1-2. Inde wakarhabala omwanafunzi we Biblia ajire amaja-mbere kuhikira obubatizo?

MWALI-WERHU oyirikirwe Amy olamire omu Fiji aderhere ntya: “Naliri nasima ebi naliri nayiga omu funzo lyani lye Biblia. Nalimenyere oku bili by’okuli. Aliko nahwanzaga bona oku bimpemere mpindamuke n’okujira amaja-mbere kuhikira obubatizo, amango nahwanzaga okubuganana na bene-berhu na bali-berhu.” Ogula mufano gwa Amy gurhuyigirize obula bukweri bw’akamaro: Omwanafunzi we Biblia akagenderera kujira amaja-mbere kuhikira obubatizo, amango ali apata oburhabale burhengerere oku bandi omu chibaga.

² Buli muhubiri akarhabala oku maja-mbere m’echibaga. (Efe. 4:16) Painiya muguma oyirikirwe Leilani olamire omu Vanuatu, ashambere ntya: “Banaderha oku ‘omwana aba wa boshi.’ Intyo ku binali oku bilolere akasi k’okujira abanafunzi. Bihemere buli muntu omu chibaga arhabale y’omuntu mulebe ayiga okuli.” Abazere, abandi bantu b’omulala, abera n’abalimu b’oku masomo, boshi banarhabala omu kukuza omwana. Banajira ntyo omu kuheba omwana omurhima n’okumuyigiriza ebintu by’akamaro. Konakuguma, abahubiri boshi bakahanula, bakaheba omurhima, n’okuyereka abanafunzi be Biblia omufano gwinja, n’echola chabarhabala bajire amaja-mbere kuhikira obubatizo.​—Mez. 15:22.

3. Bichi ebinwa Ana, Dorin, na Leilani baderhere bikuyigirize?

³ Bulagurhe omuhubiri oli waongoza efunzo lye Biblia akwanene asimiswe n’oburhabale abandi bahubiri bakaha omwanafunzi? Yunva ebi Ana, painiya w’omu Moldova aderhere: “Biba bikomerere muntu muguma okuyenezeza omwanafunzi we Biblia byoshi  alagirire amango amarhondera kujira amaja-mbere.” Dorin, painiya ominuzize oli wakolera mw’echola chihugo chen’echola, naye aderhere ntya: “Abandi bahubiri banazigana kuderha echintu chinahuma omwanafunzi oku murhima bwenene, namb’eyintakafa nawazize chiro kw’echola chintu.” Leilani naye ayerekene eyindi mpanvu yakarhuma rhwayunva rhusimire amango abandi bali barhabala. Aderhere ntya: “Obuzigire n’okumushagalukira, byakamurhabala arhegere olubaga lwa Yehova.”​—Yoh. 13:35.

4. Bichi rhwaganirira mu gunola mwazi?

⁴ Aliko hali oku wakachibaza ntya: ‘Bichi nakajira yi ntabala omwanafunzi we Biblia, chiro akaba arhali nye mwalimu wage?’ Rhushambalage oku by’omuntu akajira amango amaherekeza owabo oku funzo lyage lye Biblia, n’ebi rhwakajira amango omwanafunzi we Biblia amarhondera kuhika oku mbuganano. Rhwashuba kubona nka gurhe abashamuka bakarhabala abanafunzi be Biblia bajire amaja-mbere kuhikira obubatizo.

5. Kasi kachi ogwerhe amango wamaherekeza owindi muhubiri oku funzo lyage lye Biblia?

⁵ Amango m’efunzo lye Biblia, omwalimu y’egwerhe kasi kanene k’okurhabala omwanafunzi ayunve bwinja Echinwa cha Mungu. Akaba omwalimu akubwirire omuherekeze, okwanene ochibone woyo w’enyine nka murhabazi. Akasi kawe kali k’okumurhabala. (Muh. 4:9, 10) Ahanene, bichi wakajira omu kurhabala y’efunzo lye Biblia ligera bwinja?

6. Amango wamaherekeza owindi muhubiri oku funzo, nka gurhe wakakolesa akanuni kabonekene omu Mezali 20:18?

⁶ Orheganye ebi mwajayiga. Ech’oburhanzi, obwire omwalimu akubwire bigeke eju y’omwanafunzi. (Osome Mezali 20:18.) Wakamubaza ntya: “Bichi omenyere k’oyola mwanafunzi we Biblia? Myazi mihe mwayiga naye? Bichi osimire omwanafunzi wawe ayige kugerera efunzo lya zene? Ka hali echintu nkwanene changwa nta kwanene kujira changwa kuderha amango m’efunzo? Nka gurhe nakaheba omwanafunzi omurhima ajire amaja-mbere?” Kweri, omwalimu arhakubwira chiro n’akatyu omwazi gw’esiri oku bilolere omwanafunzi, aliko eby’akubwira, byakarhabala bwenene. Misiyonere muguma oyirikirwe Joy anaganira kw’ebyola bintu haguma n’abanamuherekeza oku funzo lye Biblia. Ashambere ntya: “Eyola nganiro enarhabala omperekeze asimiswe n’omwanafunzi, anamenye bichi akaderha y’amurhabala.”

7. Bulagurhe okwanene kurheganya ebi mwayiga amango wamaherekezana oku funzo?

⁷ Nka bamakubwira oherekezane oku funzo, kwakaba kwinja orheganye emyazi mwajayiga. (Ezr. 7:10) Mwene-werhu Dorin rhwabaga rhwashambereko, aderhere ntya: “Nansima amango omperekeze arheganyize ebi rhwayiga. Amango amajira ntyo, anaderha ebinwa byakarhabala omwanafunzi.” Kandi, omwanafunzi abona oku mwalichirheganyize bwinja mwembi, n’ogola  gwamubera mufano gwinja. Chiro akaba oku orhagala kurheganya byoshi mwayiga, olonze akasanzi k’okubigeza mw’esu y’obika amawazo makulu omu bwenge.

8. Gurhe wakajira y’oderha eby’akamaro omu sala amango muli mwayiga n’omwanafunzi we Biblia?

⁸ Esala chili chigabi ch’akamaro oku funzo lye Biblia, che chirhumire obe wawaza oku biwakaderha omu sala nk’omwalimu ayinjire kukubwira osalire. Ahola waja wagala kuderha ebintu by’akamaro omu sala. (Zb. 141:2) Hanae, olamire omu Japon achiyibukire amasala mwali-werhu waliri waherekeza mwalimu wage we Biblia aliri asalira. Aderhere ntya: “Nalema nayunva kangana gurhe ali mwira okomere wa Yehova, na nalonza mbe kuguma naye. Na nayunva oku anzigire amango ayinjaga aheba ezino lyani omu masala mage.”

9. Nk’oku olwandiko lwa Yakobo 1:19 luyerekene, bichi wakajira y’oyerekana ok’oli muherekezi mwinja oku funzo lye Biblia?

⁹ Orhabale omwalimu amango m’efunzo. “Painiya ominuzize oyirikirwe Omamuyovbi olamire omu Nigeria aderhere ntya: “Omuherekezi mwinja anayunviriza amango m’efunzo, anaderha ebinwa by’akamaro, aliko arhakwanene kuderha binene. Bulala amenyere oku omwalimu y’ekwanene kuderha binene.” Nka gurhe wakamenya akasanzi n’okuntu wakaderha amango m’efunzo? (Mez. 25:11) Oyunvirize bwinja-bwinja amango omwalimu n’omwanafunzi bali baganira. (Osome Yakobo 1:19.) Ahola yi waja wagala kurhabala omu kasanzi kakwanene. Kweri, okwanene kurhanga kuwaza embere oderhe. Omufano, orhakwanene kuderha binene, orhakwanene kucha omwalimu akalimi, changwa mp’oganire oku birhapatene n’ebi mulimo. Aliko kugerera binwa bigeke, omufano, changwa echibazo, wakarhabala omu kuhuguza bwinja ewazo lili lyaganirwa. Mango maguma wakabona oku orhagwerhe binene by’okuyongera oku mwazi muli mwayiga. Aliko nk’obwirire omwanafunzi koko, okanamuyereka ok’omulagireko, ahola wanaba ey’oli wamurhabala bwenene kujira amaja-mbere.

10. Nka gurhe ebi wagereremo omu kalamo byakarhabala omwanafunzi we Biblia?

¹⁰ Oderhe oku biwagereremo. Akaba obwene oku byakarhabala omwanafunzi, omubalire oku bugeke nka gurhe wapataga okuli, okuntu wahimaga chibazo chilebe, changwa okuntu wabonaga oburhabale bwa Yehova omu kalamo kawe. (Zb. 78:4, 7) Ebyola byakaba eyi by’omwanafunzi alilagirire mw’akola kasanzi. Ebyola byakakomeza obwemere bwage, n’okumuhira omurhima agenderere kujira amaja-mbere kuhikira obubatizo. Okola kwakanashuba kumuyereka okuntu akahima echigeregezo ali ahurana nacho. (1 Pe. 5:9) Gabriel, olamire omu Brezil, onali painiya zene, ayibukire eby’amurhabalaga amango aliri ayiga Ebiblia. Ashambere ntya: “Amango nayinjaga nayunva ebi bene-berhu bagereremo omu kalamo, namenya oku Yehova anabona ebibazo rhuli rhwahurana. N’akaba baligalire kubihima, nani nakahima ebyani.”

11-12. Bulagurhe rhukwanene kuyegereza oku bushagaluke omwanafunzi we Biblia wahikire oku mbuganano?

¹¹ Y’omwanafunzi we Biblia ajira amaja-mbere kuhikira obubatizo, akwanene ayinj’ahika oku mbuganano z’echibaga oku kahunda, anabone okw’ezola nyigirizo zimugwerhere akamaro. (Ebr. 10:24, 25) Nkabaga omwalimu akamubwira ahike oku mbuganano obwage b’oburhanzi. Amango amayinja, rhweshi rhwakamuheba omurhima agenderere kuhika oku Chumbi ly’Obwami. Nka gurhe rhwakajira ntyo?

¹² Oyegereze omwanafunzi n’obushagaluke. (Ro. 15:7) Nka rhwamarhabala omwanafunzi achiyunve okw’ayegerezwe oku mbuganano, hali oku akasima bwenene agenderere kuhika oku Chumbi ly’Obwami. Buzira kumukoza eshoni, olamuse omwanafunzi n’obushagaluke onamumenyese oku bandi. Orhawazaga okw’agwerhe ow’okumushishikala; oshambale naye bulala mwalimu wage akaba ey’arhazi hika changwa agwerhe binene by’okujira. Oyunvirize bwinja eby’omwanafunzi ali aderha, onamuyereke oku omulagireko. Nka gurhe okuyegereza omwanafunzi n’obushagaluke kwakamurhabala? Tala omufano gwa Dmitrii, wabatizwaga hamagera myaka migeke onakola ali mugwasi w’akasi. Aderhere ntya oku bilolere amango ahikaga oku mbuganano ob’oburhanzi: “Mwene-werhu muguma ambona nyumangire embuga we Chumbi ly’Obwami eyi ndinalingiriza n’obuba abamperekeza omu Chumbi. Banene bayinja kundamusa. Ebyola byalinsomeze bwenene. Nayunva nsimire bwenene, ntakanabagire rhukalema rhwajira embuganano buli lusiku omu boso. Nta handi naliza kubona ebili nk’ebyola.”

13. Nka gurhe oborhere bwawe bwinja bwakarhabala omwanafunzi we Biblia?

¹³ Oyerekane omufano gwinja. Oborhere bwawe bwakarhabala omwanafunzi we Biblia ayemere bwinja oku rhuli Bakristu b’okuli. (Mt. 5:16) Vitalii, oli wajira akasi k’obupainiya omu Moldova, aderhere ntya: “Nalolereza okuntu abandi omu chibaga baba balamire, okuntu bawaza, n’oborhere bwabo. Ebyola byanyemeza oku Abahamirizi ba Yehova ly’edini ly’okuli.”

14. Nka gurhe omufano gwawe gwakarhabala muntu mulebe agenderere kujira amaja-mbere?

¹⁴ Embere omwanafunzi abatizwe, akwanene akolese eby’ali ayiga. Birhaba biyoroheze okujira ntyo. Aliko amango omwanafunzi amabona enyungu oli wapata omu kukolesa amakanuni me Biblia omu kalamo, naye akayunva asimire akuyige. (1 Ko. 11:1) Yunva omufano gwa Hanae rhwabaga rhwaderhereko oku burhanzi. Ashambere ntya: “Buli mango, bene-berhu na bali-berhu baliri bandekera omufano gwinja gw’ebintu naliri nayiga kukola. Namenya okuntu nakalema naheba abandi omurhima, okubababalira, n’okubayereka obuzigire. Bakazaga zigana kuderha abandi bwinja. Nayunva nsimire mbayige.”

15. Nka gurhe olwandiko lwa Mezali 27:17 lwakarhurhabala rhumenye bulagurhe kuli kwinja rhujire obwira haguma n’omwanafunzi we Biblia, oku ali agenderera kuhika oku mbuganano?

 ¹⁵ Ojire obwira haguma n’omwanafunzi. Ok’omwanafunzi ali agenderera kuhika oku mbuganano, ogenderere okumuyereka ok’omulagireko. (Flp. 2:4) Oyinje waganira haguma naye. Wakamubwira okuntu osimire bwenene okubona gurhe ali ajira amaja-mbere, wakanashuba mubaza eju y’efunzo lyage lye Biblia, omulala gwage, n’akasi kage. Aliko omenye wakamubaza ebibazo byakamukoza eshoni. Eyola nganiro yarhuma obwira bwenyu bwakomera. Amango wamaba mwira w’omwanafunzi, wamurhabala ajire amaja-mbere kuhikira obubatizo. (Osome Mezali 27:17.) Hanae akala ali painiya w’oku kahunda. Aderhere ntya oku bilolere amango arhonderaga kuhika oku mbuganano: “Oku ndi nagenderera kujira abera omu chibaga, narhondera okugwarha enyorha y’okuhika oku mbuganano n’okujako chiro n’amango naliri nachiyunva nduhire. Naliri nasima okuba haguma na bera bani bahyahya, n’okola kwantabala ndekane n’abera naligwerhe barhali bakolera Yehova. Nahwanza sima kuyegera Yehova bwenene n’okuyegera bene-berhu na bali-berhu. Nava nahigirira okubatizwa.”

16. Bichi bindi wakajira y’orhabala omwanafunzi we Biblia achiyunve bwinja omu chibaga?

¹⁶ Oku omwanafunzi y’agenderera kujira amaja-mbere n’okuhindamula bintu biguma omu kalamo kage, omurhabale achiyunve oku agwerhe ech’amalire omu chibaga. Wakajira ntyo omu kuba muntu w’okuyegereza abandi. (Ebr. 13:2) Denis olamire omu Moldova ayibukire amango aliri ayiga Ebiblia, aderhere ntya: “Mango manene, bene-berhu baliri bampamagala nyono na mukani rhugeze ebisanzi haguma nabo. Baliri barhubwira okuntu babwene Yehova ali abarhabala. Ebyola byarhuheba omurhima. Ebyola bisanzi byaliri byarhurhabala rhubone oku bihemere rhukolere Yehova, n’oku rhukajira ntyo, rhwalama akalamo kenja.” Amango omwanafunzi we Biblia amaba muhubiri, wakamubwira mugende naye oku mahubiri. Mwene-werhu muguma oyirikirwe Diego w’omu Brezil, aderhere ntya: “Bene-berhu banene baliri bambwira ngende nabo omu mahubiri. Eyola yaliri njira y’okubamenya bwinja-bwinja. Oku naliri nagenderera kujira ntyo, nayiga binene na nayunva nyegerere bwenene Yehova na Yesu.”

17. Nka gurhe abashamuka bakarhabala abanafunzi be Biblia?

¹⁷ Ogeze ebisanzi haguma n’abanafunzi be Biblia. Bashamuka, nka muyerekere abanafunzi obuzigire n’oku mubalagireko, mwanabarhabala kujira amaja-mbere kuhikira obubatizo. Muyinje mwashambala n’abanafunzi be Biblia buli mango oku mbuganano. Babona oku kweri mubalagireko nka mulemere mwayibuka amazino mabo, ahanene amango bamarhondera  kushubiza oku mbuganano. Olonze akasanzi k’okugenda n’abandi bahubiri amango bamaja kuongoza amafunzo. Mugwerhe binene mwakarhabala m’omwanafunzi we Biblia kulusha nk’oku muwazize. Painiya muguma oyirikirwe Jackie olamire omu Nigeria, aderhere ntya: “Banafunzi banene baliri basomerwa amango baliri bamenya oku mwene-werhu omperekeze kw’eyola funzo ali mushamuka. Muguma mu abola banafunzi aliderhere ntya: ‘Pastere werhu arhakajira chiro n’ehityu ebili nk’ebyola. Analambagirira abachire bonyine, n’ahanene nka hali echi bamuha!’” Oyola mwanafunzi we Biblia akala ali ahika oku mbuganano.

18. Nka gurhe abashamuka bakakola bwinja akasi kabo babahere kayerekenwe omu lwandiko lwa Matendo 20:28?

¹⁸ Okoomeze onahebe abalimu be Biblia omurhima. Bashamuka, mugwerhe akasi k’akamaro k’okurhabala bene-berhu na bali-berhu babe bahubiri na balimu benja be Biblia. (Osome Matendo 20:28.) Nka mwene-werhu changwa mwali-werhu amayunva eshoni z’okuongoza efunzo onaliho, wakayiga n’oyola mwanafunzi olola lusiku. Jackie rhumalire kuderhako ashambere ntya: “Abashamuka baliri bamperekeza buli mango oku mafunzo mani me Biblia. Amango naliri nabuganana ebibazo omu kuongoza efunzo, baliri bampa amahano m’okuntabala.” Abashamuka bagwerhe binene bakajira omu kuheba abalimu be Biblia omurhima yi bapata obushiru b’okugenderera kuyigiriza. (1 Te. 5:11) Jackie ayongerere ntya: “Inanyunva nsimire bwenene amango abashamuka banampeba omurhima n’okumbwira oku babwene akasi kakomere ndi nakola n’oku kali ka kamaro. Ebinwa nk’ebyola bina ntuliriza kuguma n’egopa ly’amenji maganyire omuntu ananywa oku zuba linene. Ebinwa byabo binja binarhuma nahwanza bona oku ndi najira akasi kenja oku mafunzo mani me Biblia, n’okushuba rhuma nagwarha mwishingo gunene.”​—Mez. 25:25.

19. Mwishingo nyabachi rhwakagwarha rhweshi haguma?

¹⁹ Chiro akaba oku nta funzo rhuli rhwaongoza zene, rhwakanachirhabala muntu mulebe ahikire obubatizo. Nka rhurheganyize ebi rhwaderha bwinja, rhwakarhabala omwalimu we Biblia amango m’efunzo buzira kuderha binene. Rhwakaba bera b’abanafunzi amango bamahika oku Chumbi ly’Obwami, rhwakanabayereka omufano gwinja bakakulikira. N’abashamuka baheba omurhima abanafunzi be Biblia omu kugeza akasanzi haguma nabo n’abalimu omu kubakoomeza n’okubabwira koko. Kweri, rhugwerhe mwishingo gunene amango rhwamamenya oku rhugwerhe echi rhwakajira omu kurhabala muntu mulebe chiro chaba chigeke y’azigira n’okukolera Yehova.