MWAZI G’OKUYIGA 2
Bichi Omufano gwa Mudorho wa Yesu Gwakarhuyigiriza?
“Yakobo muja wa Mungu na wa Waliha Yesu Kristu.”—YAK. 1:1.
OLWIMPO 88 Unijulishe Njia Zako
OKU BUGEKE *
1. Nka gurhe wakafasiriya omulala gwa Yakobo?
YAKOBO, mudorho wa Yesu, akuliraga omu mulala gukomere ekiroho. * Abazere bage, Yusufu na Mariya, balizigiire Yehova bwenene banaliri bajira okwabo koshi yi bamukolera. Yakobo aliri asiimira ogwindi mugisho; mukulu wage aba Masiya. Lwaliri lukengo lunene ku Yakobo kuba muguma wa mw’ogola mulala!
Amango moshi akulaga haguma na Yesu, Yakobo ahikira kumenya mukulu wage bwinja (Olole echifungo cha 2)
2. Mpanvu zihe zakarhumire Yakobo akenga mukulu wage?
2 Yakobo aligwerhe mpanvu zinene z’okuyiganya mukulu wage. (Mt. 13:55) Omufano, amango Yesu aligwerhe myaka 12, alimenyere Amandiko bwinja n’ahola, byaliri byasomeza abegiriza b’omu Yerusalemu. (Lu. 2:46, 47) Yakobo aliri akola na Yesu omu kasi k’okuranda empaho. Na nk’alonzaga, akahikire kumenya mwene-wabo bwinja. Nathan Knorr aliderhere ntya: “Omuntu anayiga binene oku wabo, amango ali akola naye.” * na Yakobo aliri achibonera gurhe “Yesu aliri agenderera kukula n’okugwarha bwengehe bunene n‘okuyemerwa na Mungu n’abantu.” (Lu. 2:52) Kugerera echola, rhwakawaza oku Yakobo aliri muguma w’omu banafunzi barhanzi ba Yesu. Aliko, birhabaga ntyo.
3. Nka gurhe Yakobo alijirire amango Yesu arhondera akasi kage k’okuhubiri?
3 Amango Yesu aliri akola akasi kage k’okuhubiri hanola oku gulu, Yakobo arhabaga muguma w’omu banafunzi bage. (Yoh. 7:3-5) Oku derha okuli, nkabaga Yakobo aliri muguma omu bantu b’omu mulala gwage baliri bawaza oku Yesu “abere musire.” (Mk. 3:21) Na ntaho hayerekene oku Yakobo aliri haguma na nyina, Mariya, amango Yesu ayirhwaga oku murhi gw’amalibuko.—Yoh. 19:25-27.
4. Bintu bihe rhwaganirako?
4 Enyuma, Yakobo achizera Yesu anaba mushamuka okengerwe omu chibaga che Chikristu. Mu gunola mwazi, rhwalola bintu bibiri rhwakayiga kugerera Yakobo: 1) bulagurhe rhukwanene kugenderera kuba berhohye na 2) nka gurhe rhwakaba begiriza benja.
OGENDERERE KUBA MWIRHOHYE KUGUMA NA YAKOBO
Amango Yesu abonekera Yakobo, oku bwirhohye ayemera oku Yesu aliri Masiya. Enyuma w’aho, Yakobo aba mwanafunzi mwimana wa Kristu (Olole echifungu cha 5-7)
5. Gurhe Yakobo alijirire amango Yesu amubonekera enyuma y’okufuuka kwage?
5 Mangochi Yakobo abaga mwanafunzi mwimana wa Yesu? Amango Yesu amalaga fuka, “abonekera Yakobo n’enyuma abonekera ezindi ntumwa zoshi.” (1 Ko. 15:7) Enyuma y’okubuganana na Yesu, Yakobo aba mwanafunzi wage. Aliri haguma n’entumwa omu chumba ch’enyanya e Yerusalemu eyi bali balingiriza eroho lichesibwa balaganywaga. (Mdo. 1:13, 14) N’enyuma w’ahola, Yakobo aligwerhe obusime b’okukola omu baraza lirhambwire ly’omu myaka 100 ya burhanzi. (Mdo. 15:6, 13-22; Gal. 2:9) Na mango maguma embere y’omwaka gwa 62 N.K.Y., ayerekezwa n’eroho lya Mungu ayandikire Abakristu bashigwa amaruba. Amola maruba mali marhurhabala zene rhube rhugwerhe obulangalire b’okulama embingu changwa oku gulu. (Yak. 1:1) Nk’oku Yosefu omubalazi w’engani ayandikaga, Yakobo ayirhwaga oku rhegeko lyahanwaga n’Ananiasi, Mudahwa Mukulu mugala wa Anasi. Yakobo agenderera kuba mwimana kugera amango amalaga olugenzi lwage l’oku gulu.
6. Mu njira ehe Yakobo arhaliri kuguma n’abakulu b’echidini b’omu siku zage?
6 Yakobo aliri mwirhohye. Bulagurhe rhwakaderha ntyo? Lola okuntu Yakobo ajiraga oku bilolere Yesu n’okuntu birhaliri kuguma n’oku banene omu bakulu b’edini bajiraga. Amango Yakobo abona ebintu biyerekene wazi oku Yesu ali Mugala wa Mungu, abiyemera oku bwirhohye. Aliko abakulu b’abadahwa b’omu Yerusalemu barhajiraga ntyo. Omufano, ntako bakagalire hakana oku Yesu afuulire Lazaro. Ahali h’okuyemera oku Yesu arhumwaga na Yehova, bajira okwabo koshi yi balonza gurhe bakayirha Yesu na Lazaro. (Yoh. 11:53; 12:9-11) N’enyuma y’okufuuka kwa Yesu, barhondera kulonza gurhe bakabisha abantu oku Yesu afuukire. (Mt. 28:11-15) Bulala abola bakulu b’echidini baligwerhe omwibone, balahira Masiya.
7. Bulagurhe rhukwanene kulekana n’omwibone?
7 Esomo: Rhuchilange n’omwibone: Rhube tayari kuyigirizwa na Yehova. Kuguma n’ok’obulwala bwakarhuma omurhima nya murhima g’omuntu gurhakola bwinja, konakuguma omwibone gwakarhuma byakomerera omuntu okukenga obwerekezi bwa Yehova. Abafarisayo bajira omurhima gukomeere kuhika amango balahiraga kuyemera ebintu biyemezeze eroho lya Mungu lyaliri lyajira. (Yoh. 12:37-40) Ogola mwibone gwaliri gubi bwenene bulala gwakarhumire barhabona akalamo k’esiku n’amango. (Mt. 23:13, 33) Bili by’akamaro bwenene rhugenderere kuleka Echinwa cha Mungu n’eroho lyage bihindamule oborhere bwerhu n’okuyerekeza amawazo merhu n’emihigo yerhu! (Yak. 3:17) Bulala Yakobo aliri mwirhohye, alilekere Yehova amuyigirize. Na nk’okurhwabona, obwirhohye b’obwarhumaga aba mwigiriza mwinja.
OBE MWIGIRIZA MWINJA KUGUMA NA YAKOBO
8. Bichi byarhurhabala rhube balimu benja?
8 Yakobo arhasomaga masomo manene. Abakulu b’edini ba mw’amola mango kweri balimubwene nka “muntu orhasomaga na wantya-ntya” kuguma n’okubaliri babona Petro na Yowane. (Mdo. 4:13) Aliko Yakobo ayiga gurhe akaba mwalimu mwinja nk’okurhunabona amango rhuli rhwasoma echitabu chiyirikirwe oku zino lyage. Kuguma na Yakobo nkabaga nerhu rhurhasomaga masomo manene. Aliko chiro akaba ntyo, kugerera oburhabale bw’eroho lya Yehova n’okuntu rhunakoomezwa omu lubaga lwage, nerhu rhwakaba balimu benja. Rhujage rhwaganira oku mufano Yakobo arhulekere yewe nka mwalimu rhunalole bintu bihe rhwakayiga.
9. Bichi wakaderha oku bilolere okuntu Yakobo aliri ayigiriza?
9 Yakobo arhakolesaga ebinwa bikomeere changwa amafasiriyo makomeere kuyunva. Echola charhuma abonviriza bage bamenya bichi bakajira n’okuntu bakabijira. Omufano, lola okuntu Yakobo ayigirizaga omu njira eyorohere oku Abakristu bakwanene kuba tayari kulibuzwa buzira kubika omujinya. Ayandika ntya: “Rhunabona oku balala balembeere bagwerhe ebusime. Mwayunvirhe okulembera kwa Yubu kandi mwabwene ebi Yehova amujirire mwanabona oku Yehova agwerhe obuzigire bukombere n’olukogo.” (Yak. 5:11) Obwene oku ebi Yakobo aliri ayigiriza bene-babo byaliyimangiire oku mandiko. Alikoleseze Echinwa cha Mungu omu kurhabala abonviriza bage babone oku buli mango Yehova anahemba balala na Yubu bali bimana emwage kuguma. Yakobo aliyigirize echola omu kukolesa ebinwa biyororhere binayunvikene. Omu kujira ntyo, arhalonzaga oku abantu bamuseze k’obwenge, s’aliko baseze obwenge bwabo ku Yehova.
10. Mu njira nguma ehe rhwakayiganya Yakobo amango rhuli rhwayigiriza?
10 Esomo: Ogenderere kuyorohya oburhumwa bwawe onayigirize kugerera Echinwa cha Mungu. Amango rhuli rhwayigiriza, rhurhakwanene kulonza kuyereka abantu bingana gurhe rhumenyere, s’aliko rhukwanene kubayereka bingana gurhe Yehova amenyere na kangana gurhe abalagireko. (Ro. 11:33) Rhwakahikira ogola muhigo omu kusezeza buli mango ebi rhwaderhere oku Mandiko. Omufano, ahali h’okubwira abanafunzi berhu be Biblia ebi bakajira buli mango, rhwakabarhabala bawaze oku mifano eli omu Biblia, banamenye amawazo ma Yehova n’okuntu anachiyunva. Banaja bagwarha enyorha y’okusimisa Yehova, s’arhali rhwabo.
11. Bibazo bihe Abakristu baliherhe omu siku za Yakobo, na mpanulo zihe abahaga? (Yakobo 5:13-15)
11 Yakobo alimenyere bwinja ehali z’abandi. Amaruba ma Yakobo mayerekene bwinja oku alimenyere bwinja ebibazo bene-babo na bali-babo baliri bahurana, anabahereza obwerekezi buli wazi buyerekene okuntu bakabihima. Omufano, Bakristu baguma barhaliri bakolesa amahano juba-juba. (Yak. 1:22) Abandi baliri bahira abachire embere. (Yak. 2:1-3) Kandi byalikomerere abandi okulanga olulimi lwabo. (Yak. 3:8-10) Abola Bakristu baliherhe ebibazo bikomere aliko Yakobo alilangalire oku bakahindamuka. Aliri ahanula oku bwirhohye aliko buzira kubisha chintu, n’okuheba omurhima balala baliherhe ebibazo by’ekiroho balonze oburhabale oku bashamuka.—Osome Yakobo 5:13-15.
12. Nka gurhe rhwakagenderera kugwarha amawazo menja amango rhuli rhwarhabala abanafunzi be Biblia?
12 Esomo: Omenye bwinja ehali z’abandi, aliko ogenderere kugwarha amawazo menja kubo. Abanene omu barhunayiga nabo Ebiblia binabakomerera kukolesa empanulo zayo. (Yak. 4:1-4) Byakabahema akasanzi yi balekana n’engeso zibi, n’okuhwanza kuyerekana engeso z’Obukristu. Kuguma na Yakobo rhukwanene kugwarha obushiru b’okubwira abanafunzi berhu ebi bakwanene kuhindamula. Kandi rhukwanene kugenderera kuba n’amawazo menja, n’okulangalira oku Yehova akulula abantu benja emwage n’oku abahereza emisi bakenere yi bagala hindamula ebi bakwanene kuhindamula omu kalamo kabo.—Yak. 4:10.
13. Nk’okolwandiko lwa Yakobo 3:2 n’amahugulo m’eshishi biyerekene, bichi Yakobo naye aliyemerere?
13 Yakobo arhalichirholere oku ali mwinja kulusha abandi. Yakobo arhalichirholere oku ali muntu w’akamaro bwenene kulusha abandi mpu bulala ali mwene-wabo Yesu changwa mpu bulala aligwerhe engabane z’akamaro. Aliyirikire ababo Bakristu “bene-berhu bazigirwa.” (Yak. 1:16, 19; 2:5) Arhalonzaga kuchiyerekana ku yewe ali mushinganyanya, aliko naye achihira mw’echola chigusho chiderhere mw’ebila binwa: “Rhweshi rhunajira amagosa mango manene.”—Osome Yakobo 3:2, n’amuhugulo m’eshishi.
14. Bulagurhe rhukwanene kuba tayari kuyemera amagosa merhu?
14 Esomo: Oyibuke oku rhweshi rhuli banya-byaha. Rhurhakwanene kuwaza oku rhulushire chiro balala rhunayigiriza. Bulagurhe? Nka rhwamarhuma omwanafunzi werhu awaza oku rhurhajira magosa rhwakamuvuna omurhima bulala akawaza oku nta lusiku chiro n’oluguma nji agala kukenga Mungu oku bushinganyanya. Aliko amango rhwamayemera n’omurhima goshi oku nerhu binazigana kurhukomerera okukenga amakanuni n’okumufasiriya gurhe Yehova anarhurhabala rhuhime ebibazo byerhu, rhwarhabala omwanafunzi werhu amenye oku naye akagala kukolera Yehova.
Emifano ya Yakobo yaliyorohere, yaliyunvikene bwinja, yalinakwanene (Olole echifungo cha 15-16) *
15. Bichi wakaderha oku bilolere emifano Yakobo akolesaga? (Yakobo 3:2-6, 10-12)
15 Yakobo alikoleseze emifano ehumire oku murhima. Nta ngangane, eroho lichesibwa lyalimurhabere, aliko kandi aliyigire binene oku kuntu k’okuyigiriza omu kulolera oku mifano ya mukulu wage, Yesu, aliri akolesa. Emifano Yakobo akolesaga omu maruba mage eyorohere, n’okuntu rhwakayikolesa kuyunvikene.—Osome Yakobo 3:2-6, 10-12.
16. Bulagurhe rhukwanene kukolesa emifano minja?
16 Esomo: Okolese emifano minja. Amango wamakolesa emifano ekwanene, abantu barhayunva eby’olonzeze kubayigiriza byonyine, si n’ogola mufano gwayorha omu bwenge. Eyola mifano yaleka efoto omu bwenge bw’abantu. Ezola foto zarhabala abonviriza bawe bayibuke enyigirizo z’akamaro ze Biblia. Yesu aliyinji kukolesa emifano bwinja amango aliri ayigiriza. Na Yakobo mwene-wabo, aliyiganyize omufuno gwage. Leka rhulole miguma omu mifano ya Yakobo rhunalole nka gurhe eli minja bwenene.
17. Bulagurhe omufano gubonekene omu Yakobo 1:22-25 guli gwinja?
17 Osome Yakobo 1:22-25. Omufano gwa Yakobo gw’ echiyo guherhe empanvu zinene zirhumire gwaba eyi gukwanene. Aliri ayigiriza enyigirizo z’okubera omu bwenge, k’okuderha, yi rhuyunguka ne Chinwa cha Mungu, rhurhakwanene kuchisoma konyine; si rhukwanene kukola nk’okurhwasomere. Yakobo alikoleseze omufano abonviriza bage bakayunva juba-juba, g’omuntu oli wachilola omu chiyo. Somo lihe aliri ayigiriza? Kwakaba kubula obwenge amango omuntu waliri wachilola omu chiyo amabona echintu akahindamwire, aliko anachileka anachigendera ntyo. Konakuguma, kwakaba kubula obwenge, amango rhwaliri rhwasoma Echinwa cha Mungu rhwanabona echintu rhwakahindamwire oku borhere bwerhu, aliko ntacho rhwajira mpu rhuchihindamule.
18. Bintu bihe bisharhu rhwakajira amango rhuli rhwakolesa omufano?
18 Amango rhwamakolesa omufano, rhwakayiganya omufano gwa Yakobo mu bintu bisharhu: 1) Ojire okuntu ogola mufano gufarhane n’omwazi muli mwaganirako. 2) Okolese omufano abonviriza bawe bakayunva jub-juba. 3) Oyerekane bwinja bichi ogola mufano guyigirize abantu. Akaba bikukomerere kupata emifano abonviriza bawe bakayunva juba-juba, okolese Index des Publications des Témoins de Jéhovah. Oje ahayandikirwe “Emifano,” washimana h’emifano minene wakakolesa. Aliko oyibuke kw’eyola mifano eli nka mikrofone, yarhuma enyigirizo oli wahana zayunvikana bwinja. Bobola ochizere oku wakoleseze omufano gwalerha amawazo makulu oku nyigirizo walonzaga kuyigiriza. Kweri, mpanvu nguma omu zinarhuma rhwalonza rhube begiriza benja, kuli kulonza kurhabala bantu banene nk’oku bigalikene babe baguma b’omu mulala gwa Yehova guherhe obusime, s’arhali oku barhuseze k’obwenge bwabo.
19. Nka gurhe rhwayerekana ku rhuzigire bene-berhu na bali-berhu?
19 Yakobo aligwerhe mukulu wage waliri mushinganyanya, si rhwewe nanga. Aliko rhuherhe olukengo l’okukola haguma n’omulala guzibu-zibu gwa bene-berhu na bali-berhu ba Bakristu. Rhunabayereka obuzigire omu kuzigana kuchiheba haguma nabo, rhwanabayiganyanya, n’okukola haguma nabo oku bwimana omu buguma omu kasi k’okuhubiri n’okuyigiriza. Amango rhuli rhwajira okwerhu koshi yi rhuyiganya omufano gwa Yakobo omu borhere bwerhu, omu lugenzi, n’omu kuntu rhunayigiriza, rhwalerhera Yehova olukengo, n’okurhabala abantu b’emirhima minja bayegere Darha w’obuzigire w’omu mbingu.
OLWIMPO 114 “Mukuwe na Uvumilivu”
^ Yakobo akuliraga omu mulala muguma na Yesu. Yakobo alimenyere bwinja Omugala mushinganyanya wa Mungu kulusha abandi bantu boshi ba mw’amola mango. Mu gunola mwazi, rhwalola bichi rhwakayiga kugerera akalamo n’enyigirizo z’oyola mudorho wa Yesu wahikiraga kuba muguma w’omu bene-berhu baliri bayerekeza echibaga che Chikristu ch’omu myaka 100 ya burhanzi.
^ Mu gunola mwazi, rhwahamagala Yakobo oku ali mwene-wabo Yesu. Arhengaga nda nguma na Yesu, binabonekene oku yi wayandikaga echitabu che Biblia cha Yakobo.
^ Nathan Knorr aliri muguma w’omu Baraza Lirhambwire. Amalaga olugenzi lwage l’oku gulu omu mwaka gwa 1977.
^ AMAFASIRIYO M’EFOTO: Yakobo alikoleseze omufano g’omuliro gugeke, che chintu abantu bakayunvirhe juba-juba, omu kuyerekana obuhanya bwakabaho amango omuntu amakolesa kubi olulimi lwage.