwa 2022 luli luhe, na bulagurhe lukwanene?
17 Bulala Yehova ali eburhambi bwerhu, nta mpanvu rhugwerhe y’okuyubaha ebyahika omu siku zayinjire. Mungu werhu arhakarhujahika haba n’akatyu amango rhuli rhwahira Obwami bwage oku fasi y’oburhanzi omu kalamo kerhu. Omu kurhuyibusya rhubone bulagurhe bili by’akamaro rhuchirheganye kurhangira zene oku bibazo by’amango mayinjire, n’okulangalira Yehova oku arhakarhujahika haba n’akatyu, e Baraza Lirhambwire lyachishogere olwandiko lwa Zaburi 34:10, lube lwandiko lwerhu l’omwaka gwa 2022: “Balala banalonza Yehova nta chinja bebule.”
OLWIMPO 38 Atakupatia nguvu
^ Olwandiko lwerhu l’omwaka gwa 2022, lurhengerere omu Zaburi 34:10: “Balala banalonza Yehova nta chinja bebule.” Banene omu bakozi bemana ba Yehova baherhe lufuranga lugeke changwa bintu bigeke. Bobo si, bulagurhe rhwakaderha oku “nta chintu chinja bebule”? Nka gurhe okuyunva bwinja ogula mustari kwakarhurhabala rhuchirheganye bwinja oku bihe bikomere byayinjire?
^ Olole “Ebibazo by’Abanasoma Ebitabu Byerhu” omu Munara g’Omulanzi gwa Siku 15 Mwezi gwa 9, 2014.