Mwazi G’okuyiga 11
Okuntu Okusoma Ebiblia Kwakakurhabala Olembere Ebibazo
“Mungu . . . yehana okulembera.”—RO. 15:5.
OLWIMPO 94 Kulithamini Neno la Mungu
OKU BUGEKE *
1. Bigeregezo nyabachi abantu ba Yehova bali bahurana?
OLI wahurana ebigeregezo bikomere si? Nkabaga muntu mulebe w’omu chibaga akugayisize. (Yak. 3:2) Changwa nkabaga abantu onakola nabo wala ab’onasoma nabo bali bakushekera mpu bulala oli mukozi wa Yehova. (1 Pe. 4:3, 4) Changwa kandi nkabaga abantu b’omulala gwawe bali bachihangana kukubuza okuhika oku mbuganano, wala okubwira abandi eju y’obwemere bwawe. (Mt. 10:35, 36) Amango m’echigeregezo chikomere bwenene, wakabona nk’ochilekere kukolera Yehova. Aliko wakachizera oku kweri chiro echibazo chakaba chili gurhe oli wahurana, Yehova akuha obwengehe b’okuchilwisa n’emisi y’okuchilembera.
2. Nk’oku olwandiko lwa Waroma 15:4 lushambere, kamaro kachi okusoma Ebiblia kwakarhulerhera?
2 Yehova aliyandikisize emifano omu Biblia eyerekene okuntu abantu barhashinganene balwisize ebigeregezo bikomere. Bulagurhe? Y’eyola mifano erhuyigiriza. Echola chi Yehova ayerekezaga entumwa Paulo ayandike. (Osome Waroma 15:4.) Okusoma ezola ngani kwakarhurhuliriza n’okurhuha obulangalire. Aliko yi rhupata akamaro kazo, rhukwanene kujira binene olekere okusoma Ebiblia konyine. Rhukwanene kuleka amandiko mahindamule amawazo merhu n’okurhuhuma oku murhima. Gurhe si rhwakajira akaba rhuli rhwalonza obwerekezi bwakarhurhabala rhuhime chibazo chilebe? Rwakakolesa zinola njira ene: (1) Okusalira, (2)Okuchapa omu bwenge, (3) Okukengera, na (4) Okukolesa. Rhujage rhwashambala okuntu rhwakakolesa buli njira mw’ezola. * Rhwaja rhwakolesa obola bufundi b’okuyiga omu kulola bichi ebyahikiraga omu kalamo k’Omwami Daudi n’entumwa Paulo byakarhuyigiriza.
1. OSALIRE
Embere ohwanze kusoma Ebiblia, obwire Yehova akurhabale omenye okuntu wakayunguka n’eby’oli wasoma (Olole echifungo cha 3)
3. Bichi okwanene kujira embere ohwanze kusoma Ebiblia, na bulagurhe?
3 (1) Okusalira. Embere ohwanze kusoma Ebiblia, obwire Yehova akurhabale omenye okuntu wakayunguka n’eby’oli wasoma. Omufano, akaba oli walonza ehano lyakakurhabala omenye okuntu wakalwisa echibazo, oheme Yehova akurhabale opate amakanuni omu Chinwa chage makakuyerekeza.—Flp. 4:6, 7; Yak. 1:5.
2. OCHAPE OMU BWENGE
Ochihangane ochape omu bwenge, ochibone nka woyo weshamberwe mw’eyola ngani ye Biblia (Olole echifungo cha 4)
4. Bichi byakakurhabala y’oyunva bwinja ngani ndebe eganirirwe omu Biblia?
4 (2) Okuchapa omu bwenge. Yehova arhuhere obuhashe busomeze bwenene b’okuchapa ebintu omu bwenge. Y’oyunva bwinja ngani ndebe eganirirwe omu Biblia, ochihangane ochape omu bwenge ochibone nka woyo weshamberwe mw’eyola ngani. Ochihangane kubona ebintu oyola muntu akaba ey’aliri abona, onachiyunve okuntu akaba ey’aliri achiyunva
3. OKENGERE
Owaze bwenene oku bi wasomere, n’oku bilolere okuntu eyola myazi ekulolere (Olole echifungo cha 5)
5. Okukengera k’okuderha gurhe, na nka gurhe wakakengera?
5 (3) Okukengera. Okukengera kuli kuwaza bwenene oku bi wasomere na nka gurhe eyola myazi ekulolere. Kwakurhabala ohebe amawazo haguma n’okuyunva bwinja ebi wasomere. Okusoma Ebiblia buzira kukengera, kunali nka kucha ebiraka (bitepe) by’elibaya buzira kubisonera haguma. Okukengera kunali nka kusonera ebyola biraka haguma, lyanaja lyaba libaya linja liyenere. Y’omenya okuntu wakakengera bwinja, wakachibaza n’okushubiza kw’ebila bibazo: ‘Bichi omuntu oganirirwe mw’eyila ngani alijirire y’achirhabala? Nka gurhe Yehova alimurhabere? Nka gurhe nakakolesa ebila nayigire yi bintabala ndembere ebigeregezo?’
4. OKOLESE
Okolese ebi wayigire y’orhola emihigo minja, y’opata murhula gunene, n’okukomeza obwemere bwawe (Olole echifungo cha 6)
6. Bulagurhe rhukwanene kukolesa ebi rhwayigire?
6 (4) Okukolesa. Yesu aliderhere oku nka rhurhakoleseze ebi rhwayigire, eyi rhuli kuguma n’omuntu wayumbakire enju yage oku muchanga. Akolere akasi kakomere, aliko ey’emisi yage eli yafa busha. Bulagurhe? Bulala amango echihusi n’obuhindule byamashurha enju yage, yanahena. (Mt. 7:24-27) Konakuguma, nka rhusalirire, rhukachapa omu bwenge, n’okukengera aliko rhukafunda kolesa ebi rhwayigire, eyi rhuli rhwaheza emisi yerhu oku busha. Amango obwemere bwerhu bwamageregezwa n’ebibazo changwa amalibuko, burhaba eyi bukomere okulembera. Aliko amango rhwamayiga n’okukolesa ebi rhwayigire, rhwarhola emihigo minja omu kalamo, rhwapata omurhula gunene, n’obwemere bwerhu bwakomera. (Isa. 48:17, 18) Bulala rhwamamenya gurhe rhwakakolesa ezila njira ene rhwamamala shambalako, rhujage rhwalola bichi rhwakayiga kugerera ebyahikiraga Omwami Daudi omu kalamo.
BICHI WAKAYIGA KUGERERA OMUFANO G’OMWAMI DAUDI?
7. Ngani ehe eli omu Biblia rhukola ganirako?
7 Hali mwira wawe changwa omuntu w’omulala gwawe wakugayisize si? Akaba ntyo ku bili, wayunguka omu kushuba kuganira oku ngani ya Absalomu, mugala w’Omwami Daudi, wahindamukaga eshe n’okushonda kumunyega obwami.—2 Sa. 15:5-14, 31; 18:6-14.
8. Bichi wakajira yi Yehova akurhabala?
8 (1) Okusalira. Obwire Yehova gurhe oli wachiyunva oku bilolere enjira mbi bakukoleremo, ey’onayibukire eyola ngani omu bwenge. (Zb. 6:6-9) Ntacho omubishage. Oje wabwira Yehova akurhabale obone amakanuni makakuyerekeza amango oli wachihangana kulwisa echola chibazo chikomere.
9. Kavulindi kachi karhengereraga ahagarhi ka Absalomu na Daudi?
9 (2) Okuchapa omu bwenge. Waza oku byabaga mw’eyila ngani, onachape omu bwenge okuntu byalihumire oku Mwami Daudi. Absalomu, mugala wa Daudi akolere myaka minene omu kuchishigiriza oku bantu yi bamusima. (2 Sa. 15:7) Oku Absalomu amabona okw’akasanzi kakala kakwanene, amarhuma abapererezi omu Izraeli yoshi baje kurheganya abantu bamuyemere yewe nka mwami wabo. Amanagala kuyemeza Ahitofeli, muguma w’omu bera na bahanuzi b’oku murhima ba Daudi, aje omu bugamba bwage. Absalomu amachiyimika yenyine nka mwami, amanalonza kufarha n’okuyirha Daudi, wakaba ey’alilwere bwenene mw’akola kasanzi. (Zb. 41:1-9) Daudi amamenya obola bulyalya, amanalibirha omu kurhenga e Yerusalemu. Buzinda, abasoda ba Absalomu bamalwisa abasoda bimana ba Daudi. Abasoda b’ebigamba bamahimwa, na Absalomu mugala wa Daudi ayirhirwe.
10. Gurhe Omwami Daudi akajirire amango aliri omu bigeregezo?
10 Kandi, shub’ochape omu bwenge nka gurhe Daudi akachiyunvirhe amango ebyola byoshi byaliri byamuhikira. Alizigire Absalomu analinihire Ahitofeli. Aliko abola balume bombi bamuhindamuka. Bamugayisa bwenene, chiro n’okulonza kumuyirha. Hali oku Daudi arhakachinihire abandi bera bage n’okuhwanza kuchikebwa oku nabo bajire oku lunda lwa Absalomu. Akahwanzize kuchilwako, n’okulibirha yenyine arhenge omu chihugo. Changwa akavunikire omurhima bwenene. Aliko Daudi arhajiraga chiro chintu chiguma mw’ebyola. Ahubwe, ahima echola chigeregezo chikomere. Gurhe agalaga kujira ntyo?
11. Gurhe Daudi alijirire amango m’ebibazo?
11 (3) Okukengera. Makanuni mahe wakayiga mw’eyila ngani? Oshubize ku chinola chibazo, “Bichi Daudi alijirire y’achirhabala?” Daudi arhajanjabalaga, n’okurhola emihigo y’obuhwinja. Arhanayubahaga bwenene n’okubula bichi akajira eju y’obuba. Ahali h’okujira ntyo, asalira Yehova amurhabale. Anashuba kubwira bera bage bamurhabale. Anajira juba-juba omu kukola eby’alihigirire kujira. Chiro akaba okw’aligayisizwe bwenene, Daudi arhayinjaga achikebwa abandi n’okubabikira omujinya. Aligenderere kulangalira Yehova n’okunihira bera bage.
12. Bichi Yehova alijirire y’arhabala Daudi?
12 Nka gurhe Yehova alirhabere Daudi? Omu kulonzereza emyazi, wabona nka gurhe Yehova alihere Daudi emisi alikenere y’alembera echola chigeregezo. (Zb. 3:1-8; ebinwa by’omurhondero) Yehova aligishire emihigo Daudi arholaga. Analirhabere abera bimana ba Daudi amango baliri balwa yi balanga omwami wabo.
13. Nka gurhe wakayiga Daudi nk’omuntu amakugayisa bwenene mu njira ndebe? (Matayo 18:15-17)
13 (4) Okukolesa. Ochibaze ntya, ‘Nka gurhe nakayiga omufano gwa Daudi?’ Ojire juba-juba omu kumala chibazo chilebe. Nk’okw’ehali zinali, wakakolesa ehano lya Yesu lili mu Matayo sura 18 aho han’aho changwa nka kanuni. (Osome Matayo 18:15-17.) Aliko orhakwanene kurhola emihigo ya juba-juba eshunikirwe n’okuntu oli wachiyunva. Okwanene kusalira Yehova akuhe omurhima gurhulerere n’obwengehe okenere omu kulwisa echibazo chawe. Orhalekaga okunihira bera bawe. Ahubwe, obe juba-juba kuyemera oburhabale bwabo. (Mez. 17:17) Ech’akamaro bwenene, okulikire amahano Yehova akuhere mali omu Chinwa chage.—Mez. 3:5, 6.
BICHI OMUFANO GWA PAULO GWAKAKUYIGIRIZA?
14. Hali zichi zakarhuma waseza obwenge oku lwandiko lwa 2 Timoteo 1:12-16; 4:6-11, 17-22?
14 K’abantu b’omulala gwawe bali bakupinga bulala oli wakolera Yehova? Changwa si, k’olamire omu chihugo balahize mu makasi maguma-maguma m’Abahamirizi ba Yehova wala omu chihugo akasi kerhu kalahizwemo? Akaba ntyo ku bili, wakahirwa omurhima omu kusoma 2 Timoteo 1:12-16; 4:6-11, 17-22. * Paulo ayandikaga amala mandiko amango alishwekerwe.
15. Bichi wakahema Yehova omu sala?
15 (1) Okusalira. Embere y’okusoma amala mandiko, obwire Yehova echibazo ogwerhe, n’okuntu chilicharhuma wachiyunva. Ntacho omubishage. Ahola wanaja wahema Yehova akurhabale orhegere amakanuni mali omu ngani elolere ebigeregezo Paulo ahuranaga makurhabala omenye okuntu okwanene kulwisa echibazo oli wahurana.
16. Bichi byahikiraga Paulo?
16 (2) Okuchapa omu bwenge. Ochape omu bwenge bwawe n’okuchiheba ahali ha Paulo. Ashwekerwe m’obulegule omu pirizo ye Roma. Arhali b’oburhanzi ashwekwa, aliko lero amenyere okw’ali hofi kuyirhwa. Baguma omu bera bage bamulekere, anayunvire achokere (arhamire) bwenene.—2 Ti. 1:15.
17. Gurhe Paulo akajirire amango aliri omu bibazo?
17 Paulo akachisezeze oku kalamo kage ka mira, n’okuwaza oku nk’arhabaga Mukristu w’obushiru, arhakashwekerwe. Akabikiire omujinya abalume b’omu Asia bamulekaga, akanalekere kunihira abandi bera aliyorhene. Aliko Paulo arhajiraga ntyo. Bichi byamurhabalaga agenderere kuchizera oku bera bage bakagenderere kubera bimana embere zage, n’oku Yehova akamuhembere?
18. Gurhe Paulo alijirire omu chigeregezo ahuranaga?
18 (3) Okukengera. Oshubize ku chinola chibazo: “Gurhe Paulo alijirire y’achirhabala?” Chiro akaba okw’aliri hofi kufa, Paulo arhayibagiraga oku kuli kw’akamaro bwenene okulerhera Yehova obukuze. Anagenderera kuwaza gurhe akaheba abandi omurhima. Alilangalire Yehova omu kugenderera kusalira. (2 Ti. 1:3) Ahali h’okugenderera kuwaza ku balala bamulekaga, ayerekana shukurani nene oku burhabale b’obuzigire bera bage bamurhabalagamo oku bwimana mu njira zilebe. Oku bwindi, Paulo agenderera kuyiga Echinwa cha Mungu. (2 Ti. 3:16, 17; 4:13) Ech’akamaro bwenene, alichizerere loshi oku Yehova na Yesu bamuzigire. Barhamujahikaga, bakanamuhembere eju y’akasi kage akolaga oku bwimana.
19. Nka gurhe Yehova alirhabere Paulo?
19 Yehova abaga akengwise Paulo okw’akahurene ebigeregezo eju y’okuba Mukristu. (Mdo. 21:11-13) Nka gurhe si Yehova alirhabere Paulo? Alishubize oku masala mage, hanagera ebisanzi amuha emisi. (2 Ti. 4:17) Paulo alinihizwe okw’akapatire oluhembo abag’akolere bwenene ntyo. Kandi Yehova alikoleseze abera bimana ba Paulo bamuhe oburhabale alikenere.
20. Nk’oku olwandiko lwa Waroma 8:38, 39 lushambere, nka gurhe wakayiga omufano gwa Paulo?
20 (4) Okukolesa. Ochibaze, ‘Gurhe nakayiga omufano gwa Paulo?’ Kuguma na Paulo, rhukwanene kuyibuka oku nerhu rhwalibuzwa eju y’obwemere bwerhu. (Mk. 10:29, 30) Yi rhugenderera kubera bimana embere za Yehova amango rhugwerhe ebibazo, bihemere rhugenderere kumulangalira omu kumusalira n’okuyiga Echinwa chage oku kahunda. Rhunakwanene kuyibuka buli mango oku chintu chiguma omu bintu by’akamaro rhwakajira, kuli kulerhera Yehova obukuze. Rhuchizere oku Yehova arhakaf’arhujahikire chiro n’ehityu, n’oku nta chintu omuntu akajira y’amubuza arharhuzigiraga.—Osome Waroma 8:38, 39; Ebr. 13:5, 6.
EBY’OMUFANO GW’ABANDI BANTU BASHAMBERWE OMU BIBLIA GWAKAKUYIGIRIZA
21. Bichi byarhabalaga Aya na Hector bahime ebibazo balihurene?
21 Chiro rhwaba rhuli omu hali zili gurhe, rhunapata emisi kugerera emifano y’abantu bashamberwe omu Biblia. Omufano, painiya muguma oyirikirwe Aya w’omu Japon, aderhere okw’engani ya Yona yamurhabere ahime obuba aligwerhe b’okuhubiri oku mugarogaro. Omufano gwa Rutu gwarhabere murhabana muguma oyirikirwe Hector w’omu Indonesia ogwerhe abazere barhali bakozi ba Yehova, ayige eju ya Yehova n’okumukolera.
22. Bichi byakakurhabala y’oyunguka bwenene n’edrame ze Biblia, changwa n’emyazi ekulikirene “Rhuyige Obwemere Bwabo”?
22 Ngahe si wakapata emifano ye Biblia yakakuheba emisi? Amavideo merhu, amadrame m’okuyunviriza n’emyazi ekulikirene “Rhuyige Obwemere Bwabo” byakakurhabala kuyunva bwinja engani zili omu Biblia. * Embere olole, oyunvirize, changwa osome ezola ngani zigwerhe emyazi yalonzezwe bwinja, obwire Yehova akurhabale opate emyazi y’akamaro wakakolesa. Ochape omu bwenge, anabe nka woyo weli oyola muntu oganirirwe bwenene mw’eyola ngani. Owaze bwenene oku by’abola bakozi bazigirwa ba Yehova bajiraga, n’okuntu abarhabalaga bahime ebibazo byabo. Onaje wakolesa eyola myazi omu hali yawe. Obwire Yehova koko oku burhabale ali agenderera kukuha. Onayerekane ok’osimisizwe n’obola burhabale, omu kulola gurhe wakaheba abandi omurhima n’okubarhabala.
23. Nk’oku olwandiko lwa Isaya 41:10, 13 luyerekene, bichi Yehova alaganyize okw’arhujirira?
23 Akalamo mw’elila gulu lirhegekerwe na Shetani kadarhabere bwenene, hakanagera ebisanzi rhwayunva karhugambire. (2 Ti. 3:1) Aliko rhurhakwanene kuva rhwayunva rhulagire, changwa mpu rhuyubahe. Yehova amenyere ebibazo rhuli rhwahurana. Amango rhukenere oburhabale, arhulaganyize okw’arhufarha n’okuboko kwage k’okulyo. (Osome Isaya 41:10, 13.) Rhuchizerere oku Yehova arhurhabala, n’okw’Amandiko marhuha emisi rhukenere y’okulembera buli chibazo.
OLWIMPO 96 Kitabu cha Mungu Ni Hazina
^ mus. 5 Ngani zinene zili omu Biblia ziyerekene oku Yehova anazigira abakozi bage, anabarhabala mu buli chigeregezo bakahurana. Gunola mwazi gwayerekana nka gurhe wakajira elyawe-lyawe funzo lye Biblia lyakakurhabala oyunguke n’engani oli wasoma omu Biblia.
^ mus. 2 Ezola njira ene z’okuyiga ziyerekenwe hanola, zili ziguma omu njira wakakolesa. Wakabona ezindi njira z’okuyiga Ebiblia omu Musaada wa Kutafuta Habari kwa Ajili ya Mashahidi wa Yehova omu rhwe liderhere “Ebiblia” n’omu nkingo ederhere “Osome onayunve Ebiblia.”
^ mus. 14 Mumenye mwasoma amala mandiko amango m’enyigirizo z’Omunara g’Omulanzi z’echibaga.
^ mus. 22 Olole echigabi “Rhuyige Obwemere Bwabo—Balume n’Abakazi Baganirirwe omu Biblia” oku jw.org. (Ofungule MAFUNDISHO YA BIBLIA > IMANI KATIKA MUNGU.)
