1. Nk’oku olwandiko lwa Matayo 24:9 luderhere, bulagurhe rhurhakwanene kusomerwa nk’egulu lyamarhushomba?

YEHOVA arhulemaga yi rhuyereka abandi bantu obuzigire yi nabo barhuzigira. Che chirhumire, amango muntu mulebe amarhushomba, rhunayunva rhungayire bwenene nkabaga chiro n’okuyubaha. Omufano, mwali-werhu muguma oyirikirwe Georgina, olamire omu Bulaya, aderhere ntya: “Amango naligwerhe myaka 14, mama ahwanza kunshomba bulala ndi nakolera Yehova. Nahwanza kuchiyunva ndekererwe bwenene n’okuhwanza kuchibaza akaba kweri nandi muntu mwinja.” * Mwene-werhu muguma oyirikirwe Danylo ayandikire ntya: “Amango abasoda baliri banshurha, badukanga, n’okundibuza bulala ndi mukozi wa Yehova, nayubaha n’okukozwa eshoni.” Olushombo luli nk’olola, lugayisize bwenene. Aliko birharhusomeze. Yesu abaga aderhere oku rhwakashomberwe.​—Osome Matayo 24:9.

2-3. Bulagurhe abanafunzi ba Yesu bashomberwe?

² Egulu lishombere abanafunzi ba Yesu. Bulagurhe? Bulala kuguma na Yesu, ‘rhurhali chigabi ch’egulu.’ (Yoh. 15:17-19) Che chirhumire, chiro akaba oku rhukengere oburhegesi bw’abantu, rhurhabuharamya changwa ebimanyiso byabo. Rhunaharamya Yehova yenyine. Rhuyemerere oku kweri, Mungu y’ekwanene arhambule abantu ba ngasi buko, aliko Shetani “n’oluburho” lwage barhayemerere oku Mungu y’ekwanene arhambule. (Mwa. 3:1-5, 15) Rhunahubiri oku Obwami bwa Mungu bonyine bu abantu bangasi lubero bakwenene kulangalira n’oku hanola hofi-hofi obola Bwami bw’amala balala boshi bali babupinga. (Dan. 2:44; Ufu. 19:19-21) Obola burhumwa eli myazi minja oku bantu berhohye aliko mwazi gubi oku bantu babi.—Zb. 37:10, 11.

³ Kandi rhushomberwe bulala rhuli rhwachihangana kukenga amakanuni m’okunali ma Mungu omu kalamo kerhu. Ebi Mungu  yewe aderhere oku bili binja n’ebyaderhere oku bili bibi, birhafarhene chiro n’ehityu n’eby’abantu ba linola gulu bali baderha oku bili binja n’ebi bali baderha oku bili bibi. Omufano, bantu banene zene bayemerere n’okukola ebijiro bibi by’obubaraga bili nk’ebyarhumaga Mungu alimbula e Sodoma ne Gomora! (Yud. 7) Bulala rhukengere amakanuni mali omu Biblia oku bilolere ebyola bijiro, bantu banene banarhushekera n’okurhubwira oku rhurhayemera eby’abandi.​—1 Pe. 4:3, 4.

4. Ngeso zihe zinarhuheba emisi amango abantu bamarhushomba?

⁴ Bichi byakarhurhabala rhulembere amango abantu bamarhushomba n’okurhudukanga? Bihemere rhuchizere bwenene oku Yehova arhurhabala. Kuguma n’empenzi, obwemere bwerhu “bwakazimya emyambi yoshi ekolerere y’olala mubi.” (Efe. 6:16) Aliko rhukenere bintu binene olekere okugwarha obwemere konyine. Bihemere rhugwarhe n’obuzigire. Bulagurhe? Bulala obuzigire “burhahambarwa (kuhangalwa).” Bunasirira n’okulembera ebintu byoshi by’okugayisa. (1 Ko. 13:4-7, 13) Rhujage rhwalola nka gurhe okugwarha obuzigire ku Yehova, ku bene-berhu na bali-berhu, chiro n’oku bashombanyi berhu kwakarhurhabala rhulembere olushombo.

5. Nka gurhe obuzigire Yesu aligwerhe kw’Eshe bwalimuhere emisi?

⁵ Mu budufu buguma embere abanzi bage bamuyirhe, Yesu alibwirire abanafunzi bage bimana ntya: “Nzigire Darha, [bobola] ndi najira eby’antegekere njire.” (Yoh. 14:31) Obuzigire Yesu aligwerhe ku Yehova bwalimuhere emisi y’okugala kulwisa ebigeregezo byaliri embere zage. Nerhu, obuzigire rhugwerhe ku Yehova, bwakarhurhabala kulwisa ebibazo.

6. Nk’oku olwandiko lwa Waroma 5:3-5 luderhere, gurhe abakozi ba Yehova banabona okulembera olushombo lwa linola gulu?

⁶ Buli mango, obuzigire ku Mungu bunarhabala abakozi ba Yehova balembere amalibuko. Omufano, amango entumwa zihabwa erhegeko n’olubuga lukulu lugwerhe emisi lwa Abayahudi liderhere oku baleke kuhubiri, obuzigire baligwerhe ku Mungu bwabashunika “kukenga Mungu nka murhegesi ahali h’abantu.” (Mdo. 5:29; 1 Yo. 5:3) Obula buzigire bukomere bunali bwaheba bene-berhu emisi zene, banene mu bo bagenderere kuyorha oku lwimango lwabo chiro akaba bali omu burhegesi bubi bunagwerhe emisi. Ahali h’okuvunika omurhima, rhulirhwabona oku luli lukengo okulembera olushombo lwa linola gulu.​—Mdo. 5:41; Osome Waroma 5:3-5.

7. Gurhe rhukwanene kujira amango abantu b’omulala gwerhu bamarhupinga?

⁷ Nkabaga chiguma omu bigeregezo bikomere rhuli rhwahurana, chirhengerere oku bantu b’omulala gwerhu. Amango rhwamahwanza kuyiga okuli, bantu baguma b’omu mulala bakahwanza kuwaza oku rhuli rhwarhebekwa. N’abandi banawaza oku rhwasirehere. (Huzanya na Marko 3:21.) Bakanahwanza chiro kurhupinga omu kurhukolera kubi bwenene. Obola bupinzani burhakwanene kurhusomeza. Yesu aliderhere ntya: “Abanzi b’omuntu nji baba bantu b’omu mulala gwage.” (Mt. 10:36) Kweri, koshi-koshi abantu b’omulala gwerhu bakaba bali barhubona, rhwabo rhurhabakolera nka bashombanyi berhu. Ahubwe, ok’obuzigire bwerhu ku Yehova buli bwagenderera kukula, ku n’obuzigire oku bandi bantu buli bwakula. (Mt. 22:37-39) Aliko nta lusiku nji rhwaleka kukenga amarhegeko n’amakanuni mali omu Biblia mpu yi rhusimisa owindi muntu.

8-9. Bichi byarhabalaga mwali-werhu muguma ayorhe aserere omu bwemere chiro akaba oku alihurene obupinzani bukomere?

⁸ Georgina rhwabaga rhwashambereko burhanzi, aligalire kuyorha aserere omu bwemere chiro akaba oku nyina aliri amupinga bwenene. Georgina afasiriye ntya: “Rhwarhonderaga kuyiga Ebiblia haguma n’Abamirizi ba Yehova rhwembi mama. Aliko enyuma ya myezi ndarhu,  amango nahwanzaga kusima kuja oku mbuganano, mama ahwanza kumpinga. Nayinjimenya oku gasi aliri aganira n’ebigamba by’obwemere, analiri akolesa ebi bamubwirire amango aliri aderha nani. Anahwanza kundukanga, kunkulula enviri, kuniguza, n’okukabula ebitabu byani embuga. Nahikire mu mwaka 15, nabatizwa. Mama achihangana kumbuza ndeke kukolera Yehova, anampeka mu nju nguma banalangira mw’abanyere b’ebigamba yi babahanula, baguma mu bo baliri balalu bwenene banaliri babandi bakomere. Ahanene, bikomere bwenene okulwisa obupinzani amango omuntu oli wakulibuza akwanene kukuzigira anakwanene akushishikale.”

⁹ Nka gurhe Georgina agalaga kulwisa echola chibazo? Aderhere ntya: “Amango mama ampindamukaga, nabaga eyi namayusa kusoma Ebiblia yoshi. Nabaga yi inkala nchizerere bwenene oku nabaga napatire okuli, na naba eyi nkala mwira wa hofi wa Yehova. Nakazaga musalira buli mango, analiri anyunviriza. Amango naliri eyola munda mama ampekaga, mwali-werhu muguma ampamagala emwage rhwanalonza emyazi haguma omu Biblia n’omu bitabu byerhu y’okurhurhabala. Mw’amola mango moshi, bene-berhu na bali-berhu baliri bampeba emisi oku Chumbi ly’Obwami. Bayinja bambona nka muguma w’omu milala yabo. Nalichibwenere oku Yehova yegwerhe emisi kulusha abapinzani berhu, chiro baba bali bande.”

10. Bichi rhwakalangalira oku Yehova Mungu werhu ajira buli mango?

¹⁰ Entumwa Paulo aliyandikire oku nta chintu “chakarhukula omu buzigire bwa Mungu buli mu Kristu Yesu Waliha werhu.” (Ro. 8:38, 39) Chiro akaba oku hakagera ebisanzi rhwalibuka, buli mango Yehova aba eburhambi bwerhu omu kurhurhuliriza n’okurhuha emisi. Na nk’oku ebi Georgina ageragamo biyerekene, Yehova anashuba kurhurhabala kugerera omulala gwerhu gwinja gw’ekiroho.

11. Nka gurhe obuzigire bwa Yesu bushamberwe mu Yohana 15:12, 13 bwakarhabere abanafunzi bage? Lerha omufano.

¹¹ Budufu buguma embere Yesu afe, aliyibwise abanafunzi bage okuzigirana buli muguma n’owindi. (Osome Yohana 15:12, 13.) Alimenyere oku obuzigire b’okuchihana bwakabarhabere bagenderere omu buguma n’okubarhabala balembere olushombo lw’egulu. Rhushambale oku mufano gw’echibaga che Tesalonike. Kurhangira amango charhondereswaga, bene-berhu na bali-berhu baliri mu cho, balilibwizwe bwenene. Aliko echola chirhabuzaga abola bene-berhu na bali-berhu barhaba mufano gwinja g’obushwekerezi  n’obuzigire. (1 Te. 1:3, 6, 7) Paulo abaheba omurhima bagenderere kuyerekana obuzigire, chiro na “bwinja-bwinja kulusha.” (1 Te. 4:9, 10) Obuzigire bwakabarhabere bagale kurhuliriza ovunikire omurhima n’okurhabala ozambire. (1 Te. 5:14) Bakolesa elyola hano lya Paulo, na Paulo aligwerhe empanvu nyinja y’okuyandika ntya, omu maruba makabiri ayinjaga kubayandikira mwaka muguma enyuma y’ahola: “Obuzigire bwa buli muntu na buli yeshi mu mwewe buli bwayushuka ku buli muguma n’owindi.” (2 Te. 1:3-5) Obuzigire bwabo bwalibarhabere balembere ebibazo n’amalibuko.

12. Nka gurhe bene-berhu na bali-berhu b’omu chihugo chiguma baliyerekene oku bazigirene buli muguma n’owindi omu mango m’evita?

¹² Rhushambale oku byahikiraga Danylo, rhwaganiragako burhanzi haguma na mukage. Amango evita lyaliri omu chihugo chabo ligera omu vile balilamiremo, bagenderera kugera oku mbuganano, kuhubiri nk’okubakanagala, n’okusangira akalyo baligwerhe haguma na bene-berhu na bali-berhu. Lero lusiku luguma abasoda bagwerhe entwaro bagera ahamwa Danylo. Aderhere ntya: “Bambwira mpakane oku ntakachiba Muhamirizi wa Yehova. Nabere nalahira, banshurha n’okujira nka banakala kundasha, bayinja bashurha amasasa enyanya y’erhwe lyani. Embere bagende, baderha oku bashuba galuka bafarhire mukani emisi (kubaka). Aliko bene-berhu barhuhebesa omu train juba-juba y’arhuheka omu yindi vile. Ntakafanayibagire obuzigire bw’abola bene-berhu bazigirwa. N’amango rhwageraga omu vile mpyahya, bene-berhu balamiremo barhuha akalyo, banantabala kupata akasi n’enju rhwajamo! Echola charhuma rhwaba eyi rhwakagala kuchumbikisa abandi bene-berhu balibirhire evita.” Ebyola mwene-werhu ageragamo, biyerekene k’okuzigirana buli muguma n’owindi, kwakarhurhabala rhulembere olushombo.

13. Gurhe eroho lichesibwa lyakarhurhabala rhulembere omu kasi ka Yehova chiro amango abantu bamarhushomba?

¹³ Yesu alibwirire abanafunzi bage bazigire abashombanyi babo. (Mt. 5:44, 45) Ka bili bilembu okujira ntyo? Nanga chiro! Aliko byakagalikana okujira ntyo kugerera oburhabale bw’eroho lichesibwa lya Mungu. Etunda ly’eroho lya Mungu liheberwe m’obuzigire, okulembera, olukogo, obwirhonzi, n’okuchigala. (Gal. 5:22, 23) Ezola ngeso zinarhurhabala rhugale kulembera olushombo. Bapinzani banene bahindamwire emirhima yabo, bulala beba, bakabo, abana, changwa abaturanyi bakolera Yehova bayerekene ezola engeso. Chiro na banene mubo  bayinjire kuba bene-berhu na bali-berhu bazigirwa. Che chirhumire akaba oli wabona oku bikukomerere okuzigira omuntu okushombere mpu bulala oli wakolera Yehova, oheme Yehova eroho lyage lichesibwa omu sala. (Lu. 11:13) Onachizere oku kweri, okukenga Mungu buli mango, ch’echintu chinja ch’okujira.​—Mez. 3:5-7.

14-15. Nka gurhe olwandiko lwa Waroma 12:17-21 lwalirhabere Yasmeen ayereke eba obuzigire chiro akaba ok’oyola eba aliri amupinga bwenene?

¹⁴ Rhushambalage oku mufano gwa mwali-werhu Yasmeen. Amango abaga Muhamirizi wa Yehova, eba ahwanza kuwaza oku arhebekerwe, anachihangana amubuze kukolera Mungu. Oyo eba ahwanza kumudukanga n’okubwira abantu b’omulala na mukulu muguma w’edini n’omulozi baderhe oku bakajirira oyola mwali-werhu echintu chilebe chibi bulala avunire emigenzo y’omulala gwabo. Eba anayinja amudukangira chiro n’embere za bene-berhu oku mbuganano y’echibaga! Buli mango Yasmeen aliri alaka bulala aliri akolerwa omu njira ebihire ntyo.

¹⁵ Omulala gw’ekiroho gwa Yasmeen gwaliri gwamurhuliriza n’okumuheba emisi oku Chumbi ly’Obwami. Abashamuka bamuhanula akolese amahano mali mu Waroma 12:17-21. (Osome.) Yasmeen ashambere ntya: “Byalikomere bwenene. Aliko nahema Yehova oburhabale, nanajira okwani koshi ngalire omu kukolesa eby’Ebiblia ederhere. Bobola amango bani ayinjaga akabula obuchafu omu masiga oku bulonza y’angayisa, naliri nahyagira (kubiza). Amango aliri andukanga naliri namushubiza oku bwirhonzi. N’ey’akalwere, naliri namushishikala.”

16-17. Bichi omufano gwa Yasmeen gwakuyigirize?

¹⁶ Yasmeen alipatire oluhembo eju y’okuyereka eba obuzigire. Aderhere ntya: “Bani arhondera kunihira bwenene bulala alimenyere oku buli mango namubwira okuli. Arhondera kunyunviriza oku bukenge amango naliri namubwira oku bilolere edini, anahigirira okulerha omurhula omu nju. Zene akala anyibusa okuja oku mbuganano z’echibaga. Rhunakola rhugwerhe obwira bukomere rhwembiye, rhunagwerhe omurhula omu nju. Ndangalire oku lusiku luguma bani nj’ayemera okuli kwe Biblia n’okuhwanza kukolera Yehova haguma nani.”

¹⁷ Omufano gwa Yasmeen guyerekene ok’obuzigire “bunasirira ebintu byoshi, . . . bunalangalira ebintu byoshi, bunalembera ebintu byoshi.” (1 Ko. 13:4, 7) Olushombo lwakagwarha emisi n’okurhugayisa, aliko obuzigire b’obugwerhe misi minene. Bunarhuleza emirhima. N’amango rhugenderere kuyerekana obuzigire rhwasimisa omurhima gwa Yehova. Aliko rhwakagenderera kugwarha obusime chiro abapinzani bagenderera kurhushomba. Nka gurhe byakahashikana?

18. Bulagurhe rhwakapata obusime amango barhushombere?

¹⁸ Yesu aliderhere ntya: “Abasimire, muli mwabo amango abantu bamabashomba.” (Lu. 6:22) Rhurhachishogaga okw’abantu barhushombe. Rhurhasima rhukalibuzwa eju y’obwemere bwerhu. Sasa si, nka gurhe rhwakapata obusime amango abandi barhushombere? Tala mpanvu esharhu. Ey’oburhanzi, amango rhuli rhwalembera, rhwasimisa Mungu. (1 Pe. 4:13, 14) Eya kabiri, obwemere bwerhu bunagwarha kachiro kanene n’okugenderera kukomera. (1 Pe. 1:7) N’eya kasharhu, nji rhwapata oluhembo lwinja bwenene, k’okuderha, akalamo k’esiku n’amango.​—Ro. 2:6, 7.

19. Bulagurhe entumwa zalipatire obusime enyuma y’okumala kushurhwa?

¹⁹ Harhalegamaga Yesu amalire kufuka, entumwa zage zapata obusime aliri aganirira. Enyuma y’okushurhwa n’okuhabwa erhegeko ly’okubalahiza okuhubiri, bachishinga. Bulagurhe? “Bulala babaga babwene oku bakwanene kubulirwa obukenge eju y’ezino lya [Yesu].” (Mdo. 5:40-42) Balizigire Naha-mwabo bwenene kulusha obuba baligwerhe eju y’olushombo lw’abashombanyi babo. Banaliyerekene obuzigire bwabo omu kuhubiri emyazi minja “buzira kuleka.” Zene, bene-berhu banene bali bagenderera kukolera Yehova oku bwimana chiro akaba oku bali omu malibuko. Bamenyere oku Yehova arhakayibagira chiro n’akatyu akasi kabo n’obuzigire bayerekene eju y’ezino lyage.​—Ebr. 6:10.

20. Bichi nji rhwashambalako omu mwazi gukulikire?

²⁰ Egulu ly’agenderera kurhushomba kuhika oku buzinda bwalyo. (Yoh. 15:19) Aliko rhurhakwanene kuyubaha. Nk’oku nji rhwabona omu mwazi gukulikire, Yehova nj’aha abantu bage bimana emisi n’okubalanga. (2 Te. 3:3) Rhujage rhwagenderera kuzigira Yehova, kuzigira bene-berhu na bali-berhu, chiro n’okuzigira abashombanyi berhu. Rhukakolesa elila hano, rhwagenderera kulama omu buguma, n’okugwarha obwemere bukomere, rhwalerhera Yehova erenge, n’okuyerekana oku obuzigire bugwerhe emisi bwenene kulusha ulushombo.