1. Bichi Yesu abwiraga abanafunzi bage oku bilolere obuzinda, na mukonge guhe alibahere?

 SIKU zigeke embere Yesu afe, bane omu banafunzi bage bamubaza ntya: “Bichi nji byaba bimenyeso . . . n’obuzinda bwa linola gulu libi?” (Mt. 24:3) Nkabaga abanafunzi bage baliri bachibaza nka gurhe bakamenyere amango Eyerusalemu n’ehekalu byakalimbwirwe. Omu kubashubiza, Yesu arhaderhaga konyine oku bilolere okulimbulwa kwe Yerusalemu n’ehekalu s’aliko, n’oku bilolere “obuzinda bwa linola gulu libi” rhulamiremo zene. Oku bilolere echihe ch’esiku z’obuzinda, Yesu aderha ntya: “Oku bilolere olola lusiku changwa esa, ntaye obimenyere, babe bamalaika embingu changwa Omwana w’Omuntu, s’aliko Darha yenyine.” Bobola aja ahanula abanafunzi bage oku “bagenderere kukenguka ” na “bagenderere kuba masu.”—Mk. 13:32-37.

2. Bulagurhe byaliri by’akamaro oku Bakristu b’omu kagana ka burhanzi bagenderere kuba masu?

² Abakristu Babayahudi b’omu kagana ka burhanzi balikwanene kugenderera kuba masu y’akalamo kabo kayokolwa. Yesu abwira abanafunzi bage ebi balikwanene kubona yibamenya ebyakayerekene oku e Yerusalemu eli hofi kulimbulwa. Aderha ntya: “Amango nji mwabona abasoda bamashimika enkambi kuzunguluka e Yerusalemu, mwanarhegera kw’eli hofi kuharabiswa.” Mw’amola mango, abanafunzi balikwanene kukenga ebi Yesu ababwiraga na “n’okuhwanza kulibirhira omu misozi.” (Lu. 21:20, 21) Abalikengere omukonge gwa Yesu baliyokwere akalamo kabo amango abasoda be Roma balimbula e Yerusalemu.

3. Bichi rhwaganirako mu gunola mwazi?

 ³ Zene rhulamire omu chihe ch’obuzinda cha linola gulu libi. Nerhu zene rhukwanene kulanga obwenge bwerhu n’okugenderera kuba masu. Mu gunola mwazi rhwaganira nka gurhe rhwakagenderera kugwarha olugero amango rhuli rhwalolereza ebili byarhengerera mu linola gulu, okuntu rhwakaba merangwe, na nka gurhe rhwakakolesa bwinja ebisanzi biyorhere.

4. Bula gurhe rhwakasimiswa okubona ebintu bili byarhengerera zene bili byayeneza obulebi bwe Biblia?

⁴ Hali empanvu zinja zirhumire rhwasimiswa n’okubona okuntu ebili byarhengerera bili byayeneza obulebi bwe Biblia. Omufano, Yesu ali rhubwirire ebintu by’okurhurhabala rhumenye oku obuzinda bwa linola gulu libi lya Shetani buli bwayegera. (Mt. 24:3-14) Entumwa Petro ali rhuhebere omurhima oku rhugenderere kuba merangwe oku bilolere okuyenera k’obulebi na ntyo obwemere bwerhu bwagenderera kukomera. (2 Pe. 1:19-21) Echitabu chizinda che Biblia chihwanzize na binola binwa: “Obufunuo kugerera Yesu Kristu, Mungu amuhaga, ayereke abaja bage ebikwanene kurhengerera buzira kulegama.” (Ufu. 1:1) Bobola rhusimiire bwenene okubona ebintu bili byarhengerera omu gulu zene n’okumenya gurhe byakayeneza obulebi bwe Biblia. Kandi byarhusimisa kuganira haguma n’abandi oku bilolere ebyola bili byarhengerera.

5. Bichi rhukwanene kuchilangako, aliko bichi rhukwanene rhujire? (Olole amafoto.)

⁵ Aliko amango rhuli rhwaganira oku bulebi bwe Biblia, rhukwanene kuchilanga yi rhurhayinja rhwafoola ebi nji byarhengerera. Bulagurhe? Bulala rhurhalonzeze kuderha echintu n’echiguma chakahanyagaza obuguma omu chibaga. Omufano, hali oku rhwakayunva abakulu ba linola gulu baderha okuntu bakamala ebibazo n’okulerha omurhula n’obubegeere. Ahali h’okufoola oku eyola myazi eli yayeneza obulebi buli omu 1 Watesalonike 5:3, rhukwanene rhumenye emyazi echizindire kuhaanwa hano hofi-hofi. Amango ebi rhunaderha biyumangiire oku myazi eli omu bitabu olubaga lwa Yehova luli lwarhuhereza, rhwanarhabala echibaga chigendereze obuguma ‘omu bi rhunaderha.’​—1 Ko. 1:10; 4:6.

6. Bichi olwandiko lwa 2 Petro 3:11-13 lwakarhuyigiriza?

⁶ Osome 2 Petro 3:11-13. Entumwa Petro arhurhabere rhuwaze oku mpanvu zirhumire rhukwanene kuyiga obulebi bwe Biblia. Arhuhebere omurhima “rhubike hofi omu bwenge okubaho k’olusiku lwa Yehova.” Bulagurhe? Arhali mpu bulala rhuli rhwalonza kumenya “olusiku n’esa” amango Yehova alerha evita lye Armagedoni, aliko bulala rhulonzeze kukolesa ebisanzi rhuyorhene y’irhuyerekana “ebijiro bichesibwa by’olugenzi n’ebijiro by’obushwekerezi ku Mungu.” (Mt. 24:36; Lu. 12:40) Omu bindi binwa, rhulonzeze kugwarha olugenzi lukwirire n’okuchizera oku ebi rhuli rhwakola omu kasi ka Yehova, rhuli rhwabikola bulala rhumuzigiire bwenene. Yi rhugenderera n’obola bushiru, rhukwanene kuchilanga rhwewe rhwenyine.

7. Nka gurhe rhwakayerekana oku rhuli rhwachilanga rhwewe rhwenyine? (Luka 21:34)

⁷ Yesu abwira abanafunzi bage oku barhayinjaga baseza obwenge bwabo konyine oku bili byarhengerera oku gulu, s’aliko banachilange. Echola chiyerekenwe bwinja omu mukonge guli omu Luka 21:34. (Osome.) Rhulole ebinwa bya Yesu biderhere: “Muchilange mwenyine.” Omuntu onachilanga yenyine anaba  masu ku buli buhanya boshi bwakahanyagaza obwira bwage haguma na Yehova, n’okurhola entambu y’okubuyaka. Mw’eyola njira, anagenderera kubera omu buzigire bwa Mungu.​—Mez. 22:3; Yud. 20, 21.

8. Mukonge guhe entumwa Paulo alihere Abakristu?

⁸ Entumwa Paulo alibwirire Abakristu oku bachilange bowe bonyine. Omufano, alibwirire Abakristu b’omu Efeso ntya: “Mugenderere kulola bwinja gurhe yi mwachigendesa, murhabaga nka bantu barhaherhe bwengehe, si nka bantu bayengehere.” (Efe. 5:15, 16) Shetani ali achihangana kuhanyagaza obwira bwerhu haguma na Yehova, bobola Ebiblia erhuhanwire ntya “mugenderere kurhegera obulonza bwa Yehova buli buhe” yi rhugala kuchilanga oku bintu byoshi Shetani anakolesa yarhurheera.​—Efe. 5:17.

9. Gurhe rhunarhegera obulonza bwa Yehova?

⁹ Ebiblia erhaderhere buli chintu chakahanyagaza obwira bwerhu haguma na Yehova. Buli mango rhukwanene kurhola esimikiro oku bintu Amandiko marhaderhereko wazi. Yi rhurhola esimikiro zinja, birhuhemere rhurhegere changwa rhumenye “obulonza bwa Yehova” buli buhe. Rhwakajira ntyo amango rhuli rhwasoma n’okuyiga buli mango Echinwa cha Mungu n’okuchikengeerako. Oku rhuli rhwachihangana kuyunva bwinja obulonza bwa Yehova n’okuchihangana kugwarha “obwenge bwa Kristu,” intyo kurhwagwarha orozo l’okulambagira “nka bantu bagwerhe obwengehe,” chiro n’amango nta sheriya eliho erhuyerekere okuntu rhukwanene kuchigendesa. (1 Ko. 2:14-16) Mango maguma biba biyorohere okumenya ebi rhukwanene kuchilangako, n’amandi mango birhaba biyorohere.

10. Bintu biguma bihe byaka rhulerhera obuhanya rhukwanene kuchilangako?

¹⁰ Bintu biguma rhukwanene kuchilangako byaka rhulerhera obuhanya kuli kusharhira oku orhali balo changwa orhali mukawe, obulalu, obudambi, ebinwa by’okubabaza abandi, n’okulola amasharha m’obubandi, epornografiya, n’ebindi bili nk’ebyola. (Zb. 101:3) Omwanzi werhu, Ibilisi, buli mango analonza orozo l’okuhanyagaza obwira bwerhu haguma na Yehova. (1 Pe. 5:8) Nka rhurhakengukire, Shetani akakuza omu mirhima yerhu, obongwa, obulyalya, obuhugu, akabolo, changwa olushombo, omwibone, n’okubikira abandi omujinya. (Gal. 5:19-21) Rhwakarhanga kubona oku amola mawazo ntabuhanya makalerha. Aliko nka rhurharholere entambu y’okumashigula ahola h’anaho omu mirhima n’omu bwenge bwerhu, makagenderera kukula nka murhi gugwerhe esumu n’okuja marhulerhera obuhanya.​—Yak. 1:14, 15.

11. Buhanya buhe burhabonekene bwinja-bwinja rhukwanene rhuchilangeko, na bulagurhe?

¹¹ Buhanya buguma burhabonekene bwinja-bwinja bali bera. Rhuganirage kw’enola hali. Oli wakola haguma n’omuntu orhali Muhamirizi wa Yehova. Olonzeze oyo muntu onakola naye agwarhe amazo menja oku bilolere Abahamirizi ba Yehova, bobola oli wamukolera oku bwinja n’okumurhabala. Mango maguma wanayemera kusangira naye. Orhalegamaga, wahwanza kusangira naye buli mango. Mango maguma, anarhonderasa enganiro yeby’obumaguza, wanayunva nka erhakusimisize. Aliko buzinda, wakoomera eyola nganiro, wahwanza kubona oku ntachibazo egwerhe. Naho lusiku luguma, oyo muntu onakola naye akuhamagala muje kusangira echokunywa enyuma w’akasi wanayemera. Naho, wanarhondera kugwarha amawazo mali kuguma n’amoyola muntu. Buzinda, wanarhondera kukola ebintu bili kuguma n’eby’oyola mwira wawe anakola. Kweri, rhunayerekana obwinja n’obukenge oku bantu boshi, aliko rhukwanene kuyibaka oku hakagera amango rhwanaba  kuguma nabalala rhunageza ebisanzi haguma nabo. (1 Ko. 15:33) Rhukachilanga kuguma n’oku Yesu ali rhubwirire rhujire, rhwachilanga oku bera barhakwanene, barhakulikira amakanuni ma Yehova. (2 Ko. 6:15) Rhwabona obuhanya n’okubuyaka.

12. Bichi abanafunzi ba Yesu baliri bajira oku banali balingiriza ok’obuzinda bwa linola gulu libi bwahika?

¹² Yesu alilonzeze Abanafunzi bage bagwarhe binene byo kukola, oku banali balindira oku obuzinda bwa linola gulu libi buhike. Yesu abahereza akasi k’okukola. Abaha erhegeko lyo kuhubiri emyazi minja “omu Yerusalemu, omu Yudeya yoshi, omu Samariya na kugera efasi zahale bwenene z’egulu.” (Mdo. 1:6-8) Akola kali kasi kanene Abanafunzi ba Yesu bahabwaga! Omu kujira okwabo koshi yibahubiri abandi, baliri bakolesa bwinja loshi akasanzi kabo.

13. Bulagurhe bihemere rhukolese bwinja akasanzi kerhu? (Wakolosai 4:5)

¹³ Osome Wakolosai 4:5. Yirhuchilanga rhukwanene kuwaza bwenene, oku kuntu rhunakolesa akasanzi kerhu.“Ebintu rhurhalilangalire” byakahikira buli muguma mu rhwewe. (Muh. 9:11) Rhwakafa akasanzi k’onakasanzi.

14-15. Nka gurhe rhwankakolesa bwinja loshi ebisanzi byerhu? (Waebrania 6:11, 12) (Olole n’efoto.)

¹⁴ Rhwakakolesa bwinja loshi akasanzi kerhu  omu kukola obulonza bwa Yehova n’okukomeza obwira bwerhu haguma naye. (Yoh. 14:21) Rhukenere “rhusere buzira kudundwa, buli mango rhugwarhe binene byo kukola omu kasi ka Waliha.” (1 Ko. 15:58) Naho hanola obuzinda buhika, bube buzindabwa kalamo kerhu changwa buzinda bwa linola gulu libi, nji rhurhachiganya haba nakatyu.​—Mt. 24:13; Ro. 14:8.

¹⁵ Zene, Yesu ali agenderera kuyerekeza abanafunzi bage oku banali bahubiri Emyazi minja y’Obwami omu gulu lyoshi. Yesu alikolere echage chigabi. Kugerera embuganano n’ebitabu byerhu, Yesu anarhuyigiriza okuntu rhwakahubiri emyazi minja. Kandi anarhuhereza byoshi rhukenere yirhugakola akola kasi. (Mt. 28:18-20) Rhunakola echerhu chigabi omu kukola bwenene akasi k’okuhubiri n’okuyigiriza, n’okugenderera kuba masu oku rhunali rhwalingiriza okuntu Yehova alerha obuzinda bwalinola gulu libi. Omu kukolesa ehano liri omu Waebrania 6:11, 12, rhwagendereza obulangalire bwerhu “kuhika oku buzinda.”​—Soma.

16. Bichi rhuhigirire kujira?

¹⁶ Yehova ahebereho esa n’olusiku anjalerha obuzinda bwalinola gulu libi lya Shetani. Amango olola lusiku nji lwahika, Yehova njayeneza amalebi ayandikisaga omu Chinwa chage. Aliko, mango maguma rhwakawaza oku obuzinda burhahika chiro hano hofi-hofi. Aliko kweri, olusiku lya Yehova “lurhacherehwa haba nakatyu!” (Hab. 2:3) Bobola rhujage rhwahigirira “kugenderera kulingiriza Yehova omu kulindira Mungu w’obuchunguke [bwerhu].”​—Mik. 7:7.