1. Bichi abazere balonzeze abana babo bajirage?

 BAZERE, rhumenyere oku mushondere kurhabala abana byenyu bahikire kumenya Yehova n’oku muzigira. Aliko Mungu arhabonekana. Gurhe mwakarhabala abana benyu babone Mungu nka muntu-nyamuntu n’oku muyegeera?—Yak. 4:8.

2. Nka gurhe abazere bakayigiriza abana babo oku bilolere oborhere bwa Yehova?

² Enjira y’akamaro abazere bakakolesa omu kurhabala abana babo yi bayegera Yehova, kuli kuyiga haguma nabo Ebiblia. (2 Ti. 3:14-17) Ebiblia eyerekene eyindi njira abantu bachili misole bakakolesa omu kuyiga oku bilolere Yehova. Omu chitabu cha Mezali, eshe wabana ali ayibusya omugala oku arhahira akayibirira kubona engeso za Yehova zinabonekana kugerera ebintu alemaga. (Mez. 3:19-21) Rhwabona njira ziguma abazere bakakolesamo obulemi omu kurhabala abana babo bayige oku bilolere oborhere bwa Yehova.

3. Burhabale buhe abazere bakwanene kuhereza abana babo?

³ Ebiblia ederhere oku “engeso [za Mungu] zirhabonekana, zinabonekana bwinja-bwinja kurhenga okulemwa kw’egulu na kugenderera, bulala zinabonekana kugerera ebintu byalemerwe.” (Ro. 1:20) Bazere wee, byakashobakana kweri oku munasiima kugeza ebisanzi haguma nabana benyu embuga. Mukolese ebyola bisanzi omu kurhabala abana benyu babone nka gurhe “ebintu byalemerwe” bifarhene bwenene n’engeso za Yehova zinja bwenene. Lekaga  rhulole bichi abazere bakayiga kugerera omufano gwa Yesu g’okuyigiriza.

4. Gurhe Yesu alikoleseze obulemi omu kuyigiriza abanafunzi bage? (Luka 12:24, 27-30)

⁴ Rhulole nka gurhe Yesu alikoleseze obulemi omu kuyigiriza. Mango maguma Yesu alibwirire abanafunzi bage balolereze ebihungwe, n’amauwa. (Osome Luka 12:24, 27-30.) Yesu akachishogere kukolesa enyama yoshi yoshi changwa omurhi, aliko akishoga kukolesa enyunyi na mauwa, bulala by’abanafunzi bage balimenyere bwinja. Nkabaga abanafunzi baliri babona gurhe bahungwe baliri babalala omu chanya, na gurhe amauwa maliri mashishagira omu shwa. Wakachapa omu bwenge gurhe Yesu aliri arhunga ebyola bintu omudoke amango aliri ayigiriza? Bindi bichi alishubire kujira amango amala kuganira kw’eyola mifano? Aliyigirize abanafunzi bage ebintu by’akamaro bwenene oku bilolere engeso z’Eshe w’embingu, nk’okuhaana n’obwinja: Yehova njalisa n’okuyambisa abakozi bage bimana nk’oku anakolera ebihungwe na mauwa g’omu shwa.

5. Mufano guhe obwene omu bulemi abazere bakakolesa omu kuyigiriza abana babo oku bilolere Yehova?

⁵ Bazere wee, amango muli mwayigiriza abana benyu, nka gurhe mwakayiganya omufano gwa Yesu? Wakabalira omwana wawe oku chintu chiguma ch’obulemi onasiima woyo wenyine, omufano nk’enyama onasiima bwenene changwa omurhi. Amango oli waganira n’omwana wawe oku bilolere echola, okwanene omufasiriye bichi ebyola birhuyigirize oku bilolere Yehova. Wakabaza omwana wawe oku bilolere omurhi changwa enyama anasiima. Nkabaga omwana wawe akuyunviriza bwinja-bwinja chiro n’amango oli wamuyigiriza oku bilolere engeso zaYehova, amango oli waderha oku chintu chilebe anasiima bwenene.

6. Bichi rhwakayiga kugerera omufano gwa nyina wa Christopher?

⁶ K’abazere bakwanene kukolesa bisanzi binene omu kulonza enyama changwa omurhi gulebe yi bayigiriza abana babo bichi obulemi buyerekene oku bilolere Yehova? Birhali by’akamaro bwenene okujira ntyo. Yesu arhahaanaga amafasiriyo malehere oku bilolere okuntu bahungwe banalya, changwa oku bilolere okuntu amauwa manakula. Chiro akaba omwana wawe alonzeze kumenya binene oku bilolere ebintu Yehova alemere, mango maguma amafasiriyo mageke changwa echibazo chakaba chitosheze omu kumurhabala ayunve echiwashondaga kumuyigiriza. Yunva ebi mwene-werhu oyirikirwe Christopher ayibukire kurhenga omu bwana bwage: “Nyama aliri akolesa mafasiriyo mageke omu kurhurhabala rhusiimire obulemi buli ahaburhambi bwerhu. Omufano, amango rhwaliri hofi n’omusozi aliri aderha ntya: ‘Mulole nka gurhe gunola musozi guli guzibu-zibu bwenene gunakwirire! Orhabwene oku Yehova asomeze si?’ Chiro n’amango rhwaliri hofi n’enyanja, nyama aliri aderha ntya: ‘Tala misi mingana ebivundu by’omulaba bigwerhe! K’orhabwene oku Mungu agwerhe misi minene bwenene?’” Christopher aderhere ntya: “Amola mafasiriyo maliyorohere aliko maliri marhuma nabiwazako bwenene, manaliri mampuma oku murhima.”

7. Nka gurhe wakayigiriza abana bawe bawaze oku bulemi?

⁷ Okw’abana benyu banali bakula, mwakabayigiriza kuhwanza kuwaza oku bilolere obulemi, n’okubayigiriza oku bilolere oborhere bwa Yehova. Wakaderha oku bilolere chintu chiguma Mungu alemere, naho wanaja wabaza omwana wawe, “Bichi ebyola bikuyigirize oku bilolere Yehova?” Nkabaga wasomezwa n’okusiima amango wayunva amawazo m’abana bawe.​—Mt. 21:16.

8. Rozo luhe abazere Babaizraeli baligwerhe amango baliri babalama omu barabara n’abana babo?

⁸ Abazere Babaizraeli baliheberhwe omurhima bayinje bayigiriza abana babo amarhegeko ma Yehova amango bali balambagira “omu barabara.” (Kum. 11:19) Amabarabara maligerere omu  chihugo choshi che Izraeli. Omuntu akabwene enyama, enyunyi, n’amauwa byoshi byambero zinene. Amango abantu b’emilala ye Izraeli baliri babalama omu barabara, abazere baligwerhe orozo l’okuganira n’abana babo oku bilolere ebi Yehova alemere. Mwabo bazere, nenyu mugwerhe orozo luli nk’olola l’okukolesa obulemi omu kuyigiriza abana benyu. Lola nka gurhe bazere baguma banajira ntyo.

9. Bichi wayigire kugerera omufano gwa Punitha na Katya?

⁹ Nyina wabana oyirikirwe Punitha, olamire omu vile enene y’Ebuhindi aderhere ntya: “Amango rhwamalambagirira omulala gwerhu oku vilaje, rhwanabona oku olola luli rozo l’okurhabala abana berhu bayige oku bilolere obulemi bwa Yehova busimisize bwenene. Imbwazize oku abana bani bayunva bwinja ebilolere obulemi amango bali hale n’amabarabara mayunjulirene bantu, n’evile eliyageramo omuhule gw’emitugari.” Bazere wee, abana benyu barhakagera aha bayibirira ebisanzi binja banageza haguma nenyu. Mwali-werhu w’omu Moldavie, oyirikirwe Katya aderhere ntya: “Ebintu bisimisize bwenene nyibukire omu bwana bwani bili bisanzi nagezeze haguma n’abazere bani omu vilage. Ngwerhe eshukrani enene oku bazere bani, banyigirize kurhenga omu myaka y’obusole bwani ebi Yehova alemere n’okubona engeso zage kugerera obola bulemi.”

10. Bichi abazere bakajira akaba birhagalikana kubalamira omu vilaje? (Olole echisanduku “ Oburhabale oku Bazere.”)

¹⁰ Nka gurhe si akaba orhakagala kubalamira omu vilaje? Amol, naye olamire omu chihugo che Buhindi aderhere ntya: “Ahandamire, abazere bakwanene kulambagira esa zinene, yi babalamira omu vilaje na ntyo bakwanene kulipa furanga zinene. Aliko, omuntu akaja omu bustani ngeke changwa oku nju ye etaje anaja alolereza obulemi n’okuderha oku ngeso za Yehova.” Amango oli walolereza bwinja-bwinja, wakashuba kubona hofi n’ah’olamire ebindi bintu by’obulemi wakayereka abana bawe. (Zb. 104:24) Byakashobokana  oku wakabona enyunyi, ebisimba, emirhi, n’ebindi kamama. Karina, w’omu Alemanye aderhere ntya: “Nyama agendaga asiima amauwa bwenene, n’amango nalichiri munyere mudorho aliri anyereka amauwa makwirire bwenene buli kasanzi rhwaliri rhwalambagira haguma naye.” Bazere wee, nenyu mwakakolesa amavideo malengene n’ebitabu biderhere oku bulemi, olubaga lwerhu lwarhuhere omu kuyigiriza abana. Nechi, hoshi mwakaba mulamire, mwakarhabala abana benyu balolereze ebi Mungu alemere. Lekaga rhuderhe oku ngeso ziguma omu ngeso za Yehova rhwakachisezako amango rhuli rhwayiga n’abana berhu.

11. Nka gurhe abazere bakarhabala abana babo babone obuzigire bwa Yehova?

¹¹ Omu kurhabala abana benyu kubona obuzigire bwa Yehova mwakawaza oku mufano g’okuntu enyama zinalemba abana bazo. (Mt. 23:37) Kandi mwakaseza obwenge oku bulemi bukwirire bwenene bulengene musimire. Karina, rhwabaga rhwashambereko, aderhere ntya: “Amango rhwaliri rhwachilambagiza, nyama aliri ampeba omurhima ntange nyumange, ndole nka gurhe buli wuwa lirhali kuguma namandi na gurhe obwinja bwalyo buyerekene obuzigire bwa Yehova. Chiro akaba hamagera myaka minene, nanchilola bwinja-bwinja amauwa, embero zamo, okuntu malemerwe, n’amarangi mamo. Amola mauwa managenderera kunyibusa kangana gurhe Yehova arhuzigire.”

12. Nka gurhe abazere bakarhabala abana babo kurhegeera obwengehe bwa Mungu? (Zaburi 139:14) (Olole n’efoto.)

¹² Orhabale abana bawe barhegere obwengehe bwa Yehova. Kweri Yehova agwerhe bwengehe bunene bwenene kurhulusha. (Ro. 11:33) Omufano, rhwakashambala nabo okuntu echuka ch’amenji chinazamuka omu chanya n’okujira ebichu by’envula, n’ebyola bichu byanayinja byaja eyi n’eyi buzira kukolesa misi minene. (Yob. 38:36, 37) Kandi wakaganira nabo okuntu omubiri g’omuntu gwalemerwe omu njira esomeze bwenene. (Osome Zaburi 139:14.) Leka rhulole gurhe mushamuka muguma oyirikirwe Vladimir ajiraga. Aderhere ntya: “Lusiku luguma, omwana werhu w’obusole ogwerhe myaka 5 alirhogere oku kinga. Hagerere siku zigeke, echihulu chage cha fuma. Nyono na mukani rhwamufasiriya oku Yehova alemere omubiri n’obuhashe b’okuchifumya. Rhwamurhabala amenye oku nta chintu chili nk’echola omu by’omuntu akolere chigwerhe obuhashe  buli nk’obola. Omufano, omutugari gonyine gurhakachikwiza enyuma w’okumala kujira aksida. Eby’omwana werhu achibwenere byamurhabere kurhegeera obwengehe bwa Yehova.”

13. Nka gurhe abazere bakarhabala abana babo barhegere emisi ya Mungu? (Isaya 40:26)

¹³ Yehova arhuhemere rhuyinamule amasu merhu n’okulola omu chanya yi rhuwaza oku obuhashe bwage busomeze bunarhuma enyenyezi z’abera oku nafasi yazo. (Osome Isaya 40:26.) Wakaheba abana bawe omurhima balole omu chanya banawaze oku bibabwene. Mwali-werhu muguma w’omu Taiwan oyirikirwe Tingting, ayibukire bintu biguma byabaga ey’achili mwana, aderhere ntya: “Mango maguma, nyama aliri ankula omu vile, n’okumpeka ewa mashwa ebudufu rhwaliri rhwabona enyenyezi omu chanya, bulala rhurhali chili omu vile ahamatara manene makolerere. Mango maguma, naliri nayubaha oku ntagala kubera mwimana, bulala abanafunzi naliri nasoma nabo baliri bajira okwabo koshi yi bampidika mpu yi ntagenderera kukenga Yehova. Nyama alimpebere omurhima imbwaze oku misi Yehova akolesaga omu kulema ezola nyenyezi zoshi anantabala kumenya oku akakolesa eyola misi y’eneyola omu kuntabala kulwisa echigeregezo choshi-choshi. Amango mala kulola obulemi olola lusiku rhwajaga kulambagira, naliyunvirhe ngwerhe nyorha nene y’okumenya Yehova bwinja, nanava nahigirira bwenene kumukolera.”

14. Nka gurhe abazere bakakolesa obulemi omu kurhabala abana babo babone oku Yehova ali Mungu w’obusiime?

¹⁴ Ebintu Yehova alemere binayerekana oku agwerhe obusiime n’echola chiyerekene oku alonzeze nerhu rhugwarhe obusiime. Abasomi be Siyanse babwene oku nyama zinene nk’efi n’enyunyi zizigana kusharha. (Yob. 40:20) K’abana bawe bachigerere ahabasheka amango bamabona gurhe enyama yizachitaragaza? Nkabaga bachibwenere okuntu ehihene hili hyachirimbira (hyashabira-shabira), changwa babwene okuntu abana ba busu bali basharha n’omuchira gwa nyina. Amandi mango abana bawe basheka okubona enyama zili zasharha changwa zili zashekesa, wanabayibusa oku rhunakolera Mungu w’obusiime.​—1 Ti. 1:11.

15. Bichi byakarhabala abazere bagale kumenya bichi abana babo bali bawaza? (Mezali 20:5) (Olole n’efoto.)

¹⁵ Hali amango abazere bakabona oku, bibakomerere  kuganira n’abana babo oku bilolere ebibazo bali bahurana. Akaba ntyo kubili emwawe, wakachihangana ojire okwawe koshi y’omenya amawazo m’abana bawe. (Osome Mezali 20:5.) Bazere baguma banabona oku bibayorohere okujira ntyo amango bali basiimira obulemi haguma n’abana babo. Bulagurhe? Mpanvu nguma eli okuba nta bintu binene byakahugisa abazere n’abana. Eshe w’abana muguma w’omu Taiwan, oyirikirwe Masahiko ahanire eyindi mpanvu: “Amango yirhwageza ebisanzi embuga haguma n’abana berhu, nk’okushona oku misozi, okuchisimisa oku plaje (oku mashinji), ahanene abana banachiyunva basiimire bwenene. Na ntyo rhunabona oku biyorohere bwenene okumenya ebibagwerhe omu mirhima yabo.” Katya, rhwabaga rhwaganirireko aderhere ntya: “Enyuma w’amasomo, nyama agendaga ampeka omu bustani ekwirire. Mwey’ola fasi y’omurhula byalinyorohere kumubwira bichi nahurene nabyo oku masomo, changwa ebindazize.”

16. Nka gurhe abantu b’omulala bakachisimisa n’okushagaluka amango bali balolereza obulemi bwa Yehova?

¹⁶ Obulemi bya Yehova bwakashuba kuhereza omulala orozo l’okuchisimisa, n’okukomeza obwira bwabo omu mulala. Ebiblia ederhere oku “hali akasanzi k’okusheka” ‘n’akasanzi k’okuzina’ changwa kushabira-shabira. (Muh. 3:1, 4) Kugerera emirimo ekomere akolere, Yehova alemere fasi zinene bwenene zisimisize oku gulu aharhwakajirira buli chintu choshi choshi rhusiimire. Abantu b’emilala bazigana kulambagira haguma amango bali baja omu shwa, amango bamajilambagirira bachi babo changwa amango bali baja oku Chumbi ly’Obwami. N’abana baguma banasiima okuyinja balibirha-libirha omu bustani, okulolereza enyama, okuvuma omu lwinji, changwa omu nyanja. Hali rozo lunene l’okusiimira obulemi, ebintu byoshi birhuzungulukire k’okuderha ebintu byoshi Yehova alemere!

17. Bulagurhe abazere bakwanene kurhabala abana babo basiimire ebintu Mungu alemere?

¹⁷ Omu gulu lihya-hya lya Mungu, abazere n’abana nji basiimira bwenene ebi Yehova alemere kulusha zene. Mw’agola mango, rhurhakagwarha empanvu y’okuyubaha enyama; nazo zirhakayinja zarhuyubaha. (Isa. 11:6-9) Nji rhwasiimira ebi Yehova alemere esiku n’amango. (Zb. 22:26) Aliko, abazere barhalingirizaga kugera agomango yibarhabala abana babo kusiimira obulemi. Amango wamakolesa obulemi omu kuyigiriza abana bawe oku bilolere Yehova, nkabaga nabo bahikira ahabaderha kuguma n’oku Mwami Daudi aderhaga: “Yehova wee, nta mirimo eli kuguma n’eyemwawe.”​—Zb. 86:8.