MWAZI G’OKUYIGA 34
OLWIMPO 107 Rhuyiganye Obuzigire bwa Mungu
Okuntu Abashamuka Bakayerekana Obuzigire n’Obubabale oku Banya-byaha
“Mungu oku bwinja bwage, ali alonza kukuyerekeza ewakuhungama.”—RO. 2:4.
EBIRHWAYIGA
Rhwayiga okuntu abashamuka banachihangana kurhabala abantu b’omu chibaga bajirire echaha chikomere.
1. Bichi byakarhengerera amango muntu mulebe amajira echaha chikomere?
OMU mwazi gugerere, rhwaliyigire okuntu Paulo alibwirire echibaga che Korinto chikolere owajirire echaha chikomere. Omuntu wajirire echaha orhanahungamire alikwanene kukulwa omu chibaga. Aliko, nk’ok’olwandiko lwerhu l’omusinji luyerekene, balala bajirire echaha chikomere bakwanene kulolwa. N’echola chakabashunika bahungame. (Ro. 2:4) Nka gurhe abashamuka bakabarhabala bahungame?
2-3. Bichi rhukwanene kujira nka rhwamarhegera ok’owerhu Mukristu ajirire echaha chikomere, na bulagurhe?
2 Embere abashamuka barhabale omuntu wajirire echaha, bakwanene kumenya echibazo chili chihe. Bobola, bichi rhukwanene kujira akaba rhwamarhegera ok’owerhu Mukristu ajirire echaha chikomere ch’akarhuma akulwa omu chibaga? Rhukwanene kumuheba omurhima aje kulola abashamuka bamurhabale.—Isa. 1:18; Mdo. 20:28; 1 Pe. 5:2.
3 Aliko si, gurhe byakaba nka mwene-werhu changwa mwali-werhu alahire kubwira abashamuka eju y’echaha chage? Ahola rhwakaja kulola abashamuka rhwewe rhwenyine n’okuchizera ok’oyola muntu apata oburhabale akenere. Echola chili chijiro ch’obuzigire rhwakajira, bulala rhurhalonzeze rhukaheza mwene-werhu changwa mwali-werhu. Nk’oyola muntu agenderere omu njira zage zibi, akabihya obwira bwage haguma na Yehova. Aliko kandi, akabihya erenge lye chibaga. Bobola chiro byakaba bikomere, rhunaja emunda abashamuka bali kubabwira bulala rhuzigire Yehova na bene-berhu na bali-berhu.—Zb. 27:14.
OKUNTU ABASHAMUKA BANARHABALA BALALA BAJIRIRE ECHAHA CHIKOMERE
4. Bichi abashamuka banachihangana kujira amango bamabuganana n’omuntu wajirire echaha chikomere?
4 Amango muntu mulebe omu chibaga amajira echaha chikomere, ebaraza ly’abashamuka linachishoga bashamuka basharhu mubo babuganane n’oyola muntu nka komite. a Abola balume bakwanene kugwarha olugero n’obwirhohye. Amango bali bachihangana kurhabala muntu mulebe wajirire echaha ahungame, banaba eyi bamenyere oku barhakamuseza ahindamuke. (Kum. 30:19) Abashamuka baba bamenyere okw’arhali buli yeshi yiwakahungama kuguna n’oku Mwami Daudi ajiraga. (2 Sa. 12:13) Bantu baguma bajirire echaha bakachishoga okurhayunviriza ehano lirhengere emwa Yehova. (Mwa. 4:6-8) Aliko, omuhigo gw’abashamuka kuli kurhabala omuntu ahungame. Bichi abashamuka bakwanene kuyibuka amango bamabuganana n’omuntu wajirire echaha?
5. Hano lihe abashamuka bakwanene kuyibuka amango bamabuganana n’omuntu wajirire echaha? (2 Timoteo 2:24-26) (Olole n’efoto.)
5 Abashamuka banabona omunya-byaha okw’eli ntama y’akachiro yaherere. (Lu. 15:4, 6) Chechirhumire amango bamabuganana n’oyola muntu, barhamuganiza n’ebinwa by’obukali, changwa mpu bafunde kumukolera oku bwinja. Abashamuka barhakwanene kuwaza okw’echibakwanene kujira konyine kuli kubaza ebibazo n’okupata ebishubizo hoshaho. Ahali h’okujira ntyo, bakwanene kuyerekana engeso ziyerekenwe omu 2 Timoteo 2:24-26. (Osome.) Abashamuka banayorha barhulerere, n’okuyerekana obwinja, bulala balonzeze bamurhabale ahindamule amawazo mage.
Kuguma n’abangeri ba mira, abashamuka banajira okwabo koshi yi barhabala entama yaherere (Olole echifungo cha 5)
6. Gurhe abashamuka banarheganya emirhima yabo embere y’okubuganana n’omuntu wajirire echaha? (Waroma 2:4)
6 Abashamuka banarheganya emirhima yabo. Banachihangana kuyiganya Yehova mu byoshi bali bajira amango bali baganira n’omunya-byaha omu kuyibuka binola binwa bya Paulo: “Mungu oku bwinja bwage, ali alonza kukuyerekeza ewakuhungama.” (Osome Waroma 2:4.) Abashamuka bali bangeri banakwanene kukulikira obwerekezi bwa Kristu n’okumuyiganya omu kuntu banashishikala mw’echibaga. (Isa. 11:3, 4; Mt. 18:18-20) Embere abashamuka babuganane n’oyola muntu, bakwanene kusalira Yehova yi bagala kurhabala omunya-byaha ahungame. Banalonza emyazi omu Biblia n’omu bitabu byerhu n’okusalira yi bapata obwirhegerezi. Banawaza bwenene bichi bakwanene kumenya okubilolere eby’oyola muntu agereremo byakaba eyi byebyarhumire agwarha amawazo mabi n’okujira echaha.—Mez. 20:5.
7-8. Nka gurhe abashamuka bakayiganya engeso ya Yehova y’okulindira amango bamabuganana n’omuntu wajirire echaha?
7 Abashamuka banayiganya engeso ya Yehova y’okulindira. Banayiganya okuntu Yehova aliri akolera abaliri bajira ebyaha omu mango magerere. Omufano, Yehova aliyerekere Kaini engeso y’okulindira, alimubwirire eby’akarhengerere akaba arhahindamukire n’okw’akamugishire nk’akengaga. (Mwa. 4:6, 7) Yehova alirhumire omulebi Natani ahanule Daudi, Natani akolesa omufano gwahuma Daudi oku murhima nʼokumurhabala ahungame. (2 Sam. 12:1-7) Na Yehova “aligenderere kurhuma” abalebi bage “eturu n’eturu” oku Baizraeli amango barhalimukengere. (Yer. 7:24, 25) Yehova arhaliri alinga mpw’abantu bage bahungame y’abarhabala, s’ahubwe aliri arhola entambu y’okubaheba omurhima bahungame.
8 Abashamuka banayiganya omufano gwa Yehova, amango bali bachihangana kurhabala balala bajirire echaha chikomere. Nk’oku biyerekenwe omu lwandiko lwa 2 Timoteo 4:2, banayerekeza, banakengera “omu kulindira koshi’’ amango bali haguma n’Omukristu ogwerhe ebibazo. Bobola, esiku zoshi omushamuka akwanene kurhulera n’okulindira y’arhabala omunya-byaha agale kujira ebinja. Nk’omushamuka amagwarha ebisirani changwa oburhe, hali ok’oyola muntu arhakayunviriza ehano changwa analahira kuhungama.
9-10. Nka gurhe abashamuka bakarhabala omunya-byaha awaze oku bintu ajirire?
9 Abashamuka banachihangana bamenye ehali yayerekezaga omuntu oku chaha. Omufano, bichi byakaba eyi byabihizye Kubuyabuya-kubuyabuya obwira bwage haguma na Yehova? Abaga ey’alekere kujira efunzo lyage-lyage changwa okuja omu mahubiri si? Abaga alekere kusalira Yehova oku kahunda si? Aliyemerere enyifinjo zibi zimuyerekeze si? Bande anageza ebisanzi haguma nabo? Bintu bihe by’okuchisimisa anachishoga? Nkabaga gurhe eby’achishogaga byalihumire oku murhima gwage? Amenyere okuntu Eshe Yehova ali achiyunva eju y’ebyajirire si?
10 Abashamuka bakabaza oyola muntu ebibazo byamurhabala kuwaza ebintu byarhumaga obwira bwage haguma na Yehova bwabiha n’okurhuma akola echaha. Banajira ntyo okubwinja na buzira kumubaza ebibazo byarhuma bachiheba omu kalamo kage. (Mez. 20:5) Okubwindi, abashamuka bakarhabala oyola muntu omu kukolesa omufano gwarhuma akengera oku bijiro byage bibi, kuguma n’oku Natani arhabalaga Daudi. Nkabaga amango bamabuganana n’oyola muntu ob’oburhanzi, akahwanza kuchiyunva aherhe omugayo okubilolere eby’ajiraga. Hali n’okuntu akahungama.
11. Gurhe Yesu aliri akolera abanya-byaha?
11 Abashamuka banachihangana kuyiganya Yesu. Yesu alirhabere Paulo omu kumubaza echila chibazo ch’obwengehe: “Sauli, Sauli, bulagurhe oli wandibuza?” Kugerera echola chibazo, Yesu arhabala Sauli arhegere okw’ebintu aliri ajira byaliri bibi. (Mdo. 9:3-6) N’okubilolere “omukazi Yezebeli b,” Yesu aderhere ntya: “Namuhere akasanzi k’okuhungama.”—Ufu. 2:20, 21.
12-13. Gurhe abashamuka bakahereza omunya-byaha ebisanzi by’okuhungama? (Olole n’efoto.)
12 Omu kuyiganya Yesu, abashamuka barharhola esimikiro juba juba y’okuderha ok’omuntu wajirire echaha arhahungama. Baguma bakahungama amango bamabuganana n’ekomite y’abashamuka eturu y’oburhanzi, aliko abandi byakabahema bashube babuganane nabo amandi mango. Bobola abashamuka bakarhola emipango yi babuganana n’omunya-byaha turu zinene. Nkabaga enyuma y’okubuganana naye eturu y’oburhanzi, Omukristu wakolere echaha akahwanza kukengera bwenene oku bintu bamubwirire. Hali okuntu akayerekana obwirhohye n’okuhema Yehova amubabalire echaha chage. (Zb. 32:5; 38:18) Naho, amango babuganana naye eturu yakulikiraho, omunya-byaha akagwarha amawazo mali tofauti n’amaliherhe amango babuganana naye eturu y’oburhanzi.
13 Yi barhabala omunya-byaha ahungame, abashamuka banamuyereka olukogo n’obwinja. Banasalira Yehova agishe obushiru bwabo eyi banalangalire oku bene-babo na bali-babo bachishubako n’okuhungama.—2 Ti. 2:25, 26.
Abashamuka bakabuganana n’omuntu wakolere echaha turu zinene yi bamuha ebisanzi by’okuhungama (Olole echifungo cha 12)
14. Inde okwanene kuhabwa erenge amango omunya-byaha amahungama na bulagurhe?
14 Amango omunya-byaha amahungama, binalerha busime bunene! (Lu. 15:7, 10) Inde okwanene kuhabwa erenge? Bashamuka si? Oyibuke ebi Paulo ayandikaga okubilolere abanya-byaha: “Nkabaga hali oku Mungu akababalirabo.” (2 Ti. 2:25) Oku bilolere olula lwandiko amahugulo mʼeshishi maderhere ntya: “Yehova yenarhabala omuntu ahindamule amawazo n’okuntu anabona ebintu s’arhali owindi muntu yeshi-yeshi. Paulo afasiriye ebintu binja byakarhengerera amango omuntu amahungama. Oyola muntu akagwarha obumenyi bwinja okubilolere okuli, anagalula obwenge oku mustari, akanafuma emirhego ya Shetani.—2 Ti. 2:26.”
15. Gurhe abashamuka bakagenderera kurhabala omuntu wajirire echaha wahungamire?
15 Amango omuntu wajirire echaha amahungama, abashamuka bagenderera kumulambagirira yi bamurhabala akomeze obwemere bwage, n’okumurhabala agale kuhima amashumi ma Shetani, anajire ebintu binja. (Ebr. 12:12, 13) Okuderha okuli, nta muntu abashamuka banabwira echintu chochi choshi okubilolere eby’omunya-byaha ajirire. Aliko si, bichi echibaga chiba chikenere kumenya?
“OKUKALIHIRA OMUNTU EMBERE W’ABANTU BOSHI”
16. Nk’ok’olwandiko lwa 1 Timoteo 5:20 luyerekene “bantu boshi” bahe Paulo alonzeze kuderha?
16 Osome 1 Timoteo 5:20. Paulo alibwirire Timoteo, naye waliri mushamuka okw’akalihire abanya-byaha embere “w’abantu boshi.” Bichi Paulo alilonzeze kuderha? Okuderha “abantu boshi” arhalilonzeze kuderha okubilolere echibaga choshi. S’ahubwe, alilonzeze kuderhera bantu bageke, aba nkabaga babaga bamenyere echaha chakolerwe. Bakaba eyi bachiboneraga n’amasu mabo, changwa nkabaga omunya-byaha alibabwirire eby’ajirire. Abashamuka babwira abola bantu bwihunze oku bashambere n’oyola munya-byaha n’oku bamuhanwire.
17. Akaba echaha chikomere chamenyikene bwenene omu chibaga changwa chishushire nka nji chamenyikana, tangazo lihe bakageza na bulagurhe?
17 Mango maguma, bantu banene omu chibaga bakaba eyi bamenyere oku muntu mulebe akolere echaha chikomere changwa nkabaga eyi nji bachimenya. Mw’eyola hali, echinwa “abantu boshi” chinaba eyi chiheberwe mw’echibaga choshi. Ahola, mushamuka muguma akwanene kutangaziza echibaga oku mwene-werhu changwa mwali-werhu akalihirwe. Bulagurhe? Paulo ashubiza ntya: “Yi guba mukonge oku bandi” omu kuntu barhakolaga echaha chikomere.
18. Akaba omuntu ogwerhe emyaka eli eshishi ye 18 amakola echaha chikomere, gurhe abashamuka bakajira? (Olole n’efoto.)
18 Gurhe si nk’omuntu obatizwe orhaza kuyeneza myaka 18 amakola echaha chikomere? Ebaraza ly’abashamuka bapanga bashamuka babiri babuganane n’oyola mwana wajirire echaha n’abazere bage b’Abakristu. c Abashamuka babaza abazere bichi babaga bajirire yi barhabala omwana wabo ahungame. Akaba omwana ali ayunviriza amahano m’abazere bage anali ahindamula amawazo n’olugenzi lwage, abola bashamuka bombi bakachishoga kuleka abazere bagenderere kurhabala omwana wabo. Abashamuka baba bamenyere oku Yehova ahere abazere engabane y’okuhanula abana babo omu njira y’obuzigire. (Kum. 6:6, 7; Mez. 6:20; 22:6; Efe. 6:2-4) Abashamuka bayinja balolereza haguma n’abazere omu kuchizera akaba oyola mwana anali apata oburhabale akenere. Aliko si, bichi abashamuka bakajira akaba oyola mwana orhaza kuyeneza myaka 18 agenderere kukola ebintu bibi? Mw’eyola hali, ekomite y’abashamuka yanabuganana naye haguma n’abazere bage b’Abakristu.
Amango omwana orhaza kuyeneza myaka 18 amajira echaha chikomere, bashamuka babiri bakabuganana naye haguma n’abazere bage b’Abakristu (Olole echifungo cha 18)
“YEHOVA AYUNJWIRE KASISI KANENE N’OLUKOGO”
19. Gurhe abashamuka banachihangana kuyiganya Yehova amango bali barhabala omuntu wakolere echaha chikomere?
19 Yehova ahemere abashamuka balange echibaga ku balala balahire kukulikira amarhegeko mage. (1 Ko. 5:7) Aliko kandi banajira koshi bakagala yi barhabala oyola muntu ahungame. N’amango bali barhabala oyola muntu, banaba eyi balangalire okw’ahindamuka. Bulagurhe? Bulala balonzeze kuyiganya Yehova, oba “ayunjwire kasisi kanene n’olukogo.” (Yak. 5:11) Entumwa Yohana aliri akolera bene-babo na bali-babo n’obuzigire. Aliyandikire ntya: “Bana bani badorho, imbayandikire ebila bintu yi murhakola echaha. Aliko nka habere omuntu wakola echaha, rhuherhe omurhabazi emwa Darha, Yesu Kristu, oli munya-kunali.”—1 Yohana 2:1.
20. Bichi rhwayiga omu mwazi guzinda gw’eyila myazi y’enkulikirane?
20 Ech’okugayisa, hali amango Abakristu banalahira kuhungama. Nka bibere ntyo, bakwanene kukulwa omu chibaga. Gurhe abashamuka banajira nk’eyila hali yamarhengerera? Rhwaganira kw’echola chibazo omu mwazi guzinda gw’eyila myazi y’enkulikirane.
OLWIMPO 103 Abangeri—Mpembo omu Bantu
a Omu siku zigerere, ebila bigusho byagendaga byayirikwa komite z’obuhane. Aliko bulala akasi banajira kurhaba kucha olubanja konyine, rhurhachigenda rhwakolesa olula luderho. Ahali h’okuderha ntyo, rhwagenda rhwahamagala echola chigusho komite y’abashamuka.
b Echinwa “omukazi Yezebeli” chakaderhera omukazi changwa echigusho ch’abakazi balibakola haguma omu kushumika abandi omu chibaga bajire ebintu bibi.
c Ebiderherwe ahala oku bazere byakakola kandi kuna balala bayemererwe nʼesheriya banalemba abana changwa oku bandi bangwerhe engabane yʼokulemba oyola mwana orhaza kuyeneza myaka 18.
