1-2. a) Paulo aliri mu hali zihe amango ayandikira Abakristu b’omu Efeso, na bulagurhe abayandikiraga? b) Bibazo bihe rhwaganirako?

 AMANGO entumwa Paulo aliri omu prizo e Roma, alilonzeze kuheba omurhima bene-babo b’Abakristu. Abayandikira amaruba, bulala arhakagalire kubalambagirira masu oku masu. Ayandikiraga Abakristu b’omu Efeso maguma mw’amola maruba omu mwaka gwa 60 changwa 61 N.K.Y.—Efe. 1:1; 4:1.

² Hofi myaka 10 embere w’aho, Paulo aligezeze ebisanzi omu Efeso y’ali ahubiri n’okuyigiriza emyazi minja. (Mdo. 19:1, 8-10; 20:20, 21) Alizigiire bwenene bene-babo, analilonzeze kubarhabala babere bemana ku Yehova. Aliko si, bichi byarhumaga ayandikira Abakristu bashigwa okubilolere omwizimya n’omwangaza? Kandi, bichi ebyola ayandikaga byakayigiriza Abakristu boshi? Lekaga rhuganire oku bishubizo by’ebyola bibazo.

KURHENGA OMU MWIZIMYA N’OKUJA OMU MWANGAZA

3. Binwa bihe by’omufano Paulo alikoleseze omu maruba mage ayandikiraga Abakristu b’omu Efeso?

³ Paulo ayandikira Abakristu b’omu Efeso ntya: “Mango maguma mwaliri mwizimya, aliko zene mukala muli mwangaza.” (Efe. 5:8) Paulo alikoleseze ebinwa by’omufano omwizimya n’omwangaza omu kufasiriya ehali Abakristu b’omu Efeso balirimo. Lekaga rhuganire bulagurhe Paulo aderhaga oku mango maguma Abakristu b’omu Efeso baliri “mwizimya.”

4. Mu njira zihe Abakristu b’omu Efeso baliri omu mwizimya oku bilolere eby’edini?

⁴ Amadini m’obubeshi. Embere y’okuyiga obukweri n’okuba Bakristu, Abaefeso Paulo ayandikiraga baliri omu buja bw’amadini m’obubeshi, banaliri bakola eby’obukurungu. Omu vile ye Efeso mwaliri ehekalu lya mungu w’omukazi wa Bagiriki  waliyirikirwe Artemi. Bantu banene baliri babona elyola hekalu oku lisomeze omu mahekalu moshi machigerere kubaho. Abantu baliri baja mw’elyola hekalu kuharamya ebishushanyo. Abantu baliri bakola esanamu mw’agola mango baliri bapata franga zinene omu kukola n’okuguza ezola sanamu z’elyola hekalu na mungu walyo. (Mdo. 19:23-27) Bantu banene omu Efeso, baliri bakola eby’obukurungu.—Mdo. 19:19.

5. Mu njira ehe Abantu b’omu Efeso baliri omu bijiro by’omwizimya?

⁵ Ebijiro by’eshoni. Abantu b’omu Efeso baliri bajira eby’obubaraga bwenene, barhanaliri bayunva eshoni oku bilolere ebijiro byabo. Omu mateatre mabo m’omu vile n’omu siku zabo zikulu z’edini mwagendaga mwazigana kuba eby’obubaraga bwenene. (Efe. 5:3) Banene omu balilamire omu Efeso “balikala eyibarhachifa eshoni chiro n’ehityu,” k’okuderha, “okujira amabi kurhachigendaga kwababwira chintu chiro.” (Efe. 4:17-19) Embere bayige amakanuni ma Yehova oku bilolere echinja n’echibi, ezamiri yabo erhachingendaga yabaluma amango bajirire echintu chibi. Kandi barhagendaga balaga oku bilolere okuntu Yehova achiyunva eju y’ebijiro byabo. Bobola, “obwenge bwabo bwaliri omu mwizimya n’okuhekwa hale n’akalamo karhengere emwa Mungu.”

6. Bulagurhe Paulo abwiraga Abakristu b’omu Efeso oku balikala “bali mwangaza”?

⁶ Aliko, bantu baguma b’omu Efeso barhaberaga omu mwizimya. Paulo aliyandikire oku “bakala bali omu mwangaza oku biyerekere Waliha.” (Efe. 5:8) Balikala balamire nk’oku Echinwa cha Yehova chiderhere chaliri nka mwanganza gwaliri gwabayerekeza. (Zb. 119:105) Abola Bakristu b’omu Efeso babaga balekere edini lyabo ly’obubeshi n’ebijiro by’eshoni. Babaga bakala bali “banyakuyiganya Mungu” banaliri bajira koshi bakagala yibaharamya Yehova n’oku musimisa.—Efe. 5:1.

7. Nka gurhe ehali yerhu eli kuguma n’ey’Abakristu banene b’omu Efeso?

⁷ Kuguma nabo, nerhu amango rhurhaliza kumenya okuli, rhwaliri omu mwizimya  gw’enyigirizo z’edini n’ebijiro by’eshoni. Baguma mu rhwabo baliri bajira amafete m’amadini m’obubeshi, n’abandi baliri bajira ebijiro by’eshoni omu kalamo kabo. Aliko rhwamalire kuyiga amakanuni ma Yehova oku bilolere ebinja n’ebibi, rhwalekana n’ebyola bijiro. Rhwarhondera kulama nk’oku Yehova arhuhemere. Bobola, rhwalipatire nyungu zinene. (Isa. 48:17) Aliko, buli mango birhaba biyorohere kubera hale n’omwizimya rhwarhengeremo, “n’okulambagira nka bana b’omwangaza.” Nka gurhe rhwakajira ntyo?

MUYAKE OMWIZIMYA

8. Nk’oku olwandiko lwa Waefeso 5:3-5 luderhere, bichi Abakristu b’omu Efeso balikwanene kuchilangako?

⁸ Osome Waefeso 5:3-5. Yi bagenderera omu lugenzi lurhali m’omwizimya, Abakristu b’omu Efeso balikwanene kulekana n’ebijiro birhasimisa Yehova. Echola chaliheberemo ebijiro by’obubaraga n’ebinwa b’obumaguza. Paulo ayibusa Abakristu b’omu Efeso oku balikwanene kuchilanga n’ebyola bijiro, akaba balilonzeze “kushokola Obwami bwa Kristu na Mungu.”

9. Bulagurhe rhukwanene kuchilanga yirhurhajira echintu choshi-choshi chakarhugeza oku bijiro by’eshoni?

⁹ Rhukwanene kugenderera kubera merangwe yirhurhajira “ebijiro bw’omwizimya.” (Efe. 5:11) Bili by’okuli bwenene okw’amango omuntu amalola, kuyunviriza changwa kuderha ebinwa by’eshoni, changwa by’obumaguza byakamuyorohera kujira ebintu bibi. (Mwa. 3:6; Yak. 1:14, 15) Mu chihugo chiguma, bene-berhu na bali-berhu banene babere “bera” omu bigusho by’okuganiriramo oku Enternete. Burhanzi banene mubo baliri baganira oku bilolere Yehova n’oku bilolere okuli. Aliko kubuya buya bahwanza kuganira oku bintu birhasimisa Yehova. Bayinja baganira ahanene oku bilolere echijiro ch’obuhya. Banene mw’abola bene-berhu na bali-berhu baderha okw’ezola nganiro zirhachere zaluha eyi zabahisize oku bijiro by’obubaraga.

10. Bichi Shetani alonzeze rhuchizerage? (Waefeso 5:6)

¹⁰ Linola gulu lya Shetani yilyachihangana kurhurhebeka rhuchizere okw’ebi Yehova aderhere oku bili by’eshoni birhanachere, oku birhavire byaba bibi. (2 Pe. 2:19) Ebyola birharhusomeze! Buli mango Shetani achihangana kuvuruga abantu yibarharhegera ebinja n’ebibi. (Isa. 5:20; 2 Ko. 4:4) Ch’echirhumire ma filme manene, eprograme zinene z’etelevizyo, n’esite ze Enternete binaheba embere amawazo barhafarhene n’amakanuni m’okunali ma Yehova! Shetani alonzeze rhuwaze okw’ebijiro birhachere n’okulama akalamo k’obumaguza biyunjwire omu gulu zene birhali bibi si bili byakuchisimisa na nta buhanya byakalerha.—Soma Waefeso 5:6.

11. Nka gurhe ebi mwali-werhu Angela agereremo biyerekene akamaro k’okukolesa ehano ly’obwengehe lili omu Waefeso 5:7? (Ololole n’efoto.)

¹¹ Shetani alonzeze rhujire obwira haguma n’abantu bakarhuma byarhukomerera kukenga amakanuni ma Yehova. Echola ch’echarhumaga Paulo ahanula Abakristu b’omu Efeso: “Mumenye mwakakomerana nabo,” k’okuderha, na balala banajira ebintu bibihire omu masu ma Mungu. (Efe. 5:7) Rhukwanene kuyibuka okw’arhali abantu rhunageza ebisanzi nabo masu oku masu bonyine babera berhu, si na balala rhunageza nabo akasanzi oku site ze Enternete z’okuganira n’abantu banene. Abakristu b’omu Efeso ba mira bowe barhaliri bahurana n’echola chibazo ch’okugwarha abera b’oku Enternete. Angela, a olamire omu Asie, alibwene gurhe esite ze Enternete zakalerha obuhanya. Aderhere ntya: “Kubuya-buya amawazo mani mahindamuka,  hagera amango eyi ntachilaga n’okulonza abera banakenga amakanuni me Biblia. Buzinda, nahwanza kuwaza oku kurhali kubi oku kulikiranya akalamo karhasimisize Yehova.” Aliko bashamuka baguma b’echibaga bagwerhe obuzigire barhabala Angela ahindamule akalamo kage. Aderhere ntya: “Zene indi nachiseza oku bilolere Yehova ahali h’okuchiseza oku bilolere esite ze Enternete z’okuganirirako n’abantu banene.”

12. Bichi byarhurhabala kukenga amakanuni ma Yehova m’okuchigendesa oku bilolere echinja n’echibi?

¹² Rhukwanene kulwisha amawazo m’elila gulu mayemerere ebijiro by’eshoni. Rhumenyere ok’okujira ebyola bijiro kuli kubi. (Efe. 4:19, 20) Kuli kwinja okuchibaza ntya: ‘Inanjira okwani koshi omu kuyaka obwira burhakwanene haguma na banankola nabo, abanansoma nabo, changwa abandi barhakenga amakanuni ma Yehova me haki? Inankulikira oku bushiru ebindi bintu Yehova aderhere oku bili binja changwa oku bili bibi, chiro akaba oku abandi bantu banjirira kubi bulala najirire ntyo si?’ Nk’oku biderherwe omu 2 Timoteo 2:20-22, nkabaga kandi rhwakakenera kuba merangwe amango rhuli rhwachishoga abera b’okumurhima omu chibaga che Chikristu. Rhwakabika omu bwenge oku baguma barhakarhurhabala kubera bemana omu kasi ka Yehova.

MULAMBAGIRE “NKA BANA B’OMWANGAZA”

13. “Okulambagira nk’abana b’omwangaza” k’okuderha gurhe? (Waefeso 5:7-9)

¹³ Paulo alihebere omurhima Abakristu b’omu Efeso oku barhakabuliraga konyine omwizimya aliko kandi “balambagire nka bana b’omwangaza.” (Osome Waefeso 5:7-9.) Bichi ebyola bilonzeze kuderha? Omu binwa bigeke, ebyola bilonzeze kuderha oku rhukwanene kuchigendesa nka Bakristu b’okuli amango moshi. Njira nguma yakarhurhabala rhuhikire ogola muhigo, kuli kuyiga Echinwa cha Mungu oku kahunda haguma n’ebitabu byerhu biyumangiire oku Biblia buli lusiku. Kuli kwinja bwenene oku seza obwenge oku mifano n’enyigirizo za Yesu Kristu, “oli mwangaza gw’egulu.”—Yoh. 8:12; Mez. 6:23.

14. Gurhe eroho lichesibwa lyakarhurhabala?

 ¹⁴ Kandi rhukenere oburhabale bw’eroho lichesibwa lya Mungu yirhugenderera kuchigendesa “nka bana b’omwangaza.” Bulagurhe? Bulala birhayorohere kuyorha rhuchere mu linola gulu libi. (1 Te. 4:3-5, 7, 8) Eroho lichesibwa lyakarhurhabala kulwisa amawazo m’abantu ba mu linola gulu, barhali babona ebintu nk’oku Yehova anabibona. Eroho lichesibwa lyakarhurhabala kandi kuyerekana “engeso zoshi zoshi z’obwinja n’okunali.”—Efe. 5:9.

15. Mu njira zihe rhunapatamo eroho lichesibwa? (Waefeso 5:19, 20)

¹⁵ Njira nguma rhwakagwarha mwe roho lichesibwa, kuli kulihema omu sala. Yesu aliderhere oku Yehova “aha eroho lichesibwa balala bamuhemalyo.” (Lu. 11:13) Kandi rhunapata eroho lichesibwa amango rhuli rhwakuuza Yehova haguma n’abandi oku mbuganano z’Echikristu. (Osome Waefeso 5:19, 20.) Eroho lichesibwa lya Mungu lyarhurhabala rhulame omu njira emusimisize.

16. Bichi byarhurhabala kurhola esimikiro z’obwengehe? (Waefeso 5:10, 17)

¹⁶ Amango rhuli rhwalonza kurhola esimikiro z’akamaro birhuhemere rhumenye “obulonza bwa Yehova buli buhe” n’okuja rhwakola kuguma nabo. (Osome Waefeso 5:10, 17.) Amango rhwamarhegera amakanuni me Biblia maderhere oku hali yerhu, rhunalonza amawazo ma Mungu maderhere kw’echola. Amango rhwamakolesa amakanuni mage, rhwagala kurhola esimikiro zinja.

17. Nka gurhe rhwakakolesa ebisanzi byerhu oku bwengehe? (Waefeso 5:15, 16) (Olole n’efoto.)

¹⁷ Kandi Paulo ali hanwire Abakristu b’omu Efeso bakolese ebisanzi byabo oku bwengehe. (Osome Waefeso 5:15, 16.) “Omubi,” k’okuderha omwanzi werhu Shetani, akasima rhugwarhe binene by’okukola omu kukulikiranya ebintu bya linola gulu, nantyo rhubule ebisanzi by’okukola akasi ka Mungu. (1 Yo. 5:19) Omukristu akahwanza kuchiseza bwenene omu kulonza efranga, amasomo changwa akasi, ahali h’okulonza enjira zinene  akakoleramo Yehova. Nk’a jirire ntyo anaba eyi amayerekana okw’arhondere kuwaza kuguma n’abantu barhakolera Yehova. Kweri, okujira ntyo kurhali kubi, s’aliko ebyola byoshi birhakwanene kurhola enafasi y’oburhanzi omu kalamo kerhu. Yi rhulambagira “nka bana b’omwangaza,” birhuhemere “rhukolese bwinja ebisanzi [byerhu],” k’okuderha kuchiseza kweri oku bintu bili by’akamaro.

18. Bichi Donald alijirire yakolesa bwinja akasanzi kage?

¹⁸ Olole mu njira zihe wakakoleramo Yehova bwenene. Intyo ku mwene-werhu Donald olamire omu chihugo che Afrique du Sud alijirire. Aderhere ntya: “Nawaza oku kalamo kani, na nasalira bwenene emwa Yehova antabale omu kasi k’okuhubiri. Nasalira yimpata akasi kakantabala impate bisanzi binene by’okuhubiri. Kugerera oburhabale bwa Yehova napata akasi. Nyono na mukani rhwarhondera akasi k’amango moshi.”

19. Nka gurhe rhwakagenderera kulambagira “nka bana b’omwangaza”?

¹⁹ Amaruba Paulo ayandikiraga Abakristu b’omu Efeso, malibarhabere bagenderere kubera bemana emwa Yehova. Kandi obola bwerekezi bwakarhurhabala nerhu. Nk’oku rhwayigire, amola maruba makarhurhabala rhuchishoge eby’okuchisimisa n’abera oku bwengehe. Makarhurhabala rhuyige Ebiblia oku kahunda, y’ogola mwangaza g’obukweri gugenderera kurhuyerekeza mu byoshi rhuli rhwajira. Kandi mayerekene akamaro k’eroho lichesibwa linarhurhabala rhuyerekane engeso zinja. Okukolesa ebi Paulo ayandikaga kwakarhurhabala rhurhole esimikiro z’obwengehe zipatene n’amawazo ma Yehova. Rhukajira ntyo, rhwagala kuyaka omwizimya gwa linola gulu libi n’okugenderera kubera omu mwangaza!