MWAZI G’OKUYIGA 11
OLWIMPO 129 Rhwagenderera Kulembera
Wakalembera Chiro Akaba Oli Wahurana Ebibazo
“Walembeere eju y’ezino lyani.”—UFU. 2:3.
EBIRHWAYIGA
Rhwakagenderera kukolera Yehova zene omu kulembera chiro akaba yirhwahurana ebibazo.
1. Migisho ehe miguma yirhwasimira bulala rhuli omu lubaga lwa Yehova?
KWERI rhugwerhe migisho minene y’okuba omu lubaga lwa Yehova mu chinola chihe chikomere ch’esiku zizinda. Akalamo mu linola gulu yikagenderera kubiha bwenene, aliko Yehova arhuhere bene-berhu na bali-berhu b’okurhurhabala. (Zb. 133:1) Arhurhabere rhugwarhe omulala guli m’obusime. (Efe. 5:33–6:1) Kandi arhuhere obwengehe rhukenere yirhulwisa ebibazo, rhunagwarhe n’obusime.
2. Bichi rhukenere kujira na bulagurhe?
2 Chiro akaba ntyo, rhukwanene kujira okwerhu koshi yirhugenderera kukolera Yehova oku bwimana. Bulagurhe? Bulala mango maguma rhwakagayiswa n’okurhashingana kw’abandi. Kandi rhwakayunva rhuvunikire omurhima amango rhwamajira amagosa, ahanene nka rhwamagalukira agola magosa ganagola. Birhuhemere rhugenderere kulembera omu kasi ka Yehova 1) amango owerhu Mukristu amarhugoseza, 2) amango eyi rhushabene naye amarhuvuna omurhima, 3) n’amango rhwamachiyunva rhuvunikire omurhima eju y’amagosa rhwajiraga. Mu gunola mwazi, rhwaganira ku buli nguma mw’ezola hali. Kandi rhwaganira bichi rhwakayiga kugerera abantu bemana baganirirwe omu Biblia.
OLEMBERE AMANGO OWENYU MUKRISTU AMAKUGOSEZA
3. Bigeregezo bihe abantu ba Yehova bali bahurana?
3 Echigeregezo. Oborhere bw’aberhu Bakristu baguma bwakarhugayisa. Abandi bakarhukolera echintu ch’akarhugayisa changwa bakarhukolera buzira bonjo. Abashamuka omu chibaga bakajira amagosa. Ebibazo bili nk’ebyola byakarhuma baguma bachibaza akaba lunola lunali lubaga lwa Yehova. Ahali h’okugenderera kukolera Mungu “chirhugo oku chindi” haguma na bene-babo na bali-babo, bakaleka kuganira n’ababagosezaga changwa banaleka kuhika oku mbuganano. (Sef. 3:9) Ka kuli kwinja okujira ntyo? Rhuganire oku mufano gwa muntu muguma oganirirwe omu Biblia walihurene ebibazo bili nk’ebyola.
4. Bigeregezo bihe entumwa Paulo alihurene?
4 Omufano guli omu Biblia. Entumwa Paulo alimenyere oku bene-babo na bali-babo b’Abakristu barhali bashinganyanya. Omufano, baguma b’omu chibaga che Yerusalemu baliri bayubaha Paulo. (Mdo. 9:26) Buzinda, bantu baguma mubo bamuderha kubi yibamuharabisiza erenge. (2 Ko. 10:10) Paulo alibwene omushamuka oli warhola esimikiro zibi, nkabaga zakarhumire abandi baleka echibaga. (Gal. 2:11, 12) Na muguma omu bera b’okumurhima ba Paulo yekala Marko, alimuvunire omurhima bwenene. (Mdo. 15:37, 38) Paulo akalekere nguma mw’ezola hali yarhuma aleka kugeza ebisanzi haguma n’abola bamugosezaga. Aliko, agenderera kuyereka bene-babo na bali-babo obuzigire, anagenderera kukolera Yehova oku bwimana. Bichi byarhabalaga Paulo kulembera?
5. Bichi byarhabalaga Paulo agale kubabalira bene-babo na bali-babo? (Wakolosai 3:13, 14) (Olole n’efoto.)
5 Paulo alizigire bene-babo na bali-babo. Obuzigire Paulo aligwerhe oku bandi, bwalimushunikire amenye achiseza oku kurhashinganana kw’abandi, aliko achiseze oku ngeso zabo zinja. Kandi, obuzigire bwalirhabere Paulo ababalire abandi, n’echola ch’arhuhemere nerhu rhujire omu Wakolosai 3:13, 14. (Osome.) Lola okuntu alikolere Marko. Chiro akaba oku Marko alijahikire Paulo omu lugenzi lwage lurhanzi l’obumisiyonere, Paulo arhamubikiraga omujinya. Buzinda, amango Paulo ayandikira echibaga ch’Ekolosai amaruba m’obuzigire, alisingize Marko nka wabo mukozi w’akamaro, “na shoko y’echirhulirizo chinene.” (Kol. 4:10, 11) N’amango Paulo aliri omu pirizo e Roma, alihemere Marko oburhabale. (2 Ti. 4:11) Kweri, Paulo alibabalire bene-babo anayorha haguma nabo. Bichi rhwakayiga kugerera omufano gwa Paulo?
Paulo arhabikiraga Barnaba na Marko omujinya amango barhaliyunvikene. Aliko buzinda alikolere haguma na Marko oku busime (Olole echifungo cha 5)
6-7. Bichi byakarhurhabala rhugenderere kuzigira bene-berhu na bali-berhu chiro akaba rhurhali bashinganyanya? (1 Yohana 4:7)
6 Bichi ogola mufano gurhuyigirize. Yehova alonzeze rhulembere amango rhuli rhwayereka bene-berhu na bali-berhu obuzigire. (Osome 1 Yohana 4:7.) Amango bene-berhu changwa bali-berhu barharhukolere okuntu Omukristu akakolera owabo, rhwakachizera oku barhalilonzeze barhujirire kubi, n’oku bali bachiseza kujira ebi Yehova alonzeze. (Mez. 12:18) Mungu anazigira abakozi bage bemana chiro akaba barhali bashinganyanya. Chiro akaba rhwajirire amagosa, anagenderera kuba mwira werhu arhanarhuyunvira oburhe. (Zb. 103:9) Rhugwerhe shukrani nene bwenene okubona gurhe Yehova anarhubabalira, nerhu rhukwanene kumuyiganya omu kubabalira abandi!—Efe. 4:32–5:1.
7 Rhuyibuke ok’okuntu obuzinda buli bwayegera, rhukwanene kuyorha haguma na bene-berhu na bali-berhu. Rhwakachizera okw’ebigeregezo byagenderera kuluga. Mango maguma rhwakachibugana omu pirizo eju y’obwemere bwerhu. Amango ebyola byamarhuhikira, rhwakakenera bene-berhu na bali-berhu bwenene kulusha. (Mez. 17:17) Ba nka wawaza ebyahikiraga mwene-werhu oyirikirwe Josep a oli mushamuka w’echibaga omu chihugo che Espagne. Yewe n’abandi bene-berhu balifungirwe haguma eju y’okurhaba lunda lulebe omu by’epolitike. Aderhere ntya: “Omu pirizo, rhweshi rhwalilamire haguma, bobola, mango maguma rhwaliri rhwagayisanya, rhwalikwanene kulemberana buli muguma n’owindi n’okubabalirana oku bulonza. Echola charhurhabala rhuyorhe omu bulanzi n’omu buguma. Rhwalizungulukirwe n’abandi bantu barhaliri baharamya Yehova. Mango maguma nalivunikire okuboko, banshweka kw’ebandaje ntakanachigalire kukolesa okola kuboko, changwa kuchikolera echintu n’echiguma. Aliko muguma mu bene-berhu aliri ameshera ebintu n’okunshishikala omu zindi njira zoshi. Balinyerekere obuzigire burhengere oku murhima amango nalibukenere bwenene.” Rhugwerhe empanvu zinja z’okumala ebibazo rhugwerhe ahakagarhi kerhu kurhenga zene!
OGENDERERE KULEMBERA AMANGO EY’OSHABENE NAYE AMAKUVUNA OMURHIMA
8. Chigeregezo chihe abashabene banahurana?
8 Echigeregezo. Buli bunyumpa bujira ebibazo. Ebiblia ederhere bwinja bwinja okw’abashabene bagwarha “amalibuko omu mubiri gwabo.” (1 Ko. 7:28) Bulagurhe? Bulala omulume n’omukazi barhashinganene, barhanagwerhe engeso zili kuguma barhanasiima ebintu biguma. Abashabene bakaba eyi bakuliraga omu fasi n’emicho elengene. Nkabaga okw’ebisanzi yibyanagera bakahwanza kuyerekana ngeso ziguma barhaliri bayerekana amango barhaliza kushabana. Chiguma mw’ebyola chakalerha ebibazo. Nkabaga bakahwanza kuhesanya amagosa buli muguma n’owindi eju y’ebibazo byarhengerere omu bunyumpa, chiro akaba oku bombi banajira amagosa banalikwanene kuyikala n’okumala ebyola bibazo. Chiro bakanawaza oku balekane changwa bashande obuhya. Aliko si, okulekana changwa okushanda obuhya kokwamala ebibazo byabo? b Lekaga rhuganire oku mufano gwa mukazi muguma waliyorhere mwimana emwa Yehova chiro akaba okw’eba alimulerhere bibazo binene.
9. Chigeregezo chihe Abigaili alihurene?
9 Omufano guli omu Biblia. Abigaili alishabene na Nabali, eye Biblia ederhere oku aliri muntu mubi analiri achigendesa kubi. (1 Sa. 25:3) Bikwanene kuba eyi byali bikomerere Abigaili kulama n’omulume oli nk’oyola. Abigaili alipatire orozo l’okushanda obuhya bwage si? Nechi. Alipatire orozo l’okujira ntyo amango Daudi wali wachagwirwe kuba mwami we Izraeli omu mango mayinjire, ayinja kuyirha Nabali wabaga amudukangire n’abalume aliri nabo. (1 Sa. 25:9-13) Abigaili akalibirhire n’okuhereza Daudi orozo l’okuyirha eba Nabali. Aliko arhajiraga ntyo, bobola arhebereza Daudi aleke Nabali agenderere kulama. (1 Sa. 25:23-27) Bichi byarhumaga ajira ntyo?
10. Bulagurhe Abigaili aliyorhere omu bunyumpa buli mw’ebibazo?
10 Abigaili alizigiire Yehova analikengere amakanuni mage oku bilolere obuhya. Byakashobokana okw’alimenyere ebi Mungu aderhaga amango ahereza Adamu omukazi. (Mwa. 2:24) Abigaili alimenyere ok’obuhya buli buchesibwa omu masu ma Yehova. Alilonzeze kusimisa Mungu, n’echola chakamushunikire ajire okw’age koshi y’ayokola omulala gwage goshi, kuhebamo n’eba. Ajira juba juba y’abuza Daudi kuyirha Nabali. Aliri tayari kuhema obonjo oku gosa arhajiraga. Kweri, Yehova alizigiire oyola mukazi walilagire oku nyungu z’abandi. Bichi abalume n’abakazi bakayiga oku bilolere omufano gwa Abigaili?
11. a) Bichi Yehova alonzeze abashabene bajirage? (Waefeso 5:33) b) Bichi ebi Carmen ajiraga y’alanga obuhya bwage bikuyigirize? (Olole n’efoto.)
11 Bichi ogola mufano gurhuyigirize. Yehova alonzeze omulume n’omukazi bagenderere kulama haguma chiro akaba muguma akabona oku bikomere kulama n’owabo. Mungu akwanene kuba anachiyunva asimire amango amabona abashabene bali bakola haguma yibamala ebibazo, n’okuyerekana obuzigire n’obukenge buli muguma n’owindi burhagwerhe bwikazize. (Osome Waefeso 5:33.) Rhuganire oku mufano gwa mwali-werhu Carmen. Hagerere myaka 6 ntya enyuma y’okujira obuhya, Carmen arhondera kuyiga Ebiblia haguma n’Abahamirizi ba Yehova n’enyuma waho abatizwa. Carmen aderhere ntya: “Bani arhalisimire eyola simikiro narholaga. Aliyunvirhe oburhe bulala naliri nageza ebisanzi eyi ntali haguma naye, eju y’okuja oku mbuganano na bulala nalirholere esimikiro y’okukolera Yehova. Arhondera kundukanga n’okuhwanza kunyubahiriza okw’andeka.” Chiro akaba ntyo, Carmen agenderera kulembera n’okuyorha omu buhya bwage. Mu myaka 50, aliri agenderera kulembera n’okujira okwage koshi y’azigira eba n’okumukenga. Mwali-werhu Carmen ayongerere ntya: “Okuntu emyaka yanaliri yagera, naliyigire bwinja okuntu nakamenya gurhe bani ali achiyunva n’okuntu nakaganira naye omu njira y’obukenge. Nalimenyere ok’obuhya buli buchesibwa omu masu ma Yehova, nanajira okwani koshi yimbulanga. Intapimaga habana katyu kuleka bani bulala nzigiire Yehova.” c Amango ebibazo byamarhengerera omu buhya bwawe, wakachizera oku Yehova akurhabala olembere omu buhya bwawe.
Bichi wayigire oku bilolere ebi Abigaili ajiraga oku bulonza y’ayokola omulala gwage? (Olole echifungo che 11)
ORHAVUNIKAGA OMURHIMA AMANGO WAMAJIRA ECHAHA CHIKOMEERE
12. Chigeregezo chihe rhwakahurana akaba rhwakolere echaha chikomeere?
12 Echigeregezo. Rhwakayunva rhuvunikire omurhima bwenene amango rhwamajira echaha chikomere. Ebyaha byerhu byakarhuleka eyi rhuli rhwachiyunva “rhuvunagulikire n’okuhondagulwa.” (Zb. 51:17) Mwene-werhu muguma oyirikirwe Robert aliri ey’amakola mu myaka minene n’omwete y’ayeneza ebihemerwe yaba mugwasi w’akasi. Aliko ajira echaha chikomere eyi akola ali mugwasi w’akasi anarhegera okw’agoseze Yehova. Aderhere ntya: “Amango menya echi najirire, ezamiri yanduma bwenene. N’enyuma waho, Esitoma yahwanza kunduma. Nalilakire na nasalira Yehova. Nayibuka amango naliri nawaza oku Mungu arhakafa ayunvirize amasala mani habana katyu bulala namugoseze.” Nka rhwamakola echaha chikomere, rhwakachiyunva rhuvunikire omurhima n’okurhondera kuwaza oku Yehova arhujahikire n’oku nta mpanvu yoshi yoshi rhugwerhe y’okushuba kumukolera. (Zb. 38:4) Akaba onachiyunva ntyo, owaze oku mufano muguma guli omu Biblia g’omuntu mwimana waligenderere kukolera Yehova chiro akaba okw’alikolere echaha chikomere.
13. Chaha chihe chikomeere Petro alijirire, n’amandi magosa mahe alijirire embere waho?
13 Omufano guli omu Biblia. Ebudufu embere Yesu afe, Petro alikolere magosa manene n’eju y’amola magosa akola echaha chikomeere bwenene. Burhanzi, Petro alichinihire bwenene n’echola charhuma achihala okw’akayorhere mwimana chiro akaba ezindi ntumwa zakalekere Yesu. (Mk. 14:27-29) Buzinda amango baliri omu bustani ye Getsemane, Petro aligambirwe kuyorha azene turu zinene. (Mk. 14:32, 37-41) Naho amango bantu banene bayinja kufarha Yesu eyi bagwerhe engorho n’ebibando, Petro amuleka. (Mk. 14:50) Buzinda Petro analapa okw’arhenji Yesu turu 3 zoshi, chiro anaheba echilapo k’obola bubeshi. (Mk. 14:66-71) Gurhe Petro alijirire amango amenya oku ajirire echaha chikomeere? Petro ayunva agayire bwenene, anarhondera kulira, nkabaga alichiyunvirhe kubi bwenene eju y’ebyajirire. (Mk. 14:72) Ba nka wawaza malumwa mangana gurhe Petro aliyunvirhe agwerhe esa z’embere bayirhe mwira wage Yesu. Petro akwanene kuba eyi alichuyunvirhe ntakamaro agwerhe!
14. Bichi byarhabalaga Petro agenderere kukolera Yehova? (Olole efoto y’oku chiganda.)
14 Petro aligwerhe mpanvu zinene z’akarhumire agenderera kukolera Yehova. Arhachichaga oku bandi, alishimbire ababo banafunzi banalimuhebere omurhima. (Lu. 24:33) Kandi amango Yesu afuuka, arhengerera Petro bulala alilonzeze kumuheba omurhima. (Lu. 24:34; 1 Ko. 15:5) Buzinda, ahali h’okukalihira mwira wage Petro, amubwira okw’amuha ezindi ngabane zinene. (Yoh. 21:15-17) Petro alimenyere okw’ajirire echaha chikomere, aliko aligenderere kuchihangana kujira ebinja. Bulagurhe? Bulala alichizerere oku nahamwabo Yesu, achimuzigire. Na bene-babo Petro b’Abakristu baligenderere kumurhabala. Bichi omufano gwa Petro gwakarhuyigiriza?
Omu Yohana 21:15-17 hayerekene oku Yesu arhajahikaga Petro, n’echola chaheba Petro omurhima agenderere kulembera (Olole echifungo che 14)
15. Bichi Yehova alonzeze rhuchizerage? (Zaburi 86:5; Waroma 8:38, 39) (Olole n’efoto.)
15 Bichi ogola mufano gurhuyigirize. Yehova alonzeze rhuchizere okw’arhuzigiire analonzeze kurhubabalira. (Osome Zaburi 86:5; Waroma 8:38, 39.) Amango rhwamajira echaha, rhwakachiyunva rhuli banyamagosa. Ebyola biyunvikene na buli muntu yeshi akachiyunva ntyo. Aliko, rhurhakwanene kuchiyunva nka Yehova arhachirhuzigire, n’okw’arhakachirhubabalira. Ahali h’okujira ntyo, rhukwanene kuhema oburhabale juba juba. Robert rhwabaga rhwaganirireko aderhere ntya: “Nakolaga echaha bulala nalichilangalire nyono nyenyine oku nakahimire echola chigeregezo.” Alirhegerere oku bimuhemere aganire n’abashamuka b’echibaga. Robert ayongerere ntya: “Amango nganira n’abashamuka balintabere kubona oku Yehova anzigiire. Kandi nabona okw’abashamuka nabo banzigiire. Bantabala nchizere oku Yehova arhandekerere.” Nerhu ntyo konoko rhwakachizera oku Yehova arhuzigiire bwenene, arhubabalira n’ebyaha byerhu akaba rhwahungamire, rhwalonzeze oburhabale rhukenere, n’akaba rhwajirire okwerhu koshi yirhurhashuba kugalukira amola magosa. (1 Yo. 1:8, 9) Akaba rhuchizerere oku Yehova arhuzigire, analonzeze kurhubabalira, rhurhaleka kumukolera chiro n’enyuma y’okujira amagosa.
Amango oli wabona gurhe abashamuka bali bakola bwenene yi bakurhabala, bichi echola chinarhuma wachizera? (Olole echifungo che 15)
16. Bulagurhe ohigirire kugenderera kukolera Yehova?
16 Yehova ali asimiswa n’ebirhuli rhwajira yirhumukolera mu zinola siku zikomere z’obuzinda. Kugerera oburhabale bwa Yehova, rhwakagenderera kumukolera oku bwimana amango rhwamavunika omurhima eju y’amagosa m’erhu changwa m’abandi. Rhwakagenderera kuzigira bene-berhu na bali-berhu n’okuba tayari kubabalirabo chiro n’amango bamarhugoseza. Rhwakayereka Mungu werhu obuzigire n’obukenge bunene oku bilolere omupango g’obuhya, omu kumala ebibazo byakarhengerera omu bunyumpa bwerhu. Kandi n’amango rhwajirire echaha, rhwakalonza oburhabale bwa Yehova, okuyemera obuzigire n’obubabale bwage, n’okugenderera kumukolera. Rhwakachizera oku Yehova arhugisha bwenene akaba “rhurhalekere kujira amenja.”—Gal. 6:9.
BULAGURHE RHUKWANENE KUGENDERERA OMU KASI KA YEHOVA CHIRO N’AMANGO . . .
-
owerhu Mukristu amarhugoseza?
-
eyi rhushabene naye amarhuvuna omurhima?
-
rhwamavunika omurhima eju y’amagosa merhu?
OLWIMPO 139 Waza amango Ebintu Byoshi Nji Byaba Bihyahya
a Mazino maguma mahindamwirwe.
b Echinwa cha Mungu chirhahanwire omulume n’omukazi oku balekane, chinaderhere wazi okw’amango bamalekana ntaye n’omuguma mu bombi ogwerhe oruhusa l’okushuba kushaba changwa kushabwa. Aliko hali ehali zinarhuma Bakristu baguma babona oku balekane. Olole omu chitabu Siimira Akalamo Esiku n’Amango!, amahugulo meshishi ma 4 “Ebyakarhuma Omulume n’Omukazi Balekana.”
c Ogwindi mufano, olole oku jw.org evideo Orharhebekwaga n’Omurhula g’Obubeshi!—Darrel na Deborah.
