1-2. a) Bulagurhe binakomerera bantu banene okuchizera abakulu? b) Bichi rhwaganirako mu gunola mwazi?

ZENE, bili byakomerera bantu banene kuchizera abagwerhe obukulu. Bachibwenere oku amarhegesi n’amarhegeko mazo binazigana kuheba abachire embere n’ abagwerhe oburhwali n’okuyima abakene esheriya yabo. Chechirhumire Ebiblia yaderha bwinja bwinja oku: “Omuntu anarhambula owabo omu kumubabaza.” (Mhu. 8:9) Oku bwindi, bakulu baguma b’amadini bali bajira ebintu bibi, ebyola byarhumire bantu baguma barhachigwarha obwizere mu Mungu. Bobola amango omuntu amayemera kuyiga Ebiblia haguma nerhu, rhunahurana echibazo amango rhuli rhwamurhabala agwarhe obwizere mu Mungu na mubalala ashimikire hano oku gulu omu lubaga lwage.

² Arhali abanafunzi b’Ebiblia bonyine b’obakenere kugwarha obwizere mu Mungu n’okugwarha obwizere omu lubaga lwage. Chiro akaba oku rhwamakolera Yehova mu myaka minene, rhurhakwanene kuheza obwizere bwehu haba nakatyu omu kuntu Yehova anajiramo ebintu omunjira nyinja bwenene. Mango maguma ebintu binarhengerera byakageregeza obwizere bwerhu mu Yehova. Mugunola mwazi, rhwashambala ku bintu bisharhu obwemere bwerhu bwakageregezwamo: 1) amango rhulirhwasoma ngani ziguma ze Biblia, 2) amango rhwamahabwa obwerekezi burhengere oku lubaga lwa Yehova, na 3) amango rhwahurana ebibazo omu mango mayinjire.

3. Nka gurhe ngani ziguma zili omu Biblia zakageregeza obwizere bwerhu mu Yehova?

 ³ Nka rhuli rhwasoma Echinwa cha Mungu, rhwakachibaza ebibazo oku bilolere okuntu Yehova akoleraga bantu balebe, n’okubilolere mihigo miguma arholaga. Omufano, Echitabu cha Hesabu chirhubwirire gurhe Yehova aderhaga oku Muizraeli muguma ayirhwe bulala aliri arholagula eshali oku lusiku lwe Sabato. Echitabu cha kabiri cha Samweli, chirhubwirire oku enyuma waho, hagerere myaka minene, Omwami Daudi ajira obugonyi n’okuyirha omuntu, aliko Yehova amubabalira. (Hes. 15:32, 35; 2 Sa. 12:9, 13) Hali okurhwakachibaza, ‘Bulagurhe Yehova ababaliraga Daudi wajiraga obugonyi anayirha omuntu, aliko aderha mp’omuntu wajiraga echintu chibonekene nka chirhakomeere ayirhwe?’ Yi rhushubiza kw’echola chibazo, rhuganire ku bintu bisharhu rhukwanene kuyibuka amango rhuli rhwasoma Ebiblia.

4. Nka gurhe olwandiko lwa Mwanzo 18:20, 21 na Kumbukumbu la Torati 10:17, mahebere obulangalire bwerhu emisi omu kuntu Yehova anacha emanja?

⁴Mango maguma Ebiblia erhaderha ebintu byoshi oku bilolere ngani ndebe. Omufano, rhumenyere oku Daudi alihungamire bwinja-bwinja ebijiro byage. (Zb. 51:2-4) Gurhe si oku bilolere omuntu wavunaga erhegeko lye Sabato? Alibabezwe n’echola chijiro chage si? Ka hali agandi mango alichigerere kuvuna amarhegeko ma Yehova? Aliri asuzagura changwa chiro n’okukabulira amahano abaga ahabirwe si? Ntacho Ebiblia ebiderhereko. Aliko rhwakachizera echila: Yehova “arhakola n’omulyagane haba n’akatyu.” (Kum. 32:4) Amango Yehova akala kujira chintu chilebe, aba amenyere okuli koshi-koshi oku bilolere echola. Arhayumangira oku by’abandi baderhe, akabolo, changwa echindi chintu choshi-choshi chinazigana kurhuma abantu balerha amawazo marhakwanene oku bilolere hali ndebe. (Osome Mwanzo 18:20, 21; Kumbukumbu la Torati 10:17.) Oku rhuli rhwagenderera kuyiga oku bilolere Yehova n’amakanuni mage, ku rhwanagenderera kukuza obwizere bwerhu oku kuntu anacha emanja. Chiro akaba oku ngani nguma ye Biblia yakarhuma rhwachibaza ebibazo rhurhakagala kushubiza zene, rhumenyere binene oku bilolere Mungu werhu, okuntu “ali munya-kunali omu njira zage zoshi.”​—Zb. 145:17.

5. Nka gurhe okurhashinganana kunarhuma rhurhacha olubanja omu kunali? (Olole n’echisanduku “ Okurhashinganana Kunarhuma Rhurhabona Bwinja eby’Okunali.”)

 ⁵Rhurhakagala kucha olubanja buli mango omu kunali bulala rhurhali bashinganyanya. Mungu arhulemaga n’obuhashe b’okuyerekana engeso zili nk’ezage, che chirhuma rhunalonza abantu bakolerwe omu kunali. (Mwa. 1:26) Aliko bulala rhurhali bashinganyanya, rhwakachira abandi olubanja kubi, chiro n’amango rhuwazize oku rhumenyere obukweri boshi. Yibuka omufano gwa Yona amango agayaga bulala Yehova achishogere kubabalira abantu be Ninawi. (Yon. 3:10–4:1) Jaga wawaza oku byarhengereraga bulala Yehova alichishogere kubababalira. Echola chalirhumire akalamo ka bantu barhalukire 120 000 b’omu Ninawi kayokolwa! Buzinda, Yona ye wahindamulaga amawazo mage, s’arhali Yehova.

6. Bulagurhe birhahemere mpu Yehova arhufasiriye eby’achishogere kujira?

⁶Birhahemere mpu Yehova afasiriye abantu bulagurhe arholere mihigo milebe. Kweri, Yehova aliri aleka abakozi bage b’omu mango ma mira baderhe amawazo mabo oku bilolere emihigo aliri arhola, changwa ey’aliri hofi kurhola. (Mwa. 18:25; Yon. 4:2, 3) Na mango maguma aliri abafasiriya emihigo yage. (Yon. 4:10, 11) Aliko Yehova arhasezezwe kuchifasiriya embere zerhu bulagurhe arholere mihigo milebe. Yewe nka Mulemi werhu, arhakeneere mpu rhwerhumuyemererage embere changwa enyuma ajire chintu chilebe.​—Isa. 40:13, 14; 55:9.

7. Chibazo chihe rhwakahurana, na bulagurhe?

⁷ Rhuyemerere n’omurhima goshi okw’ebi Yehova anajira amango moshi biba by’okunali. Aliko echibazo rhugwerhe, kwakaba kuchizera abalume ashimikire hanola oku gulu omu lubaga lwage. Hali oku rhwakachibaza akaba balala bagwerhe bukulu bulebe omu lubaga lwage banali bakulikira obwerekezi bwa Yehova, changwa bali bajira ebi balonzeze bonyine. Nkabaga m’amawazo amola bantu baguma balilamire omu bihe bya mira baligwerhe. Waza oku mufano rhwashambalagako omu  chifungo cha 3. Omuntu w’omu mulala g’ola mulume orhakengaga erhegeko lye Sabato, nkabaga akachibazize akaba kweri Musa analirhangire ganira na Yehova, embere echihano ch’olufu chihaanwe. Na mwira wa Uriya w’Omuhiti, eyi Daudi ajiraga obugonyi na mukage, akawazize oku Daudi akoleseze echeo chage nka mwami y’arhahabwa obuhane b’okuyirhwa alikwanene. Yehova aba anihire abalume ashimikire omu chibaga; che chirhumire akaba rhurhagwerhe obwizere mw’abola balume, rhurhakaderha oku rhubugwerhe mu Yehova.

8. Nka gurhe ebishamberwe omu Matendo 16:4, 5 bifarhene n’okuntu echibaga che Chikristu chinakola zene?

⁸ Zene, Yehova ali ayerekeza echigabi ch’olubaga lwage ch’oku gulu kugerera “omuja mwimana onakengukire.” (Mt. 24:45) Kuguma n’ebaraza lirhambwire ly’omu myaka 100 ya burhanzi, oyola muja ayumangiire abantu ba Mungu b’omu gulu lyoshi, n’okuhereza abashamuka b’ebibaga obwerekezi. (Osome Matendo 16:4, 5.) Abashamuka nabo banaja bachizera oku bakulikire obola bwerekezi omu bibaga. Rhunayerekana oku rhuchizerere okuntu Yehova anajira ebintu amango rhuli rhwakenga obwerhekezi rhwahabirwe kugerera olubaga lwage n’abashamuka.

9. Mango mahe byakarhukomerera okukenga omuhigo abashamuka barholere, na bulagurhe?

⁹ Mango maguma byakarhukomerera okukenga eby’abashamuka bachishogere kujira. Omufano, omu myaka echizindire kugera, bibaga binene n’emizunguluko byashubire kupangwa buhyahya. Hali okw’abashamuka baliri babwira abahubiri baje omu chindi chibaga y’ebichumbi byoshi bili omu Chumbi ly’Obwami  biyinja byayikalwako n’abantu. Nka bamarhubwira rhuhamire omu chindi-chindi chibaga, byakarhukomerera okuleka abera n’abantu b’omulala gwerhu. K’abashamuka banahabwa obwerhekezi burhengere emwa Mungu buderhe chibaga chihe buli muhubiri akwanene ajemo? Nanga. N’echola chakarhuma byarhukomerera kukulikira obwerekezi rhwahabirwe. Aliko Yehova ab’achizerere okw’abashamuka bajira eyola mipango bwinja, nerhu rhukwanene rhuchizerebo. *

10. Nk’oku olwandiko lwa Waebrania 13:17 luderhere, bulagurhe rhukwanene kukenga abashamuka?

¹⁰ Bulagurhe rhukwanene kukenga n’okukulikira eby’abashamuka bachishogere kujira chiro akaba oku birharhusimisize? Bulala omu kujira ntyo, rhwarhabala omu kugendereza obuguma omu lubaga lwa Mungu. (Efe. 4:2, 3) Ebibaga binayololoka amango boshi bali bakenga oku bwirhohye obwerekezi abashamuka bachishogere kujira. (Osome Waebrania 13:17.) Ech’akamaro bwenene, kuli kuyereka Yehova oku rhuchizerere ye omu kukenga balala ahere akasi k’okurhushishikala.​—Mdo. 20:28.

11. Bichi byakarhurhabala rhukomereze obwizere bwerhu omu bwerekezi abashamuka banarhuhereza?

¹¹ Rhwakakomeza obwizere bwerhu omu bwerekezi abashamuka barhuhere, omu kuyibuka oku banahema eroho lichesibwa libayerekeze amango bali bashambala oku bintu bilolere echibaga. Banashuba kulolereza bwinja-bwinja amakanuni me Biblia malolere ebyola n’okusuzuma obwerekezi olubaga lwa Yehova lunabahereza. Kweri balonzeze kusimisa Yehova n’okushishikala bwinja olubaga lwage. Abola balume bimana bamenyere bwinja oku Yehova nj’ababaza gurhe bakoleseze ezola ngabane zabo. (1 Pe. 5:2, 3) Wazaga kw’echila: Mw’elila gulu abantu barhayunvikene eju y’erangi ly’omubiri, edini, n’eby’epolitike, aliko abantu ba Yehova bali bamuharamya omu buguma yewe Mungu muguma w’okuli. Ebila byakashobokana konyine kugerera emigisho Yehova ali ahereza olubaga lwage!

12. Bichi abashamuka bakwanene kuwazako bwinja-bwinja amango bali bagerereza akaba omuntu ahungamire?

¹² Yehova ahere abashamuka akasi k’akamaro k’okurhabala echibaga chigenderere kuyorha chichere. Nk’Omukristu amakola echaha chikomeere, Yehova ahemere abashamuka balole akaba oyola muntu akagenderera kuyorha omu chibaga. Omu bindi bakwenene kumenya, kuli kulola akaba kweri oyola muntu ahungamire ebijiro byage. Akaderha oku ahungamire, aliko si kweri ashombere eby’ajirire? K’anahigirire okurhagalukira echola chaha? Akaba echarhumaga ajira echola chaha kwaliri kugwarha abera babi, k’anahigirire loshi kulekana nabo? Kugerera esala, abashamuka banalonza obukweri boshi na bichi Amandiko maderhere, n’okugerereza gurhe owajirire echaha ali achiyunva oku bilolere eby’ajirire. Banaja bagerereza akaba oyola wajirire echaha akabeera omu chibaga. Hali n’amango byakahema achibwe omu chibaga.​—1 Ko. 5:11-13.

13. Bichi byakarhuyinja omu bwenge amago omuntu w’omulala gwerhu changwa mwira werhu amachibwa omu chibaga?

¹³ Nka gurhe obwizere bwerhu omu bashamuka bwakageregezwa? Nk’omuntu wachibirwe omu chibaga arhali mwira werhu changwa muntu w’omu mulala gwerhu, byakarhuyorohera kuyemera eby’abashamuka bachishogere kujira. Lero rhuderhe ok’owachibirwe omu chibaga ali mwira werhu. Rhwakachibaza akaba abashamuka banagerereze ebintu bwinja, changwa akaba kweri banachire olubanja okuntu Yehova naye akanaluchire. Bichi byakarhurhabala rhugenderere kugwarha amawazo makwirire oku bilolere okuntu abashamuka bachishogere kujira?

14. Bichi byakarhurhabala amango abashamuka bamabona oku omuntu w’omulala gwerhu changwa mwira werhu akwanene kuchibwa omu chibaga?

 ¹⁴ Rhukwanene kuyibuka ok’okuchibwa omu chibaga guli mupango gwa Yehova, n’echola chinalerhera echibaga enyungu n’omuntu wajirire echaha. Nk’omuntu wajirire echaha orhahungamire amalekererwa abeere omu chibaga, akashumika abandi nabo bayiganye engeso yage. (Gal. 5:9) Oku bwindi, arhakarhegeera kangana gurhe ech’ajirire chili chibi, arhakana hindamula amawazo n’ebijiro byage yi Yehova ashuba kumuyemera. (Muh. 8:11) Rhwakachizera okw’amango abashamuka bali bagerereza akaba oyola muntu akwanene kuchibwa omu chibaga, banarhanga kuwaza bwinja-bwinja k’ogola muhigo. Bayinji oku, kuguma n’abazuzi b’omu Izraeli ya mira, “lurhali lubanja lw’abantu banacha, si lwa Yehova.”​—2 Ny. 19:6, 7.

15. Bulagurhe rhukwanene kuchizera obwerekezi bwa Yehova zene kulusha mira?

¹⁵ Ok’obuzinda bwa linola gulu libi buli bwayegeera bwenene, kulusha mira, birhuhemere rhugwarhe obwizere omu kuntu Yehova anajira ebintu. Bulagurhe? Bulala omu mango m’amalibuko makulu, hali oku nji rhwakahaabwa obwerekezi rhubwene nka ntacho bumalire, burhagwerhe kamaro, changwa burhafarhene n’obwenge. Kweri Yehova nj’arhaganira nerhu bunu oku bunu. Nkabaga nj’arhuhereza obwerekezi kugerera abalume ashimikire hanola oku gulu. Akola nji karhaba kasanzi k’okugwarha engangane oku bwerekezi rhwahabirwe, changwa mpu rhuchibaze ntya: ‘Ka kweri obula bwerekezi bunarhengere emwa Yehova, changwa abala bene-berhu barhuyumangiire ba bali barhuheka okuntu banalonzeze?’ Ka nji wachizera Yehova n’olubaga lwage mw’akola kasanzi k’akamaro? Echishubizo chakayerekanwa kugerera okuntu oli wabona obwerekezi rhuli rhwahabwa n’olubaga lwa Yehova zene. Akaba onachizera obwerekezi rhuli rhwahabwa zene n’okubukenga juba-juba, bishobokene kweri oku nji wanajira ntyo omu mango m’amalibuko makulu.​—Lu. 16:10.

16. Nka gurhe obwizere bwerhu omu kuntu Yehova anacha olubanja nji bwageregezwa omu mango mali hofi?

¹⁶ Hali echindi chintu rhukwanene kukengerako; oku bilolere okuntu Yehova nj’acha olubanja oku buzinda bwa linola gulu libi. Zene, rhulangalire oku banene barhali bakolera Yehova, kuheba han’abantu b’omulala gwerhu barhali bemezi, nji bakolera Yehova embere obuzinda buyinje. Aliko oku Armagedoni, Yehova, kugerera Yesu, ye njiwarhola esimikiro y’obuzinda oku bilolere akalamo kabo k’amango mayinjire. (Mt. 25:31-33; 2 Te. 1:7-9) Arhali rhwabo rhwenji rhwaderha nde okwanene olukogo lwa Yehova, na nde orhalukwanene.  (Mt. 25:34, 41, 46) Ka nji rhwachizera okuntu Yehova achire olubanja, changwa si nji rhwaleka kumukolera bulala rhurhayemerere okuntu aluchire? Kweri, rhukwanene kukomeza obwizere bwerhu mu Yehova zene, yi nji rhuchizeraye loshi omu mango mayinjire.

17. Gurhe okuntu Yehova nj’acha olubanja oku buzinda bwa linola gulu libi nji kwarhulerhera emigisho?

¹⁷ Waza okuntu nji wachiyunva omu gulu lihyahya lya Mungu amango nji wabona ebi nji byarhengerera bulala Yehova achire olubanja. Edini ly’obubeshi nji lyaba lirhachiliho, abachuruzi bagwerhe obuhugu nabo nji baba barhachiliho, n’abakulu b’epolitike bamahidika abantu n’okubalibuza mu myaka minene nji baba barhachiliho. Ebibazo by’amagala, obushaja, n’okufisa omuntu ozigiire, birhakachiba omu kalamo kerhu ka buli lusiku. Shetani n’abazimu bage nji bashwekwa myaka 1 000. Ebintu bibi byoshi byalerherwe n’obugamba bwabo, birhakachibaho haba n’akatyu. (Ufu. 20:2, 3) Nji rhwagwarha shukurani nene bwenene bulala rhwachizerere enjira Yehova anakola mw’ebintu!

18. Bichi rhwakayiga kugerera omufano gw’Abaizraeli, nk’oku biderherwe omu lwandiko lwa Hesabu 11:4-6; 21:5?

¹⁸ K’akalamo omu gulu lihyahya lya Mungu nji karhulerhera bibazo bilebe byakageregeza obwizere bwerhu omu kuntu Yehova anakola ebintu? Omufano, waza okubyarhengereraga amango Abaizraeli bamala kukuulwa omu buja e Misri. Baguma barhondera kuzimula bulala balikumbwire ebilyo bikwirire baliri balya omu Misri, banahwanza kusuzagura amana Yehova aliri abahereza. (Osome Hesabu 11:4-6; 21:5.) Ka nerhu nji rhwagwarha amawazo mali nk’amo enyuma w’amalibuko makulu? Rhurhamenyere kasi kangana gurhe nji byahema rhukole omu kuchesa egulu n’okulijira paradizo kubuya-buya. Kweri, bishobokene oku nji haba kasi kanene k’okujira, nkabaga n’akalamo nji karhayoroha burhanzi. Ka nji rhwazimula oku bilolere ebi Yehova nj’aba ali arhuhereza mwagola mango? Chintu chiguma rhuchizerere ch’echinola: Akaba rhugwerhe eshukurani oku bi Yehova y’arhuhereza zene, nji rhwagwarha shukurani nene oku bi nj’aba ali arhuha mw’agola mango.

19. Gurhe wakaderha oku bugeke amawazo makulu mali m’ogula mwazi?

¹⁹ Okuntu Yehova anakola ebintu buli mango kuba k’okunali. Rhukwanene rhuchizere echola. Kandi rhukwanene rhuchizere balala Yehova ahere akasi k’okuhaana obwerekezi bwage. Orhahira okayibagira binola binwa Yehova aderhaga kugerera omulebi wage Isaya: “Mwaba n’emisi mukagenderera kurhuleera n’okugwarha obulangalire.”​—Isa. 30:15.