1. Njira ehe nguma yarhabalaga Yobu ahikire kumenya Yehova bwinja?

 YOBU alijirire nganiro zinene haguma n’abandi bantu omu kalamo kage. Aliko enganiro ajiraga haguma na Yehova Mungu ye yaliri y’akachiro kanene. Mw’eyola nganiro Yehova abwira Yobu oku alole ebintu biguma bikwirire bwenene alemere. Ebyola bintu byakarhabere Yobu arhegere kangana gurhe Yehova ali mwengehe, n’ebyola byakakomeze obulangalire bwa Yobu oku Yehova anahereza abakozi bage buli choshi bakenere. Omufano, Yehova aliyibwise Yobu oku anashishikala enyama nantyo akamushishikere naye. (Yob. 38:39-41; 39:1, 5, 13-16) Omu kuwaza oku mifano y’ebintu Mungu alemere, Yobu ayiga binene oku bilolere engeso za Mungu wage.

2. Bulagurhe mango maguma binarhukomerera kulolereza obulemi bwa Yehova?

² Nerhu rhwakayiga binene oku bilolere Mungu werhu, amango rhuli rhwasuzuma changwa kulolereza eby’alemaga. Aliko, binarhukomerera okujira ntyo mango maguma. Akaba rhulamire omu vile, hali okuntu birhakashobokana buli lusiku rhubone bintu binene Yehova alemere. Na chiro akaba rhunabona hofi ebintu Mungu alemere, hali amango rhwakawaza oku rhurhakabona akasanzi k’okukengera oku bulemi bwa Yehova. Bobola rhujage rhwaganira bulagurhe kuli kw’akamaro rhuyinje rhwarhola ebisansi n’okugwarha obushiru b’okusuzuma ebi Mungu alemere. Rhwaganira nka gurhe Yehova na Yesu bakoleseze obulemi omu kuyigiriza, na bichi rhwakajira yirhuyiga binene kugerera obulemi.

3. Bichi biyerekene oku Yehova alilonzeze Adamu asiimire obulemi?

³ Yehova alilonzeze omuntu w’oburhanzi asiimire obulemi  bwage. Amango Mungu alema Adamu, alimuhereze akasi k’okushishikala eparadizo, kuyihinga n’okuyigalihya. (Mwa. 2:8, 9, 15) Waza busiime bungana gurhe Adamu aligwerhe amango aliri abona emyaka y’amera n’okuyasa. Adamu alihabirwe lukengo lunene l’okushishikala ebustani ye Edeni! Kandi Yehova ahereza Adamu akasi k’okuyirika enyama amazino. (Mwa. 2:19, 20) Nka Yehova alonzaga, yenyine akahereze enyama amazino. Aliko ahali h’okujira ntyo, ahereza Adamu akola kasi. Nta ngangane embere Adamu achishoge amazino akahereze enyama, aliri arhanga kulolereza oku bwirhonzi, okuntu zilemerwe n’engeso yazo. Adamu akwanene kuba eyaliri achishingiira kukola akola kasi. Kweri byalimurhabere abone bwinja okuntu Yehova ali mwengehe bwenene, na kangana gurhe ebintu alemere bisiimisize binakwirire bwenene.

4. (a) Mpanvu nguma ehe erhumire rhukwanene kulolereza ebi Mungu alemere? (b) Chintu chihe osiima bwenene omu bintu Mungu alemere?

⁴ Mpanvu nguma erhumire rhukwanene kulolereza obulemi eli okuba, Yehova alonzeze rhujire ntyo. Arhubwirire ntya: “Muyinamula amasu menyu mulole embingu.” Naho ajire abaza ntya: “Inde walemega ebila bintu?” Echishubizo chibonekene bwinja-bwinja. (Isa. 40:26) Yehova alemere ebintu byoshi omu mbingu n’oku gulu n’ebili omu nyanja, n’ebyola byoshi binarhuyigiriza oku bimulolere. (Zb. 104:24, 25) Kandi ojage wawaza okuntu nerhu rhwalemerwe. Arhuhere obuhashe b’okubona, okuyunva, okuhuma, okuhonja changwa kugeza, n’okuyunva empumulo. Obola buhashe arhuhere bunarhuma rhwagala kusiimira ebyola bintu byoshi alemere.

5. Nk’oku olwandiko lwa Waroma 1:20 luderhere, gurhe rhunayunguka omu kuyiga oku bilolere bulemi bwa Yehova?

⁵ Ebiblia erhubwirire eyindi mpanvu y’akamaro yakarhuma rhwayiga oku bilolere obulemi. Burhuyigirize oku bilolere engeso za Yehova. (Osome Waroma 1:20.) Omufano, owaze oku bintu Yehova alemere onalole gurhe byalemerwe omu kuntu kusimisize bwenene. Ebyola birhuyigirize oku Mungu ali mwengehe bwenene. Kandi owaze oku mbero z’ebilyo wakasiimira. Kweri ebyola biyerekene kangana gurhe azigiire abantu. Amango rhwamabona engeso za Yehova kugerera ebintu alemere, rhwanahikira kumumenya bwinja kandi rhwanayunva rhushunikirwe kumuyegera. Leka rhulole njira ziguma Yehova akolesezemo obulemi y’ayigiriza abantu ebintu byakamaro.

6. Bichi rhwakayiga omu kulolereza enyunyi zinahama-hama?

⁶ Yehova agwerhe akalandriye kage. Buli mwaka oku buzinda b’omwezi gwa kabiri nahagarhi g’omwezi gwa garhano, Abaizraeli bakabwene  emyanana yabalala omu chanya yanabalamira omu noro y’echihugo chabo. Mungu abwira Abaizraeli ntya: “Chiro omwanana g’omu chanya guyinji nakasanzi kago.” (Yer. 8:7) Yehova ahebereho ezola nyunyi ebisanzi by’okuhama, k’onakuguma ahebereho olusiku nj’achira abantu olubanja. Zene amango rhuli rhwalolereza enyunyi zinahama, rhwanayibuka oku rhwakalangalira oku Yehova ahebereho akasanzi k’okulerha obuzinda bwalinola gulu libi.​—Hab. 2:3.

7. Bwizere buhe rhwakagwarha omu kulolereza okuntu enyunyi enabalala omu chanya? (Isaya 40:31)

⁷ Yehova anahereza abakozi bage emisi. Kugerera omulebi Isaya, Yehova alaganya oku aha abantu bage emisi n’oku nji “babalala enyanya nka bagwerhe ebyubi bili nka byarubaka,” amango baliri bayunva bavunikire omurhima. (Osome Isaya 40:31.) Abaizraeli baliri bazigana kubona barubaka babalala omu chanya amango hali omuyaga n’echola chanarhuma barhakolesa ebyubi byabo bwenene. Ebyola birhuyibwise oku nerhu Yehova akarhuhereza emisi kuguma n’oku anarhabala ezola nyunyi amango zili omu chanya! Amango oli wabona enyunyi eli yabalala omu chanya yanazamuka omu chanya bwenene buzira kukolesa ebyubi bwenene, wanayibuka oku nerhu Yehova akarhuhereza emisi y’okugala kulwisa ebibazo byerhu.

8. Bichi Yobu aliyigire omu kuwaza oku bintu Mungu alemere, bichi nerhu rhwakayiga?

⁸ Yehova yi rhukwanene kulangalira. Yehova alirhabere Yobu akuze obulangalire bwage muye. (Yob. 32:2; 40:6-8) Omu nganiro Mungu ajiraga haguma na Yobu, aliri aderha oku bintu binene alemere kuhebamo, enyenyezi, ebichu, n’emibaraganyo (emirazo). Kandi Yehova alishambere oku nyama, omufano embogo (empanzi yelubala) n’efarasi. (Yob. 38:32-35; 39:9, 19, 20) Ebyola byoshi birhayerekene konyine emisi ya Yehova esomeze, s’aliko biyerekene obuzigire bwage n’obwengehe bunene bwenene. Kugerera eyola nganiro, Yobu ahikira kumenya Yehova bwinja kulusha embere. (Yob. 42:1-6) K’onakuguma nerhu, amango rhwamayiga oku bilolere obulemi rhwanayibuka oku Yehova ali mwengehe bwenene, n’oku agwerhe emisi minene bwenene kurhulusha. Kandi akagala nji anamala ebibazo byerhu byoshi. Ebyola bintu byakarhurhabala kukomeza obulangalire bwerhu muye.

9-10. Bichi envula n’ezuba birhuyigirize oku bilolere Yehova?

⁹ Yesu alimenyere binene oku bilolere obulemi. Yewe “nka mukozi ominuzize,” aligwerhe olukengo l’okukola haguma n’Eshe amango alemaga amahanga. (Mez. 8:30) Buzinda, amango Yesu aliri hanola oku gulu, alikolese obulemi omu kuyigiriza abanafunzi bage oku bilolere Eshe. Waza oku bintu bigeke abayigirizaga.

¹⁰ Yehova anayerekana obuzigire bwage ku buli muguma. Omu mahubiri mage m’oku musozi, Yesu alibwirire abanafunzi bage oku bilolere envula n’ezuba: ebyola bintu byombi, bili bintu bantu banene barhawaza oku kamaro bigwerhe. Ebyola byombi bili by’akamaro omu kulanga akalamo kerhu. Nka Yehova alonzaga arhakayinjire ahereza ebyola bintu oku bantu barhamukolera. Ahali h’okujira ntyo, anahereza abantu boshi envula n’ezuba oku buzigire. (Mt. 5:43-45) Yesu alikolese echola, omu kuyigiriza abanafunzi bage oku Yehova alonzeze nerhu rhuyerekane obuzigire oku bantu boshi. Buli mango eyirhubona okuntu biba bisiimisize kulola okuntu ezuba y’ilyazika changwa okuntu envula eliyarhoga, rhwanabona akasanzi k’okuwaza oku buzigire Yehova agwerhe oku bantu boshi. Omufano gwage gwakarhushunika rhuyerekane obuzigire buli nkobola amango rhuli rhwahubiri abantu boshi.

11. Nka gurhe okulolereza enyunyi z’omuchanya birhuhebere omurhima n’erhu?

¹¹ Yehova anarhuhereza byoshi rhukenere y’irhugala kulama. Mwamola mahubiri kandi, Yesu ashuba kuderha ntya: “Mulolereze bwinja enyunyi z’omu chanya; zirhabyala, zirhanashalula  mburho changwa mpu zibike omu nguli aliko Yisho w’embingu anazilisa.” Nkabaga abonviriza ba Yesu bakabwene enyunyi zili zabalala omu chanya amango aliri ababaza ntya: “Ka murhaherhe akachiro kuzilusha?” (Mt. 6:26) Omunjira eli nk’eyola eyerekene obuzigire Yesu arhurhabere rhubone oku Yehova ayinj’arhuhereza ebirhukenere! (Mt. 6:31, 32) Ebi rhwayigire kugerera obulemi, bigenderere kuhira omurhima abakozi ba Mungu bemana. Mwali werhu w’omupainia ochili musole olamire omu Espanye, aliyunvirhe avunikire omurhima bulala arhalibwene ahantu h’okulama hakwanene. Aliko enyuma y’okubona okuntu enyunyi zinayugurha emburho n’enkerere (amafulesi), ayunva aheberwe omurhima. Aderhere ntya: “Ezola nyunyi zanyibusa oku Yehova aba azilagireko n’oku nani andagako.” Kweri, enyuma waho mwali-werhu abona ahantu h’okulama.

12. Nk’oku olwandiko lwa Matayo 10:29-31 luderhere, bichi omufano gw’ebishwa gurhuyigirize oku bilolere Yehova?

¹² Yehova anabona oku buli muguma werhu ali w’akachiro. Embere Yesu arhume entumwa zage omu kasi k’okuhubiri, alibarhabere bamenye bayubaha abantu bali b’abapinga. (Osome Matayo 10:29-31.) Alijirire ntyo omu kuganira oku nyunyi zalimenyike omu Israeli, k’okuderha, ebishwa (ebitaranviyo). Ezola nyunyi zaligwerhe kachiro kageke bwenene omu siku za Yesu. Aliko alibwirire abanafunzi bage ntya: “Ntacho n’echiguma mubyo chakarhoga ahashi Yisho akafunda kumenya.” Naho ayongera ntya: “Muli b’akachiro kulusha bishwa binene.” Yesu alirhabere abanafunzi bage bachizere oku Yehova anabona buli muguma oku ali w’akamaro, n’oku nta mpanvu baligwerhe y’okuyubaha obupinzani. Abanafunzi bakayibukire ebyola binwa bya Yesu amango bakabwene ezola nyunyi eyi bali bahubiri omu mavile n’omu mavilaje. Amango moshi-moshi wamabona akanyunyi katyuli, oyibuke oku Yehova akubwene oku oli w’akamaro, bulala nawe ‘oli wakachiro kulusha bishwa binene.’ Akurhabala orhayubahaga amango abantu bamakupinga.—Zb. 118:6.

13. Bichi byarhurhabala rhuyige bintu bilebe kugerera obulemi?

¹³ Rhwakayiga bindi bintu binene oku bilolere Yehova kugerera obulemi. Nka gurhe? Ech’oburhanzi, rhukwanene kurhola akasanzi k’okulolereza obulemi. Echa kabiri, rhukwanene kuwaza bichi birhuyigirize oku bilolere Yehova. Mango maguma birharhuyorohera kupata akasanzi k’okujira ntyo. Mwali-werhu oyirikirwe Géraldine w’omu chihugo che Cameroun aderhere ntya: “Nakuliraga omu vile, n’echola charhuma nayinja kurhegera oku bihemere bisanzi binene n’obushiru y’omuntu alolereza obulemi.” Mwene-werhu muguma oyirikirwe Alfonso, oli mushamuka w’echibaga afasiriye ntya: “Nayigire oku bimpemere nyinje narhola ebisanzi by’okuba nyenine yi ndolereza obulemi n’oku kengeerako oku bintu bunyigirize oku bilolere Yehova.”

14. Bichi Daudi aliyigire amango aliri akengeera oku bulemi bwa Yehova?

¹⁴ Daudi alipatire akasanzi k’okuwaza bwenene  oku bilolere obulemi bwa Mungu. Abwira Yehova ntya: “Amango nambona embingu zawe, akasi k’emidoke yawe, omwezi n’enyenyezi walemaga, omuntu onafa, ali nde mp’omuyibuke?” (Zb. 8:3, 4) Nechi, amango Daudi aliri alola omu chanya ebudufu, arhasimaga konyine okubona enyenyezi. Aliko aliri arhola n’akasanzi k’okukengeera oku nyenyezi na bichi zimuyigirize oku bilolere Mungu. Aliyigire okuntu Yehova ali Mukulu bwenene. Omu mandi mango, Daudi aliri awaza okuntu omubiri gwage gwakuliraga omunda ya nyina. Okw’aliri agenderera kukengeera kw’ebyola bintu bisomeze, agenderera kusimiswa bwenene n’obwengehe bwa Yehova.​—Zb. 139:14-17.

15. Nka gurhe wabwene engeso za Yehova kugerera obulemi? Lerha omufano. (Zaburi 148:7-10)

¹⁵ Kuguma na Daudi, birharhuhemere mpu rhulole ebintu bya hale yi rhubona ebirhwakakengeerako oku bilolere obulemi. Okala walola ahaburhambi bwawe, wakabona bintu binene byakurhabala kumenya Yehova bwinja. Omufano, wakayiga oku bilolere emisi ya Yehova amango wamayunva echuuka ch’ezuba oku mubiri gwawe. (Yer. 31:35) Wakalolereza obwengehe bwa Mungu, amango wamabona gurhe enyunyi yi yayumbaka oloogo. Waza nka gurhe Mungu aba w’obusiime amango wamabona gurhe ehibwa hili hyasharha n’omuchira gwahyo. Obwire Yehova koko oku buzigire bwage amango wamabona omukazi ali asharha n’akabonjo kage. Rhugwerhe orozo lunene l’okuyiga oku bilolere Yehova bulala alemere bintu binene, bibe bizibu-zibu changwa bigeke-geke, bibe bili hale changwa hofi, byoshi binamulerhera erenge.​—Osome Zaburi 148:7-10.

16. Bichi rhukwanene kuhigirira kujira?

¹⁶ Mungu werhu ali mwengehe, agwerhe obuzigire, agwerhe n’emisi minene bwenene, ebintu byoshi alemere bikwirire orhakalola. Rhwakayiga oku bilolere ezola ngeso n’ezindi nezindi amango rhuli rhwalola bwinja bwinja obulemi burhuzungulukire. Rhwakachihangana kurhola akasanzi buli mango k’okusiimira ebintu alemere n’okuwaza oku bintu byarhuyigirize oku bilolere Yehova. Omu kujira ntyo, rhwayegera bwenene Omulemi werhu. (Yak. 4:8) Omu mwazi gwakulikiraho, rhwabona nka gurhe abazere bakakolesa obulemi omu kurhabala abana babo bayegere Yehova.