1-2. Akaba orhaza kuba tayari kubatizwa, bulagurhe orhakwanene kuvunika omurhima? (Olole efoto y’oku chiganda.)

 AKABA wakasiima obatizwe, wachihebere h’omuhigo gwinja bwenene. Oli tayari kubatizwa? Akaba obwene ok’oli tayari kubatizwa n’abashamuka bayemerere, omenye wagangana haba n’akatyu kubatizwa omu kasanzi kayinjire. Okajira ntyo wagwarha emigisho omu kasi ka Yehova.

² Aliko si, hali omuntu wachigerere kukubwira k’okenere kushuba kujira amajambere embere y’okubatizwa? Changwa warhegerere echola woyo wenyine? Akaba ntyo kubili, omenye wavunika omurhima. Wakajira amajambere n’okuhikira ogola muhigo gw’akamaro, obe oli musole changwa mushaja.

3. Bichi omurhwali w’okubwami w’Omuetiyopiya abazaga Filipo, na bichi rhwakachibaza? (Matendo 8:36, 38)

³ Osome Matendo 8:36, 38. Omurhwali mukulu w’oku bwani w’Omuetiyopiya abaza Filipo muyeneza-enjili: “Bichi bimbuzize kubatizwa?” Oyola mulume w’Omuetiyopiya alilonzeze abatizwe, aliko si kweri aliri tayari kubatizwa?

4. Nka gurhe Omuetiyopiya aliyerekene okw’ahigirire kugenderera kuyiga?

⁴ Oyola mulume w’Omuetiyopiya “alijire e Yerusalemu kuharamya.” (Mdo. 8:27) Akwanene kuba ey’aliyemerere edini ly’Abahayudi; nta ngangane akwanene kuba ey’aliyigire oku bilolere Yehova kugerera Amandiko machesibwa me Chiebrania. Aliko, aliri tayari kuyiga binene. Bichi Filipo abonaga oyola mukozi w’oku bwami ali ajira amango amubugana omu njira? Aliri asoma  echitabu ch’omuzingo chiyandikirwe m’obulebi bwa Isaya. (Mdo. 8:28) Ebyola byaliri bilyo by’ekiroho bikomere. Oyola mukozi w’oku bwami arhalitoshekere konyine n’enyigirizo z’omusingi; s’aliko alishondere kugenderera kuyiga.

5. Bichi omulume w’Omuetiyopiya ali jirire oku bilolere ebyaliri ayiga?

⁵ Oyola mulume aliri muntu w’enyanya bwenene oku bwami bwa mwami-kazi w’Etiyopiya Kandake; ye “wanaliyimangiire obuhirhi bwage boshi.” (Mdo. 8:27) Alikwanene kuba mulume waligwerhe makasi manene n’engabane z’okukola. Chiro akaba ntyo, alirholere ebisanzi by’okuharamya Yehova. Arhalitoshekere konyine n’ebyaliri ayiga; aliko aliri ayerekana n’ebyayigire kugerera bijiro byage. Bobola aliri ayemera alambagire enjira elehere kurhenga Etiyopiya y’aja kuharamya Yehova oku hekalu ye Yerusalemu. Olola lugenzi lukwanene kuba eyi lwalihemere bisanzi binene n’efuranga, aliko oyola mulume aliyerekene bushiru bunene oku bilolere emparamyo ya Yehova.

6-7. Nka gurhe obuzigire omulume w’Omuetiyopiya aligwerhe ku Yehova bwa gendereraga kukula?

⁶ Oyola Muetiyopiya aliyigire enyigirizo ziguma zihya-hya z’okuli kugerera Filipo. Ziguma muzo zaliderhere oku Yesu ye Masiya. (Mdo. 8:34, 35) Kweri oyola murhwali w’oku bwami alihumirwe oku murhima amango amenya ebi Yesu amujirire. Bichi alijirire amala kumenya ezola nyigirizo? Nk’ashondaga akayorhere mulume okengerwe, oyemerere edini ly’Abayahudi. S’ahubwe, obuzigire bwage ku Yehova n’Omugala bwakomera. Oyola mulume alihumirwe oku murhima amango ayiga n’okuba mwanafunzi wa Yesu omu kuyemera abatizwa. Amango Filipo abonaga ok’oyola mulume aliri tayari, ava amubatiza.

⁷ Nk’okulikire ogola mufano g’omulume w’Omuetiyopiya, wakaba tayari kubatizwa. Nawe wakaderha ntya n’obwizere boshi, “Bichi bimbuzize kubatizwa?” Lekaga rhulole okuntu wakajira ebintu bili nk’ebyo mulume w’Omuetiyopiya ajiraga: Aligenderere kuyiga, akolesa eby’aliri ayiga, n’obuzigire bwage ku Mungu bwagenderera kukula.

8. Bichi olwandiko lwa Yohana 17:3 luderhere okwanene kujira?

⁸ Osome Yohana 17:3. K’ebila binwa bya Yesu bikurhabere kurhola omuhigo g’okuyiga Ebiblia? Intyo kubili ku banene mu rhwabo. Aliko si, ebyola binwa byen’ebyo birhubwirire kandi oku rhugenderere kuyiga si? Nechi. Rhurhankaleka haba n’akatyu ‘kugerera aharhwakumenya, woyo Mungu muguma w’okuli.’ (Muh. 3:11) Nechi nji rhwagenderera kuyiga esiku n’amango. Oku rhunali rhwagenderera kuyiga, kurhwanagenderera kuyegera Yehova.​—Zb. 73:28.

9. Bichi rhukwanene kujira enyuma y’okuyiga enyigirizo z’omusinji ze Biblia?

 ⁹ Amango rhwamahwanza kuyiga oku bilolere Yehova, rhunayiga konyine enyigirizo z’omusinji. Omu maruba mage ayandikiraga Abaebrania, entumwa Paulo aliderhere oku, ezola nyigirizo z’omusinji bili “bintu biyorohere.” Arhaliri asuzagura “enyigiririzo zirhanzi-rhanzi, ziyigirizwa abachirhondera;” s’aliri azihuzanya n’amonka banayonsya akabonjo. (Ebr. 5:12; 6:1) Alihemere Abakristu bagenderere kuyiga arhali enyigirizo z’omusinji zonyine, si n’enyigirizo zikomere bwenene z’omu Chinwa cha Mungu. Ka wakuzize enyorha oku bilolere enyigirizo zikomeere ze Biblia? K’oli tayari kugenderera kukula ekiroho, n’okugenderera kuyiga oku bilolere Yehova n’emihigo yage?

10. Bulagurhe bantu baguma banabona k’okuyiga bikomeere?

¹⁰ Aliko ku banene murhwabo zene, bibakomerere okuyiga. Gurhe woyo onabona okuyiga? Ka walimenyere kusoma n’okugala kuyiga bwinja oku masomo? Ka waliri wasiima kuyiga n’okubona oku wamamenya binene? Changwa si, wabwene oku orhakagala kuyunva ebili omu bitabu? Akaba ntyo kubili, orhali wenyine. Aliko, Yehova akakurhabala. Ali mushinganyanya kandi yena Mwalimu mwinja bwenene kulusha boshi.

11. Nka gurhe Yehova ayerekene oku ali “Mwigiriza wawe Mukulu”?

¹¹ Yehova achiyirikire “Mwigiriza wawe Mukulu.” (Isa. 30:20, 21) Ali mwalimu onalembera, mwinja, onayunva n’abandi. Anabona engeso zinja z’abanayigiriza. (Zb. 130:3) Kandi arharhuhema rhujire haba n’akatyu ebi chubukire obuhashe bwerhu. Oyibuke oku, akuhere empaano nyinja bwenene, k’okuderha, obonko bwawe. (Zb. 139:14) Rhuherhe enyorha yakaburhano y’okuyiga. Omulemi werhu ashondere rhugenderere kuyiga esiku n’amango n’okusiimira kujira ntyo. Bobola bili by’obwengehe ‘oku gwarha nyorha nene’ oku bilolere enyigirizo z’okuli ze Biblia zene. (1 Pe. 2:2) Ochihebere h’emihigo wakahikira, onayinje wasoma n’okuyiga Ebiblia oku kahunda. (Yos. 1:8) Kugerera oburhabale bwa Yehova, wagerera ahawayinja wasiimira okusoma n’okuyinja wayiga binene bwenene oku bilolere Yehova.

12. Bulagurhe rhukwanene kuyiga oku bilolere akalamo ka Yesu n’akasi kage k’okuhubiri?

¹² Oyinje warhola akasanzi oku kahunda k’okuwaza oku kalamo ka Yesu na kasi kage k’okuhubiri. Kuli kw’akamaro rhukulikire bwinja bwinja olwiganyo lwa Yesu akaba rhulonzeze kukolera Yehova, ahanene mu zinola siku zikomere. (1 Pe. 2:21) Yesu aliderhere buzira kubisha oku bilolere ebibazo abanafunzi bage bakahurene nabyo. (Lu. 14:27, 28) Aliko alichizerere oku, abanafunzi bage b’okuli bakagenderere kuyorha bemena emwa Yehova nk’oku naye ajiraga. (Yoh. 16:33) Oyige oku bilolere akalamo ka Yesu, onachihebere h’emihigo y’okumuyiganya omu kalamo kawe ka buli lusiku.

13. Bichi okwanene kugenderera kuhema Yehova, na bulagurhe?

¹³ Obumenyi bonyine burhatosheze. Empanvu erhumire wakenera obumenyi eli okuba, olonzenze kumenya binene oku bilolere Yehova n’okugwarha engeso nk’okumuzigira n’okugwarha obwemere muye. (1 Ko. 8:1-3) Ok’oli wagenderera kuyiga oku bimulolere, wakagenderera kumuhema y’ogwarha bwemere bunene. (Lu. 17:5) Anashubiza bwenene amasala mali nk’amola. Obwemere b’okuli buyumangire oku bumenyi oku bilolere Mungu, bwakurhabala orhole ezindi ntambu.​—Yak. 2:26.

14. Nka gurhe entumwa Petro aliyerekene oku bili by’akamaro bwenene okukolesa ebi rhuli rhwayiga? (Olole n’efoto.)

¹⁴ Entumwa Petro aliyerekene kangana gurhe bili by’akamaro, abanafunzi ba Kristu bagenderere kukolesa ebibayigire. Aganira oku ngani  ya Nowa eli omu Biblia. Yehova abwira Nowa okw’alerha envula y’echihonzi, yakalimbwire abantu babi ba mw’echola chihe. Okumenya konyine oku envula y’echihonzi yayinja, kurhankayokwere Nowa n’omulala gwage. Obwene oku Petro ashambere oku kasanzi embere envula y’echihonzi eyinje “amango esafina yaliri yayumbakwa.” (1 Pe. 3:20) Nechi kweri, Nowa n’omulala gwage baliri bakolesa ebibaliri bayiga oku bilolere Mungu omu kuyumbaka esafina, k’okuderha, ebote nzibu-zibu bwenene. (Ebr. 11:7) Naho Petro ajahuzanya echi Nowa ajiraga n’obubatizo, ayandika ntya: “Obubatizo buhuzenye n’echola, bunabayokola nenyu zene.” (1 Pe. 3:21) Bobola, wakahuzanya eby’oli wajira zene omu kuchirheganya oku bubatizo, n’akasi Nowa n’omulala gwage bakolaga mu myaka minene omu kuyumbaka esafina. Kasi kahe okwanene kujira y’obatayari kubatizwa?

15. Nka gurhe rhwakayerekana oku rhwahungamire ebirhengere oku murhima?

¹⁵ Echintu chirhanzi omu birhukwanene kujira, kuli kuhungama n’omurhima goshi ebyaha byerhu. (Mdo. 2:37, 38) Amango rhwamahungama n’omurhima goshi rhwahindamula loshi akalamo kerhu. Ka wakabulire loshi-loshi ebijiro byoshi binagayisa Yehova, nk’okulama akalamo k’obumaguza, okunywa erhaabi, changwa okukolesa ebinwa bibolere? (1 Ko. 6:9, 10; 2 Ko. 7:1; Efe. 4:29) Akaba orhaza kujira ntyo, ochihangane ohindamuke. Oheme omuntu munayiga naye Ebiblia, changwa abashamuka b’echibaga bakurhabale banakuhereze obwerekezi. Akaba ochili musole onachilamire aha mwenyu, oheme abazere bawe oburhabale b’okulekana n’engeso yoshi-yoshi imbi yakarhuma orhabatizwa.

16. Bichi rhwakajira akaba rhulonzeze kuharamya Yehova oku kahunda?

¹⁶ Kandi kuli kw’akamaro oku gwarha eprograme nyinja y’eby’ekiroho. Ebyola biheberwemo okuja oku mbuganano ze Chikristu n’okuhaana ebishubizo. (Ebr. 10:24, 25) Akaba wayeneze ebihemerwe y’oba muhubiri, oyinje wahubiri oku kahunda. Ok’onali wagenderera kukola kw’akola kasi k’okuyokola akalamo, kuwanagenderera kukasiima. (2 Ti. 4:5) Akaba oli musole onachilamire aha mwenyu, ochibaze ntya: ‘K’abazere bani babananyibusya okuja oku mbuganano changwa omu kasi k’amahubiri? Changwa si inanchiyibusya nyono nyenyine?’ Amango  oli wajira ebyola wenyine buzira kukuyibusya, wanayerekana ok’ogwerhe obwemere, onazigiire Yehova Mungu, n’oku ogwerhe eshukrani oku bintu akuhere. Ebyola “bili bijiro by’obushwekerezi ku Mungu,” empembo rhunahereza Yehova oku bulonza. (2 Pe. 3:11; Ebr. 13:15) Empembo zoshi rhunahereza Mungu oku bulonza zinamusimisa. (Ohuzanye na 2 Wakorinto 9:7.) Rhunajira ntyo bulala binarhusimisa bwenene okuhereza Yehova ebinja bwenene.

17-18. Ngeso ehe y’akamaro yakurhabala ojire amaja-mbere y’ohikira kubatizwa, na bulagurhe? (Mezali 3:3-6)

¹⁷ Ok’oli wagenderera kujira amajambere y’ohikira kubatizwa, wahurana ebigeregezo. Bantu baguma bakakushekera oku bilolere obwemere bwawe buhya-hya; bakakupinga chiro n’oku kulibuza. (2 Ti. 3:12) Nkabaga oli wachihangana oleke kujira chintu chilebe chibi, aliko hali amango wakashuba kuchigalukira. Changwa wakayunva ogwerhe omugayo n’okuyunva nk’orhagala kulembera bulala omuhigo gwawe gubonekene ok’orhakaguhikira. Bichi byakakurhabala kulembera? Engeso nguma y’akamaro, k’okuderha, obuzigire bwawe ku Yehova.

¹⁸ Obuzigire bwawe ku Yehova y’eli ngeso nyinja bwenene, ch’enachintu ch’akamaro ogwerhe. (Osome Mezali 3:3-6.) Obuzigire bukomeere ogwerhe ku Mungu bwakurhabala kuhima ebibazo by’omu kalamo. Ebiblia enazigana kuderha oku bilolere obuzigire bwimana Yehova anayereka abakozi bage. Obola buzigire bwimana buyerekene oku arhakajahika haba n’akatyu abakozi bage, changwa kuleka kubazigira. (Zb. 100:5) Walemerwe okushusho lya Mungu. (Mwa. 1:26) Nka gurhe wakayerekana obuzigire buli nk’obwage?

19. Nka gurhe wakayerekana ok’ogwerhe eshukrani enene oku bintu Yehova akujirire? (Wagalatia 2:20)

¹⁹ Orhondere kugwarha eshukrani. (1 Te. 5:18) Ochibaze ntya buli lusiku, ‘Nka gurhe Yehova anyerekere obuzigire?’ Naho wanaja wamubwira koko omu masala mawe, n’okuderha ebintu binja akujirire. Warhegera oku Yehova akujirire ebintu binja bulala akuzigire. Echola ch’entumwa Paulo ahikiraga kubona oku bilolere Yehova. (Osome Wagalatia 2:20.) Ochibaze ntya, ‘Ka nani indonzeze kumuyereka obuzigire bwani?’ Obuzigire ogwerhe ku Yehova bwakurhabala ogale kuhima amashumi, onagale kulembera ebigeregezo. Bwakushunika ogenderere kuharamya Yehova oku kahunda, n’okuyereka Yisho w’embingu oku omuzigire lusiku oku lwindi.

20. Bichi okwanene kujira y’ohaana akalamo kawe emwa Yehova, na bulagurhe ogola muhigo guli gw’akamaro bwenene?

 ²⁰ Hagera amango, obuzigire ogwerhe ku Yehova bwakushunika oderhe esala liminuzize. Naho wanahaana akalamo kawe emwa Mungu. Oyibuke, amango wamahaana kalamo kawe emwa Yehova, wanamulaganya: ‘Nakukolera omu mango menja n’omu mango amabihire.’ Orhakanajira echola chilagane kabiri. Kweri amango wamahaana akalamo kawe emwa Yehova, ahola eyi wamarhola esimikiro ekomere. Waza kw’echila: Nji warhola nsimikiro zinene omu kalamo kawe, ziguma muzo nji zaba eyi ziri zinja, aliko orhakachigera ahawarhola esimikiro nyinja kulusha y’okuhaana akalamo kawe emwa Yehova. (Zb. 50:14) Shetani nja pinyapinya (kuchihangana) kubihya obwira bwawe haguma na Yisho w’embingu, ey’achizerere oku orhagenderera kuba mwimana emwage. Omenye waziga akuhima! (Yob. 27:5) Obuzigire bukomere ogwerhe ku Yehova bwakurhababala ogendereze omuhigo gwawe g’okumukolera n’okugenderera kubera hofi na Yisho w’embingu.

21. Bulagurhe rhwakaderha oku obubatizo burhali buzinda s’aliko guli murhondero?

²¹ Enyuma y’okumala kuchihaana emwa Yehova, oganire n’abashamuka b’omu chibaga chawe oku bilolere okuntu wakarhola entambu y’akamaro ekulikireho. Buli mango oyibuke oku, obubatizo burhali buzinda, aliko guli murhondero. Obubatizo guli murhondero gw’akalamo karhagwerhe buzinda k’okukolera Yehova. Bobola okomeze obuzigire bwawe ku Yisho w’embingu kurhonderera zene. Ochihebere h’emihigo yarhuma obuzigire bwawe bwakula n’okukomera lusiku oku lwindi. Entambu eli nk’eyola yarhuma wahikira oku bubatizo. Olola nji lwaba lusiku lwinja bwenene. Aliko ogola guli murhondero. Ojage wagenderera kukomeza obuzigire bwawe ku Yehova n’Omugala esiku n’amango!