Bichi byarhumaga Yesu aderha ebinwa bya Daudi bili omu Zaburi 22:1 embere afe?

Omu binwa bizinda bya Yesu embere afe, bili mw’ebiyandikirwe omu Matayo 27:46: “Mungu wani wee, Mungu wani wee, bulagurhe wandekerere?” Achiderha ntyo, Yesu ayeneza ebinwa by’omwandisi w’ezaburi Daudi biba omu Zaburi 21:1. (Mk. 15:34) Kwakaba kuchibesha nka rhuwazize oku Yesu aderhaga ntyo bulala aligayire oku Yehova ajirire, changwa mpu nkabaga obwemere bwage bwali bwamahwanza kugeha. Yesu alimenyere bwinja-bwinja bulagurhe bihemere afe, analisimire bwenene bibe ntyo. (Mt. 16:21; 20:28) Kandi, analimenyere oku amango m’olufu lwage, Yehova alikwanene aleke kumulanga. (Yob. 1:10) Ahola Yehova alekera Yesu orozo ayerekane oku nta ngangane, kweri akwanene kuyorha mwimana chiro haba byago bingana gurhe kugera oku lufu.​—Mk. 14:35, 36.

Sasa akaba ntyo, charhumaga Yesu aderha ebinwa by’eyila Zaburi? Chiro akaba oku rhurhakava rhwaderha mpu ntya ku bili hoshaho hoshaho, leka rhulole mpanvu ziguma zakaba eyi zarhumaga. *

Omu kuderha ebila binwa, byakashobokana oku Yesu aliri akaziza oku Yehova arhamurhabala yi barhamuyirha. Byalihemere Yesu alipe enchungu buzira kurhabalwa na Yehova. Aliri muntu nya muntu, byanalimuhemere afe ntyo “y’ahonjera buli muntu olufu.”​—Ebr. 2:9.

 Omu kuderha ebyola binwa bigeke by’eyola zaburi, nkabaga Yesu aliri aseza obwenge kw’eyola zaburi yoshi. Mw’ezola siku, Abayahudi bagendaga bazigana kuchihangana bafarhe zaburi zinene omu rhwe. Eyi bakayibusizwe mustari muguma gw’ezaburi, banahwanza kuyibuka ahola h’anaho eyindi mistari yoshi y’eyola Zaburi. Akaba echola chi Yesu alonzaga kujira, ahola alirhabere Abayahudi balikala bali banafunzi bage bayibuke bulebi bunene buli mw’eyola zaburi buderhere byoshi byakabere kuyerekera olufu lwage. (Zb. 22:7, 8, 15, 16, 18, 24) Oku bwindi, olwandiko luzinda lw’eyola zaburi luhere Yehova obukuze n’okumuyerekana nka Mwami w’egulu lyoshi.​—Zb. 22:27-31.

Omu kuderha ebyola binwa bya Daudi, Yesu akaba ey’aliri ayerekana oku arhaherhe gosa. Embere bamuyirhe, Esanedrini yalijire omu lubuga buzira kukulikiza esheria, bashobeka Yesu oku adukangire Mungu. (Mt. 26:65, 66) Olubuga lwajirwaga juba-juba, eyi bukala bwanayirire bwenene n’okuyirukira bacha olushinja buzira kukulikiza nk’oku amarhegeko m’esheria maliderhere. (Mt. 26:59; Mk. 14:56-59) Omu kuderha ebila binwa omu luderho lw’echibazo, inkabaga Yesu aliri ayerekana oku ntacho ajirire chikwanene buhane bungana ahola.

Kandi Yesu akaba ey’aliri ayibusya oku chiro akaba oku Daudi, omwandisi w’eyila zaburi alilekerwe alibuke, arhali k’okuderha oku Yehova alimukabulire. Echibazo cha Daudi chirhaliyerekene oku abulire obwemere. Amalire kubaza echola chibazo agendereza omu kuyerekana kangana gurhe achizerere obuhashe bwa Yehova b’okuyokola, na Yehova agenderera kumugisha. (Zb. 22:23, 24, 27) Konakuguma, chiro akaba oku Yesu “Mugala wa Daudi,” alilibukire oku murhi gw’amalibuko, arhali k’okuderha oku Yehova arhalichimuyemerere.​—Mt. 21:9.

Yesu akaba eyi aliri ayerekana omugayo gunene okubona gurhe byahema Yehova amukule k’obulanzi bwage yi yenyine ayemeza oku kweri ali mwimana. Yehova arhalipangire burhanzi ok’Omugala nj’alibuke anafe. Byajaga byahema ku ntyo kubibage Adamu na Eva bayusa kuchihenula ku Mungu. Nta chibi n’echiguma Yesu alijirire, aliko byahema alibuke n’okufa y’ashubiza oku lushinja Shetani abaga arhondereseze, n’okuhaana enchungu y’ashuba kugalula byoshi abantu babaga bahezeze. (Mk. 8:31; 1 Pe. 2:21-24) Ntako ebyola byoshi byakayenezwe na Yehova arharhangire kukula Yesu kw’amaboko bugeke omu kalamo kage.

Changwa kandi, Yesu akaba ey’aliri arhabala abanafunzi bage baseze obwenge bwenene oku nchungu okubona gurhe Yehova akayemera oku anafage olufu luli ntyo. * Yesu alimenyere ok’okufa nka mubandi oku murhi gw’amalibuko kwagayisa bantu banene. (1 Ko. 1:23) Nk’abanafunzi bage baseze obwenge oku mpanvu kanuni y’olufu lwage, bayunva bwinja bichi biguma luderhere. (Gal. 3:13,14) Bakamubwene oku ali Muchunguzi s’arhali nyankola-maligo.

Chiro empanvu yakaba ehe yarhumaga Yesu aderha ebyola binwa, alibere amenyere ok’olufu lwage oku murhi gw’amalibuko, kwaba kujira obulonza bwa Yehova. Bugeke ntya okw’anamala derha eyola zaburi, Yesu aderha mpu: “Byamayenera!” (Yoh. 19:30; Lu. 22:37) Nechi, Yehova okurhanga kuleka kulanga Yesu, byalirhumire Yesu agala kuyeneza byoshi byarhumaga arhumwa oku gulu. Kandi kwalimuhere orozo l’okuyeneza obulebi boshi bwabaga bwaleberwe kumuyerekera “omu Sheriya ya Musa, omu Balebi n’omu Zaburi.”​—Lu. 24:44.