MWAZI G’OKUYIGA 4
Bichi Birhuma Rhwaja oku Lwibuko?
“Mugenderere kujira ntya omu kunyibuka.”—LU. 22:19.
OLWIMPO 20 Ulimutoa Mwana Wako Mupendwa
OKU BUGEKE *
1-2. a) Mangochi rhunazigana kuyibuka omuzigirwa werhu wafire? b) Bichi Yesu ahwanzisaga ebudufu bw’embere y’olufu lwage?
CHIRO akaba oku hamagera myaka minene abazigirwa berhu bafire, rhunagenderera kubayibuka. Ahanene rhunazigana kubayibuka olusiku bafagamo.
2 Buli mwaka rhunachihira haguma n’amamiliyoni m’abantu banayibuka olusiku omuzigirwa werhu afaga, Yesu Kristu. (1 Pe. 1:8) Rhunabuganana haguma omu kuyibuka olala wahaanaga akalamo kage nka nchungu y’arhuchungula omu chaha n’olufu. (Mt. 20:28) Yesu alilonzeze abanafunzi bage bayibuke olufu lwage. Obudufu bw’embere y’olufu lwage Yesu Kristu ahwanzisa ebilyo biminuzize anaha abanafunzi bage erhegeko liderhere ntya: “Mugenderere kujira ntya omu kunyibuka.” *—Lu. 22:19.
3. Bichi rhwaganirako mu gunola mwazi?
3 Bantu bageke banaja oku Lwibuko l’olufu lwa Yesu bagwerhe obulangalire busimisize b’okulama embingu. Aliko amamiliyoni m’abandi bantu baherhe obulangalire b’okulama oku gulu, nabo banahika oku lwibuko. Mu gunola mwazi rhwaganira bichi birhuma ebyola bigusho bibiri bijira enyorha y’okuhika oku Lwibuko buli mwaka. Rhwashuba kuganira oku nyungu rhwakagwarha amango rhwamahika oku Lwibuko. Rhuhwanzage omu kushambala oku mpanvu ziguma zirhuma abashigwa bahika oku Lwibuko.
BICHI BIRHUMA ABASHIGWA BAHIKA OKU LWIBUKO?
4. Bulagurhe abashigwa banalya omugati n’okunywa edivayi oku Lwibuko?
4 Buli mwaka, abashigwa banahika oku Lwibuko banalya omugati n’okunywa edivayi. Bulagurhe babakwanene kulya omugati n’okunywa edivayi? Yi rhushubiza kw’echola chibazo rhushambale oku byabaga omu budufu buzinda bw’akalamo ka Yesu hanola oku gulu. Enyuma y’okumala kulya Epasaka, Yesu ahwanzisa echayinjire kumenyikana nka Bilyo by’Egolo bya Waliha. Yesu ageza omugati n’edivayi embere w’entumwa zage bemana n’okubabwira balye bananywe. Yesu ashambala oku bilolere ndagano ebiri, changwa masezerano, k’okuderha, endagano mpyahya n’endagano y’obwami. * (Lu. 22:19, 20, 28-30) K’okuderha ezola ndagano zafungulira enjira ezola ntumwa n’olwindi luganjo lw’abantu bageke nji baba bami na badahwa omu mbingu. (Ufu. 5:10; 14:1) Abashigwa bayorhere * bali mw’ezola ndagano ebiri, bonyine babakalya omugati n’okunywa edivayi oku Lwibuko.
5. Bichi abashigwa bamenyere oku bilolere obulangalire bahaabirwe?
5 Hali eyindi mpanvu erhuma Abakristu bashigwa bagwarha enyorha y’okuhika oku lwibuko. Akola kasanzi kanabaha orozo l’okuwaza oku bulangalire bwabo. Yehova abahere obulangalire busimisize bwenene b’okugwarha akalamo karhakafa karhakanasherera omu mbingu, nji bakola haguma na Yesu Kristu wafukire na balala bandi boshi bali omu luganjo lwa 144 000, n’echinja mu byoshi, abashigwa bamenyere oku nji babona Yehova Mungu! (1 Ko. 15:51-53; 1 Yo. 3:2) Abashigwa bamenyere oku bahamagerwe yi nji baja siimira olola lukengo omu mbingu. Yi nji bayemererwa kuja omu mbingu, abashigwa bakwanene bagenderere kuba bemana kugera oku lufu. (2 Ti. 4:7, 8) Okuwaza oku bulangalire bwabo b’okuja embingu kunalerhera abashigwa mwishingo gunene. (Tit. 2:13) Gurhe si oku bilolere “ezindi ntama”? (Yoh. 10:16) Mpanvu zihe ziguma zirhuma bahika oku lwibuko?
BULAGURHE EZINDI NTAMA ZINAHIKA OKU LWIBUKO
6. Bulagurhe ezindi ntama zinahika oku lwibuko buli mwaka?
6 Abantu b’ezindi ntama banahika oku lwibuko, arhali mpu yi balya omugati n’okunywa edivayi, aliko banagwarha obusime b’okubaho. Omu mwaka gwa 1938, abaherhe obulangalire b’okulama oku gulu bahamagalwa ob’oburhanzi nabo bahike oku Lwibuko. Omunara g’Omulanzi gwa Lusiku 1 Mwezi gwa 3, 1938, gwaliderhere ntya: “Kwaba kwinja bwenene balala b’ezindi ntama babe kw’eyila mbuganano balole ebinajirika. . . . Nabo akala kasanzi kakwenene kuba k’omwishingo.” Nka kulala abahamagalwaga oku fete y’obuhya, ezindi ntama zinagwarha obusime b’okuba oku Lwibuko n’okulolereza konyine.
7. Bulagurhe ezindi ntama zinalingiriza oku nyorha ejambo ly’olwibuko?
7 Ezindi ntama nazo zinawaza oku bulangalire bwabo. Banalingiriza oku nyorha nene ejambo ly’olwibuko, linaderhera ahanene ebi Kristu na balala 144 000 nj’a arhegeka nabo nji bajirira abantu bemana omu Burhegesi bwa Myaka Chihumbi. Eshishi w’obwerekezi b’Omwami wabo Yesu Kristu, balala nji barhegeka omu mbingu nji barhabala kuhindula egulu libe paradizo n’okurhabala abantu berhonzi bahikire obushinganyanya. Amamiliyoni ma balala banahika oku lwibuko banayunva basimire bwenene amango bamawaza okuntu obulebi bwe Biblia nji bwayenera, nka bula buli omu Isaya 35:5, 6; 65:21-23; na Ufunuo 21:3, 4. Amango bamachapa omu bwenge bali omu gulu lihyahya bowe n’abazigirwa babo, banakuza obulangalire bwabo n’okuhigirira okurhaleka kukolera Yehova.—Mt. 24:13; Gal. 6:9.
8. Yindi mpanvu ehe erhuma balala baherhe obulangalire b’okulama oku gulu bahika oku lwibuko?
8 Rhushambale oku yindi mpanvu erhuma ezindi ntama zahika oku lwibuko. Bashondere kuyerekana obuzigire n’oburhabale bwabo oku bashigwa. Echinwa cha Mungu chalibere chaderha oku abashigwa na balala baherhe obulangalire b’okulama esiku n’amango oku gulu, bakakolere haguma omu buguma. Nka gurhe? Rhushambalage ku mifano migeke.
9. Nka gurhe obulebi buli omu Zekaria 8:23 buyerekene okuntu ezindi ntama zinachiyunva oku bilolere abashigwa?
9 Osome Zekaria 8:23. Olula lwandiko luyerekene omu njira ekwirire bwenene okuntu ezindi ntama zinachiyunva oku bilolere bene-babo na bali-babo b’abashigwa. Ebinwa “Omuyahudi” na “mwabo bantu” biderhere echo chigusho chenecho; k’okuderha, abashigwa bayorhere. (Ro. 2:28, 29) Abo “bantu ekumi kurhenga omu ndimi zoshi z’amashanja” bayerekene ezindi ntama. Kokuderha oku “bachishwekere oku bwimana” oku bashigwa n’okuchihira haguma nabo omu buharamye buchere. Bobola, omu budufu b’olwibuko ezindi ntama zinayerekana oku zichishwekere bwenene oku bashigwa omu kuba haguma nabo oku lwibuko.
10. Bichi Yehova ajirire omu kuyeneza obulebi buli omu Ezekieli 37:15-19, 24, 25?
10 Osome Ezekieli 37:15-19, 24, 25. Yehova ayeneze obola bulebi omu kujira abashigwa n’ezindi ntama bakole haguma omu buguma. Obola bulebi buderhere oku bilolere bichira bibiri by’emirhi. Balala baherhe obulangalire b’okuja kulama embingu bali nka chichira ch’omurhi “cha Yuda” (eshanja abami be Izraeli bakazaga rhengamo), na balala baherhe obulangalire b’okulama oku gulu bali nka chichira ch’omurhi “cha Efraimu.” * Yehova akahebere ebyola bigusho bibiri haguma byanaba “chichira chiguma ch’omurhi.” Echola chiyerekene oku bali bakola haguma omu buguma eshishi w’obwerekezi bw’ Omwami wabo muguma, Yesu Kristu. Buli mwaka abashigwa n’ezindi ntama banahika oku lwibuko, arhali nka bigusho bibiri bilekene si nka “chishumba chiguma” chiyabwirwe na “mungeri muguma.”—Yoh. 10:16.
11. Nka gurhe “entama” zishamberwe omu Matayo 25:31-36, 40 ahanene zinarhabala bene-babo Kristu?
11 Osome Matayo 25:31-36, 40. “Entama” Yesu aderhaga m’ogula mufano ziyerekene abemana balamire omu chihe chizinda baherhe obulangalire b’okulama oku gulu; k’okuderha ezindi ntama. Bali barhabala oku bwimana abashigwa bayorhere ba Kristu ahanene omu kubagwasa kukola akasi kabo kazibu-zibu; kokuderha akasi k’okuhubiri n’okujira abanafunzi omu gulu lyoshi.—Mt. 24:14; 28:19, 20.
12-13. Mu zindi njira zihe ezindi ntama zinarhabala bene-babo Kristu?
12 Buli mwaka omu maboso m’embere w’olwibuko, ezindi ntama zinarhabala bene-babo Kristu kukola bwenene omu kampanye k’okuhamagala balala basimisizwe bayinje oku Lwibuko. (Olole echisanduku “ K’Oli Wachirheganya Embere y’Akasanzi oku Bihe by’Olwibuko?”) Banashuba kurhabala omu kurheganya ebintu byoshi bikenerwe y’Olwibuko lujirika omu gulu lyoshi chiro n’omu chibaga murhali abashigwa banalya omugati n’okunywa edivayi. Ezindi ntama ziherhe enyorha nene y’okurhabala bene-babo Kristu mw’eyola njira. Ezola ntama zimenyere oku Yesu ali abona ebi bali bakolera bene-babo nka yewe yenyine yi bali babikolera.—Mt. 25:37-40.
13 Zindi mpanvu zihe zinarhuma rhwahika oku Lwibuko chiro akaba rhuherhe bulangalire buhe?
BULAGURHE RHWESHI RHUNAHIKA OKU LWIBUKO?
14. Nka gurhe Yehova na Yesu barhuyerekere obuzigire bunene?
14 Rhugwerhe eshukrani oku buzigire Yehova na Yesu barhuyerekere. Yehova arhuyerekere obuzigire omu njira zinene, aliko nguma ye nkulu omu zindi zoshi. Enjira nkulu Mungu ayerekene mo oku arhuzigire kwaliri kurhuma Omugala alibuke n’okukufa ejuu yerhu. (Yoh. 3:16) Rhumenyere bwinja oku Yesu naye aliyerekene obuzigire bunene omu kuba tayari kuhaana akalamo kage eju yerhu. (Yoh. 15:13) Ntacho rhwakagala kugalulira Yehova oku buzigire yewe na Yesu barhuyerekere. Aliko rhwakabayereka eshukrani yerhu omu kuntu rhulamire omu kalamo kerhu ka buli lusiku. (Kol. 3:15) Kandi rhunahika oku Lwibuko bulala rhulonzeze kuwaza oku buzigire barhuyerekere n’okuyerekana oku nerhu rhubazigire.
15. Bulagurhe abashigwa n’ezindi ntama baherhe eshukrani bwenene oku luhembo lw’enchungu?
15 Rhubwene ok’oluhembo lw’enchungu luli lw’akamaro bwenene. (Mt. 20:28) Abashigwa banabona kw’enchungu eli y’akamaro bwenene bulala yarhumire bagwarha obulangalire busimisize b’okulama embingu. Bulala baherhe obwemere omu nterekero ya Yesu Kristu, Yehova abahamagere banyakunali, n’okubajira bana bage. (Ro. 5:1; 8:15-17, 23) Ezindi ntama nazo zigwerhe eshukrani oku nchungu. Bulala bagwerhe obwemere omu nterekero ya Yesu Kristu, Mungu abayemerere, banamukolera akasi kachesibwa, banaherhe obulangalire ‘b’okufuma amalibuko makulu.’ (Ufu. 7:13-15) Njira nguma abashigwa n’ezindi ntama banayerekana mw’eshukrani yabo oku nchungu, kuli kuba oku Lwibuko lwa buli mwaka.
16. Yindi mpanvu ehe erhuma rhwahika oku Lwibuko?
16 Eyindi mpanvu erhuma rhwahika oku Lwibuko eli okuba rhulonzeze kukenga Yesu. Chiro akaba rhuherhe bulangalire buhe bw’amango mayinjire, buli muguma werhu alonzeze kukenga erhegeko Yesu ahanaga omu budufu ahwanzisaga m’Olwibuko: “Mugenderere kujira ntya omu kunyibuka.”—1 Ko. 11:23, 24.
OKUNTU RHWESHI RHUNAYUNGUKA N’OLWIBUKO
17. Nka gurhe Olwibuko lunarhurhabala rhuyegere Yehova?
17 Rhunayegera Yehova. (Yak. 4:8) Nk’okurhwabwene, Olwibuko lunarhuha akasanzi k’okuwaza oku bulangalire Yehova arhuhere, n’okushuba kuwaza bwenene oku buzigire arhuyerekere. (Yer. 29:11; 1 Yo. 4:8-10) Amango rhwamawaza bwenene oku bulangalire bwerhu burhakavuna omurhima bw’amango mayinjire, n’okuntu Mungu arhuzigiire bwenene, rhwanakomeza obuzigire bwerhu ku Yehova n’okukomeza obwira bwerhu haguma naye.—Ro. 8:38, 39.
18. Bichi okuwaza bwenene oku mufano gwa Yesu kwakarhushunika rhujire?
18 Rhunahebw’omurhima rhuyiganye omufano gwa Yesu. (1 Pe. 2:21) Omu siku z’embere w’olwibuko rhunaseza obwenge oku ngani ze Biblia zishambere oku maboso mabuzinda-zinda ma Yesu oku gulu, olufu lwage, n’okufuuka kwage. Omu golo ly’Olwibuko, ejambo lyanaja lyarhuyibusa obuzigire Yesu arhuherheko. (Efe. 5:2; 1 Yo. 3:16) Amango rhuli rhwasoma oku bilolere omufano gwa Yesu g’okuchihana yewe yenyine n’okugukengerako, rhwanachiyunva rhuheberwe omurhima “rhugenderere kulama nk’oku Yesu naye alilamire.”—1 Yo. 2:6.
19. Bichi rhwakajira yi rhubera omu buzigire bwa Mungu?
19 Rhwashuba kuhigirira bwenene kubera omu buzigire bwa Mungu. (Yud. 20, 21) Yi rhubera omu buzigire bwa Mungu rhunajira okwerhu koshi yi rhumukenga, rhuchese ezino lyage, n’okusimisa omurhima gwage. (Mez. 27:11; Mt. 6:9; 1 Yo. 5:3) Okuhika oku Lwibuko kunarhushunika rhuhigirire bwenene okulama omu bulyo buyerekere Yehova oku ‘rhulonzeze rhubere omu buzigire bwage esiku n’amango!’
20. Mpanvu zihe zinja rhuherhe z’okuhika oku Lwibuko?
20 Chiro obulangalire bwerhu bwaba b’okulama esiku n’amango omu mbingu changwa oku gulu, rhuherhe empanvu zinja z’okuhika oku Lwibuko. Buli mwaka, amango rhwamachigusha haguma, rhunayibuka olufu l’omuntu rhuzigiire bwenene, k’okuderha Yesu Kristu. Ahanene rhunayibuka echijiro chiyerekene obuzigire burhalukire boshi Yehova arhuyerekaga omu kuhaana Omugala nka nchungu. Mu guno mwaka, Olwibuko lwaba egolo lya Lwakarhano, Siku 15 Mwezi gwa 4, 2022. Rhuzigire Yehova n’Omugala, bobola omu kuyibuka olufu lwa Yesu buli mwaka, nta chindi chintu choshi-choshi rhubwene ch’akamaro chilushire okuhika oku Lwibuko.
OLWIMPO 16 Tumusifu Yehova na Mwana Wake Mutiwa-Mafuta
^ Chiro akaba rhuherhe obulangalire b’okulama embingu changwa omu paradizo hanola oku gulu, ogula mwazi gwashambala oku mpanvu z’Amandiko zirhuma rhuja oku lwibuko buli mwaka na gurhe rhwakayunguka omu kujira ntyo
^ Chiro akaba rhuherhe obulangalire b’okulama embingu changwa omu paradizo hanola oku gulu, ogula mwazi gwashambala oku mpanvu z’Amandiko zirhuma rhuja oku lwibuko buli mwaka na gurhe rhwakayunguka omu kujira ntyo.
^ Y’omenya binene oku bilolere endagano mpyahya n’endagano y’Obwami, olole omwazi “Mtakuwa ‘Ufalme wa Makuhani’” omu Munara g’Omulanzi gwa Siku 15 Mwezi gwe 10, 2014, buk. 15-17.
^ AMAFASIRIYO M’EBINWA: Echinwa bashigwa bayorhere chiyerekene abakristu bashigwa bachilamire oku gulu.
^ Y’obona myazi minene oku bilolere obulebi buderhere bichira bibiri by’emirhi buli omu Ezekieli sura 37, lola echitabu Ibada Safi ya Yehova Inarudishwa Tena!, buk. 130-135, chi. 3-17.