ECHINWA “chitugari” omu lulimi lwa mira omu Tafsiri ya Ulimwengu Mpya chakaderhera mbero zinene z’emitugari. (Mdo. 8:28, 29, 38) Aliko, bibonekene ok’oyula Muetiopiya aliri amu mutugari guzibuzibu kulusha omutugari gw’evita changwa ogu banakolesa omu malibirha. Rhuganirage oku mpanvu ziguma zirhumire rhwaderha ntyo.

Oyola Omuetiyopiya aliri murhwali wajiraga olugenzi lulehere. Aliri “murhwali waliri wakolera Kandake, mwami-kazi w’Abanyaetiyopiya, wanaliyimangiire obuhirhi bwage boshi.” (Mdo. 8:27) Etiyopiya ya mira yabaga egerere n’omu Soudan ya zene n’echichira che Sud che Misri. Nachiro akaba oyola mulumume nkabaga arhagendaga mw’echila chitugari omu lugenzi loshi, akwanene kuba aligwerhe mizigo minene y’okukolesa m’olola lugenzi. Omu mitugari yagenda yakoleswa omu kagana ka burhanzi N.K.Y., haliri n’emitugari ya mapine 4 y’okuheka abantu. Muntu muguma wahanire amafasiriyo oku chitabu cha Matendo aderhere ntya: “Echitugari chili nk’echola chaligwerhe efasi nzibuzibu y’okuheba mw’emizigo n’ebindi-bindi bintu, n’echola chaliri charhabala abantu bagale kujira olugenzi lulehere.”

Oyola Muetiyopiya aliri asoma amango Filipo amuyegera. Eyi ngani ederhere oku “Filipo agenda alibirha eburhambira bw’echitugari n’okuyunva y’asoma [Omuetiyopiya] omulebi Isaya n’omulenge.” (Mdo 8:30) Ebitugari by’olugenzi birhakolwaga oku bileme byalibirha bwenene. Bulala echola chitugari chaliri chalambagira kubuyabuya, echola charhuma oyola Muetiyopiya agala kusoma, byanarhuma Filipo naye amuhikako anali alambagira n’amagulu.

Oyola Muetiyopiya “abwira Filipo agende ayikale haguma naye.” (Mdo. 8:31) Ebitugari bagendaga bakolesa omu kulibirha, owaliri atembeza alikwanene kuba ey’ayumangire. Aliko, omu chitugari ch’okubalama mowe, Omuetiopiya na Filipo baligwerhe ah’okuyikala.

Nk’okw’ebili omu Matendo sura 8 biderhere n’ezindi ngani, ebitabu byerhu bichizindire yerekana amafoto m’Omuetiyopiya oli omu chitugari chizibuzibu ahali h’okuba omu chitugari chigeke chagendaga chakoleswa oku vita changwa omu malibirha.