1-2. Bibazo bihe abakozi ba Yehova bakahurana?

 AMANGO chintu chilebe chikomere chamarhuhikira, akalamo kerhu kanahindamuka aho han’aho. Omufano, mwene-werhu mwimana oyirikirwe Luis a balimupimire obulwala bukomere bwenene bw’akansere. Doktere amubwira oku akafire enyuma wa myezi migeke. Monika n’eba baligwerhe binene by’okukola omu kasi ka Yehova. Lusiku luguma, mwali-werhu Monika arhegera okw’eba oli mushamuka omu chibaga aliri akola ebyaha omu bwibisho mu siku zinene. Mwali-werhu Olivia ochili mulamba alisezezwe arhenge omu nju yage amango echinjira chikomere chaliri hofi kurhengerera. Amango agaluka abugana echihusi chashandwize enju yage. Akalamo ka Luis, Monika na Olivia kahindamuka aho han’aho loshi loshi. Nawe si, hali chintu chilebe chikomere chachigerere kukuhikira chahindamwire akalamo kawe loshi loshi?

² Chiro akaba rhuli bakozi ba Yehova bemana, rhuchili rhwahurana ebibazo bikomere n’amalwala kuguma n’abandi bantu boshi. Nkabaga kandi rhwakaba eyi rhulirhwalembera obupinzani, amalibuko malerherwe na balala bashombere abantu ba Mungu. Chiro akaba oku Yehova arharhulanga oku bibazo bili nk’ebyola, arhulaganyize okw’arhurhabala. (Isa. 41:10) Kugerera oburhabale bwage rhwakagenderera kulanga obusiime bwerhu, okurhola esimikiro zinja, n’okuyorha bemana emwage chiro akaba yirhwahurana ehali zikomere bwenene. Mu gunola mwazi, rhwaganira ku njira 4 Yehova akarhurhabalamo amango rhuli rhwahurana ebibazo bikomere omu kalamo. Kandi rhwaganira oku birhukwanene kujira yirhuyunguka n’oburhabale bwa Yehova.

 YEHOVA AKULANGA

3. Amango rhwamahurana ebibazo bikomere bichi rhurhakachigala kujira?

³ Echigeregezo. Amango rhuli rhwahurana n’echihe chikomere, byakarhukomerera kuwaza n’okurhola esimikiro zinja. Bulagurhe? Bulala rhwakayunva rhugwerhe mugayo gunene n’okuyunva omulago. Rhwakachiyunva rhuhwererwe n’okuchibaza gurhe rhujage rhwajira. Lekaga rhuganire gurhe bali-berhu babiri rhwabaga rhwashambereko embere, balichiyunvirhe omu mango m’ebigeregezo byabo. Olivia aderhere ntya: “Amango echiyaga chizibuzibu chimala kushandaza enju yani, nachiyunva mpwererwe nayunva n’ebintu byanchubukire.” Mwali-werhu Monika aderhere ntya amango eba aliri amugoseza: “Nalichiyunvirhe nvunikire omurhima bwenene. Naliyunvirhe nka bashingire akeri omu murhima. Nalichiyunvire ingambirwe kukola orhwasi rhwabuli lusiku. Nta mango naliwazize haba n’akatyu okw’ebyola byakampikire.” Gurhe Yehova arhulanganyize oku arhurhabala amango rhwamachiyunva rhuhwererwe?

4. Nk’ok’olwandiko lwa Wafilipi 4:6, 7 luderhere, bichi Yehova arhulaganyize?

⁴ Bichi Yehova alaganyize okw’arhujirira? Alaganyize kw’arhuha ebye Biblia eyirikire “murhula gwa Mungu.” (Osome Wafilipi 4:6, 7.) Ogola murhula kuli kuyunva omuntu arhulerere omu bwenge n’omu murhima, bulala agwerhe obwira bukomere haguma na Yehova. Ogola murhula “guchubukire byoshi omuntu akagala kuyunva”; guli gw’akamaro bwenene orhakalola. Hali amango wachigerere wasalira Yehova birhengere oku murhima na buzinda wachiyunva wamarhulera? Walichiyunvirhe ntyo bulala Yehova alikuhere “omurhula gwage.”

5. Gurhe omurhula gwa Mungu gunalanga obwenge n’omurhima gwerhu?

⁵ Olula lwandiko lwa Wafilipi 4:7 lushubire kuderha ok’omurhula gwa Mungu “gwalanga emirhima n’enkengero zerhu.” Echinwa “kulanga” chili chinwa chagendaga chakoleswa omu chisoda, chinakoleswa ahanene okuntu abasoda banalanga evile eyorhe omu bulanzi yibarhayirhera. Abantu balilamire omu vile abola balanzi balirimo, baliri bachiyunva bali omu bulanzi bulala balimenyere okw’abasoda bali babalanga. Intyo kon’oko, amango omurhula gwa Mungu gulangire obwenge n’emirhima yerhu, rhwachiyunva rhurhulerere n’okumenya oku rhuli omu bulanzi. (Zb. 4:8) Kuguma na Hana, chiro akaba ehali yerhu erhahindamukire aho han’aho, rhwakagenderera kuchiyunva rhugwerhe omurhula. (1 Sa. 1:16-18) Kandi amango rhwamachiyunva rhurhulerere, binarhuyorohera ahanene kuwaza bwinja n’okurhola esimikiro z’obwengehe.

6. Bichi rhwakajira yirhuyunguka n’omurhula gwa Mungu? (Olole n’efoto.)

⁶ Bichi rhukwanene kujira? Amango oli omu  bibazo bikuchubukire, wakahamagala “omulanzi.” Nka gurhe? Osalire kugera aha wachiyunva ogwerhe omurhula gwa Mungu. (Lu. 11:9; 1 Te. 5:17) Mwene-werhu Luis, rhwabaga rhwaganirireko, afasiriye gurhe yewe na mukage Ana, baligalire kulwisa okuntu baliri bachiyunva amango babwira Luis okw’asigeze myezi migeke anafa. Aderhere ntya: “Omu hali zili nk’ezila, biba bikomere bwenene okurhola esimikiro oku bilore okuntu wakashishikala amagala n’oku bilolere ebindi bintu. Aliko rhwaligalire kugwarha omurhula mw’echola chihe chikomere bwenene, bulala rhwaliri rhwasalira.” Luis na mukage baderhere oku bagendaga basalira amasala marhengere oku murhima buli mango, omu kuhema Yehova abahereze omurhula g’omu bwenge, omurhima gurhulerere n’obwengehe bwarhuma barhola esimikiro zinja. Kandi balichibwenere obola burhabale. Akaba oli wahurana echigeregezo, ogenderere kusalira, wachibonera oku Yehova akuhereza omurhula gwage gwalanga omurhima n’obwenge bwawe.—Ro. 12:12.

YEHOVA AKURHULIRIZA

7. Guhe rhwakajira amango rhuli rhwahurana ebibazo bikomere?

⁷ Echigeregezo. Amango rhwamahurana echigeregezo chikomere, okuntu rhulirhwachiyunva, enkengero zerhu, birhakachiba nk’okubirhula biba. Kuguma n’okuntu echombo chinaja eyi neyi amango chili omu mulaba gunene, nerhu rhwakayunva nk’obwenge bwerhu buli bwahehwa eju y’okuntu rhuli rhwachiyunva. Mwali-werhu Ana rhwabaga rhwaganirireko, aderhere okw’alichiyunvirhe kubi bwenene amango eba Luis amala kufa. Aderhere ntya: “Mango maguma nakayunvirhe omugayo n’okuhwanza kuchiganya. Naba mukali bwenene bulala bani afire.” Amandi mango Ana aliri achiyunva ali yenyine, n’amango aliri arhola esimikiro oku bilolere ebibazo eba Luis agendaga amala yenyine, aliri achiyunva kubi. Omu kandi kasanzi aliri achiyunva nka muntu oli omu mulaba omu nyanja. Gurhe Yehova anarhurhabala amango rhwamahurana n’ehali zili nk’ezola?

8. Nk’ok’olwandiko lwa Isaya 33:6 luderhere, bichi Yehova arhulaganyize oku arhujirira?

⁸ Bichi Yehova arhulaganyize okw’arhujirira? Arhulaganyize okw’arhurhuliriza. (Osome Isaya 33:6.) Amango hali omulaba omu nyanja, echombo chakaba omu buhanya chanarhondera kuja eyi n’eyi. Byombo binene bijira emigara y’echuma omu mbavu enabirhabala bimenye byaja eyi n’eyi. Abantu bali mw’echola chombo bakachiyunva bali omu bulanzi n’olungenzi lwabo lwaba lwinja. Eyola migara enakola bwinja amango echombo chili chagenda. Intyo kon’oko, Yehova anarhurhuleza nerhu amango rhugenderere kumuharamya oku bwimana omu bihe bikomere.

9. Nkagurhe ebikoleso byerhu by’okulonza emyazi byakarhurhabala rhuyorhe rhurhulerere? (Olole n’efoto.)

 ⁹ Bichi rhukwanene kujira? Amango oyunvirhe amalumwa eju y’ebihe bikomere, ojire okwawe koshi omu kugenderera kusalira, okuja oku mbuganano n’okuhubiri. Nkabaga orhajira nk’oku wagendaga wajira burhanzi, aliko olangalire oku Yehova arhab’alangalire oku rhwajira binene kulusha ebi rhwakagala. (Huzanya na Luka 21:1-4.) Omu programe yawe y’okujira ebintu by’ekiroho, ochihebereho akasanzi k’okujira efunzo lyawe lyawe n’okukengera oku bintu wayigire. Bulagurhe? Kugerera olubaga lwage, Yehova ahebereho amavideo n’emyazi minja bwenene y’omu Chinwa chage byakakurhabala oshube orhulere. Y’opata eby’okenere wakakolesa ebikoleso by’okulonza emyazi bili omu lulimi lwawe nke aplikasiyo yerhu ya JW Library^® wakaja omu, Index des publications, wanaja omu chitabu Msaada wa Kutafuta Habari Kwa ajili ya Mashahidi wa Yehova. (Oburhabale oku Bahamirizi ba Yehova b’Okulonza Emyazi). Monika rhwabaga rhwashambereko burhanzi, aderhere oku aliri akolesa ebyola bikoleso by’okulonza emyazi, amango aliri ayunva obwenge bwage burharhulerere. Omufano, alonza emyazi oku bilolere echinwa “oburhe.” Amandi mango, alonza emyazi oku bilolere echinwa “okulyalihira” changwa “obwimana.” Oku analiri asoma kw’eyola myazi kw’analiri achiyunva bwinja. Aderhere ntya: “Amango narhonderaga kulonza emyazi naliri nayunva emilago bwenene, aliko oku naliri nagenderera kusoma ku nanaliri nachiyunva nka Yehova amampobera bwenene. Oku naliri nagenderera kusoma nayinja kurhegera oku Yehova ayunvirhe okuntu ndi nachiyunva analiri antabala.” Oburhabale buli nk’obola burhengere emwa Yehova, bwakakurhabala kandi kurhulera kugera ah’omulaba gwahwera.—Zb. 119:143, 144.

YEHOVA AKURHABALA

10. Gurhe rhwakachiyunva enyuma w’ebibazo bikomere?

¹⁰ Echigeregezo. Amango echintu chigayisize bwenene chamarhuhikira, rhwakayunva obwenge n’omubiri biluhire bwenene. Rhwakachiyunva nka muntu wabaga wakomere amasharha m’okulibirha aliko wakoromekere okala oli ashonagira. Nkabaga byakarhukomerera kukola ebintu rhwalikomere kukola mira, changwa rhurhakachigwarha enyorha y’okujira ebintu rhwagendaga rhwayunva birhulerhere obusime. Kuguma na Eliya, rhwakachiyunva nka birhukomerere kuzuka. Rhwanachiyunva konyine nka rhugenderere kulyama. (1 Fa. 19:5-7) Bichi Yehova arhulaganyize oku arhujirira amango rhuyunvirhe rhuzambire?

11. Yindi njira ehe Yehova anakolesa omu kurhurhabala? (Zaburi 94:18)

 ¹¹ Bichi Yehova arhulaganyize okw’arhujirira? Arhulaganyize okw’arhurhabala. (Osome Zaburi 94:18.) Nka kulala olala muntu onakola amasharha m’okulibirha wakoromekere akenere oburhabale y’agala kulambagira, nerhu rhukenere oburhabale yirhugenderera omu kasi ka Yehova. Omu bisanzi bili nk’ebyola, Yehova arhurhabere rhuchizere ntya: “Nyono, Yehova Mungu wawe infarhire efune yawe y’okulyo nyono nyendi nakubwira, ‘Orhayubahaga. Nakurhabala.’” (Isa. 41:13) Mwami Daudi alichibwenere oburhabale buli nk’obola kurhenga emwa Yehova. Amango aliri ahurana ebibazo n’abanzi, abwira Yehova ntya: “Efune yawe y’ekulyo enantabala.” (Zb. 18:35) Aliko gurhe Yehova anahana oburhabale bwage?

12. Bande Yehova akakolesa amango rhuyunvirhe rhuzambire?

¹² Mango manene Yehova anakolesa abandi bantu barhurhabale. Omufano, mango maguma Daudi alichiyunvirhe azambire, mwira wage Yonatani ayinja kumulola y’amukomeza n’okumuheba omurhima. (1 Sa. 23:16, 17) Kon’oko Yehova alikoleseze Elisha omu kuhereza Eliya oburhabale alikenere. (1 Fa. 19:16, 21; 2 Fa. 2:2) Zene, Yehova akakolesa abantu b’omu milala yerhu, abera, changwa abashamuka b’omu chibaga omu kurhurhabala. Aliko, amango rhugwerhe omugayo gunene rhwakalonza kuchicha oku bandi. Rhwanalonza konyine kubera ahali bwihunze. Buli muntu anachiyunva ntyo. Gurhe rhwakajira yirhupata oburhabale burhengere emwa Yehova?

13. Bichi rhukwanene kujira yirhuyunguka n’oburhabale bwa Yehova? (Olole n’efoto.)

¹³ Bichi rhukwanene kujira? Ochihangane omenye wakachicha oku bandi. Okuchicha oku bandi kwakarhuma wayinja wachiwazako konyine n’oku bibazo oli wahurana. Okujira ntyo kwakarhuma orharhola esimikiro zinja. (Mez. 18:1) Kweri, rhweshi rhuba rhukenere ebisanzi rhwakaba rhwenyine ahanene amango rhuli rhwahurana ebibazo bikomere. Aliko, amango rhuli rhwachiheba bwihunze mu bisanzi binene, rhwanaba nka rhuli rhwalahira oburhabale bw’abantu Yehova ali akolesa omu kurhurhabala. Bobola chiro akaba oli wahurana ebibazo bikomere bili gurhe, oyemere oburhabale bw’abantu b’omulala gwawe, bera bawe, n’obw’abashamuka b’echibaga. Obone oku Yehova ali abakolesa omu kukurhabala.—Mez. 17:17; Isa. 32:1, 2.

YEHOVA AKUKOMEZA

14. Bintu bihe rhwakahurana byakarhuyubahisa?

¹⁴ Echigeregezo. Rhwakagera amango rhuli  rhwachiyunva rhuyubahire. Ebiblia ederheere abakozi bemena ba Mungu balichiyunvirhe bayubahire n’okudirhimana eju y’abanzi babo n’ebindi bibazo. (Zb. 18:4; 55:1, 5) Intyo kon’oko, rhwakahurana obupinzani oku masomo, oku kasi, bulerherwe n’abantu b’omulala gwerhu changwa eguvernema. Chiro rhwakayubaha oku rhwafa amango bali barhubuka. Mw’amola mango rhwakachiyunva nka rhulekererwe nka mwana mudorho. Gurhe Yehova akarhurhabala omu bihe bili nk’ebyola?

15. Nk’ok’olwandiko lwa Zaburi 94:19 luderhere, bichi Yehova arhujirira?

¹⁵ Bichi Yehova arhulaganyize okw’arhujirira? Arhurhabala n’okurhurhuliriza. (Osome Zaburi 94:19.) Eyila zaburi erhuyibwise omunyere mudorho wayubahire kulyama eju y’echihusi chizibuzibu chili chahusa. Rhwakachapa omu bwenge eshe ali ayinja anamubagalira omu fune kuhika ahajir’ero. Chiro akaba echihusi chili chahusa, ehyola hinyere hyanachiyunva hirhulerere n’okubegeera omu maboko m’eshe. Amango rhuli rhwahurana ebibazo biyubahisize rhwakakenera Darha w’embingu arhubagalire omu fune zage kugera aha rhwachiyunva rhurhulerere. Gurhe rhwakapata echirhulirizo chili nk’echola chirhengere emwa Yehova?

16. Bichi rhwakajira yirhuyunguka n’oburhabale bwa Yehova? (Olole n’efoto.)

¹⁶ Bichi rhukwanene kujira? Rhugeze ebisanzi buli mango haguma na Yehova k’okuderha, omu kusalira n’okusoma echinwa chage. (Zb. 77:1, 12-14) Akaba onazigana kujira ntyo, nkabaga echintu ch’oburhanzi wakajira kuli kuhema Darha w’embingu oburhabale. Obwire Yehova ebi kuyubahisize n’ebikulazize. Omuleke aganire nawe anakurhulirize kugerera amandiko. (Zb. 119:28) Nkabaga wakabona ok’okusoma bigabi biguma bye Biblia byakakurhuliriza amango ogwerhe obuba. Omufano, nkabaga wakabona ebinwa byakakuheba omurhima omu bitabu nka Yobu, Zaburi, Mezali n’omu binwa bya Yesu bili omu Matayo sura ya 6. Amango wamasalira emwa Yehova n’okusoma echinwa chage wayunva okw’ali akurhuliriza.

17. Bwizere buhe rhwakagwarha?

¹⁷ Rhwakachizera oku Yehova aba haguma nerhu amango moshi rhuli rhwahurana ebihe bikomere omu kalamo kerhu. Arhakarhulekerera haba n’akatyu. (Zb. 23:4; 94:14) Yehova arhulaganyize okw’arhulanga, arhukomeza, arhurhabala n’okurhurhuliriza. Olwandiko lwa Isaya 26:3 luderhere ntya oku bilolere Yehova: “Walanga balala banakulangalira loshi; wabaha omurhula gugenderere, bulala bakulangalire woyo.” Bobola olangalire Yehova, onajire koshi wakagala y’oyunguka n’oburhabale bwage. Okajira ntyo, washuba kugwarha emisi chiro n’amango oli omu bibazo bikomere.