1. Bulagurhe Yesu abwiraga Yehova alange abanafunzi bage?

OMU budufu bwage buzinda kunola gulu, Yesu aliwazize bwenene oku bibazo abanafunzi bage bakahurene. Bulala alizigire abanafunzi bage, Yesu abwira Eshe “abalange k’olala mubi.” (Yoh. 17:14, 15) Yesu alimenyere oku arhachilegama kugaluka embingu n’oku Shetani Ibilisi akagenderere kulwisa buli yeshi walisimire kukolera Yehova. Echola che chirhumire abantu ba Yehova baba bakenere obulanzi.

2. Bichi byakarhuyemeza oku kweri Yehova ashubiza amasala merhu?

² Yehova alishubize oku sala lya Yesu bulala azigire oyola Mugala. Akaba rhuli rhwachihangana kujira oku rhugalire yirhusimisa Yehova, naye arhuzigira n’okuyunviriza bwinja-bwinja amasala merhu rhuli rhwamusalira n’okumuhema oburhabale n’obulanzi. Kuguma n’Erhwe ly’omulala linja, Yehova agenderera kushishikala oku buzigire abana bage. Nk’arhajirire ntyo, anachizingisiza ezino n’okuchihezeza erenge!

3. Bulagurhe rhukenere obulanzi bwa Yehova zene?

³ Zene rhulagirire obulanzi bwa Yehova kulusha mira. Bafukwize Shetani embingu, “agwerhe burhe bunene.” (Ufu. 12:12) Ayemezeze abantu bali barhulibuza bawaze oku amango bali bajira ntyo, eyi bali bakolera Mungu “akasi kachesibwa.” (Yoh. 16:2) Abandi barhayemerere Mungu, bali barhulibuza bulala rhurhali kuguma n’abantu bali mu linola gulu. Bibe bichi bili byarhuma abantu barhulibuza, rhwabo rhurhayubahire. Bulagurhe? Bulala Echinwa cha Mungu chiderhere ntya: “Waliha ali mwimana, abaheba emisi n’okubalanga k’olala mubi.” (2 Te. 3:3) Nka gurhe Yehova anarhulanga? Leka rhushambale ku njira ebiri.

4. Nk’oku olwandiko lwa Waefeso 6:13-17 luderhere, bichi Yehova arhuhere yi birhulanga?

⁴ Yehova arhuhere entwaro rhwakayambala zakarhulanga amango Shetani amarhurhera. (Osome Waefeso 6:13-17.) Ezola ntwaro z’ekiroho, zikomere zinakola n’akasi bwinja! Aliko akaba rhusimire zirhulange, rhukwanene rhugenderere kuzikolesa zoshi. Bichi buli ntwaro eyerekene? Leka rhushambale ku buli nguma muzo.

5. Omukaba g’okuli bili bichi, na bulagurhe rhukwanene kuguyambala?

⁵ Omukaba g’okuli guyerekene okuli kuli omu Chinwa cha Mungu, Ebiblia. Bulagurhe rhukwanene kuyambala ogola mukaba? Bulala Shetani ali “eshe w’obubeshi.” (Yoh. 8:44) Amamala myaka minene ey’ali abesha anali ahabula “egulu lyoshi lilamirweko”! Ufu. 12:9) Aliko okuli kuli omu Biblia kwarhulanga yirhurharhebekwa. Nka gurhe rhunayambala ogula mukaba g’omufano? Rhunajira ntyo omu kuyiga okuli eju ya Yehova, okumuharamya “omu roho n’omu kuli,” n’omu kugenderera kuba banihirwa omu bintu byoshi.​—Yoh. 4:24; Efe. 4:25; Ebr. 13:18.

6. Olugogorho l’oku chifuba l’okunali bili bichi, na bulagurhe rhukwanene kuluyambala?

⁶ Olugogorho l’oku chifuba l’okunali luyerekene amakanuni m’okunali ma Yehova. Bulagurhe rhukwanene kuyambala olola lugogorho l’oku chifuba? Kuguma n’olugogorho l’oku chifuba lunalanga omurhima nya murhima g’omusoda y’ebibamulikize birharhula, olugogorho l’oku chifuba l’okunali, lwakalanga omurhima gwerhu g’omufano changwa obumuntu bwerhu bwa ndani oku mashumi mabi ma linola gulu. (Mez. 4:23) Yehova alonzeze rhumuzigire n’okumukolera n’omurhima gwerhu goshi. (Mt. 22:36, 37) Che chirhumire Shetani ali achihangana kugaba omurhima gwerhu omu kurhushumika rhuzigire ebintu linola gulu lili lyahana; k’okuderha ebintu Yehova anagaya. (Yak. 4:4; 1 Yo. 2:15, 16) N’akaba amola mashumi marhafarhire, achihangana kurhuyubahisa yi rhuvuna amarhegeko ma Yehova.

7. Nka gurhe rhwakayambala olugogorho l’oku chifuba l’okunali?

⁷ Rhunayambala olugogorho l’oku chifuba l’okunali, omu kuyemera amarhegeko ma Yehova oku bilolere echinja n’echibi, n’okulama nk’oku amola marhegeko maderhere. (Zb. 97:10) Baguma bakabona nk’amakanuni ma Yehova marhushwekere. Aliko nka rhulekere kukolesa amakanuni me Biblia omu kalamo kerhu, rhwanaba kuguma n’omusoda wahogwere olugogorho l’oku chifuba n’obola ali omu ntambala bulala awazize oku lulemerere. Kweri okujira ntyo buli buhwinja! Ku balala bazigira Yehova, amarhegeko mage “gurhali muzigo gulemerere,” s’aliko mali makuyokola akalamo.​—1 Yo. 5:3.

8. Okuyambala ebirato by’okuba tayari kuhubiri emyazi minja, k’okuderha gurhe?

⁸ Paulo ashubire kurhuhanula rhuyambale ebirato by’okuba tayari kubwira abandi emyazi minja y’omurhula. K’okuderha oku buli mango rhukwanene kuba tayari kuhubiri emyazi minja y’Obwami. Amango rhuli rhwabwira abandi oku burhumwa bwe Biblia, nerhu obwemere bwerhu bwanakomera. Bisimisize bwenene okubona gurhe abantu ba Yehova omu gulu lyoshi bali bachihangana kulonza enjira z’okuhubiri emyazi minja; akaba omu kasi, oku masomo, efasi z’okuguziza, n’amango bali bahubiri nju oku nju, omu soko, amango bamalambagirira abantu b’emilala yabo barhali Bahamiriza, omu kuganira n’abantu bamenyene nabo, chiro n’amango barhali barhenga ahambuga mu mango maguma. Nka rhuyunvirhe obuba n’okuleka kuhubiri, rhwanaba kuguma n’omusoda wahogwere ebirato byage n’obola ali omu  ntambala; amagulu mage makakoromeka juba-juba. N’echola chanarhuma aba ey’arhagala kuchilanga, ey’arhakanachigala kukulikira ebi komanda y’aderha.

9. Bulagurhe bihemere rhuheke empenzi nzibu-zibu y’obwemere?

⁹ Empenzi nzibu-zibu y’obwemere eyerekene obwemere rhugwere mu Yehova. Rhulangalire oku nj’ayeneza ebilagane byage byoshi. Obola bwemere bwarhurhabala “kuzimya emyambi yoshi ekolerere y’olala mubi.” Bulagurhe bihemere rhuheke eyola mpenzi nzibu-zibu? Bulala yarhulanga yi rhurharhebekwa n’enyigirizo z’ebigamba by’obwemere, changwa yi rhurhavunika omurhima amango abantu bamarhushekera n’okurhudukanga eju y’obwemere bwerhu. Buzira bwemere, rhurhagala kugwarha emisi y’okurhurhabala kulahira amango abandi bamachihangana kurhushumika rhuvune amakanuni ma Yehova. Aliko mango rhulirhwahamiriza obwemere bwerhu oku kasi changwa oku masomo, rhwanaba eyi rhuhekere empenzi yerhu. (1 Pe. 3:15) Buli mango yirhwalahira akasi ka mushahara gunene aliko kakabuza rhurhagendereraga kukolera Yehova nk’okubihemere, eyi rhuhekere empenzi yerhu. (Ebr. 13:5, 6) Na buli mango rhwagenderera kukolera Yehova chiro akaba oku rhuli omu bupinzani, ey’empenzi yerhu eli y’arhulanga.​—1 Te. 2:2.

10. Esapo y’echuma y’obuchunguke bili bichi, na bulagurhe rhukwanene kuyiyambala?

 ¹⁰ Esapo y’echuma y’obuchunguke buli bulangalire Yehova arhuhere; k’okuderha obulangalire oku nj’arhuyokola omu lufu n’oku nj’ahemba balala boshi bali bajira obulonza bwage. (1 Te. 5:8; 1 Ti. 4:10; Tit. 1:1, 2) Nka kulala esapo y’echuma enalanga omusoda, obulangalire b’obuchunguke, bunalanga obuhashe bwerhu b’okuwaza. Mu njira ehe? Obola bulangalire bunarhuma rhwaseza obwenge bwerhu oku bilagane bya Mungu, n’okurhurhabala rhumenye rhwayubaha bwenene ebibazo rhulimo. Nka gurhe rhunayambala eyola sapo y’echuma? Rhunajira ntyo omu kugenderera kubona ebintu nk’oku Mungu anabibona. Omufano, rhurhalangalira obuchire burhagwerhe echi bumalire, s’aliko rhulangalire Mungu.​—Zb. 26:2; 104:34; 1 Ti. 6:17.

11. Engorho y’eroho bili bichi, na bulagurhe bihemere rhuyikolese?

¹¹ Engorho y’eroho chili Chinwa cha Mungu, Ebiblia. Eyola ngorho eherhe emisi y’okucha obubeshi bwa ngasi lubero n’okukula abantu omu buja bw’enyigirizo z’obubeshi n’ezindi ngeso zoshi zibi. (2 Ko. 10:4, 5; 2 Ti. 3:16, 17; Ebr. 4:12) Rhunayiga gurhe rhwakamenya kukolesa bwinja eyola ngorho kugerera efunzo lyerhu rhwenyine, na kugerera enyigirizo rhunapata omu lubaga lwa Mungu. (2 Ti. 2:15) Olekere ezola ntwaro z’okuyambala, Yehova anashuba kukolesa eyindi njira omu kurhurhabala bwenene. Y’ehe eyola?

12. Bichi bindi rhulagirire na bulagurhe?

¹² Omusoda okomere kulwa evita, ab’amenyere oku arhakagala kuhima echigusho chinene ch’abasoda yewe yenyine; akenere oburhabale bw’ababo basoda. Konakuguma, rhurhakagala kulwisa Shetani n’abantu bage oku misi yerhu; rhukenere oburhabale bwa bene-berhu na bali-berhu. Yehova arhuhere “echinya-buguma cha bene-berhu ch’omu gulu lyoshi” baliho eju y’okurhurhabala.​—1 Pe. 2:17.

13. Nk’oku olwandiko lwa Waebrania 10:24, 25 luderhere, nyungu zichi rhunapata amango rhwamahika oku mbuganano zerhu?

¹³ Njira nguma rhunapata m’oburhabale, kuli kuhika oku mbuganano zerhu. (Osome Waebrania 10:24, 25.) Rhweshi, hanagera ebisanzi rhwavunika omurhima. Amango byamaba ntyo, embuganano zakarhuheba omurhima. Rhunahebwa omurhima kugerera ebishubizo binja bene-berhu na bali-berhu banahana. Amajambo mayumangire oku Biblia n’ebipindi banageza, binakomeza omuhigo gwerhu g’okukolera Yehova. N’enganiro nyinja rhunajira embere n’enyuma w’embuganano enarhuheba omurhima. (1 Te. 5:14) Kandi, embuganano zerhu zinarhuha akasanzi k’okupata omwishingo omuntu anagwarha amango amarhabala abandi. (Mdo. 20:35; Ro. 1:11, 12) Hali ezindi njira embuganano zerhu zinarhurhabala mo. Zinarhurhabala rhube bahubiri benja na balimu benja. Omufano, rhunayiga okuntu rhwakakolesa bwinja Ebikoleso Byerhu by’Okuyigiriza. Bobola, orheganye bwinja embuganano z’echibaga. Oyunvirize bwinja amango m’embuganano. Enyuma w’embuganano, okolese enyigirizo wapatire. Amango wamajira ebyola byoshi, waba “musoda mwinja wa Kristu Yesu.”​—2 Ti. 2:3.

14. Yindi njira nchi Yehova ali akolesa omu kurhurhabala?

¹⁴ Kandi amamiliyoni ma bamalayika bagwerhe emisi banarhurhabala. Ba nka wawaza oku bi malayika muguma akakola! (Isa. 37:36) Lero jaga wawaza bichi bamalayika kamama bagwerhe emisi bakagala kukola. Nta muntu changwa muzimu ogwerhe emisi y’okuhima bamalayika ba Yehova bagwerhe misi minene. Yehova agwerhe misi minene. Che chirhumire amango ali haguma nerhu rhwagenderera kugwarha emisi kulusha abapinzani berhu chiro baba bali bangana gurhe. (Amu. 6:16)  Rhuchizerere ok’obola buli bukweri! Ogenderere kuyibuka ntyo amango wamayubahiswa kugerera chintu chilebe omuntu onakola naye, ey’onasoma naye, changwa omuntu w’omulala orhali Muhamirizi akaderha changwa akajira. Oyibuke ok’orhali wenyine mw’eyola ntambala. Oli wakulikira obwerekezi bwa Yehova. Bobola arhakulekerera.

15. Nk’oku olwandiko lwa Isaya 54:15, 17 luderhere, bulagurhe abantu ba Mungu barhakafa balekere kuhubiri?

¹⁵ Linola gulu lirhegekerwe na Shetani ligwerhe mpanvu zinene zakarhuma lyarhushomba. Nta lusiku rhwafa rhwachihebere omu by’epolitike changwa mpu rhuheke ebundi. Rhuli rhwahubiri ezino lya Mungu, rhuli rhwabwira abantu ok’Obwami bwage bonyine bu nji bwalerha omurhula, rhunagenderere kukenga amakanuni mage m’okunali. Rhuli rhwayereka abantu ok’omurhegesi wa linola gulu ali mubeshi mubi, anali munizi. (Yoh. 8:44) Rhunali rhwamenyesa oku hanola hofi-hofi egulu lya Shetani lyalimbulwa. Aliko, Shetani n’abantu bage barhakabuza chiro n’ehityu akasi kerhu k’okuhubiri. Ahubwe, rhwagenderera kukuza Yehova mu buli njira yoshi! Chiro akaba oku Shetani agwerhe misi menene, agambirwe kubuza oburhumwa b’Obwami kuhika oku bantu boshi omu gulu. Obulanzi bwa Yehova bonyine buli bwarhuma rhwagala kujira ntyo.—Osome Isaya 54:15, 17.

16. Nka gurhe Yehova nj’ayokola abantu bage oku malibuko makulu?

¹⁶ Bichi birhulingire? Amango m’amalibuko makulu, Yehova nj’arhuyokola mu njira ebiri zisomeze. Ey’oburhanzi, nj’ayokola abakozi bage bimana amango nj’akolesa abami b’egulu omu kulimbula Babiloni Mukulu, k’okuderha amadini moshi m’obubeshi. (Ufu. 17:16-18; 18:2, 4) Enyuma w’ahola, nj’ayokola abantu bage amango nj’alimbula ebigabi biyorhere by’egulu lya Shetani oku Armagedoni.​—Ufu. 7:9, 10; 16:14, 16.

17. Nyungu zichi rhwakapata nka rhugenderere kuba bera ba hofi-hofi ba Yehova?

¹⁷ Amango rhugenderere kuba bera ba hofi ba Yehova, Shetani arhakagala kurhulimbula loshi-loshi. Ahubwe, ye nji walimbulwa esiku n’amango. (Ro. 16:20) Bobola oyambale entwaro zoshi, onagenderere kuzikolesa! Orhapimaga kulwisa Shetani n’egulu lyage oku misi yawe wenyine. Orhabale bene-benyu na bali-benyu. Onakulikire obwerekezi bwa Yehova. Okajira ntyo, wayemera bwinja oku kweri Yisho w’embingu w’obuzigire akuheba emisi n’okukulanga.​—Isa. 41:10.