MWAZI G’OKUYIGA 2
OLWIMPO 19 Ebilyo by’Egolo bya Waliha
Ochirheganyize oku Lusiku lw’Akamaro Bwenene omu Mwaka si?
“Mugenderere kujira ntya omu kunyibuka.”—LU. 22:19.
EBIRHWAYIGA
Rhuganire bula gurhe olubwiko luli lw’akamaro bwenene, okuntu rhwakachirheganya, n’okuntu rhwakarhabala abandi yi baluhikako.
1. Bulagurhe olwibuko luba lusiku lw’akamaro bwenene omu mwaka? (Luka 22:19, 20)
OKU bantu ba Yehova, olusiku lw’olwibuko lw’olufu lwa Yesu luli lw’akamaro bwenene omu mwaka. Echola chonyine che chintu ch’akamaro bwenene Yesu ahanaga kw’erhegeko okw’abanafunzi bage bakwanene kugenda bayibuka. (Osome Luka 22:19, 20.) Hali mpamvu zinene zinarhuma rhwalindira n’enyorha olusiku l’olwibuko. Rhuganire ku mpamvu ziguma muzo.
2. Mpamvu zihe ziguma zinarhuma rhwasimiswa n’Olwibuko?
2 Olwibuko lunarhurhabala rhukengere bwenene oku kamaro k’enchungu. Lunarhuyibusa gurhe rhwakayerekana eshukrani oku nterekero ya Yesu. (2 Ko. 5:14, 15) Kandi lunarhuhereza orozo lw’okusiimira “kuhebana omurhima buli muguma n’owindi” haguma na bene-berhu na bali-berhu. (Ro. 1:12) Bene-berhu na bali berhu balekere kuhika oku mbuganano banayinja oku lwibuko. Bulala banabakolera oku buzigire amango m’olwibuko, baguma banachishoga kugalukira Yehova. Na bantu banene rhunahamagala oku lwibuko banasimiswa n’ebibabwene n’ebibayunvirhe, n’ebyola byanabashunika barhondere kuyiga Ebibliya. Ebyola byoshi binarhuma rhwabona ok’olusiku l’olwibuko lunali lw’akamaro bwenene!
3. Gurhe Olwibuko lunaheba bene-berhu na bali-berhu b’omu gulu lyoshi omu buguma? (Olole n’efoto.)
3 Rhunalingiriza na nyorha nene olola lusiku bulala rhuba rhumenyere oku lwarhuheba omu buguma haguma na bene-berhu na bali-berhu b’omu gulu lyoshi. Abahamirizi ba Yehova omu gulu lyoshi banakola olwibuko amango ezuba lyamazika. Rhunalindira rhweshi ejambo lyayerekana akamaro k’enchungu. Rhunayimpa nyimpo ebiri z’okukuuza, rhunageza omugati n’edivayi, rhunaderha na “amena” orhengere oku murhima ku masala 4. Omu sa 24 ebibaga by’omu gulu lyoshi binaba byajirire oko konoko. Ba nka wawaza obusiime Yehova na Yesu banagwarha amango rhweshi omu gulu rhuli rhwabahereza olukengo mw’eyola njira.
Olwibuko lunaheba bene-berhu na bali-berhu omu buguma omu gulu lyoshi (Olole echifungo cha 3) f
4. Bichi rhwaganirako mu gunola mwazi?
4 Mu gunola mwazi rhwaganira kw’ebila bibazo: Gurhe rhwakarheganya emirhima yerhu amango m’olwibuko? Gurhe rhwakarhabala abandi yi bayunguka n’okukegera oku lwibuko? Kandi gurhe rhwakarhabala bene-berhu na bali-berhu balekere kuhubiri n’okuhika oku mbuganano? Ebishubizo kw’ebyola bibazo byakurhabla obe tayari kw’echola chihe ch’akamaro.
OKUNTU RHWAKARHEGANYA OMURHIMA GWERHU AMANGO M’OLWIBUKO
5. a) Bulagurhe rhukwanene kukengera oku kachiro k’enchungu? (Zaburi 49:7, 8) b) Bichi rhwayigire kugerera evideo Bici Byarhumaga Yesu Afa?
5 Njira nguma y’akamaro rhwakarheganya m’omurhima gwerhu amango m’olwibuko kuli kukengera oku kamaro k’enterekero y’enchungu ya Yesu Kristu. Nta chintu n’echiguma chakagalire kurhuyokola kurhenga omu lufu n’echaha. (Osome Zaburi 49:7, 8; olole n’evideo Bici Byarhumaga Yesu Afa?) a Yehova alijirire okuntu y’omwana wage Yesu ahaana akalamo kage yarhuyokola. (Ro. 6:23) Bobola, Yehova na Yesu bahanire enterekero y’akachiro bwenene. Amango moshi rhwamagenderera kukengera oku nterekero Yehova na Yesu bahanire eju yerhu, kurhwanagenderera kugwarha eshukrani omu nchungu. Rhwaganira ku bintu biguma by’akamaro byali hemerwe yi Yehova na Yesu bahaana enchungu. Aliko ech’oburhanzi, enchungu eheberwemo bichi na bichi?
6. Enchungu eheberhwe mu bichi na bichi?
6 Enchungu lili beyi linalipwa yiligombola chintu chilebe. Omuntu murhanzi walemwaga Adamu aliri mushinganyanya. Amango akola echaha aheza akalamo kashinganene k’esiku n’amango, arhali ku yewe yenyine si n’oku bana bage boshi. Omu kujuha ebi Adamu ahezaga, Yesu alihanire akalamo kage kashinganyanya nka nterekero. Omu mango m’akalamo kage oku gulu, Yesu, “arhakolaga echaha n’echiguma, n’obubeshi burhachigeraga bwarhenga omu bunu bwage.” (1 Pe. 2:22) Amango Yesu afa, aliri mushinganyanya kuguma n’oku Adamu aliri arhaza kujira echaha. Bobola kugerera enterekero, Yesu ahaana akalamo kage omu kulipa ebeyi ly’akamaro Adamu ahezaga.—1 Ko. 15:45; 1 Ti. 2:6.
7. Bigeregezo bihe biguma Yesu alihurene amango aliri oku gulu?
7 Amango Yesu aliri oku gulu, aligenderere kukenga Yehova omu bintu byoshi, chiro n’amango byalimukomerere kujira ntyo. Yesu aliri mwana oshinganene, abazere bage bowe nanga. Aliko aligenderere kubakenga. (Lu. 2:51) Amango alichiri omu myaka y’olubiruko nkabaga byalimuhemere ahime buli kahidiko k’abandi bantu balishondere aleke kukenga Yehova n’okurhakenga abazere bage, changwa yarhayorha mwimana emwa Yehova. Kandi n’amango Yesu akula n’okuba muntu mukulu, byali bimuhemere ahime amashumi ma Shetani Ibilisi waliri walonza ajire echaha n’oku mubwira wazi oku arhayorhaga mwimana emwa Mungu. (Mt. 4:1-11) Shetani alihigirire oku Yesu ajire echaha nabuzinda arhagalaga kulipa enchungu.
8. Bindi bigeregezo bihe Yesu ali lembere?
8 Omu mango m’akasi kage oku gulu, Yesu ali lembere ebindi bigeregezo. Abanzi bage baliri bamulibuza n’okulonza kumuyirha. (Lu. 4:28, 29; 13:31) Byalimuhemere alembere okurhashinganana kw’abanafunzi bage. (Mk. 9:33, 34) Amango achibirwa olubanja omu kalamo kage hanola oku gulu, alilibwizwe oku murhi gw’amalibuko anabonererwa. Naho akolerwa nka munizi n’okulembera malumwa manene. (Ebr. 12:1-3) Byalimuhemere alembere amola malibuko mazinda buzira burhabale bwa Yehova. b—Mt. 27:46.
9. Gurhe rhunachiyunva oku bilolere enterekero ya Yesu? (1 Petro 1:8)
9 Bibonekene bwinja oku Yesu ali libukire bwenene yahaana enchungu. Amango rhwamawaza oku bintu bingana Yesu ali chiyimire yahaana akalamo kage eju yerhu, kw’akarhuma rhwashuba kumuzigira bwenene.—Osome 1 Petro 1:8.
10. Bichi Yehova alikwanene kujira yahana enchungu?
10 Bichi Yehova alijirire oku bulonza byarhumaga Yesu ahana enterekero y’enchungu? Yehova na Yesu baherhe obwira bukomere buba aha kagarhi k’omwana n’eshe. (Mez. 8:30) Ba nka wawaza okuntu Yehova alichiyunvirhe ababere amango Yesu aliri alembera bigeregezo binene hanola oku gulu. Bishushire oku Yehova aliyunvirhe malumwa manene amango abona omugala ajahikwa, akolerwa kubi n’okulibuzwa.
11. Lerha omufano guyerekene gurhe Yehova alichiyunvirhe amango Yesu alibuzwa.
11 Buli muzere wachigerere afisa omwana, aba amenyere malumwa mangana gurhe olufu lunalerha. Rhugwerhe obwemere bukomere omu bufuuke aliko echola chirhamala amalumwa amango rhwamaheza omuzigirwa werhu. Ogola mufano gurhurhabere rhuyunve okuntu Yehova alichiyunvirhe amango abona omugala muzigirwa y’alibuzwa n’okufa omu mwaka gwa 33 N.K.Y. c—Mt. 3:17.
12. Bichi rhwakajira omu maboso m’embere w’olwibuko?
12 Mu chinola chihe n’omu chihe ch’olwibuko ochihangane kuyiga binene oku bilolere enchungu omu funzo lyawe lyawe n’omu buharamye bw’omulala. Okolese echitabu Msaada wa Kutafuta habari kwa Ajili ya Mashahidi wa Yehova (Oburhabale oku Bahamirizi ba Yehova bw’Okulonza Emyazi) changwa ebindi bitabu biganirire binene oku bilolere olwibuko. d Kandi ochihangane kukulikira eprograme y’obusomi bw’Ebiblia oku bilolere olwibuko buhanirwe omu kaye ly’embuganano Akasi n’Akalamo k’Omukristu. Kandi oku lusiku lw’olwibuko, omenye wayibagira kukulikira eprograme eminuzize y’obuharamye bw’esezi. Amango rhwamarheganya omurhima gwerhu oku bilolere olwibuko, rhwaba tayari kurhabala abandi bayunguke n’olwibuko.—Ezr. 7:10.
ORHABALE ABANDI BAYUNGUKE N’OLWIBUKO
13. Chintu chihe ch’oburhanzi rhwakajira yi rhurhabala abandi bayunguke n’olwibuko?
13 Gurhe rhwakarhabala abandi bayunguke n’olwibuko? Ech’oburhanzi, ochihangane kubahamagala oku lwibuko. Ahali h’okuhamagala abarhuzigana kubuganana nabo omu mahubiri bonyine, rhwakayandika eperu ly’abandi bantu rhukwanene kuhamagala. Abola baheberwemo, abazere berhu, abarhunakola nabo, abarhunasoma nabo, n’abandi bantu rhumenyere. Chiro akaba rhurhagwerhe ama envitasiyo manene mali emprime rhwakabarhumira echifarhiso ch’echielektronike. Wakasomerwa kubona bantu bangana gurhe bachishogere kuhika oku lwibuko!—Muh. 11:6.
14. Ofasiriye akamaro k’envitasiyo wahanaga masu oku masu.
14 Amango wamahamagala abantu masu oku masu, nkabaga byakarhuma bagwarha enyorha nene y’okuhika oku lwibuko. Mwali-werhu muguma eyi eba arhali muhamirizi, alisomerwe kubona eba amubwira oku bagenda haguma oku lwibuko. Bulagurhe echola chalimusomeze? Bulala aligezeze bisanzi binene ey’ali amuheba omurhima nji bagende haguma aliko arhayemeraga. Bichi byarhumaga eba ayemera agola mango? Omushamuka omumenyere bwinja alimuhamagere oku lwibuko omu kumuha envitasiyo. Eba agera oku lwibuko mw’ogola mwaka, anagenderera kujira ntyo mu myaka minene.
15. Bichi rhukwanene kubika omu bwenge amango rhuli rhwahamagala omuntu oku lwibuko?
15 Obike omu bwenge oku amango wamahamagala abantu oku lwibuko, nkabaga bagwarha ebibazo oku bilolere olwibuko ahanene akaba bob’oburhanzi bahika oku mbuganano zerhu. Bobola rhukwanene kukengera oku bibazo bakarhubaza n’okuchirheganya gurhe rhwakabishubizako. (Ko. 4:6) Omufano, nkabaga baguma bakachibaza ntya: ‘Gurhe ebintu nji byaba bili oku lwibuko?’ ‘Eyola mbuganano eminuzize yamala bisanzi bingana gurhe?’ ‘Gurhe omuntu akwanene kuyambala y’aja kw’eyola mbuganano eminuzize?’ ‘Hali efuranga nkwanene kulipa embere nyingire si?’ ‘Bayinja kumbwira mpane esadaka hano nkala mba ndi oku lwibuko si?’ Amango rhwamahamagala omuntu oku lwibuko, nkabaga rhwakamubaza ntya konyine, “Hali echibazo ogwerhe si?” naho nkabaga, rhwanamushubiza oku bibazo byage byoshi akaba agwerhe. Kandi rhwakakolesa amavideo Oyibuke olufu lwa Yesu na Bichi binakolwa aha Rhunakusanyikira? Omu kurhabala omuntu ayunve bwinja gurhe embuganano zerhu zinakolwa. Kandi, esomo lya 28 ly’echitabu Siimira Akalamo Esiku n’Amango! Ligwerhe eyindi myazi minene wakaganira naye.
16. Inkabaga bindi bibazo bihe abayinjaga oku lwibuko b’oburhanzi bakachibaza?
16 Enyuma y’okumala kukulikira olwibuko, abahyahya nkabaga bakabaza ebibazo binene. Bulagurhe ntaye n’omuguma walire omugati n’okunywa edivayi? Changwa bulagurhe bantu (bageke) bobalire? Kandi nkabaga bakachibaza kanga rhunajira olwibuko? Inkabaga bakalonza kumenya akaba embuganano z’Abahamirizi ba Yehova zoshi zinagera omu njira eli ntyo. Chiro akaba amawazo manene makaba maganirirweko omu jambo ly’olwibuko, nkabaga abahyahya bakaba bachikenere amafasiriyo manene. Olole oku jw.org omwazi guherhe erhwe liderhere “Juu ya Nini Mashahidi wa Yehova Wanafanyaka Meza ya Bwana Tofauti na Dini Zingine?” (Bulagurhe Abahamirizi ba Yehova Barhajira Ameza ga Waliha Kuguma n’Amandi Madini?) Byakarhurhabala kushubiza oku biguma omu bibazo byabo. Rhwajira koshi rhwakagala embere, amango, n’enyuma w’olwibuko, k’okuderha kurhabala boshi bagwerhe “oborhere b’omurhima gukwanene” bayunguke n’olwibuko.—Mdo. 13:48.
ORHABALE ABAHOLERE
17. Gurhe abashamuka b’echibaga bakarhabala balala baholere? (Ezekieli 34:12, 16)
17 Omu chihe ch’olwibuko bichi abashamuka b’echibaga bakajira yibarhabala balala baholere? Mubayereke oku mubalagireko. (Osome Ezekieli 34:12, 16.) Embere y’olwibuko muchizere oku mwahamagere banene nk’oku byakanagalikana koshi. Mubabwire oku mubalagireko n’oku mulonzeze kubarhabala mu buli njira yoshi nk’oku byakanagalikana. Mubahamagale oku lwibuko. Na bakayinja muchihangane kubayegereza n’obushagaluke. N’enyuma y’olwibuko mugenderere kulambagirira bene-berhu na bali-berhu bazigirwa munabahereze oburhabale bwoshi bwoshi bw’ekiroho bakaba bakenere y’ibagalukira Yehova.—1 Pe. 2:25.
18. Gurhe rhweshi omu chibaga rhwakarhabala balala baholere? (Waroma 12:10)
18 Rhweshi omu chibaga rhwakarhabala abaholere bayinje oku lwibuko. Nka gurhe? Omu kubayereka obuzigire, kubakolera oku bwinja n’okubayereka obukenge. (Osome Waroma 12:10.) Oyibuke oku nkabaga byali bibakomerere omu kushuba galukira embuganano. Nkabaga baligwerhe obuba oku bilolere ebi bene-berhu na bali-berhu bakababwirire changwa ebibakaderhere oku bibalolere. e Bobola orhababazaga ebibazo byakarhuma bachiyunva kubi, changwa k’uderha ebinwa byakabavuna omurhima. (1 Te. 5:11) Abola bene-berhu na bali-berhu bali berhu Bakristu. Kandi buli busiime bunene kubona rhwashuba kuharamiza haguma nabo!—Zb. 119:176; Mdo. 20:35.
19. Gurhe rhunayunguka amango rhwamaja oku lwibuko l’olufu lwa Yesu?
19 Rhugwerhe obusiime bunene okubona Yesu arhubwirire rhugende rhwayibuka olufu lwage buli mwaka. Rhwanabwene bulagurhe bili by’akamaro bwenene. Rhwabo haguma n’abandi rhunayunguka mu njira zinene amango rhwamagera oku lwibuko. (Isa. 48:17, 18) Rhunakuza obuzigire bwerhu mu Yehova na Yesu. Rhunayerekana kangana gurhe rhusimisizwe bwenene n’ebibarhujirire. Rhunashuba yegera bwenene bene-berhu na bali-berhu. Kandi rhwakarhabala abandi bayige gurhe nabo bakayunguka n’emigisho enchungu y’abalerhere. Leka rhujire okwerhu koshi rhwakagala yinjirhugera oku lwibuko lw’ogula mwaka kokuderha olusiku lw’akamaro bwenene omu mwaka!
GURHE RHWAKA . . .
-
rheganya omurhima gwerhu oku lwibuko?
-
rhabala abandi bayunguke n’olwibuko?
-
rhabala abaholere?
OLWIMPO 18 Koko Okurhuhaanira Enchungu
a Y’obona emyazi n’amavideo maganirirwe mu gunola mwazi, oje oku jw.org oyandike elyola rhwe ahantu h’okulonzeza emyazi.
c Olole echitabu Mkaribie Yehova, sura ya 23, bukurasa 8-9.
d Olole echisanduku “ Emyazi Wakalonza.”
e Olole efoto n’echisanduku “ Gurhe Echibaga Chakajira?” Mwene-werhu waholere yayubaha kuja omu Chumbi ly’Obwami, aliko amahima obuba bwage, amasimiswa n’okuntu bamuyegereze n’obushagaluke bunene.
f AMAFASIRIYO M’EFOTO : Amango abantu ba Yehova bali bajira olwibuko mu fasi ziguma omu gulu, bene-babo na bali-babo b’omu zindi fasi omu gulu nabo banaba eyi bali bachirheganya kw’echola chihe ch’akamaro.
