MWAZI G’OKUYIGA 10
Bulagurhe Okwanene Kubatizwa?
“Muleke buli muguma wenyu abatizwe.”—MDO. 2:38.
OLWIMPO 34 Nitatembea kwa Uaminifu-Mushikamanifu
OKU BUGEKE a
1-2. Bichi binazagana kurhengerera amango abantu bamabatizwa, na bichi okwanene kuwazako?
KA WACHIGERERE kubona echigusho ch’abantu bachirheganyize kubatizwa? Waliyunvirhe bagwerhe emilenge y’obwizere amango baliri bashubiza ku bibazo bibiri embere babatizwe. Wabona abantu m’omulala gwabo na bera babo bagwerhe obusiime bwenene. Amango obona ababatizwa barhenga omu menji, wayunva abantu bakubira bwenene, wanabona obusiime bunene baligwerhe omu malanga mabo. Buli boso, ebihumbi by’abantu banahaana akalamo kabo emwa Mungu n’okubatizwa n’okuba Bahamirizi ba Yehova.
2 Gurhe si woyo? Akaba oli wawaza oku nawe wakabatizwa, oli muntu w’akamaro bwenene mu linola gulu lya Shetani bulala “oli walonza Yehova.” (Zb. 14:1, 2) Gunola mwazi gwarheganyizwe ku mweshi mube misole changwa bashaja. Aliko kunabalala mu rhwabo babatizwe mira, bashondere kukomeza omuhigo gwabo g’okuhigirira kukolera Yehova esiku n’amango. Bobola, lekaga rhushambale ku mpanvu esharhu omu mpanvu zinene zirhuma rhwakolera Yehova.
OSIIME OBUKWERI N’OKUNALI
Shetani amazingisa ezino lya Yehova omu bihumbi by’emyaka anagenderere kujira ntyo (Olole echifungo cha 3-4)
3. Bulagurhe abakozi ba Yehova banasiima obukweri n’okunali? (Zaburi 119:128, 163)
3 Yehova ahemere abantu bage “basiime obukweri.” (Zek. 8:19) Yesu alibwirire abanafunzi bage bagenderere kukulikiranya okunali. (Mt. 5:6) K’okuderha oku, birhuhemere rhugwarhe nyorha enene y’okujira eby’okunali, ebinja, binachere omu masu ma Mungu. K’onasiima okunali? Rhuchizezere oku onasiima okunali. Onashomba obubeshi n’ebintu byoshi bibi bwenene. (Osome Zaburi 119:128, 163.) Omuntu onabesha anaba eyali ayiganya Shetani, murhegesi walinola gulu. (Yoh. 8:44; 12:31) Muguma omu mihigo ya Shetani kuli kuzingisa ezino lichesibwa lya Yehova Mungu. Shetani arhonderaga kuyeneza obubeshi oku bilolere Mungu kurhenga amango abaga chigamba omu Bustani ye Edeni. Alilonzeze kushumika abantu bawaze oku Yehova ali murhegesi w’obwikazize onayiima abantu ebintu binja. (Mwa. 3:1, 4, 5) Obubeshi bwa Shetani oku bilolere Yehova, bwagenderere kubihya obwenge n’emirhima y’abantu. Amango abantu bamachishoga ‘okurhasiima obukweri,’ Shetani akabashumika bajire ebintu byoshi birhali by’okunali n’ebintu bibi bwenene.—Ro. 1:25-31.
4. Nka gurhe Yehova ayerekene oku ali “Mungu w’obukweri”? (Olole n’efoto.)
4 Yehova ali “Mungu w’obukweri,” kandi anayigiriza oku bulonza balala bamuzigiire. (Zb. 31:5) Omu kujira ntyo, anabarhabala yi barhachigenderera kulambagira omu bubeshi bwa Shetani. Yehova anayigiriza abantu bage babe banihirwa banabe banya-kunali. Echola chinarhuma baba bantu bachikengeseze bwenene n’okugwarha omurhula gwa ndani. (Mez. 13:5, 6) Nawe achigerere kukujirira ntyo oku wanaliri wayiga Ebiblia? Wayigire oku buli mango enjira zage ziba zinja bwenene oku bantu boshi kuhebamo nawe bwawe-bwawe. (Zb. 77:13) Bobola, olonzeze kujira ebi Mungu aderhere oku bili binja. (Mt. 6:33) Olonzeze kuderhera okuli, n’okuyerekana oku ebi Shetani ashobekaga Yehova bili by’obubeshi. Nka gurhe wakajira ntyo?
5. Nka gurhe wakashigikira obukweri n’okunali?
5 Wakachishoga enjira y’akalamo ederhere ntya: “Nakabulire hale obubeshi bwa Shetani, aliko nchishwekere oku bukweri. Ndozeze Yehova abe Murhegesi Wani Mukulu Bwenene, nandozeze kujira eby’aderhere oku bili by’okuli.” Nka gurhe onajira ntyo? Oyegere Yehova kugerera esala n’okuhaana akalamo kawe emwage naho wanajawayereka abantu boshi oku wachihaanire emwage omu kubatizwa. Okusiima obukweri n’okunali eli mpanvu y’akamaro yakarhuma omuntu achishoga kubatizwa.
OZIGIIRE YESU KRISTU
6. Olwandiko lwa Zaburi 45:4 lukuhere mpanvu zihe z’okuzigira Yesu Kristu?
6 Bulagurhe onazigira Yesu Kristu? Hala mpanvu ziguma z’akamaro zili omu Zaburi 45:4. (Osome.) Yesu alizigiire okuli, obwirhohye, n’okunali. Akaba nawe osiimire okuli n’okunali, biyunvikene oku nawe ozigiire Yesu Kristu. Waza oku kuntu Yesu aliri aderhera n’obushiru obukweri n’okunali. (Yoh. 18:37) Aliko si, kangana gurhe Yesu alihebere abantu omurhima babe berhohye?
7. Bichi wabwene bikusimisize oku bilolere obwirhohye bwa Yesu?
7 Yesu aliyerekene omufano g’obwirhohye. Omufano, aliri aleka erenge lije emw’Eshe, s’arhali emwage haba nakatyu. (Mk. 10:17, 18; Yoh. 5:19) Nka gurhe onachiyunva amango wamabona okuntu Yesu aliri ayerekana obwirhohye? K’echola chinakushunika ozigire Mugala wa Mungu n’oku muyiganya? Kweri intyo kubili. Bulagurhe Yesu aliri mwirhohye? Bulala alizigiire n’okuyiganya Eshe, oba mwirhohye. (Zb. 18:35; Ebr. 1:3) K’orhakululirwe emwa Yesu wayerekene oku bushinganyanya engeso za Yehova?
8. Bulagurhe rhuzigire Yesu yewe nka Mwami werhu?
8 Rhuzigiire Yesu, yewe nka mwami werhu bulala ali Murhegesi mwinja bwenene. Yehova akoomeze Omugala anamushimika abe Murhegesi. (Isa. 50:4, 5) Kandi owaze oku buzigire b’okuchihaana Yesu ayerekene. (Yoh. 13:1) Yewe nka Mwami wawe, okwanene omuzigire loshi. Afasiriye oku abamuzigire kweri, balala ayirikire bera bage, banayerekana oku bamuzigiire omu kukenga amarhegeko mage. (Yoh. 14:15; 15:14, 15) Luli lukengo lunene okuba mwira wa Mugala wa Yehova!
9. Nka gurhe obubatizo bw’Abakristu buli kuguma n’obubatizo bwa Kristu?
9 Liguma omu marhegeko mage liderhere oku abanafunzi bage bakwanene kubatizwa. (Mt. 28:19, 20) Aliyerekene omufano. Mu njira ziguma obubatizo bwage burhalikuguma n’obw’abanafunzi bage. (Olole echisanduku “ Ngahe Obubatizo bwa Yesu n’obw’Abanafunzi Bage Bilekene?”) Aliko buli kuguma omu zindi njira. Amango abatizwa, Yesu achihaana y’ajira obulonza bwe Eshe. (Ebr. 10:7) Konakuguma, abanafunzi ba Kristu nabo banabatizwa omu kuyereka abantu boshi oku bahaanire akalamo kabo emwa Yehova. Barhachiseza akalamo kabo omu kujira obulonza bwabo, saliko omu kujira obulonza bwa Mungu. Naho banahwanza kukulikira olwiganyo lwa Waliha wabo.
10. Bulagurhe obuzigire ku Yesu bwakakushunika obatizwe?
10 Wayemerere Yesu Mugala w’echinege wa Yehova ey’ashimikire abe Mwami y’arhurhegeka. Obwene oku ali mushinganyanya, ali mwirhohye, anayiganyire Eshe oku bushinganyanya. Wayigire oku ali lisize abaliri nzara, arhuliriza abalivunikire omurhima, anafumya chiro n’abalwala. (Mt. 14:14-21) Wachibwenere okuntu ali ayerekeza echibaga zene. (Mt. 23:10) Kandi omenyere oku nj’ajira binene omu mango mayinjire yewe nka Mwami w’Obwami bwa Mungu. Gurhe wakayerekana oku omuzigiire? Omu kukulikira olwiganyo lwage. (Yoh. 14:21) Wakahwanza kujira ntyo omu kuhaana akalamo kawe emwa Yehova n’okubatizwa.
OZIGIIRE YEHOVA MUNGU
11. Mpanvu nguma ehe y’akamaro bwenene erhuma omuntu abatizwa, na bulagurhe oderhere ntyo?
11 Mpanvu nguma ehe y’akamaro bwenene erhuma omuntu abatizwa? Yesu aliyerekene erhegeko lihe likulu bwenene omu marhegeko ma Mungu, amango aderha ntya: “Okwanene ozigire Yehova Mungu wawe n’omurhima gwawe goshi, n’obwenge bwawe boshi, n’emisi yawe yoshi.” (Mk. 12:30) K’ebyola binwa biyerekene kangana gurhe ozigiire Mungu?
Yehova ye Shoko ya buli chintu chinja wachigerere kusiimira n’echinjiwasiimira amango mayinjire (Olole echifungo che 12-13)
12. Bulagurhe onazigira Yehova? (Olole n’efoto.)
12 Hali mpanvu zinene bwenene zirhumire rhwazigira Yehova. Omufano, wahikire kumenya oku yewe yeli “Shoko y’akalamo” kandi yewe yenarhuha “buli mpaano nyinja na buli luhembo lushinganyanya.” (Zb. 36:9; Yak. 1:17) Kandi buli chintu rhugwerhe charhengaga emwa Mungu onahaana, onagwerhe obuzigire.
13. Bulagurhe enchungu luli luhembo (mpaano) y’akamaro bwenene?
13 Enchungu eli mpaano y’akamaro bwenene Yehova arhuhere. Bulagurhe rhwakaderha ntyo? Waza oku bwira buli ahagarhi ka Yehova n’Omugala. Yesu aderha ntya: “Darha anzigiire” kandi “nzigiire Darha.” (Yoh. 10:17; 14:31) Obwira bwabo bwaligenderere kukomera bwenene omu mamiliare ye myaka balamire haguma. (Mez. 8:22, 23, 30) Jaga wawaza okuntu byalilumire Yehova oku murhima bwenene amango ayemera Omugala alibuke n’okufa. Yehova azigiire abantu bwenene kuhebamo nawe, kuhika aha haniraga Omugala muzigirwa nka nchungu yi woyo n’abandi mugwarha akalamo k’esiku n’amango. (Yoh. 3:16; Gal. 2:20) Eyola y’empanvu nkulu bwenene erhumire rhwazigira Mungu.
14. Muhigo gwinja bwenene guhe wakarhola omu kalamo kawe?
14 Obuzigire bwawe ku Yehova bwagenderere kukomera ok’onali wagenderera kumenya binene okubi mulolere. Kweri rhwakamuyegera zene n’esiku n’amango. Wakanagala kujira ntyo. Oku buzigire, akuhebere omurhima osimiise omurhima gwage. (Mez. 23:15, 16) Wakajira ntyo kugerera ebinwa n’ebijiro byawe. Okuntu olamire kwayerekana oku kweri ozigiire Yehova. (1 Yoh. 5:3) Ogola g’omuhigo gwinja bwenene wakarhola omu kalamo kawe.
15. Nka gurhe wakayerekana oku ozigiire Yehova?
15 Nka gurhe wakayerekana oku ozigiire Yehova? Ech’oburhanzi, wakaderha esala ly’akamaro bwenene, wanahaana akalamo kawe emwa Mungu muguma yenyine w’okuli. (Zb. 40:8) Naho wanajawayereka abantu boshi oku wahaanire akalamo kawe emwa Mungu omu kubatizwa. Nk’okurhwabonaga oku murhondero gwa gunola mwazi, obubatizo kali kasanzi k’obusiime kandi k’akamaro bwenene omu kalamo kawe. Wanahwanza kulama akalamo kahya-hya, orhachilama oku bulonza bwawe wenyine, si wajawalama omu kujira obulonza bwa Yehova. (Ro. 14:8; 1 Pe. 4:1, 2) Eyola yakabonekana nk’eli simikiro ekomeere, nechi enakomeere kweri. Aliko yakakurhabala olame akalamo kenja orhankalola. Nka gurhe?
16. Bichi Zaburi 41:12 ederhere, Yehova nj’ajirira balala bakoleseze akalamo kabo omu kumukolera?
16 Yehova anahaana bwenene orhankalola. Chiro wamuhereza bingana gurhe, buli mango akuhereza binene bwenene kulusha ebiwamuhaga. (Mk. 10:29, 30) Akuhereza ebintu bisimisize bwenene, emigisho, akalamo kenja chiro na zene mw’elila gulu libihire bwenene. N’ogola guli murhondero konyine. Olola lugenzi wamahwanza omu kubatizwa, lurhaherhe buzinda. Wakagenderera kukolera Darha muzigirwa esiku n’amango. Obuzigire bwawe ahagarhi kawe na Yisho bwakagenderera kukomera, kandi kweri nawe wakalama nk’oku naye analamire k’okuderha, esiku n’amango.—Osome Zaburi 41:12.
17. Bichi wakahereza Yehova arhazigwarha?
17 Amango wamahaana akalamo kawe emwa Yehova n’okubatizwa, ahola eyiwamagwarha olukengo l’okuhereza Yisho echintu ch’akamaro bwenene. Akuhere buli chintu chinja, akasanzi kasimisize, wanasimiire bwenene ebyola bintu orhankalola. Nawe, wakaja wahereza Owalemaga embingu n’egulu, chintu chilebe arhazigwarha, k’okuderha, obulonza bwawe b’okumukolera oku bwimana. (Yob. 1:8; 41:11; Mez. 27:11) Eyola y’enjira nyinja bwenene wakakolesamo akalamo kawe! Nta ngangane, obuzigire bwawe ku Yehova, y’empanvu nyinja loshi yakarhuma wabatizwa.
OLI TAYARI KUBATIZWA?
18. Bibazo bihe wakachibaza?
18 Nka gurhe si wakajawashubiza kw’echila chibazo, Oli tayari kubatizwa? Woyo wenyine wewakashubiza kw’echola chibazo. Aliko wapata oburhabale nka wamachibaza ntya, ‘Bichi nchili nalinga ntabatizwa?’ (Mdo. 8:36) Oyibuke mpanvu esharhu rhwashambalagako. Ey’oburhanzi, ozigiire obukweri n’okunali. Ochibaze ntya, ‘Ka ndozeze kubona amango buli muntu yeshi nj’aderha obukweri n’okujira ebintu by’okunali changwa binja?’ Eyakabiri, ozigiire Yesu Kristu. Ochibaze ntya, ‘Ka ndozeze Mugala wa Mungu abe Mwami wani na ndozeze kukulikira olwiganyo lwage?’ Eyakasharhu, yena y’akamaro bwenene, ozigiire Yehova. Ochibaze ntya, ‘Ka ndozeze kusimisa omurhima gwa Yehova, n’okumusimisa yewe nka Mungu wani?’ Akaba ebishubizo kw’ebyola bibazo ali nechi, bichi bijire byarhuma orhabatizwa, bichi ochili walinga?—Mdo. 16:33.
19. Bulagurhe orhakwanene kugwarha engangane oku bilolere obubatizo? Lerha omufano. (Yohana 4:34)
19 Akaba oli wagangana kubatizwa, owaze oku mufano Yesu akolesaga. (Osome Yohana 4:34.) Obwene oku Yesu alihuzenye okujira obulonza bw’Eshe n’ebilyo. Bulagurhe? Akalyo kali k’akamaro. Yesu alimenyere oku buli chintu choshi Yehova anarhubwira rhujire chinarhulerhera enyungu. Yehova arhakalonza chiro haba n’akatyu rhujire echintu chakarhubabaza. Ka Yehova alonzeze obatizwe? Nechi. (Mdo. 2:38) Naho wanajawachizera oku okukenga erhegeko ly’okubatizwa kwakulerhera enyungu. Akaba orhakagwarha engangane y’okuhonja oku bilyo bilokere bwenene, bulagurhe oli wagangana kubatizwa?
20. Bichi nji rhwaganirako omu mwazi gukukilireho?
20 Bulagurhe bantu baguma banalegama kubatizwa? Banene bakashubiza ntya kw’echila chibazo, “Ntaziba tayari.” Kweri esimikiro yawe y’okuhaana akalamo kawe emwa Yehova n’okubatizwa, y’esimikiro y’akamaro bwenene kulusha zoshi wakarhola. Bobola bihemere ebisanzi, okuwaza bwinja k’ogola muhigo, n’okugwarha obushiru y’omuntu ayeneza ebihemerwe y’abatizwa. Aliko akaba kweri oshondere kubatizwa, bichi wakajira zene omu kuchirheganya? Nji rhwaganira oku chishubizo ch’echola chibazo omu mwazi gukulikireho.
OLWIMPO 28 Rafiki ya Yehova Ni Nani?
a Obubatizo y’entambu y’akamaro bwenene buli mwanafunzi we Biblia akwanene kurhola. Bichi byakashunika omwanafunzi arhole eyola ntambu? Mu chinwa chiguma, buli buzigire. Aliko akwanene kuzigira bichi na nde? Mu gunola mwazi, rhwaganira oku bishubizo by’ebyola bibazo, kandi rhwaganira oku kalamo kali gurhe rhwakagwarha amango rhwamabatizwa n’okuba Bakristu.
