Entumwa Paulo aliyandikire Abakristu be Tesalonika omu kuderha ntya: “Akaba omuntu yeshi yeshi arhakengere ebirhwaderhere mw’amala maruba, mumuhebe kw’echimenyeso.” (2 Te. 3:14) Mira rhwaliri rhwaderha ok’obola bwerekezi bwalilolere abashamuka. Nka muntu mulebe arhagenderere kukulikira amakanuni me Biblia chiro akaba bamuhanwire turu zinene, abashamuka balikwanene kugezeza echibaga ejambo ly’omukonge. Nantyo, buli muhubiri olonzeze anachishoga kurhakomerana n’oyola muntu waheberwe kw’echimenyeso.

Aliko okuhindamula ebintu kuli kw’akamaro. Ehano lya Paulo liyerekene eby’Abakristu bonyine bakachishoga kujira mu hali zilebe. Bobola birhachihemere abashamuka kugeza ejambo ly’okuheba omuntu kw’echimenyeso. Bulagurhe rhwahindamwire ebyola bintu? Rhuganire okubilolere ebi Paulo aliri aderha amango ahana elyola hano.

Paulo aliderhere oku bantu baguma ba mw’echola chibaga “baliri bachigendesa kubi.” Barhaliri bakenga amahano me Biblia. Omu ntangulo yakulikiragaho, abahereza linola rhegeko: “Omuntu yeshi yeshi orhalonzeze kukola arhanakwanene kulya.” Aliko baguma baligenderere kulahira kukola omu kushishikala ebi bakenere, chiro akaba oku baligwerhe obuhashe b’okujira ntyo. Banaliri bachiheba omu kalamo k’abandi. Gurhe Abakristu balikwanene kukolera balala barhaliri bachigedesa bwinja?​—2 Te. 3:6, 10-12.

Paulo aderhere ntya: “Mumuhebe kw’echimenyeso.” Echinwa che Chigiriki chiderhere oku rhukwanene kurhegera bwinja bwinja oyola muntu n’okumenya okw’agwerhe olugenzi lubi. Paulo alihanire obola bwerekezi oku chibaga choshi, arhali oku bashamuka bonyine. (2 Te. 1:1; 3:6) Bobola Omukristu wabwene mwene-wabo changwa mwali-wabo orhali wakenga amahano me Biblia, akachishoga “kuleka kukomerana” naye.

Echola chiderhere ok’oyola akwanene kukolerwa nka muntu wakulirwe omu chibaga si? Nanga, Paulo ayongerere ntya: “Mugenderere kumuhanula nka mwene-wenyu.” Bobola buli Mukristu akachishoga akaba agenderera kukomerana n’omuntu oli kw’echimenyeso amango bali oku mbuganano changwa oku mahubiri, aliko anachishoga kurhageza naye ebisanzi amango bali bachisimisa. Bulagurhe? Paulo aderhere ntya: “Na ntyo akozwe eshoni.” Amango rhwamaleka kukomerana na mwene-werhu changwa mwali-werhu omu njira eli nk’eyola, ayunva eshoni eju y’ebyali ajira n’okuhindamuka.​—2 Te. 3:14, 15.

Gurhe Abakristu bakakolesa elyola hano zene? Ech’oburhanzi, bakwanene kuchizera akaba okuntu mweme-werhu ali achigendesa “kuli kubi,” kuguma n’oku Paulo aderhaga. Arhaliri alonza kuderha okubilolere balala banajira ebintu bilolere ezamiri yʼomuntu yenyine, aliko birhapingene n’amakanuni me Biblia. Arhaderhere okubilolere balala banasima ebintu bili tofauti n’ebyerhu. Arhanaderhere ku balala barhuvunire omurhima konyine. Ahali hantyo, Paulo aliri aderha okubilolere balala balihabirwe ehano lirhengere omu Chinwa cha Mungu, aliko bachishoga kurhalikenga.

Zene nka rhubwene owerhu Mukristu orhali wakenga ehano lirhengere omu Chinwa cha Mungu, a rhwakachishoga okurhaba haguma naye omu by’okuchisimisa haguma n’abandi. Bulala rhwenyine rhwerhwachishogere eyola simikiro, rhurhakwanene kuyiganirako n’abandi olekere abantu b’omu mulala gwerhu. Rhwakachigenderera kuba haguma naye oku mbuganano n’omu kasi k’amahubiri. Amango amahindamula olugenzi lwage, rhwakashuba kukomerana naye.