MWAZI G’OKUYIGA 10
OLWIMPO 13 Kristu l’Olwiganyo Lwerhu
“Ogenderere Kukulikira” Yesu Enyuma y’Okubatizwa
“Akaba omuntu yeshi yeshi alonzeze kunkulikira, akwanene kuchilahira yewe yenyine, anarhole n’omurhi gwage gw’amalibuko lusiku oku lwindi n’okugenderera kunkulikira.”—LU. 9:23.
EBIRHWAYIGA
Ogula mwazi gwarhurhabala rhweshi rhukengere oku kuntu okuchihana kwerhu emwa Yehova, kuhumire oku kalamo kerhu. N’ahanene gwarhabala balala boshi bachizindire kubatizwa bagenderere kuyorha bemana.
1-2. Migisho ehe omuntu anapata amango amamala kubatizwa?
RHUNAGWARHA obusime amango rhwamabatizwa n’okuba baguma b’omu mulala gwa Yehova. Luli lukengo lunene okugwarha obwira bwa hofi haguma na Yehova. Rhuyemerere ebila binwa by’omwandisi we zaburi Daudi waderhaga ntya: “Ogwerhe obusime ali olala [Yehova] achishogere n’okumulerha hofi y’ayikala omu bibuga byage.”—Zb. 65:4.
2 Yehova arhayemerera omuntu yena muntu aje omu mulala gwage. Nk’oku rhwabonaga omu mwazi gugerere, anachishoga kuba mwira wa balala boshi balonzeze kumuyegera. (Yak. 4:8) Amango wamachihana emwa Yehova n’okubatizwa onaba eyi wamamuyegera omu njira emusimisize. Wakachizera okw’enyuma y’okubatizwa ‘akusheshera kw’emigisho kugera ahantacho wabula.’—Mal. 3:10; Yer. 17:7, 8.
3. Abakristu bachihanire emwa Yehova n’okubatizwa bajira ngabane zihe z’akamaro? (Muhubiri 5:4, 5)
3 Nechi, obubatizo guli murhondero gw’akalamo kawe omu kasi ka Yehova. Enyuma y’okubatizwa, waba ey’olonzeze kujira okwawe koshi y’olama kuguma n’echilagane chawe, chiro n’amango obwemere bwawe bwamageregezwa. (Osome Muhubiri 5:4, 5.) Woyo nka mwanafunzi wa Yesu, ogenderere kukulikira omufano gwage n’amarhegeko mage moshi nk’oku byakanagalikana. (Mt. 28:19, 20; 1 Pe. 2:21) Gunola mwazi gwakurhabala ojire ntyo.
“OGENDERERE KUKULIKIRA” YESU CHIRO AKABA OLI WALIBUZWA N’OKUGEREGEZWA
4. Mu njira nchi abanafunzi ba Yesu banaheka “omurhi gw’amalibuko”? (Luka 9:23)
4 Enyuma y’okubatizwa, akalamo kawe karhabula ebibazo. Bobola, Yesu aliyerekene bwinja bwinja okw’abanafunzi bage bakahekere “omurhi gw’amalibuko.” Omukuderha okuli bakwanene kujira ntyo “lusiku oku lwindi.” (Osome Luka 9:23.) Ka Yesu aliri aderha okw’abanafunzi bage bakagenderere kulibuka esiku zoshi? Nanga chiro. Alilonzeze kuderha ok’olekere emigisho bakagenderere kupata, bakahurene n’ebigeregezo. Biguma mw’ebyola bigeregezo byakaba eyibikomere chiro bwenene.—2 Ti. 3:12.
5. Migisho ehe Yesu alilaganyize balala boshi balekere bintu bilebe?
5 Nkabaga nawe wakaba eyi wapatire obupinzani burhengere oku bantu b’omulala, changwa nkabaga wakaba eyi walekere kugwarha furanga zinene, changwa birugu binene, y’oheba enyungu z’Obwami oku nafasi y’oburhanzi omu kalamo kawe. (Mt. 6:33) Akaba ntyo kubili, Yehova amenyere byoshi wamukolere. (Ebr. 6:10) Byakashobokana oku wachibwenenere obukweri bw’ebila binwa bya Yesu: “Nta muntu walekere enju, bene-babo, bali-babo, nyina, eshe, abana changwa amashwa eju yani n’eju y’emyazi minja, orhakapata kukuba kali egana kurhenga zene mu chinola chihe—enju, bene-babo, bali-babo, banyina, abana, amashwa, n’amalibuko—n’omu gulu lyayinjire, akalamo k’esiku n’amango.” (Mk. 10:29, 30) Emigisho wapatire eli minene bwenene kulusha byoshi walekere.—Zb. 37:4.
6. Bulagurhe byakuhema ogenderere kulwisa “enyifinjo z’omubiri” n’enyuma y’okubatizwa?
6 Byachikuhema ogendere kulwisa “enyifinjo z’omubiri” enyuma y’okubatizwa. (1 Yo. 2:16) Bili ntyo bulala orhali muntu mushinganyanya. Nantyo mango maguma amawazo mawe makaba kuguma na m’entumwa Paulo. Ayandikire ntya: “Kweri nsimire esheriya ya Mungu nk’okundi omu murhima gwani, aliko mbwene ok’omu mubiri gwani muli yindi sheriya eherhe yalwisa esheriya y’obwenge bwani n’okunjira mbe mushwekwa w’esheriya y’echaha eli omu mubiri gwani.” (Ro. 7:22, 23) Wakachiyunva ovunikire omurhima bulala okwanene okulwisa enyifinjo zibi. Aliko, omu kugenderera kuwaza eju y’echilagane wahaga Yehova amango ochihana emwage, kwakuhereza emisi y’ogenderera kulwisa amashumi. Omu bukweri amango wamahurana ebigeregezo, echilagane chawe wahere Yehova chakurhabala. Nka gurhe?
7. Nka gurhe okuchihana emwa Yehova kukurhabere kuyorha mwimana kuye?
7 Amango wamachihana emwa Yehova, onaba eyi wamachilahira woyo wenyine. Echola chilonzeze kuderha oku rhukwanene kukabulira enyifinjo changwa emihigo yerhu yakarhuma rhwagoseza Yehova. (Mt. 16:24) Bobola, amango wamageregezwa, changwa amango oli wahurana n’ehali zikomere orhakwanene kushiba wachibaza bichi okwanene kujira. Waba eyi mira wachishogere bichi okwanene kujira, k’okuderha kuyorha mwimana emwa Yehova. Wayorha eyohigirire kusimisa Yehova. Mw’eyola njira waba kuguma na Yobu. Chiro akaba oku alihurene n’ebigeregezo bikomere, alihigirire ntya: “Ntaleka obwishwekerezi bwani!”—Yob. 27:5.
8. Nka gurhe okukengera oku sala waderhaga amango ochihana emwa Yehova kwakakurhabala ogale kuhima amashumi?
8 Omu kukengera oku sala waderhaga amango ochihana emwa Yehova, kwakurhabala opate emisi y’okugala kuhima amashumi moshi moshi. Omufano, nka wakahwanza kukomerana n’omukazi changwa omulume wabene omu njira erhakwanene? Nanga chiro! Wamalire kulaganya Yehova ok’orhakafa wajirire echintu chili nk’echola. Nk’orhayemerere enyifinjo zibi zigenderere kukula omu murhima gwawe, nji byakuyorohera kuzileka juba juba. Ahola waba eyi “wamarhenga omu njira” yaba “nyankola maligo.”—Mez. 4:14, 15.
9. Nka gurhe kandi okukengera oku sala waderhaga amango ochihana emwa Yehova, kwakurhabere ogenderere kuheba obuharamye bwa Yehova oku nafasi y’oburhanzi omu kalamo kawe?
9 Gurhe si byakaba, nka muntu mulebe akuhere akasi kakubuza kuhika oku mbuganano ze Chikristu oku kahunda? Okwanene kumenya gurhe wajira. Embere ohabwe akola kasi, wabaga wachishogere ok’orhakayemera akasi k’akubuza kuja oku mbuganano. Na ntyo orhashumikwa kurhola akasi kali nk’akola naho buzinda oje walonza gurhe wakaheba Yehova oku nafasi y’oburhanzi omu kalamo kawe. Okukengera oku mufano gwa Yesu kwakakurhabala. Alihigirire kusimisa Eshe. Kuguma na Yesu ohigirire kukabulira juba juba n’obushiru echintu choshi choshi chakarhuma wagayisa Mungu wachihanaga emwage.—Mt. 4:10; Yoh. 8:29.
10. Gurhe Yehova akurhabala enyuma y’okubatizwa “ogenderere kukulikira” Yesu?
10 Eby’onajira amango ogwerhe ebibazo changwa amango oli wageregezwa binayerekana ok’olonzeze “kugenderera kukulikira” Yesu. Kandi wakachizera oku Yehova akurhabala ogenderere kukulikira Yesu. Ebiblia ederhere ntya: “Mungu ali mwimana, arhabaleka mugeregezwe kulusha okuntu mwakagala kulembera, aliko kugerera echola chigeregezo arhuyereka enjira y’okugeramo yi rhugala kuchilembera.”—1 Ko. 10:13.
BICHI WAKAJIRA Y’OGENDERERA KUKULIKIRA YESU?
11. Njira ehe nguma nyinja bwenene omu zakakurhabala ogenderere kukulikira Yesu? (Olole n’efoto.)
11 Yesu akoleere Yehova n’omurhima goshi, anagenderera kubera hofi naye kugerera esala. (Lu. 6:12) Naho, njira nguma omu njira nyinja bwenene yakakurhabala ogenderere kukulikira Yesu enyuma w’okubatizwa, kuli kugenderera kukola ebintu byakakurhabala ogendereze obwira bwawe haguma na Yehova. Ebiblia ederhere ntya: “Chiro akaba rhwajirire amajambere mahe, rhugenderere kuchiheka bwinja mw’eyola njira y’en’eyola.” (Flp. 3:16) Buli mango, onayunva ebi bene-berhu na bali-berhu bagereremo yibahikira emihigo y’okukola binene omu kasi ka Yehova. Nkabaga bajire oku Masomo m’Abanayeneza Enjili y’Obwami changwa ahakenerwe oburhabale bunene. Akaba ehali ekuyemerere ogola g’ogwakakubera muhigo gwinja. Abantu ba Yehova banalonza enjira zoshi bakakola mu binene omu kasi ka Yehova. (Mdo. 16:9) Gurhe si akaba kugera buno orhakagala kujira ntyo? Orhawazaga ok’oli muntu wabusha omu kuchihuzanya n’abali bagala kujira ntyo. Ech’akamaro kuli kubona ok’oli wagenderera kulembera. (Mt. 10:22) Omenye wayibirira ok’onasimisa Yehova bwenene amango oli wajira koshi ogalire omu hali olimo. Eyola y’enjira y’akamaro yakakurhabala ogenderere kukulikira Yesu enyuma y’okubatizwa.—Zb. 26:1.
Enyuma y’okubatizwa, ochihebere h’omuhigo g’okujira ebintu byakurhabala kubera hofi na Yehova (Olole echifungo che 11)
12-13. Bichi wakajira akaba obushiru bwawe bwahwanzize kupunguka? (1 Wakorinto 9:16, 17) (Olole n’echisanduku chiderhere “ Oyorhe Omu Mulindi.”)
12 Bichi wakajira akaba oli wachiyunva ok’orhachili wasalira ebirhengere oku murhima, changwa ok’orhachili wasimira akasi k’okuhubiri nk’okuwaliri wajira embere? Gurhe si akaba orhachiyunva osimire kusoma Ebiblia nk’oku wagenda wajira mira? Akaba ntyo k’oli wachiyunva enyuma y’okubatizwa, omenye wawaza ok’orhachigwerhe eroho lya Yehova. Bulala rhuli bantu barhashinganene, amawazo merhu makahindamuka mango oku mandi. Akaba obushiru bwawe bwahwanzize kupunguka, okukengera oku mufano gwa Paulo kwakakurhabala. Chiro akaba okw’aliri achihangana kuyiganya Yesu, Paulo alimenyere oku mango maguma akabulire obushiru bunene b’okujira ebyalilonzeze ajire. (Osome 1 Wakorinto 9:16, 17.) Aderhere ntya: “Aliko chiro akaba ndi najira ntyo buzira kulonza, nchigwerhe ezindi ngabane nahabirhwe.” K’okuderha, Paulo alihigirire kuyeneza akasi k’okuhubiri chiro akaba aliri omu hali eli gurhe.
13 Intyo konoko omenye warhola esimikiro ziyumangire oku kuntu oli wachiyunva konyine. Ohigirire kujira ebintu binja chiro akaba orhalilonzeze kweri kubijira. Akaba ogenderere kujira ebintu binja, amawazo mawe makahindamuka okw’ebisanzi bili byagera. Kurhenga zene oku gwarha eprograme nyinja y’efunzo lyawe lyawe, oku salira, okuhika oku mbuganano n’akasi k’okuhubiri, byakurhabala ogenderere kukulikira Yesu enyuma y’okubatizwa. Amango bene-benyu na bali-benyu bali babona oli wakolera Yehova, echola chabaheba omurhima.—1 Te. 5:11.
“OGENDERERE KUCHIGEREGEZA . . . N’OKUCHISUZUMA”
14. Bichi okwanene kusuzuma buli mango, na bulagurhe? (2 Wakorinto 13:5)
14 Enyuma w’okumala kubatizwa bili by’akamaro okugenderera kuchisuzuma oku kahunda. (Osome 2 Wakorinto 13:5.) Kuli kwinja buli mango, rhulole akaba rhunasalira buli lusiku, oku soma n’okuyiga Ebiblia, okuhika oku mbuganano, n’okuja omu kasi k’amahubiri. Ochihangane kugwarha enjira wakasimiramo n’okuyunguka n’amola makasi. Omufano, wakachibaza ebibazo bili nk’ebila: ‘Inangala kufasiriya abandi enyigirizo z’omusinji ze Biblia si? Hali enjira zankantabala y’akasi kani k’amahubiri kasimisa kulusha si? Gurhe amasala mani maba, ka manayerekana oku kweri ndangalire Yehova? Inampika oku mbuganano ze Chikristu oku kahunda si? Nka gurhe nakayerekana oku indi naseza obwenge bwani oku mbuganano n’okuhana ebishubizo?’
15-16. Bichi ebi mwene-werhu Robert agereremo bikuyigirize oku bilolere okuhima echigeregezo?
15 Bili by’akamaro bwenene kandi okumenya obuzamba bwawe. Mwene-werhu oyirikirwe Robert aderhere ebyagereremo biyerekene echola: “Amango naligwerhe hofi myaka 20, naligwerhe akasi ntagendaga nakola buli lusiku. Lusiku luguma enyuma wakasi, mukazi muguma rhunakola naye ampamagala emwage. Ambwira oku nji rhwaba rhwembiye rhwenyine n’oku nji ‘rhwageza ebisanzi bisimisize.’ Burhanzi naliri namuha empanvu zirhafarhire, aliko oku buzinda namubwira nanga na namufasiriya bulagurhe.” Mwene-werhu Robert alihimire echola chizeregezo, anali wakubwirwa koko. Aliko buzinda awaza oku byarhengereraga, arhegera okw’alikwanene kujira okuntu kurhali kuguma n’okwajiraga. Ayongerere ntya: “Ntalahiraga juba juba ebyaliri ampema kuguma n’oku Yosefu ajiraga amango ahima amashumi ma muka Potifa. (Mwa. 39:7-9) Aliko, nalisomerwe okubona gurhe byalinkomerere kuderha nanga. Ebyola byampikiraga byalintabere mbone oku nalikenere kukomeza obwira bwani haguma na Yehova.”
16 Wakayunguka kugerera okuchisuzuma nk’oku Robert ajiraga. Chiro n’amango wagalire kuhima echigeregezo ochibaze ntya: ‘Bisanzi bingana gurhe byalimpemere yinderha nanga?’ Akaba obwene oku hali ahantu halebe wakajirira amajambere orhavunikaga omurhima. Ogwarhe obusime bulala okala omenyere obuzamba bwawe. Osalire Yehova oku bilolere obuzamba bwawe, onajire ebintu byakomeza obulonza ogwerhe b’okumukenga.—Zb. 139:23, 24.
17. Nka gurhe ebi Robert agereremo byali humire oku renge lya Yehova?
17 Hali echindi chintu rhwakayiga oku bilolere ebi mwene-werhu Robert agereremo. Agenderere kuderha ntya: “Enyuma y’okulahira obulalike b’oyola mukazi, ambwira ntya: ‘Wamafuma echigeregezo!’ Namubaza bichi alonzeze kuderha. Ambwira oku mwira wage waliri Muhamirizi wa Yehova, amubwirire okw’emisole yoshi y’Abahamirizi ba Yehova enajira ebintu bibi omu bwibisho amango yamapata orozo. Bobola, oyola mukazi abwira mwira wage okw’alilonzeze kulola akaba nani ndi kuguma n’eyola misole. Agola mango nachiyunva ngwerhe obusime okubona nakengeseze ezino lya Yehova.”
18. Bichi ohigirire kujira enyuma y’okubatizwa? (Olole n’echisanduku “ Myazi Ebiri y’Akakulerhera Obusime.”)
18 Amango wamahana akalamo kawe emwa Yehova n’okubatizwa, onaba eyi wamayerekana ok’olonzeze kuchesa ezino lyage chiro harhengerera echintu choshi choshi. Kandi ochizere oku Yehova amenyere amashumi moshi oli wahurana n’ebigeregezo oli wahima. Agisha omuhigo gwawe g’okugenderera kubera mwimana. Wakachizera oku kugerera eroho lyage lichesibwa, akuha emisi okenere y’okujira ntyo. (Lu. 11:11-13) Kugerera oburhabale bwa Yehova wakachizera oku wagenderera kukulikira Yesu enyuma y’okubatizwa.
GURHE WAKASHUBIZA?
-
Mu njira ehe Abakristu banaheka “omurhi gw’amalibuko lusiku oku lwindi”?
-
Bichi wakajira “y’ogenderera kukulikira” Yesu enyuma y’okubatizwa?
-
Nka gurhe okukengera oku sala waderhaga amango ochihana emwa Yehova kwakurhabala ogenderere kuyorha mwimana?
OLWIMPO 89 Yunviriza, Okenge y’Ogishwa
