MWAZI G’OKUYIGA 33
OLWIMPO 130 Mubabalirane
Okuntu Yehova Alonzeze Echibaga Chikolere Abajirire Echaha Chikomere
“Akaba hali owajirire echaha, rhugwerhe omurhabazi.”—1 YO. 2:1.
EBIRHWAYIGA
Rhwabona ebi rhwakayiga omu ngani eyerekene okuntu barhabalaga omuntu wajiraga echaha chikomere omu chibaga che Korinto omu kagana ka burhanzi.
1. Bichi Yehova alonzeze abantu boshi?
YEHOVA alemere abantu n’obuhuru b’okuchishoga. Rhunakolesa olola luhembo amango moshi rhuli rhwarhola buli simikiro omu kalamo kerhu. Esimikiro y’akamaro bwenene kulusha eyindi yoshi omuntu akarhola, kuli kuchihana emwa Yehova n’okuba muguma w’omu mulala gwage. Yehova alonzeze buli muntu ajire ntyo. Bulagurhe? Bulala azigire abantu, anabalonzeze ebinja bwenene. Alonzeze basimire obwira haguma naye, banalame esiku n’amango.—Kum. 30:19, 20; Gal. 6:7, 8.
2. Bichi Yehova alonzeze balala barhazakuhungama? (1 Yohana 2:1)
2 Ntaye Yehova anaseza okw’amukolere. Analeka buli muntu achishoge bichi akajira. Bichi abashamuka bakwanene kujira akaba Omukristu amajira echaha chikomere? Akaba arhahungamire, akwanene kukulwa omu chibaga. (1 Ko. 5:13) Nechi, chiro akaba ntyo, Yehova alonzeze kweri oyola muntu ahungame anashube kuba mwira wage wa hofi hofi. Omu bukweri, eyola y’empanvu nkulu yarhumire Yehova ahana enchungu, y’abanya-byaha bahungamire bababalirwa. (Osome 1 Yohana 2:1.) Yehova aba Mungu w’obuzigire bunene bwenene, olonzeze balala bajirire ebyaha bikomere bahungame.—Zek. 1:3; Ro. 2:4; Yak. 4:8.
3. Bichi rhwaganirako mu gunola mwazi?
3 Yehova arhubwirire gurhe anachiyunva oku bilolere echaha n’okubilolere balala banajira ebyaha bikomere. Analonzeze nerhu rhuchiyunve ntyo. Gunola mwazi gwarhuyereka gurhe rhwakajira ntyo. Ok’oli wayiga gunola mwazi, lola binola bintu bisharhu: 1) Okuntu barhabalaga omuntu wajiraga echaha chikomere omu chibaga che Korinto omu kagana ka burhanzi, 2) obwerekezi Paulo ahanaga amango oyola muntu ahungama, na 3) bichi eyola ngani ye Biblia eyerekene okubilolere okuntu Yehova anakolera abajirire ebyaha bikomere.
OKUNTU BARHABALAGA OMUNTU WAJIRAGA ECHAHA CHIKOMERE OMU KAGANA KA BURHANZI
4. Bichi byarhengereraga omu chibaga che Korinto omu kagana ka burhanzi? (1 Wakorinto 5:1, 2)
4 Osome 1 Wakorinto 5:1, 2. Omu lugenzi lwage lwa kasharhu l’obumisiyonere, Paulo ayunva okubilolere chintu chilebe chibi charhengereraga omu chibaga chihyahya che Korinto. Mwene-werhu muguma wa mw’echola chibaga aliri ajira obugonyi haguma n’amuk’eshe. Chiro n’abantu barhaharamya Mungu balimenyere okw’echola chili chintu chibi bwenene! Aliko echibaga chawaza oku nta chibazo, n’oyola mwene-werhu wajiraga echola chijiro akayorha omu chibaga. Nkabaga baguma baliri bawaza ok’okujira ntyo kuli kuyerekana obubabale kuguma na Yehova. Aliko Yehova arhaleka abantu bali bajira ebyaha omu lubaga lwage. Eju y’olugenzi lubi l’oyola muntu, echibaga chaheza erenge linja lyacho. Na nk’ayorhaga omu chibaga, abandi bakarhondere kumuyiganya. Bobola, bichi Paulo alibwirere echibaga chijirage?
5. Bichi Paulo alibwirere echibaga chijire, na bichi alonzaga kuderha? (1 Wakorinto 5:13) (Olole n’efoto.)
5 Osome 1 Wakorinto 5:13. Kugerera eroho lya Mungu, Paulo ayandika amaruba mayerekene ok’omunya-byaha orhahungamire akwanene kukulwa omu chibaga. Gurhe Abakristu bemana balikwanene kukolera oyola muntu? Paulo ababwira oku “baleke kugenderera kukomerana” naye. Bichi ebyola byalilonzeze kuderha? Paulo afasiriya okw’elyola rhegeko lyaliheberemo “chiro n’okurhalya haguma n’omuntu oli nk’oyola.” (1 Ko. 5:11) Amango rhuli rhwasangira haguma na muntu mulebe, ahanene rhunazigana kugwarha enganiro esimisize haguma. Bibonekene wazi oku Paulo alilonzeze kuderha okw’echibaga chirhalikwakanene kukomerana n’oyola muntu. Okola kwakalangire echibaga oku mashumi mage mabi. (1 Ko. 5:5-7) Oku bwindi, echola chakarhabere oyola muntu arhegere kangana gurhe ababeze Yehova, achiganye, n’echola chanamushunika ahungame.
Kugerera eroho lya Yehova, Paulo ayandika amaruba omu kufasiriya oku bakwanene kukula omunya-byaha orhahungamire omu chibaga (Olole echifungo cha 5)
6. Gurhe amaruba ma Paulo malirhabere echibaga n’oyola munya-byaha?
6 Paulo amalire kurhuma amaruba mage oku Bakristu be Korinto, arhondera kuchibaza akaba mabasimisa changwa nanga. Buzinda, Tito amubwira omwazi gwinja gwamulerheraga obusime. Echibaga chalisimire amaruba ma Paulo. (2 Ko. 7:6, 7) Bakulikira obwerekezi bwage. Kandi, harhalegamaga Paulo amalire kurhuma amaruba mage, olala munya-byaha ahungama echaha chage! Alihindamwire olugenzi n’amawazo mage anarhondera kukulikira amakanuni m’okunali ma Yehova. (2 Ko. 7:8-11) Bichi Paulo alijire abwira echibaga chijire enyuma w’aho?
OKUNTU ECHIBAGA CHALIKWANENE KUKOLERA OYOLA MUNTU WAHUNGAMAGA
7. Okukula omunya-byaha omu chibaga kwalilerhere nyungu zihe? (2 Wakorinto 2:5-8)
7 Osome 2 Wakorinto 2:5-8. Paulo aliderhere ‘ok’okukalihirwa na bantu banene kwalitosheze k’oyola muntu.’ Omu bindi binwa, obuhane bwalihikire omuhigo bwago oku bilolere oyola muntu. Muhigo guhe ogola? G’okumuyerekeza ewa kuhungama.—Ebr. 12:11.
8. Bichi Paulo alibwirire echibaga chijire enyuma w’ahola?
8 Paulo ahana obula bwerekezi oku chibaga: “Mubabalire oku bulonza n’okurhuliriza” oyola mwene-werhu wajirire echaha, ‘n’okumuyereka oku mumuzigire bwinja-bwinja.’ Bibonekene oku Paulo alilonzeze echibaga chijire binene olekere okuyemerera oyola muntu agaluke konyine omu lubaga lwa Yehova. Paulo alilonzeze bene-berhu bayereke oyola muntu wahungamire oku bamubabalire bwinja-bwinja n’okubamuzigire kugerera ebi bali baderha n’okujira. Omu kujira ntyo, oyola mwene-werhu akachiyunvirhe akaribisizwe omu chibaga.
9. Nkabaga bulagurhe baguma bakagwarhire engangane zʼokubabalira omunya-byaha wahungamaga?
9 Baguma balichiyunvirhe barhali tayari kuyegereza oyo munya-byaha wahungamaga si? Ntacho eyola ngani erhubwirire. Aliko byakashobokana. Bulagurhe rhuderhere ntyo? Ebijiro byage bibi byalilerhere ebibazo omu chibaga na nkabaga eshoni oku bandi bantu. Abola baliri omu chibaga, balichihanganire bwenene yi bakenga amarhegeko ma Yehova. Bobola baguma bakachiyunvirhe oku kurhali kwinja ok‘omuntu wajirire echaha chikomere chili nk‘echola, ayemererwe kugaluka omu chibaga. (Huzanya na Luka 15:28-30.) Bulagurhe byaliri by’akamaro abantu omu chibaga bayereke oyola mwene-werhu wagalukire obuzigire b’okuli?
10-11. Bichi byakarhengerere nk’echibaga chalahiraga kubabalira omunya-byaha wahungamire?
10 Ba nka wawaza bichi byakabere nk’abashamuka balahiraga kuyemerera oyola muntu wahungamire eby’okuli agaluke omu chibaga. Changwa enyuma w’okugaluka kwage echibaga chilahire kumuyereka obuzigire. Akayunvirhe kubi bwenene n’okuvunika omurhima. Akachiyunvirhe okw’arhakachigalire kushuba kukolera Yehova. Akawazize chiro oku Yehova arhakafire amubabalire n’oku nta mpanvu agwerhe y’okuhindamuka.
11 Bichi bindi byakarhengerere nka bene-berhu na bali-berhu balahiraga kubabalira oyola muntu wahungamire? Bakahezeze obwira bwabo haguma na Yehova. Bulagurhe? Bulala barhakabere eyi bali bayiganya Yehova onababalira omunya-byaha wahungamire, s’aliko bakabere eyi bali bayiganya Shetani oba mukali orhanayerekana obubabale. Bakabere yi bali baleka Ibilisi abakolese omu kuvuna omurhima oyola munya-byaha wahungamire.—2 Ko. 2:10, 11; Efe. 4:27.
12. Gurhe echibaga chakayiganyize Yehova?
12 Gurhe echibaga che Korinto chakayiganyize Yehova ahali h’okuyiganya Shetani? Chakayiganyize Yehova omu kubabalira abanya-byaha bahungamire nk’oku Yehova naye anajira. Lola ebi bandisi baguma be Biblia baderhere okubilolere Yehova. Daudi aliderhere ntya: Yehova aba “mwinja anaba tayari kubabalira.” (Zb. 86:5) Mika aliyandikire ntya: “Inde Mungu oli kuguma nawe, onababalira egosa orhanachiseza oku gosa?” (Mik. 7:18) Isaya naye aderha ntya: “Omubi aleke olugenzi lwage lubi, n’omuntu mubi aleke enkengero zage; agalukire Yehova, wamuyereka olukogo, agaluke emwa Mungu werhu, bulala anababalira bwenene.”—Isa. 55:7.
13. Bulagurhe kwaliri kwinja okugalula oyola munya-byaha wahungamire omu chibaga? (Olole echisanduku “ Mangochi Oyola Muntu w’omu Korinto Agalulwagwa omu Chibaga?”)
13 Omu kuyiganya Yehova, echibaga che Korinto chalikwanene kukaribisa n’okuyerekana oku chizigire oyola muntu wahungamire n’okugaluka. Omu kukulikira obwerekezi bwa Paulo b’okukaribisa omunya-byaha wahungamire n’okugaluka, echibaga chakayerekene oku chili “chakenga omu bintu byoshi.” (2 Ko. 2:9) Kweri chiro akaba oku haligerere myezi migeke yonyine oyola muntu akulirwe omu chibaga, obuhane bamuhaga bwalimurhabere ahungame. Bobola, birhalihemere mpw’abashamuka balindire hagere siku zinene embere bagalule oyola muntu omu chibaga.
OKUNTU RHWAKAYIGANYA EHAKI N’OBUBABALE BWA YEHOVA
14-15. Bichi rhwakayiga kugerera ebyarhengereraga omu Korinto ya mira? (2 Petro 3:9) (Olole n’efoto.)
14 Engani ederhere okubilolere okuntu ab’omu chibaga che Korinto bakoleraga omunya-byaha, byaliyandikirwe byanalagwa “yi birhuyigiriza.” (Ro. 15:4) Kugerera eyola ngani rhwayigire oku Yehova arhalekerera balala bajirire ebyaha bikomere barhanahungamire bagenderere kubera omu chibaga. Baguma bakawaza oku bulala Yehova ajira obubabale, akayemerera omuntu orhahungamire ayorhe omu chibaga, aliko arhali ntyo ku Yehova anayerekana obubabale bwage. Chiro akaba oku Yehova anababalira, aliko arhayemera buli bijiro. Amakanuni mage okubilolere echinja n’echibi marhahindamuka. (Yud. 4) Nka Yehova ayemerere omunya-byaha orhahungamire ayorhe omu chibaga, ok’ola kurhakaba k’okuyerekana obubabale bulala echibaga choshi chakayahukizwa.—Mez. 13:20; 1 Ko. 15:33.
15 Kugera hanola rhwayigire oku Yehova arhalonzeze oku habe n’omuntu n’omuguma waharabiswa. Alonzeze kuyokola abantu nk’oku byakanagalikana. Anayereka abantu boshi obubabale bahindamwire amawazo n’ebijiro byabo, banalonzeze kumukolera. (Eze. 33:11; osome 2 Petro 3:9.) Bobola amango olala muntu w’omu chibaga che Korinto ahungama n’okuhindamula olugenzi lwage, Yehova akolesa Paulo afasiriye echibaga ok’oyola muntu akwanene kubabalirwa n’okukaribiswa.
Rhunayiganya obuzigire n’obubabale bwa Yehova omu kuzigira n’okuyereka obwinja balala bagalwirwe omu chibaga (Olole echifungo che 14-15)
16. Gurhe oli wachiyunva okubilolere Yehova enyuma y’okuyiga eby’arhengereraga omu chibaga che Korinto?
16 Omufano gw’ebyarhengereraga omu chibaga che Korinto guyerekene oku Yehova ajira buzigire bunene, aba munya-kunali, anakulikiza nʼehaki. (Zb. 33:5) Okumenya ntyo, kurhumire rhwayunva rhulonzeze kuha Yehova erenge linene bwenene. Rhugwerhe eshukrani nene bwenene okubona aba wakubabalira, bulala rhweshi rhuba banya-byaha rhunakenere obubabale bwage. Buli muguma werhu agwerhe empanvu y’okuyerekana eshukrani emwa Yehova eju y’enchungu, enarhuma obubabale bwagalikana. Bihebere omurhima bwenene okumenya okw’anazigira bwinja-bwinja abantu bage anabalonzeze ebinja!
17. Bichi rhwaganirako omu myazi ekulikireho?
17 Nk’omuntu amajira echaha chikomere zene, gurhe abashamuka b’echibaga bakayiganya obuzigire bwa Yehova n’okumurhabala ahungame? Gurhe echibaga chakajira amango abashamuka babwene oku bakule changwa kugalula omuntu omu chibaga? Rhwashubiza kw’ebyola bibazo omu myazi ekulikireho.
OLWIMPO 109 Muzigirane Bwenene Kurhenga oku Murhima
