1-2. Bichi omuntu akwanene kujira embere abatizwe?

 OMU myaka 5 yamagera bantu barhalukire muliyoni muguma b’abatizwe n’okuba Bahamirizi ba Yehova. Banene mubo, kuguma nʼomwanafunzi w’omukagana kaburhanzi Timoteo, bamenyaga okuli “yibachiri bana.” (2 Ti. 3:14, 15) Abandi bayigaga oku bilolere Yehova yibakala bakulire, n’abandi yikala bashajire. Mukazi muguma waliri ayiga Ebiblia n’Abahamirizi ba Yehova, abatizwaga eyi agwerhe myaka 97!

² Akaba oli wayiga Ebiblia changwa wakuliraga omu mulala gw’Abahamirizi ba Yehova, oli wawaza gurhe nawe wakabatizwa si? Ogola guli muhigo gwinja bwenene! Embere obatizwe bihemere orhange ochihane emwa Yehova. Gunola mwazi gwa ganirira bichi okuhana akalamo emwa Yehova biderhere. Kandi gwakurhabala obone bula gurhe orhakwanene kuyubaha kuhana akalamo kawe emwa Mungu n’okubatizwa amango oli tayari kujirantyo.

OKUCHIHANA EMWA YEHOVA K’OKUDERHA GURHE?

3. Hana emifano eganirirwe omu Biblia y’abantu balichihanire emwa Yehova.

³ Nkʼoku Ebiblia ederhere, omuntu wachihanire emwa Yehova aliheberwe eburhambi yʼayeneza omuhigo gwago-gwago. Abaizraeli lyaliri shanja lyalichihanire emwa Yehova. Aliko, baguma mw’elyola shanja balichihanire emwa Yehova omu njira eli kwago kwago. Omufano, Haruni aliheberwe “kw’echimenyeso chichesibwa ch’okuchihana” k’okuderha ebyola byalibonekene oku mubano gwe oro gwalifarhire oku chitambara omudahwa mukulu aliri ayambala. Ogola mubano gwe oro gwaliyerekene okw’achishogerwe y’akolera Yehova omu njira eli kwago kwago, k’okuderha mudahwa mukulu we Izraeli. (Law. 8:9) Abanaziri nabo balichihanire emwa Yehova omu njira eli kwago kwago. Echinwa “Munaziri” chirhengere omu chinwa ch’Echiebrania nazirʹ, chiderhere “Owahirirwe Eburhambi”  changwa “Owachihanire.” Abanaziri balikwanene kukenga amarhegeko maliyandikirwe eju yabo bonyine omu Sheriya ya Musa.—Hes. 6:2-8.

4. a) Amango wamachihana emwa Yehova, bichi binaja byaba by’akamaro bwenene omu kalamo kawe? b) “Okuchilahira woyo wenyine” k’okuderha gurhe? (Olole n’efoto.)

⁴ Amango wamachihana emwa Yehova woyo wenyine, eyi wamachishoga kuba mwanafunzi wa Yesu Kristu, n’okujira obulonza bwa Yehova chechibage chintu ch’akamaro bwenene omu kalamo kawe. Ebyola biheberwemo bichi na bichi? Yesu aderhere ntya: “Akaba muntu mulebe alonzeze kunkulikira akwanene kuchilahira yewe yenyine.” (Mt. 16:24) Echinwa ch’Echigiriki chitafsiribwe “kuchilahira wenyine” chakashuba kuderha “okw’arhachilama okw’alonzeze yewe yenyine.” Rhwabo bantu bachihanire yi rhukolera Yehova, birhuhemere rhulekane na buli chintu choshi chirhasimisize Yehova. (2 Ko. 5:14, 15) Ebyola biderhere ok’okwanene kulekana “n’ebijiro by’omubiri,” omufano nk’ebijiro by’obumaguza. (Gal. 5:19-21; 1 Ko. 6:18) Bobola si, okukenga amola marhegeko kwabihya akalamo kawe? Nanga. Akaba ozigiire Yehova wachizera ok’okukenga esheriya zage kuli kw’akamaro emwawe. (Zb. 119:97; Isa. 48:17, 18) Mwene-werhu oyirikirwe Nicholas aderhere ntya: “Onabona okw’amakanuni ma Yehova mali nka mipaka y’epirizo enakubuza kujira ebintu olonzeze kujira, changwa onamabona nka lupango lufungire mu ba simba yibarhakujira kubi?”

5. a) Gurhe omuntu anachihana emwa Yehova? b) Gurhe okuchihana emwa Yehova n’okubatizwa bilekene? (Olole n’efoto.)

⁵ Gurhe wakachihana emwa Yehova? Kuli kulaganya Yehova omu sala oku wamuharamya yewe yenyine n’oku waheba obulonza bwage oku nafasi y’oburhanzi omu kalamo kawe. Naho, wanalaganya Yehova oku wagenderera kumuzigira “n’omurhima gwawe goshi, nʼobugumaguma bwawe boshi, n’obwenge  bwawe boshi n’emisi yawe yoshi.” (Mk. 12:30) Amango ochihana emwa Yehova nta windi muntu waliriho, mwaliri mwembi Yehova mwenyine. Aliko, obubatizo bowe onabujira embere z’abantu banene; wanayereka abandi oku wachihanire emwa Yehova. Okuchihana kwawe emwa Yehova chirhali chilagane cha ntyantya, omuhigo gwawe gukwanene kuba gokugenderera kuyeneza echola chilagane na ntyo ku Yehova alonzeze ojirage.—Muh. 5:4, 5.

BULAGURHE OKWANENE KUCHIHANA EMWA YEHOVA?

6. Bulagurhe omuntu anachishoga kuhana akalamo kage emwa Yehova?

⁶ Empanvu nkulu yakarhuma wachihana emwa Yehova eli bulala omuzigiire. Obuzigire bwawe burhayumangire okukuntu onachiyunva konyine. Aliko, buyumangire oku “bumenyi burhagwerhe magosa” “n’okuyunva bwinja ebintu by’ekiroho” k’okuderha ebintu wayigire oku bilolere Yehova byarhumire obuzigire bwawe kuye bwakomera. (Kol. 1:9) Efunzo lyawe lye Biblia lyakurhabere ochizere 1) oku Yehova abaho, 2) okwe Biblia chili Chinwa chage chifuhererwe, n’oku 3) anakolesa olubaga lwage omu kuyeneza obulonza bwage.

7. Bichi rhukwanene kujira embere y’okuchihana emwa Mungu?

⁷ Abantu banachihana emwa Yehova bakwanene kuba eyi bamenyere enyigirizo z’omusinji z’Echinwa chage, n’okulama okw’amakanuni mage maderhere. Banajira n’okwabo koshi yibabwira abandi oku bilolere ebibayigire. (Mt. 28:19, 20) Obuzigire bwabo ku Yehova bwakulire, banagwerhe enyorha y’okugenderera kuharamya Yehova yenyine. Ka nawe  arhali ntyo bili? Akaba ozigiire Yehova n’omurhima gwawe goshi, orhabona ok’okuchihana kwawe emwa Yehova n’okubatizwa kulikulonza kusimisa mwalimu wawe we Biblia, abazere bawe changwa mpu bulala bera bawe boshi bajirire ntyo.

8. Nka gurhe eshukrani yakakushunika orhole esimikiro y’okuchihana emwa Yehova? (Zaburi 116:12-14)

⁸ Amango wamawaza oku bintu byoshi Yehova akujirire, wagwarha eshukrani nene kuye n’okulonza kuhana akalamo kawe emwage. (Osome Zaburi 116:12-14.) Ebiblia ederhere oku buli mpano “nyinja bwenene na buli luhembo lushinganene” lunarhenga emwa Yehova. (Yak. 1:17) Empano nkulu mw’ezola mpano zoshi Yehova arhuhere, eli nterekero y’Omugala, Yesu. Ba nka wawaza kangana gurhe eyola mpano eli yakusomeza bwenene! Enchungu yarhumire byagalikana ogwarhe obwira bukomere haguma na Yehova. Kandi yarhumire wagwarha orozo l’okulama esiku n’amango. (1 Yo. 4:9, 10, 19) Okuchihana kwawe emwa Yehova eli njira nguma nyinja bwenene y’okuyerekana eshukrani kw’echola chijiro ch’obuzigire bunene chirhasaga kushuba kubaho, n’oku yindi migisho yoshi Yehova akuhere. (Kum. 16:17; 2 Kor. 5:15) Ebyola binwa bigalukirwe omu somo lya 46, ly’echitabu, Siimira Akalamo Esiku n’Amango! ngingo 4 eli mun’evideo ya miniti 3 ederhere ntya: Ohe Mungu Entulo.

OLI TAYARI KUCHIHANA EMWA YEHOVA N’OKUBATIZWA SI?

9. Bulagurhe omuntu arhakwanene kuchiyunva asezezwe kuchihana emwa Yehova?

⁹ Nkabaga wakachiyunva ok’orhali tayari kuchihana emwa Yehova n’okubatizwa. Nkabaga bikuhemere ojire ebiwahindamula y’akalamo kawe kapatana n’amakanuni ma Yehova, changwa nkabaga bikuhemere bisanzi binene y’okomeza obwemere bwawe. (Kol. 2:6, 7) Abanafunzi boshi be Bibiblia barhajirira amajambere m’okuzigira Yehova chaligumira, n’emisole yoshi erhaba tayari kuguma emwa Yehova n’okubatizwa ey’eheherhe myaka minganangana. Ochihangane omenye eby’okwanene kuhindamula, s’orhachihuzanyaga n’abandi.—Gal. 6:4, 5.

10. Bichi wakajira amango wamamenya ok’orhaza kuba tayari kuchihana emwa Yehova n’okubatizwa? (Olole n’echisanduku “ Ku Balala Bakuliraga omu Mulala gw’Abahamirizi ba Yehova.”)

¹⁰ Chiro n’amango ochiyunvirhe k’orhaza kuba tayari kuchihana emwa Yehova, ogenderere kugwarha ogola muhigo. Obwire Yehova omusala akurhabale omenye ebyokwanene kuhindamula omu kalamo kawe. (Flp. 2:13; 3:16) Okwanene kuchizera oku Yehova ayunviriza esala lyawe anali tayari kukurhabala.—1 Yo. 5:14.

BULAGURHE BAGUMA BANAGANGANA KUCHIHANA EMWA YEHOVA N’OKUBATIZWA

11. Gurhe Yehova akarhurhabala yirhugenderera kubera bemana kuye?

¹¹ Bantu baguma banaba bali tayari kuchihana emwa Yehova n’okubatizwa, aliko eyibanagwerhe engangane. Nkabaga bakayubaha oku ‘hanola bamala kubatizwa bajira echaha chikomere banachibwa omu chibaga.’ Akaba ogwerhe obuba buli nk’obola, ochizere oku Yehova akuha byoshi okenere “yogenderera kulambagira omu njira emusimisize.” (Kol. 1:10) Arhabere bantu banene bajire ebintu binja, nawe akurhabala kujira ebintu binja. (1 Ko. 10:13) Eyola eli nguma omupanvu zinarhuma bantu bageke babanachibwa omu chibaga che Chikristu. Yehova anarhabala abantu bage yibagenderera kubera bemana.

12. Gurhe wakachilanga y’orhajira echaha chikomere?

¹² Buli muntu yeshi orhashinganene anashumikwa kujira ebintu bibi. (Yak. 1:14) Aliko,  wakachishoga ebiwajira amango wamageregezwa. Bibonekene oku wenyine wekwanene kuchishoga ebiwajira omu kalamo. Bantu baguma banaderha ok’omuntu arhakamenya kuyerekeza amawazo n’ebijiro bwage. Aliko obola buli bubeshi. Wakayiga kuyerekeza amawazo mawe mabi. Chiro n’amango wamageregezwa, wakachishoga kurhajira echaha. Hali ebindi bintu byakakurhabala y’orhajira echaha. Omufano, oku salira Yehova buli mango. Okugwarha eprograme nyinja y’efunzo lyawe lwawe y’okuyiga Echinwa cha Mungu. Okuja oku mbuganano oku kahunda. Okuja oku mahubiri. Okujira ebyola byoshi oku kahunda kwakaguha emisi y’okugenderera kubera mwimana ku Yehova. Omenye wayibagira habanakatyu oku Yehova akurhabala ojirentyo.—Gal. 5:16.

13. Lwiganyo luhe lwinja Yosefu arhulekere?

¹³ Byakuyorohera kubera mwimana ku Yehova, okachishoga embere wakasanzi eby’okwanene kujira amango wamageregezwa. Ebiblia erhubwirire luganjo lunene lw’abantu, balijirire ntyo chiro akaba oku barhaliri bashinganyanya. Omufano, muka Potifa alilonzeze mu mango manene kulala na Yosefu. Aliko, Yosefu ali amenyere embere wakasanzi bichi akwanene kujira. Ebiblia erhubwire “okw’alilahire,” aderha ntya: “Lero si gurhe nakajira echila chijiro chibi bwenene ntya, injirire na Mungu echaha?” (Mwa. 39:8-10) Kweri, Yosefu alimenyere bichi akajirirechiro embere muka Potifa amubwire alale naye. Echola chalirhumire byayorohera Yosefu kujira ebintu binja amamgo aliri ageregezwa.

14. Gurhe wakayiga kukabulira amashumi mabi?

¹⁴ Gurhe wakayiganya omufano gwa Yosefu n’okukabulira amashumi mabi? Wakachishoga kurhenga zene ebi nji wajira amango nji wageregezwa. Oyige kulahira ahola hanaho ebintu Yehova ashomba, orhanashibaga wabiwazako chiro. (Zb. 97:10; 119:165) Okajirantyo, orhakajira echaha amango nji wageregezwa. Nji waba eyʼomenyere gurhe wakajira amango wamageregezwa.

15. Gurhe omuntu akayerekana ‘okwʼali alonza [Yeova] nʼomurhima goshiʼ? (Waebrania 11:6)

¹⁵ Nkabaga wakaba y’omenyere kuwabwene obukweri, onalonze kusimisa Yehova n’omurhima gwawe goshi, aliko oli wachiyunva nk’orhaza kuba tayari kuchihana emwa Yehova n’okubatizwa. Wakajira nk’oku Mwami Daudi ajiraga. Wakalakirira Yehova ntya:  “Mungu we, ogerereze omurhima gwani. Ondolereze, onamenye n’amawazo mandazize. Olole akaba munyono muli njira ndebe yakangeza oku bugali, oje wanyerekeza omu njira y’esiku n’amango.” (Zb. 139:23, 24) Yehova anagisha balala “banamulonza n’omurhima goshi.” Ebyoli wajira y’ohikira omuhigo g’okuchihana emwa Yehova n’okubatizwa, bimuyerekere ok’oli wamulonza n’omurhima goshi.—Osome Waebrania 11:6.

OGENDERERE KUBERA HOFI NA YEHOVA

16-17. Gurhe Yehova anakulula balala bakulire omu bukweri? (Yohana 6:44)

¹⁶ Yesu aliderhere oku Yehova yenakulula emwage abanafunzi bage. (Osome Yohana 6:44.) Owaze kangana gurhe echola chili chakusomeza na bichi bikumalire. Buli muntu yeshi Yehova anahamagala emunda ali, anaba y’amubwene mu chintu chilebe ch’akamaro. Anabona buli muntu nka “buchire bwage bwʼakachiro” changwa “buchire bwage bwʼakamaro.” (Kum. 7:6; mahugulo m’eshishi.) Intyo kunawe anakubona.

¹⁷ Nkabaga, byakaba eyiwakuliraga omu mulala gw’Abahamirizi ba Yehova. Nkabaga wakabona kubikuhemere okolere Yehova bulala abazere bawe bali bajira ntyo, s’arhali bulala Yehova akukulwire emwage. Aliko, Ebiblia ederhe ntya: “Muyegere Mungu naye abayegera.” (Yak. 4:8; 1 Ny. 28:9) Amango wamarhola omuhigo g’okuyegera Yehova, anaba y’ali tayari kukuyegereza emunda ali. Yehova arhakubona nka muntu oli omu chigusho konyine, yenakulula buli muntu emwage kuhebamo na buli yeshi wakuliraga omu kuli. Amango omuntu amarhola entambu y’okuyegera Yehova, anabay’amajira nk’okurhwabonaga omu lwandiko lya Yakobo 4:8.—Ohuzanye na 2 Watesalonike 2:13.

18. Bichi rhwaganirira omu mwazi gukulikireho? (Zaburi 40:8)

¹⁸ Amango wamachihana emwa Yehova n’okubatizwa, onaba yiwamajira kuguma n’oku Yesu ajiraga. Alichihanire emunda Eshe ali oku bulonza anajira byoshi amuhemere. (Osome Zaburi 40:8; Ebr. 10:7) Omu mwazi gukulikireho, nji rhwaganira bichi byakakurhabala ogenderere kukolera Yehova okubwimana enyuma y’okubatizwa.