MWAZI G’OKUYIGA 31
OLWIMPO 12 Yehova Ali Mungu Okomere
Ebi Yehova Ajirire y’Arhuyokola omu Chaha n’Olufu
“Mungu alizigiire egulu bwenene, ahana Mugala wage w’echinege.”—YOH. 3:16.
EBIRHWAYIGA
Rhwabona gurhe Yehova ahebere h’omupango yi rhugala kulwisa echaha n’okumusimisa. Rhwabona na gurhe arhuyerekere obubabale omu kuyemera bigalikane nji rhulame esiku n’amango n’okuba bashinganyanya.
1-2. a) Echaha bye bichi na gurhe rhwakachilwisa n’okuchihima? (Olole “n’Amafasiriyo m’echinwa.”) b) Bichi rhwaganirako mu gunola mwazi n’omuyindi myazi eli mu gunola Munara g’Omulanzi? (Olole “n’Eby’abasomi Bakwanene Kumenya” mw’enola Gazeti.)
WAKASIMA omenye kangana gurhe Yehova Mungu aba akuzigire si? Hali enjira nyinja yakakurhabala opate echishubizo chinja: Wakapata echishubizo omu kuyiga okubilolere eby’ajiraga y’akuyokola omu chaha n’olufu. Echaha a ali mwanzi mudarhi orhakagala kulwisa woyo wenyine. Rhweshi rhunajira ebyaha buli lusiku, kandi bulala rhweshi rhuli banya-byaha rhunafa. (Ro. 5:12) Aliko hali emyazi minja, buzira ngangane Yehova nj’arhuyokola kurhenga omu chaha n’olufu!
2 Yehova Mungu agenderere kurhabala abantu kulwisa echaha mu myaka hofi bihumbi 6 000. Bulagurhe? Bulala arhuzigire. Yehova azigire abantu kurhenga amango abalema. Bulala arhuzigire bwenene ajirire bintu binene y’arhurhabala amango rhwamajira echaha. Mungu amenyere okw’echaha chinalerha olufu arhanalonzeze oku rhufe, alonzeze rhulame esiku n’amango. (Ro. 6:23) Ebyola byakulonzeze. Mu gunola mwazi rhwaganira ku bibazo bisharhu: 1) Bulangalire buhe Yehova ahere abantu b’abanya-byaha? 2) Bichi abantu barhashinganene b’omu mango Ebiblia yaliri yayandikwa balijirire yi basimisa Yehova? 3) Bichi Yesu alijirire y’ayokola abantu omu chaha n’olufu?
BULANGALIRE BUHE YEHOVA AHERE ABANTU B’ABANYA-BYAHA?
3. Gurhe abazere berhu b’oburhanzi babaga banya-byaha?
3 Amango Yehova alema omulume n’omukazi barhanzi, alilonzeze bagwarhe obusime. Alibahere ahantu henja h’okulama, oluhembo lw’obuhya, n’engabane nyinja bwenene. Balikwanene kuburha n’okujira egulu lyoshi libe paradizo kuguma n’ebustani y’Edeni. Alibahere erhegeko liguma lyonyine lirhakomere. Analibabwirire oku bakachishoga kurhakenga erhegeko lyage, echola chakabalerhere olufu. Rhumenyere ebyabahikiraga. Malayika orhalibazigire orhanalizigire Mungu, abehya Adamu na Eva oku bagomere Mungu. Adamu na Eva bayemera obola bubeshi. Bafunda kulangalira Eshe muzigirwa bajira echaha. Nk’oku rhumenyere, ebi Yehova aderhaga byayinja kuba by’okuli. Kurhengerera olola lusiku barhondera kuhurana engaruka; nk’obushaja, na buzinda bafa.—Mwa. 1:28, 29; 2:8, 9, 16-18; 3:1-6, 17-19, 24; 5:5.
4. Bulagurhe Yehova anashomba echaha na gurhe anarhurhabala rhuchilwise? (Waroma 8:20, 21)
4 Yehova ayandikisize eyola ngani egayisize oku nyungu yerhu. Echola chinarhurhabala rhumenye bulagurhe anashomba echaha. Echaha chinarhuharabisiza obwira bwerhu haguma na Yehova n’okurhuheka ewa lufu. (Isa. 59:2) Shetani anashomba Yehova n’abantu. Echola checharhumaga arhebeka Adamu na Eva bajire echaha, na zene agenderere kurhebeka abantu. Bobola amango Adamu na Eva bajira echaha, nkabaga Shetani aliwazize okw’aharabisize omupango gwa Yehova oku bantu. Aliko arhalimenyere kangana gurhe Yehova ali bazigire. Mungu arhahindamulaga habanakatyu omupango gwage okubilolere oluburho lwa Adamu na Eva. Bulala abazigire boshi, av’abaha ahola hanaho obulangalire. (Osome Waroma 8:20, 21.) Yehova alimenyere oku baguma m’olola luburho bakachishogere kumuzigira n’okulonza oburhabale bwage yi balwisa echaha. Yehova ajirire okuntu bigalikane y’abola bantu bamuyegera n’okuyokolwa omu chaha. Bichi Yehova akajirire y’ebyola byoshi bigalikana?
5. Mangochi Yehova ahaga abantu echilagane ch’oburhanzi? Fasiriya. (Mwanzo 3:15)
5 Osome Mwanzo 3:15. Yehova ahaga abantu echilagane ch’oburhanzi amango achira Shetani olubanja. Mungu aderha oku hakabere “oluburho” lwakayokwere abantu. Olola luburho lwakalimbwire Shetani loshi-loshi n’okukwiza byoshi byaharabiswe na Shetani omu Edeni. (1 Yo. 3:8) Aliko burhanzi, Shetani akalibwize olola luburho changwa kuluyirha. Echola chakagayisize Yehova bwenene bwenene. Aliko Yehova aliri tayari kulibuka n’okuleka “oluburho” lulibuke y’agala kuyokola abantu omu chaha n’olufu!
AMANGO EBIBLIA YALIRI YAYANDIKWA BICHI OMUNYA-BYAHA AKAJIRIRE Y’ASIMISA YEHOVA?
6. Bichi abantu b’obwemere nka Abeli na Nowa balijirire yibagwarha obwira bukomere haguma na Yehova?
6 Omu magana me myaka makulikiragaho, Yehova ayinja ayerekana kubuyabuya kubuyabuya okuntu abantu babanya-byaha bakagwarhire obwira bukomere haguma naye. Abeli mugala wakabiri wa Adamu na Eva, yiwaliri muntu w’oburhanzi wayerekanaga obwemere mu Yehova enyuma y’obugamba bwarhengereraga omu Edeni. Bulala Abeli alizigire Yehova analilonzeze kumusimisa n’okugwarha obwira bukomere haguma naye, echola chalirhumire ahana enterekero. Abeli aliri mungeri, bobola arhola ziguma omu ntama zage zichiri zidorho, azibaga anazihana emwa Yehova nka nterekero. Gurhe Yehova alibwene eyola nterekero? “Asimiswa na Abeli n’enterekero amuhaga.” (Mwa. 4:4) Yehova aliyerekene okw’anasimiswa n’enterekero zili nk’ezola ahabwagwa n’abantu bamuzigire banamulangalire kuguma na Nowa. (Mwa. 8:20, 21) Omukuyemera enterekero zili nk’ezola, Yehova ayerekana okw’akashubire kuyereka abantu b’abanya-byaha olukogo lwage banashuba kumuyegera. b
7. Bichi rhwakayiga kugerera okuntu Abrahamu aliri tayari kuhana omugala nka nterekero?
7 Yehova ahema Abrahamu omulume w’obwemere bunene ajire chintu chilebe chikomere ch’okuhana omugala Isaka nka nterekero. Kweri, Abrahamu alibwene okw’echola chintu Yehova amuhemaga chalibabeze bwenene okuntu arhaliwazize. Aliko akenga Yehova. Naho, amango Abrahamu alonza kuyirha omugala Mungu amulahiza. Yehova alimenyere oku Abrahamu akayunvire malumwa manene bwenene nkʼayirhaga omugala. Chiro akaba ntyo, ogola mufano guyigirize abantu boshi bagwerhe obwemere obukweri bw’akamaro. Yehova aliri tayari kuhana Omugala muzigirwa nka nterekero. Yehova anazigira abantu bwenene.—Mwa. 22:1-18.
8. Bichi enterekero zinene zaliri eshishi w’Esheriya ziderhere? (Mambo ya Walawi 4:27-29; 17:11)
8 Amango Yehova aha Abaizraeli Esheriya ababwira bagende bahana enterekero. (Osome Mambo ya Walawi 4:27-29; 17:11.) Ezola nterekero zaliyerekene oku Yehova akahanire enterekero nyinja bwenene yakayokwere abantu loshi loshi kurhenga omu chaha. Abalebi ba Mungu balifuhererwe baderhe okubilolere oluburho lwalilaganyizwe lwakabere Mugala wa Mungu w’echinege wakalibwizwe na buzinda anayirhwa. Akabere kuguma n’entama yahanirwe nterekero. (Isa. 53:1-12) Ba nka wawaza: Yehova aheba h’omupango y’Omugala muzigirwa ahanwa nka nterekero y’ayokola abantu kuhebamo nawe, k’okuderha, kurhenga omu chaha n’olufu!
BICHI YESU AJIRIRE Y’AYOKOLA ABANTU?
9. Bichi Yohana Mubatiza aliderhere okubilolere Yesu? (Waebrania 9:22; 10:1-4, 12)
9 Omu mwaka gwa 29 N.K.Y., omukozi wa Mungu, k’okuderha, Yohana Mubatiza aderha ntya oku bilolere Yesu we Nazareti: “Tala, Omwana-buzi wa Mungu wakulira egulu echaha!” (Yoh. 1:29) Ebyola binwa bifuhererwe byaliyerekene Yesu nka Luburho lwalebwagwa kurhenga mira. Yesu akahanire enterekero yalilaganyizwe. Ahola, oluburho lwa Yehova lwahikira kuyokola abantu loshi loshi kurhenga omu chaha.—Osome Waebrania 9:22; 10:1-4, 12.
10. Gurhe Yesu aliyerekene oku “aliyinjire kuhamagala” abanya-byaha?
10 Yesu alichisezeze ahanene oku bantu baliri bachiyunva bababezwe n’echaha anabahamagala babe banafunzi bage. Alimenyere okw’echaha gogwaliri murhondero gw’ebibazo by’abantu. Bobola, abantu baliri balibuka bwenene eju y’echaha. Alikoleseze omufano omu kufasiriya ntya: “Abagumaguma barhakenera munganga s’ahubwe abalwala babanamukenera.” Ayongerere ntya: “Ntayinjaga kuhamagala abashinganyanya s’aliko abanya-byaha.” (Mt. 9:12, 13) N’ebyola bi Yesu alijirire. Oku bwirhonzi ababalira omukazi wamushukaga amagulu n’emiziga yage. (Lu. 7:37-50) Ayigiriza obukweri bw’akamaro omukazi w’omu Samariya abuganaga oku chisima, chiro akaba alimenyere okw’alilamire akalamo k’okujira eby’eshoni. (Yoh. 4:7, 17-19, 25, 26) Mungu alihere Yesu obuhashe b’okumala engaruka zoshi z’echaha, k’okuderha, olufu. Nka gurhe? Yesu alifulire abalume n’abakazi, abana, n’abantu bakulu.—Mt. 11:5.
11. Bulagurhe abantu babanya-byaha baliri bachiyunva huru kuyegera Yesu?
11 Birhasomeze okumenya oku chiro n’abantu baliri bajira ebyaha bikomere bwenene, baliri bachiyunva huru kuyegera Yesu. Aliri abayereka obubabale n’okuchiheba oku nafasi yabo. Baliri bachiyunva huru kumuyegera. (Lu. 15:1, 2) Na Yesu aliri ababwira koko n’okubasingiza bulala bayerekene obwemere muye. (Lu. 19:1-10) Yesu aliyerekene engeso y’obubabale kuguma n’Eshe. (Yoh. 14:9) Kugerera ebinwa n’ebijiro byage, Yesu aliyerekene okw’Eshe w’obubabale onachiheba oku nafasi y’abandi anasima abantu analonzeze kurhabala buli muguma agale kulwisa echaha n’okuchihima. Yesu alirhabere abanya-byaha bahindamule engeso zabo n’okumukulikira.—Lu. 5:27, 28.
12. Bichi Yesu aliyigirize okubilolere olufu lwage?
12 Yesu alimenyere okw’aliri hofi kuhana akalamo kage nka nterekero. Turu zinene alibwirire abanafunzi bage oku akalyalihirwe n’okumanikwa oku murhi. (Mt. 17:22; 20:18, 19) Alimenyere okw’enterekero yage yakakulire echaha oku gulu kuguma n’oku Yohana aliderhere n’okw’abalebi balilebere. Kandi Yesu aliderhere okw’enyuma y’okufa kwage akalerhere “abantu ba buli lubero” emwage. (Yoh. 12:32) Abantu b’abanya-byaha bakasimisize Yehova omu kuyemera Yesu nka Waliha n’omu kukulikira entambu zage. Nka bajiraga ntyo, “bakabere huru kurhenga omu chaha.” (Ro. 6:14, 18, 22; Yoh. 8:32) Bobola Yesu aligwerhe obushiru analiri tayari kufa olufu lubabeze bwenene y’arhuyokola.—Yoh. 10:17, 18.
13. Gurhe Yesu afaga na bichi olufu lwage lurhuyigirize okubilolere Yehova Mungu? (Olole n’efoto.)
13 Balilyalihire Yesu, bamufunga, bamudukanga, bamuderhaderha kubi, bamuchira olubanja na chiro bamukolera kubi bwenene. Buzinda abasoda bamanika Yesu oku murhi yi bamuyirha. Okw’analiri alembera amola malumwa moshi oku bwimana, hali Owindi waliri ayunva malumwa manene bwenene. Oyola ali Yehova Mungu. Yehova aligwerhe emisi n’obuhashe b’okuyumanza amalibuko Omugala aliri ahurana, aliko arhajiragantyo. Bulagurhe? Bichi byashunikaga Darha w’obuzigire ajire ntyo? Bwaliri buzigire. Yesu aderhere ntya: “Bulala Mungu alizigire egulu bwenene, ahana Mugala wage w’echinege, yi buli muntu wayerekana obwemere muye arhaharabiswaga, s’ahubwe apate akalamo k’esiku n’amango.”—Yoh. 3:16.
Yehova alilibukire bwenene amango aziga ok’Omugala ayirhwe y’arhuyokola omu chaha n’olufu (Olole echifungo che 13)
14. Bichi enterekero ya Yesu ekuyigirize?
14 Enterekero ya Yesu eyerekene bwinja bwinja obuzigire Yehova agwerhe oku luburho lwa Adamu na Eva. Eyerekene kangana gurhe Yehova akuzigire bwenene. Aliyemerere alibuke bwenene eju y’okurhuyokola omu chaha n’olufu. (1 Yo. 4:9, 10) Nechi, alonzenze kurhabala buli muguma werhu alwise echaha n’okuchihima!
15. Bichi rhukwanene kujira yirhuyunguka n’oluhembo lwa Yehova lw’enterekero y’enchungu ya Yesu?
15 Oluhembo lwa Mungu lw’enterekero y’enchungu y’Omugala w’echinege lwarhumire byagalikana rhupate obubabale bw’ebyaha byerhu. Aliko rhukwanene kujira chintu chilebe yi rhupata obubabale bwa Mungu. Chintu chihe echola? Yohana Mubatiza na Yesu Kristu bahanire echishubizo: “Muhungame bulala Obwami bw’embingu buli hofi.” (Mt. 3:1, 2; 4:17) Bobola rhukwanene kuhungama ebyaha byerhu akaba rhulonzeze kugwarha obwira bukomere haguma na Yehova n’okubabalirwa ebyaha byerhu. Aliko si, okuhungama k’okuderha gurhe, na gurhe byakarhurhabala kusimisa Yehova chiro akaba oku rhuli banya-byaha? Omwazi gukulikireho g’okuyiga gwashubiza kw’echola chibazo.
OLWIMPO 18 Koko Okurhuhanira Enchungu
a AMAFASIRIYO M’ECHINWA: Omu Biblia echinwa “echaha” mango maguma chinaderha okubilolere ebintu Yehova aderhere oku bili bibi, changwa amango rhurhajirire eby’aderhere oku bili binja. Aliko kandi echinwa “echaha” chakaderhera okurhashinganana, changwa omunya-byaha, k’okuderha, ehali y’okurhashinganana rhwashokwere ku Adamu. Empanvu enarhuma rhweshi rhwafa, chiri chaha rhwashokwere.
