MWAZI G’OKUYIGA 4
OLWIMPO 30 Darha, Mungu Wani Kandi Mwira Wani
Yehova Arhugwerhek’Obuzigire bw’Akasisi
“Yehova ajira buzigire bunene bw’akasisi.”—YAK. 5:11.
EBIRHWAYIGA
Obuzigire rhugwerhe ku Yehova bwarhuma rhwaba hofi naye, bwarhuma rhwachiyunva rhuli omu bulanzi, okuchiyunva arhulagireko n’oku rhurhuliriza.
1. Bichi binayinja omu bwenge bwawe amango wamawaza ku Yehova?
WACHIGERERE kuba nka wapima kuwaza gurhe Yehova aba? Amango oli waganira naye omu sala, bichi binayinja omu bwenge bwawe? Rhurhakabona Yehova n’amasu, aliko Ebiblia emuderhereko omu njira zilengene. Yehova ayirikirwe “zuba n’empenzi” na “muliro gunasingonyola.” (Zb. 84:11; Ebr. 12:29) Okubaho kwage kubonekene nka bale ly’akachiro liyirikirwe safiri, nka chuma chili chabaraganya, na nka mungeri guli gwabaraganya. (Eze. 1:26-28) Okola ahamagerwe kwakarhuma rhwagwarha obuba changwa kwanarhutintimisa.
2. Nkabaga bichi byakarhuma byarhukomerera kuyegera Yehova?
2 Bulala rhurhabona Yehova n’amasu, nkabaga byakarhukomerera kuyemera oku aba arhuzigire. Baguma banawaza oku Yehova arhakabazigira haba nakatyu eju y’ebintu bagereremo omu kalamo. Nkabaga barhachigeraga kugwarha eshe obazigire. Yehova amenyere gurhe rhuli rhwachiyunva na bulagurhe byakarhukomerera kumuyegera. Kugerera Ebiblia rhunagala kurhegera ali muntu wanyabachi.
3. Bulagurhe rhukwanene kusuzuma obuzigire bwa Yehova?
3 Ebiblia ederhe oku Mungu buli buzigire. (1 Yo. 4:8) Byoshi anajira anabikola oku buzigire. Obuzigire bwa Mungu bunarhuma aba muntu onahaana, ogwerhe n’emisi erhagwerhe mipaka anayiyerekana ku balala bamuzigire na balala barhamuzigire. (Mt. 5:44, 45) Mu gunola mwazi ahanene rhwaganira ku Yehova n’oku buzigire bwage. Amango rhwayiga bwenene oku bilolere Mungu werhu, kurhwanamuzigira bwenene.
YEHOVA ARHUZIGIRE BWENENE
4. Gurhe obuzigire bwa Yehova bw’akasisi bunarhuma wachiyunva? (Olole n’efoto.)
4 “Yehova ajira buzigire bunene bw’akasisi.” (Yak. 5:11) Omu Biblia, achihuzenye na nyina w’omwana ogwerhe buzigire bunene bw’akasisi. (Isa. 66:12, 13) Ba nka wawaza okuntu omuzere w’omukazi anashishikala omwana wage mudorho oku buzigire. Analyamikiza omwana wage kubuyabuya oku mavi mage, anamuganiza n’ehilenge hikwirire hy’okumubembereza. Amango amalira changwa amango ali ayunva amalumwa, anachihangana kumujirira byoshi akenere. Amango rhugwerhe emilago rhwakachizera obuzigire bwa Yehova. Omwandisi we zaburi ayandikire ntya: “Amango emilago enchubukire onantuliriza n’oku nsiririza.”—Zb. 94:19.
“Kuguma n’oku nyina w’abana anarhuliriza omugala, nagenderera kukurhuliriza” (Olole echifungo cha 4)
5. Obuzigire bwimana bwa Yehova bichi buderhere emwawe?
5 Yehova ali mwimana. (Zb. 103:8) Arhaleka kurhuyereka obuzigire bwage chiro n’amango rhwajirire chintu chilebe chibi. Eshanja lye Izraeli lyaligoseze Yehova turu zinene; aliko amango bachiyunva kubi eju y’ebibi bakolaga n’amango baleka kubijira abayereka obuzigire bwage bwimana. Omufano, ali babwirire ntya: “Mwabere bakachiro omu mesho mani, mwahabirwe olukengo, kandi nabayerekere obuzigire.” (Isa. 43:4, 5) Nerhu Yehova arhugwerhek’obuzigire buli nk’obola zene. Rhwakalangalira obola buzigire buli mango. Chiro akaba rhwajirire ebyaha bikomere, Yehova arhakarhulekerera haba nakatyu. Amango rhwamahungama n’okugalukira Yehova, rhwabona okw’achirhuzigire. Arhulaganyize oku “arhubabalira loshi loshi.” (Isa. 55:7) Ebiblia ederhere oku rhwabona “ebihe by’okuluhusya . . . birhenga emwa Yehova yewe yenyine.”—Mdo. 3:19.
6. Bichi olwandiko lwa Zekaria 2:8 lurhuyigirize oku bilolere Yehova?
6 Osome Zekaria 2:8. Bulala Yehova arhuzigire, anayunva juba juba okuntu rhuli rhwachiyunva, anali tayari kurhulanga. Yehova anachiyunva kubi amango rhugwerhe emilago. Bobola, rhwakachizera oku arhushubiza amango rhwama musalira ntya: “Ondange kuguma n’ok’onalanga embonyi y’elisho lyawe.” (Zb. 17:8) Elisho chili chintu chakaharabika juba juba kandi chili chirumbu ch’omubiri ch’akamaro bwenene. Bobola, amango Yehova amarhuhuzanya n’embonyi y’elisho lyage, kwakaba nka ali aderha ntya; ‘Owinji wapima abajira kubi, mwabo bantu bani, nj’aba ey’amahuma oku chintu chani ch’akachiro bwenene.’
7. Bulagurhe birhuhemere rhukomeze obwizere bwerhu omu buzigire bwa Yehova?
7 Yehova abalonzeze ochizere oku akuzigire woyo bwawe bwawe. Aliko rhumenyere oku eju y’ebirhwagereremo omu mango magerere, byakarhuma rhwachibaza akaba akachirhuzigira. Changwa nkabaga rhwakaba eyi rhuli rhwahurana ehali zene eli yageregeza obwizere bwerhu omu buzigire bwa Yehova. Bichi byakakomeza obwizere bwehu? Kuli kuyiga okuntu Yehova ayerekere Yesu obuzigire bwage, oku bashigwa, n’akurhwabo rhweshi.
OKUNTU YEHOVA ANAYEREKANA OBUZIGIRE BWAGE
8. Bulagurhe Yesu alichizerere obuzigire bw’Eshe?
8 Yehova n’Omugala bamamala myaka minene eyi bali haguma n’echola charhumire bagwarhanak’obuzigire bw’akasisi buli muguma n’owindi. Nk’oku rhunasoma omu Matayo 17:5, Yehova ayerekere Yesu obuzigire bwinja bwinja. Yehova akaderhere ntya konyine, ‘Oyula namuyemerere.’ Aliko, alilonzeze rhumenye kangana gurhe azigire Yesu, n’antyo amuhamagala “Mugala wani muzigirwa.” Yehova alichivugire Yesu ahanene bulala aliri tayari kuhaana akalamo kage. (Efe. 1:7) Kandi nta ngangane Yesu aligwerhe okw’Eshe amuzigire. Yesu ali gwerhe obwizere boshi omu buzigire bw’Eshe. Aliderhere turu zinene n’obwizere okw’Eshe amuzigire.—Yoh. 3:35; 10:17; 17:24.
9. Chinwa chihe chifasiriye obuzigire Yehova agwerhe oku bashigwa? Fasiriya. (Waroma 5:5)
9 Kandi Yehova anayereka n’abashigwa obuzigire bwage. (Osome Waroma 5:5.) Lola echinwa “chashesherwe omu.” Edigsiyonere nguma ye Biblia efasiriye echola chinwa “oyinje emwerhu nka shoko y’amenji.” Echola chinwa chiyerekene kangana gurhe Yehova azigiire abashigwa! Abashigwa nabo bamenyere oku “Mungu naye abazigire.” (Yud. 1) Entumwa Yohana afasiriye okuntu abashigwa banachiyunva amango ayandika ntya: “Rhulole buzigire buli gurhe Darha arhuyerekere omu kurhuyirika bana bage!” (1 Yo. 3:1) Yehova aba azigiire abashigwa bonyine si? Nanga, Yehova arhuyerekere rhweshi obuzigiire bwage.
10. Chintu chihe ch’akamaro bwenene chinakuyereka obuzigire Yehova akugwerheko?
10 Chintu chihe ch’akamaro chinarhuyereka obuzigire bwa Yehova? Eli nchungu. Bulala kugerera enchungu, Yehova arhuyerekere obuzigire kulusha boshi bachigerere kubuyerekana. (Yoh. 3:16; Ro. 5:8) Yehova alihaanire Omugala muzigirwa anayemera afa eju y’abantu boshi, y’ebyaha byerhu bibabalirwa, yirhunashuba kuba bera bage. (1 Yo. 4:10) Amango moshi rhwagenderera kukengeera oku kachiro k’enchungu Yehova na Yesu balipire, kurhwanarhegeera kangana gurhe bazigiire buli muguma werhu. (Gal. 2:20) Yehova arhahaanaga enchungu mpu okwenge ehaki yage yali muhemere ajire ntyo, si bulala eli mpano y’obuzigire. Yehova arhuyerekere obuzigire bwage omu kuhaana echintu ch’akachiro bwenene omu byaligwerhe, k’okuderha Yesu. Yehova ayemera oku Omugala alibuke anafe eju yerhu.
11. Bichi rhwayigire kugerera olwandiko lwa Yeremia 31:3?
11 Nk’oku rhwabwene, Yehova arhafa chakurhuyereka obuzigire s’aliko kandi anarhuyereka kangana gurhe aba arhuzigiire. (Osome Yeremia 31:3.) Yehova arhukulwire emwage bulala arhuzigire. (Ohuzanye n’olwandiko lwa Kumbukumbu la Torati 7:7, 8.) Nta chintu changwa omuntu wakarhukula oku buzigire bwa Yehova. (Ro. 8:38, 39) Gurhe obola buzigire bunarhuma wachiyunva? Osome Zaburi ya 23, onalole nka gurhe Daudi aliri achiyunva oku bilolere obuzigire bwa Yehova.
GURHE OBUZIGIRE BWA YEHOVA BUNARHUMA WACHIYUNVA?
12. Gurhe wakaderha oku bugeke e Zaburi 23?
12 Osome Zaburi 23:1-6. Omu Zaburi 23, Daudi aliyerekene obwizere bwage oku Yehova ali muzigire n’okumushishikala. Afasiriye obwira bukomere aligwerhe haguma na Yehova ey’aliri ahamagala Mungeri wage. Daudi ali chuyunvirhe ali omu bulanzi amango ayemera oku Yehova amuyerekeze, anagenderera kumulangalira. Na Yehova akamuyerekere obuzigire bwage esiku zoshi omu kalamo kage. Bichi byarhumaga agwarha obola bwizere?
13. Bulagurhe Daudi alichizerere oku Yehova amurhabala?
13 “Ntacho nji nabula.” Daudi alichuyunvirhe azigirwe bulala Yehova aliri amuhereza buli mango byoshi akenere. Daudi alimenyere oku Yehova ali mwira wage n’oku amuyemerere. Echola chalirhumire Daudi achizera oku, choshi choshi chakamuhikire, Yehova akangenderere kumushishikala n’okumuhereza byoshi akenere. Bulala Daudi alichizerere oku Yehova ali muzigire n’oku akagenderere kumushishikala, echola chalimurhabere amenye ayubaha, aliko agwarhe obusime n’okutosheka.—Zb. 16:11.
14. Mu njira ehe nkabaga Yehova anarhuyerekamo oku arhulagireko?
14 Yehova anarhushishikala oku buzigire, ahanene amango ebintu bibi byamarhuhikira omu kalamo. Mwali-werhu oyirikirwe Claire, a wamakola oku Beteli myaka echubukire 20, arhalimenyere gurhe akarhabala omulala gwage amango gwaliri gwahurana ebibazo bikomere bikulikirene. Eshe alwala e AVC. Mudorho wage muguma achibwa omu chibaga, n’omulala gwabo gwaliri omu bukene bw’efuranga, banaheza n’enju yabo. Gurhe Yehova ali bayerekere obuzigire bwage n’okubashishikala? Mwali-werhu Claire aderhere ntya: “Yehova aliri arhuha buli choshi rhukenere buli lusiku. Bobola mango manene, Yehova aliri arhuhereza chiro na binene kulusha ebirhwalikenere! Mango manene naliri nawaza oku bilolere okuntu Yehova aliri arhurhabala, kandi ntakafa nayibagire obuzige bwage. Ebyola byaligenderere kuntabala ngenderere kukolera Yehova n’obusime n’omu mango ebindi bibazo byakampikiire omu kalamo.”
15. Bulagurhe Daudi alichiyunvirhe ashubire kugwarha emisi? (Olole n’efoto.)
15 “Anashuba kumpeba emisi.” Mango maguma, Daudi aliri achiyunva agwerhe omulago eju y’ebibazo n’ebigeregezo aliri ahurana. (Zb. 18:4-6) Aliko obuzigire bw’akasisi bwa Yehova, bwalishubire kumuheba emisi. Yehova aliyerekeze mwira wage ochokere “ahantu hali obwasi” na “menji manene.” N’echola charhuma Daudi agwarha emisi kandi aligalire kugenderera kukolera Yehova n’obusiime.—Zb. 18:28-32.
Chiro n’amango Daudi alichiyunvirhe agwerhe bibazo binene, obuzigire bw’akasisi bwa Yehova bwalimurhabere ashube kugwarha emisi (Olole echifungo che 15)
16. Nka gurhe obuzigire bwa Yehova bunashuba kukuheba emisi?
16 Intyo kon’oko zene, “eju y’obuzigire bwimana bwa Yehova rhurhahwaga” amango rhuli rhwahurana ebibazo omu kalamo n’oku bilwisa. (Omb. 3:22; Kol. 1:11) Rhuganire oku mufano gwa mwali-werhu Rachel. Ali chiyunvirhe ahwererwe amango eba amuleka n’amango aleka Yehova omu chihe ch’obulwala b’okuyahukira bwe Korona. Gurhe Yehova ali murhabere? Aderhere ntya: “Yehova aliri anyereka obuzigire bwage. Aliri antabala nyunve zungulukirwe n’abera baliri bageza ebisanzi haguma nani, baliri banderhera akalyo, baliri bantumira amamesaje mali mw’ebinwa by’omu mandiko, baliri basheka haguma nani, n’okugenderera kunyibusya oku Yehova alindagireko. Imbwirire Yehova koko bwenene omu kumpa omulala guzibuzibu gugwerhe obuzigire.”
17. Bulagurhe Daudi “arhaliyubahire echintu chibi”?
17 “Nta chibi nayubaha bulala oli haguma nani.” Ahanene akalamo ka Daudi kaliri kaba omu buhanya, aligwerhe na banzi banene bagwerhe emisi. Aliko obuzigire bwa Yehova bwaliri bwarhuma achiyunva ali omu bulanzi. Daudi aliri achiyunva nka Yehova ali haguma naye mu buli hali, n’echola chalirhumire achizeraye. Echola charhuma ayimpa ntya: “[Yehova] anyokwere omu buba bwani boshi.” (Zb. 34:4) Chiro akaba Daudi aliri achiyunva agwerhe obuba mu mango manene, aligalire kubuhima bulala alimenyere oku Yehova amuzigire.
18. Nkabaga gurhe okuchizera obuzigire bwa Yehova kwakakukomeza amango oyunvirhe obuba?
18 Gurhe okumenya oku Yehova arhuzigire kunarhuhereza emisi amango rhuli omu hali ziyubahisize? Mwali-werhu oli payinia oyirikirwe Suzi aderhere ntya oku bilolere okuntu yewe n’eba balichiyunvirhe amango omugala achiniga: “Amango bintu bilebe bibi byamakuhikira omu kalamo, wakayubaha oku hali ebindi bintu binene bibi byakuhikira. Aliko obuzigire bw’akasisi bwa Yehova bwarhumire rhwachiyunva rhuli omu bulanzi.” Rachel rhwabaga rhwashambereko embere ayibukire ntya: “Mu lusiku luguma ebudufu, naliri nayunva omurhima gwani guli gwanduma bwenene, nalichiyunvirhe ngayire eyi nangwerhe buba bunene, nava nasalira Yehova n’omulenge gw’enyanya. Mw’akola kasanzi nayunva amarhuleza omurhima gwani kuguma nk’oku nyina w’omwana anasiriza akabonjo kage, nani nava naj’ero. Ntakafa nayibagire olola lusiku.” Mushamuka muguma w’echibaga oyirikirwe Tasos ali gezeze myaka 4 omu prizo eju y’okulahira kuja omu chisoda. Gurhe alichibwenere obuzigire bwa Yehova n’okuntu aliri amulagako? Aderhere ntya: “Yehova aliri ampereza binene kulusha n’ebinalikenere. Echola chalikomeze obwizere bwani oku nalikwanene kugenderera kumulangalira. Kandi, kugerera eroho lyage lichesibwa, Yehova alimpereze obusime chiro akaba ok’omu prizo haliri hantu h’okulibuza omuntu bwenene. Echola chalintabere menye oku amango moshi nachizera Yehova, kunanagenderera kubona obuzigire bwage. Bobola narhondera kumukolera nka painiya w’oku kahunda omu prizo.”
OYEGERE MUNGU OGWERHE OBUZIGIRE BW’AKASISI
19. a) Nka gurhe okumenya oku Mungu arhuzigiire kwakahuma oku birhwaderha omu masala merhu? b) Mu njira nchi obuzigire bwa Yehova bufasiribwemo kwakuhebere omurhima bwawe-bwawe? (Olole echisanduku “ Ebinwa Byarhurhabala Rhuyunve Obuzigire bwa Yehova.”)
19 Emifano rhwaganirireko yoshi eyerekene oku Yehova, “Mungu w’obuzigire,” ali haguma nerhu! (2 Ko. 13:11) Analaga ku buli muguma bwage-bwage. Rhuchizerere oku “rhuzungulukirwe n’obuzigire bwage bwimana.” (Zb. 32:10) Amango moshi rhwagendera kukengera gurhe arhuyerekere obuzigire bwage, ku rhwanagenderera kubona oku ali w’okuli n’okuchiyunva rhuli hofi naye. Rhwaka chiyunva huru kumuyegera n’okumubwira kangana gurhe rhukenere obuzigire bwage. Rhwakamubwira byoshi birhulazize, eyi rhunachizerere oku abiyunva n’okwali tayari kurhurhabala.—Zb. 145:18, 19.
20. Gurhe obuzigire bwa Yehova bunarhuma rhwayorha hofi naye?
20 Kuguma n’okurhunasimiswa n’amenji madagarhire omu mango m’emboho, ku rhunasimiswa n’obuzigire bwa Yehova. Kandi obuzigire bw’akasisi bwa Yehova bugwerhe misi minene. Bobola, ogwarhe obusime bulala Yehova akuzigire. Naho, oyerekane oku ozigire Yehova omu kuderha ntya: “Nzigire Yehova”!—Zb. 116:1.
GURHE WAKASHUBIZA?
-
Gurhe wakafasiriya obuzigire bwa Yehova?
-
Bulagurhe wakachizera oku Yehova akuzigire bwenene?
-
Gurhe obuzigire bwa Yehova bunarhuma wachiyunva?
OLWIMPO 108 Obuzigire Bwimana bwa Yehova
a Mazino maguma mahindamwirwe.