MIRA-MIRA, omuhya-mulume changwa omulala gwage gwakazaga kuhaana eshigi oku mulala g’omuhya-mukazi amango eyola milala yombi yamayunvikana okushabirana. Nkabaga omuntu akahaanire ebintu by’akachiro, ebirhungano, changwa efuranga. Mango maguma, omuntu akahaanire eshigi omu kukola, nka kulala Yakobo ayemeraga akolere eshe wa Raeli myaka mushanvu yamushaba. (Mwa. 29:17, 18, 20) Bulagurhe abantu baliri bazigana kujira ntyo?

Musomi muguma w’ebye Biblia oyirikirwe Carol Meyers, aderhere ntya: “Nkabaga eshigi lyakazagahaanwa oku mulala g’omuhya-mukazi eju y’akasi aliri akola omu omulala gwage, kaliri k’akamaro omu milala [ya bahinzi].” Kandi, nkabaga eshigi lyaliri lyahaanwa omu kukomeza obwira bw’eyola milala yombi yamagwarha obuchi omu kushabirana. Abantu b’eyola milala yombi bakajire bahwanza kurhabalana omu mango m’ebibazo. Oku bwindi, eshigi lyaliyerekene oku omunyere arhachilangwa n’okushishikalwa n’eshe si eba yi wajayinja ajira akola kasi.

Kuhaana eshigi kurhaliri kuderha ok’omukazi aliri chintu ch’okugulwa changwa cha kuguzwa. Chitabu chiguma chiderhere ntya: “Bulala omuntu alikwanene kuhaana furanga zilebe, changwa akachiro kazo, oku mulala g’omunyere, echola chaka rharhuma abantu bawaza oku Abaizraeli baliri bagula omukazi. Aliko bibonekene oku eshigi lyaliri lyarholwa nka luhembo bahere omulala g’omunyere s’arhali nka kachiro kagulire omukazi.” (Ancient Israel​—Its Life and Institutions.)

Zene, mu bihugo biguma, abantu bagenderere kuhaana eshigi. Amango abazere ba Bakristu bamahema eshigi, “banaleka olugero lwabo lumenyekane oku bantu boshi” omu kurhahema shigi likabize. (Flp. 4:5; 1 Ko. 10:32, 33) Omu kujira ntyo, banayerekana oku barhali bantu “basimiire efuranga,” changwa bagwere obuhugu. (2 Ti. 3:2) Oku bwindi, amango abazere ba Bakristu barhahemere eshigi linene, echola charhuma omulume oli hofi kushaba arhalegamya obuhya bwage bulala barhamuhemere eshige linene. Changwa omulume arhabona oku bimuhemere aleke akasi kage k’obupainiya mpu y’ajilonza akasi k’omubiri k’okukola amango moshi yagwarha amahumwa mamurhabala ahaane eshigi linene bamuhemere.

Mu bihugo biguma, abakulu bahebereho erhegeko lilolere eshigi. Omu bihugo bigwerhe amola marhegeko, abazere ba Bakristu bakwanene kumakenga. Bulagurhe? Bulala Mungu ahemere Abakristu “bachihebe eshishi z’abakulu bali enyanya” banakenge amarhegeko marhapingene n’amarhegeko ma Mungu.​—Ro. 13:1; Mdo. 5:29.