1. Bulagurhe rhwakayunva obuba mango maguma?

 BULI muntu anayunva obuba mango maguma. Kweri, bulala rhumenyere ebye Biblia erhuyigirize, rhurhayubaha olufu, abazimu, changwa ebyahikira abantu omu mango mayinjire. Aliko rhulamire omu mango m’ebihe bikomere, bobola nkabaga rhwakayubaha evita, obubandi n’amalwala. (Lu. 21:11) Nkabaga kandi rhwakayubaha abantu nk’abarhegesi bali barhuhidika changwa abantu b’omulala bali bapinga obuharamye b’okuli. Baguma bakayubaha oku barhagala kulembera ebibazo bali bahurana zene changwa ebi nji bahurana omu mango mayinjire.

2. Ba nka waderha oku hali Daudi alirimo amango aliri e Gati.

² Hali amango Daudi aliri achiyunva ayubahire. Omufano, amango Mwami Sauli aliri amuhiga n’okulonza kumuyirha, Daudi abona okw’alibirhire omu vile nguma y’Abafilistini yaliyirikirwe Gati. Omwami we Gati, k’okuderha, Akishi, amenya oku Daudi aliri musoda okomeere wayirhaga “amakumi m’ebihumbi” by’Abafilistini. Daudi “ayubaha bwenene.” (1 Sa. 21:10-12) Aliyubahire eju y’ebi Akishi akamukolere. Bichi byarhabalaga Daudi amenye bichi akajira y’ahima obuba bwage?

3. Nk’ok’olwandiko lwa Zaburi 56:1-3, 11 luyerekene, nka gurhe Daudi ahimaga obuba bwage?

³ Omu Zaburi ya 56, Daudi ayerekene okuntu aliri achiyunva amango aliri e Gati. Mw’eyola Zaburi, Daudi afasiriye bwinja bwinja bulagurhe aliyubahire aliko kandi afasiriye bichi byamurhabalaga aleke kuyubaha. Amango Daudi aligwerhe obuba, alilangalire Yehova. (Osome Zaburi 56:1-3, 11.) Daudi aligwerhe empanvu nyinja y’okulangalira Yehova. Kugerera oburhabale bwa Yehova, Daudi achishoga kujira chintu chilebe chisomeze bwenene: Achijira musire, n’agola mayeri mage mamuyokola! Ahali h’okulonza kuyirha Daudi, Akishi amufukuza ahamwage nantyo Daudi afuma.—1 Sa. 21:13–22:1.

4. Gurhe rhwakakomeza obulangalire bwerhu mu Yehova? Fasiriya.

 ⁴ Nerhu rhwakayorha rhurhulerere n’okukola n’obwengehe amango rhugwerhe obuba omu kulangalira Yehova. Aliko si, nka gurhe rhunakomeza obulangalire bwerhu mu Yehova, ahanene amango rhugwerhe obuba? Rhuganire k’ogula mufano. Nka bamakubwira ok’ogwerhe obulwala, nkabaga wakarhanga kuyunva oyubahire. Aliko, wakachiyunva orhulerere nk’olangalire omunganga wawe. Nkabaga akaba ey’arhabere balwala banene baligwerhe obulwala buli nk’obogwerhe. Akakuyunviriza bwinja bwinja amango oli wamufasiriya ebirhumire wagwarha obuba, wanachiyunva okw’akulagireko. Nkabaga akakuyandikira amafumu marhabalaga abandi. Intyo kon’oko, rhwakomeza obulangalire bwerhu mu Yehova omu kuwaza oku by’arhujirire, eby’ali arhujirira zene, n’ebinj’arhujirira omu mango mayinjire. Intyo ku Daudi alijirire, oku rhunali rhwaganira oku binwa byarongozwaga n’eroho lichesibwa bili omu Zaburi ya 56, owaze gurhe nawe wakakomeza obulangalire bwawe mu Yehova n’okuyorha orhulerere amango ogwerhe obuba.

BICHI YEHOVA AJIRIRE?

5. Amango Daudi aligwerhe obuba, bichi aliri akengeerako? (Zaburi 56:12, 13)

⁵ Chiro akaba oku Daudi aliri omu hali ekomere bwenene, arhalekaga kuwaza oku bintu binja Yehova abaga amukolere omu mango magerere. (Osome Zaburi 56:12, 13.) Echola ch’echintu Daudi aliri ajira omu kalamo kage koshi. Omufano, mango muguma aliri akengera oku bulemi bwa Yehova. Okujira ntyo kwaliri kwamuyibusya kangana gurhe Yehova agwerhe emisi anazigiire abantu bwenene. (Zb. 65:6-9) Kandi Daudi aliri akengera oku bi Yehova akoleere abandi. (Zb. 31:19; 37:25, 26) Kandi aliri akengera ahanene oku bi Yehova abaga amukolere yewe bwage bwage. Yehova abaga arhabere Daudi n’oku mulanga kurhenga achili mwana. (Zb. 22:9, 10) Kweri, okuwaza kw’ebyola bintu kwalirhabere Daudi akomeze obulangalire bwage mu Yehova!

6. Amango rhwamachiyunva rhugwere obuba, bichi byakarhurhabala rhugenderere kulangalira Yehova?

⁶ Amango ogwerhe obuba, ochibaze ntya: ‘Bichi Yehova ajirire?’ Owaze oku bintu alemere. Omufano, “ololereze bwinja” okuntu  Yehova anashishikala enyunyi n’amauwa, chiro akaba oku birhagwerhe obuhashe b’okuyerekana engeso za Mungu birhakanamuharamya. K’okuderha oku rhwabo, Yehova anarhushishikala bwenene kulusha ezola nyunyi n’amauwa. Rhukakengera bwenene kw’ebyola rhwagwarha obulangalire bunene muye. (Mt. 6:25-32) Waza kandi oku bi Yehova ajirire balala banamuharamya. Wakayiga oku bilolere mufano muguma g’omuntu oganirirwe omu Biblia waliyerekene obwemere busomeze, changwa wakasoma oku bilolere omufano gwa mukozi muguma wa Yehova wa mumanola mango. a Omu kuyongera, owaze oku bintu Yehova akukolere. Gurhe Yehova akurhabere y’ohikira kumumenya? (Yoh. 6:44) Gurhe ashubize oku masala mawe? (1 Yo. 5:14) Gurhe onayunguka buli lusiku n’enterekero y’Omugala muzigirwa?—Efe. 1:7; Ebr. 4:14-16.

7. Gurhe eby’omulebi Danieli ageragamo byalirhabere mwali-werhu Vanessa ahime obuba bwage?

⁷ Mwali-werhu Vanessa, b w’omu chihugo che Haiti, aligerere omu hali eyubahisize. Mulume muguma w’ahantu ali lamire aliri amuhamagala, n’okumurhumira amamesaje buli lusiku, aliri amuseza abe mwira wage. Vanessa amubwira buzira kumubisha okw’arhalonzeze kujira obwira haguma naye. Aliko oyola mulume akaliha bwenene analonza amujire kubi. Vanessa aderhere ntya: “Naliyubahire bwenene.” Gurhe Vanessa alijire ajira? Alijirire okwage koshi y’achilanga. Mushamuka muguma w’echibaga amurhabala aganire n’abakulu. Aliko kandi aseza obwenge bwage oku kuntu Yehova alangaga abakozi bage b’omu mango ma mira. Vanessa aderhere ntya: “Omuntu w’oburhanzi naliri nawazako aliri mulebi Danieli. Balimukabwire omu chishimu chili mu basimba bali nzara chiro akaba oku nta gosa alijirire. Aliko, Yehova amulanga. Afunga obunu bwa basimba. Bobola nahema Yehova ajire okuntu oyola mulume aleke kumbwazako n’okumalira echola chibazo, bulala nyono nta chindi nakakolere. Enyuma w’ahola ntachiyunvaga obuba haba n’akatyu.”—Da. 6:12-22.

EBI YEHOVA ALI AJIRA ZENE?

8. Bichi Daudi ali chizerere? (Zaburi 56:8)

⁸ Chiro akaba oku Daudi aliri omu buhanya bukomere amango aliri e Gati, arhagwarhaga buba bunene bwenene. Ahali h’okugwarha obuba, awaza bwenene oku bi Yehova aliri amujirira mw’agola mango. Daudi alichibwenere gurhe Yehova aliri amuyerekeza n’okumulanga, analimenyere okuntu aliri achiyunva. (Osome Zaburi 56:8.) Kandi Daudi aligwerhe abera benja, nka Yonatani, n’Omudahwa Mukulu Ahimeleki, baliri bamuheba omurhima n’oku murhabala. (1 Sa. 20:41, 42; 21:6, 8, 9) Kandi, chiro akaba oku Omwami Sauli aliri alonza kumuyirha, Daudi amufuma. Alichizerere oku Yehova amenyere bwinja bwinja ebyaliri byamuhikira na gurhe aliri achiyunva.

9. Bichi Yehova anaba eyi ali abona ku buli muguma werhu?

⁹ Amango wamahurana echigeregezo chakarhuma wagwarha obuba, oyibuke oku Yehova ali abona echola chigeregezo na nka gurhe chili charhuma wachiyunva. Omufano, Yehova arhamenyaga konyine okuntu Abaizraeli baliri bakolerwa kubi e Misri s’aliko analimenyere kandi “amalumwa [baliri bahurana].” (Kut. 3:7) Daudi ayimpa oku Yehova amenyere “amalibuko” mage “anayinji omulago gunene” agwerhe. (Zb. 31:7) N’amango abona gurhe olubaga lwage lwaliri lwalibuka eju y’esimikiro zabo z’obuhwinja, aliri achiyunva, “ababere.” (Isa. 63:9)  Amango oyubahire, Yehova anayunva okuntu oli wachiyunva anaba alonzeze kukurhabala y’ohima obuba bwawe.

10. Bichi byakakurhabala ochizere oku Yehova aba akulagireko n’okw’akurhabala kulwisa buli chigeregezo?

¹⁰ Amango oli wahurana echigeregezo chikomere, hali amango orhakabona okuntu Yehova ali akurhabala. Gurhe wakajira? Bobola omuheme akurhabale orhegere enjira ali akurhabalamo. (2 Fa. 6:15-17) Naho oje wachibaza ntya: Lyakaba jambo changwa chishubizo oku mbuganano y’echibaga by’ebyakukomeze si? K’echitabu, evideo, changwa olwimpo l’omu zindi-zindi nyimpo by’ebyakukomeze si? Ka hali omuntu wachigerere kuganira oku wazo changwa oku lwandiko lukuhebere omurhima si? Rhwakayibirira kangana gurhe obuzigire bwa bene-berhu n’oburhabale bw’Echinwa cha Mungu, nobo ezola zili mpano zisomeze zirhengere emwa Yehova. (Isa. 65:13; Mk. 10:29, 30) Ziyerekene oku Yehova akulagireko. (Isa. 49:14-16) Kandi ziyerekene oku wakamulangalira.

11. Bichi byarhabalaga mwali-werhu Aida ahime obuba bwage?

¹¹ Mwali-werhu Aida olamire omu chihugo che Senegal, alichibwenere gurhe Yehova aliri amurhabala amango aliri ahurana amalibuko. Bulala y’ewaliri mwana w’efula omu mwabo, abazere bage balilangalire oku akakolere bwenene y’agwarha furanga zinene z’okugula ebintu akanere n’okubashishikala. Enyuma y’okuyorohya akalamo kage y’aba painiya, Aida aligwerhe lufuranga lugeke bwenene. Omulala gwage gwamuyunvira oburhe n’okuhwanza kumuderha kubi. Aderhere ntya: “Naliyubahire oku ntakagalire kurhabala abazere bani n’oku buli muntu anjahika. Chiro naliri navumagula Yehova oku alekerere ebintu bibi bimpikire.” Naho akulikira ejambo oku mbuganano. Aderhere ntya: “Mwene-werhu waliri ageza ejambo arhuyibusya oku Yehova ab’amenyere echinarhuma buli muntu yeshi agwarha emilago changwa obuba. Aliko kubuyabuya, kugerera amahano m’abashamuka n’abandi bantu, n’obuzigire bwa Yehova nagwarha obwizere. Amango nsalira Yehova narhondera kuyunva ngwerhe bwizere bunene oku akantabere, kandi oku naliri nabona amasala mani mashubizwa kwaliri kwanderhera omurhula gwa ndani.” Enyuma wa kasanzi kalebe, mwali-werhu Aida apata akasi kaliri kamuha furanga zitosheze y’agendereza akasi k’obupainiya  n’okushishikala abazere bage n’abandi bantu. Aderhere ntya: “Nayigire kulangalira Yehova loshi loshi. Zene, eyimala kusalira, obuba bwani bwanahwa.”

BICHI YEHOVA AJIRA OMU MANGO MAYINJIRE?

12. Nk’ok’olwandiko lwa Zaburi 56:9 luderhere, bichi Daudi alichizerere?

¹² Osome Zaburi 56:9. Olula lwandiko lurhuyibwisye echindi chintu charhabalaga Daudi amango aligwerhe obuba: Chiro n’amango akalamo kage kaliri omu buhanya aliri awaza oku bindi bintu Yehova akamujirire omu mango mayinjire. Daudi alimenyere oku Yehova akamuyokwere omu kasanzi kakwanene. Olekere nantyo, Yehova aderha oku Daudi akabere mwami we Izraeli. (1 Sa. 16:1, 13) Ku Daudi, byoshi Yehova alimulaganyize byabaga eyi bili nka byayenere.

13. Bichi rhwakachizera oku Yehova arhujirira?

¹³ Bichi Yehova alaganyize oku ajira? Rhurhalangalire oku arhulanga oku bibazo byerhu byoshi. c Aliko oyibuke oku, ebigeregezo byoshi byoshi nkabaga wakahurana muzinola siku zizinda, Yehova nj’abikula omu gulu lihyahya lyayinjire. (Isa. 25:7-9) Omulemi werhu agwerhe misi minene y’okufuula abafire, oku rhukulira amalwala n’oku rhukulira abanzi berhu boshi.—1 Yo. 4:4.

14. Bichi rhwakakengerako?

¹⁴ Amango oyunvirhe ogwerhe obuba, okengere oku bi Yehova akujirira omu mango mayinjire. Ba nka wawaza gurhe nji wachiyunva amango Shetani nj’aba arhachiliho, amango abantu babi nji baba bamalimbulwa eyi abanya-kunali bonyine babakala baliho, eyi n’obushinganyanya yibwayinja bwayegera kubuyabuya kubuyabuya lusiku oku lwindi. Echerekane chageraga oku mbuganano y’eneo ya 2014 chaliyerekene gurhe rhwakagenderera kukengera oku bulangalire bwerhu. Mulume muguma aganira n’omulala gwage okuntu olwandiko lwa 2 Timoteo 3:1-5 lwakaderhere nka lwabaga yilwaganirira oku bilolere e Paradizo. Lwakaderhere ntya: “Omu gulu lihyahya nji mwaba ebihe bisimisize bwenene bulala abantu nji baba eyi bazigirene, bazigire ebintu by’ekiroho, bagwerhe olugero, berhohye, banakuuza Mungu, banakenga abazere, bagwerhe eshukrani, bali bemana, bagwerhe obuzigire bw’akasisi oku bantu b’emilala yabo, banayunvikana n’abandi, banaderha abandi bwinja esiku zoshi, banachigala, berhonzi, banasiima amenja, bakanihirwa, banayemera amawazo m’abandi, banachicha bufi, bazigire Mungu ahali h’okusima oluyenge, bachishwekere ku Mungu, oyegere abantu bali nkabo.” K’onaganira n’abantu b’omulala gwawe changwa bene-benyu na bali-benyu oku bilolere okuntu akalamo nji kaba omu gulu lihyahya?

15. Amango mwali-werhu Tanja aligwerhe obuba bichi byamurhabalaga yayorha mwishwekerezi?

¹⁵ Rhuganire oku byahikiraga mwali-werhu oyirikirwe Tanja w’omu chihugo che Macedoine du Nord. Amango arhondera kuyiga Ebiblia, abazere bage barhondera kumupinga. Aliko okuwaza oku bi Yehova nj’amujirira omu mango mayinjire kwarhabala mwali-werhu Tanja ayorhe mwimana amango aligwerhe obuba. Aderhere ntya: “Biguma omu bintu naliri nayubaha byayinja mpikira. Nyama agendaga ankubirha buli kurhenga oku mbuganano. Abazere bani baliri bankolera kubi n’okubwira oku nji banyirha inkaba Muhamirizi wa Yehova.” Buzinda, bamufukuza ahamwabo. Gurhe alijire ajira? Aderhere ntya: “Nachiseza oku busiime n’akagwarhire esiku n’amango nka ngenderere kubera mwishwekerezi. Kandi naliri nawaza oku bilolere ebi Yehova nj’ampemba omu gulu lihyahya nahezeze mu linola gulu libi, na gurhe ebintu bibi byoshi nji byaba byayibagirwe.” Mwali-werhu Tanja ali genderere kuyorha mwishwekerezi.  Kandi kugerera oburhabale bwa Yehova, apata ahantu h’okulama. Kugera buno, mwali-werhu Tanja ashabirwe na mwene-werhu mwimana banali bakola akasi k’amango moshi haguma omu busiime.

OKOMEZE OBULANGALIRE BWAWE MU YEHOVA ZENE

16. Bichi nji byarhurhabala rhuyorhe rhugwerhe obushiru amango nji rhwabona obulebi buli omu Luka 21:26-28 yi bwayenera?

¹⁶ Omu mango mamalibuko makulu, abantu nji “balaba changwa nji bagwa echihumulo eju y’obuba.” Aliko abantu ba Mungu nji bayorha buzira kushaganyika n’eyibagwerhe obushiru. (Osome Luka 21:26-28.) Bulagurhe nji rhwaba rhugwerhe obushiru? Bulala nji rhwaba eyi rhwayigire kulangalira Yehova. Mwali-werhu Tanja rhwabaga rhwaganirireko, aderhere okw’ebyageragamo bili byamurhabala alwise ezindi hali zikomere. “Nayigire oku Yehova akarhurhabala rhulembere buli hali yoshi yoshi ekomere n’oku rhugisha. Mango maguma byakashusha nk’abandi babali bayerekeza ebintu, aliko Yehova agwerhe emisi bwenene kubalusha. Kandi chiro akaba echigeregezo chakaba chikomere, chahikira obuzinda.”

17. Gurhe olwandiko lwerhu l’omwaka gwa 2024 lwarhurhabala? (Olole efoto y’okuchiganda.)

¹⁷ Zene hali bintu binene bwenene byakarhuma rhwachiyunva rhugwerhe obuba. Aliko kuguma na Daudi, rhurhakwanene kuziga obuba bwarhuhima. Olwandiko lwerhu l’Omwaka gwa 2024 Daudi asalira Yehova ntya: “Amango namayunva obuba, inakulangalira.” (Zb. 56:3) Musomi muguma we Biblia aderhere ntya oku bilolere olula lwandiko, Daudi “arhaliri awaza bwenene oku bintu bina mulerhera obuba changwa ebibazo byage. Ah’okujira ntyo aliri aseza obwenge bwage oku wakamuyokola.” Owaze oku lwandiko lwerhu l’omwaka omu myezi yayinjire, ahanene amango oli wahurana n’ehali ziyubahisize. Orhole akasanzi k’okuwaza oku bi Yehova ajirire, oku by’ali ajira, n’ebyajira omu mango mayinjire. Nantyo, kuguma na Daudi wakaderha ntya: “Mungu yi dangalire, ntacho nayubaha.”—Zb. 56:4.