Ech’okugayisa, nabere nahika omu myaka y’olubiriko, obwira bwani bukomere naligwerhe haguma na Yehova bwahwanza kuhwa. Aberhu banafunzi balibonekene nka bagwerhe buhuru bunene, nani nalonza mbe huru bwenene. Naliri nachiyunva nk’amarhegeko m’abazere bani n’amakanuni me Chikristu binshwekere. Nanahwanza kubona ok’okuharamya Yehova kali kasi kakomere bwenene. Chiro akaba oku nta lusiku naliza lahira oku Yehova arhabaho, aliko nahwanza chiyunva nka ntamuyegerere.

Chiro akaba oku ntalizahola ekiroho, aliko nahwanza kuha Yehova ebisigaza omu kasi k’okuhubiri. Ntalichili nachirheganya embere y’okuja oku mahubiri, echola chayinja charhuma nahwanza kugambwa kurhonderesa changwa kugendereza enganiro haguma n’omuntu. Okola kwarhuma ntachiyinja napata amalehe menja omu kasi k’okuhubiri na nta mwishingo, n’ebyola byarhuma nagaya amahubiri bwenene. Nayinja nachibaza mpu, ‘Gurhe omuntu akagala kugenderera kukola akala kasi boso oku lindi na mwezi oku gwindi?’

Nayeneze myaka 17, nayunva nsimire bwenene mpwanze kuchirhegeka. Nava nashana ebyani, narhenga ahambuga naja e Australie. Byalilumire  abazere bani oku murhima bwenene okubona nachikulaga ahambuga. Byalilazizebo, aliko balema bawaza oku nakagenderere kukolera Yehova.

Nabere nkola ndi omu Australie, ehali yani y’ekiroho yaja yashendegerera bwenene. Nahwanza kugosa embuganano. Najira obwira haguma n’eyindi misole, eyi nabo kuguma nani, baliri basima kuja oku mbuganano golo liguma aliko enyuma w’aho banaja kunywa n’okuzina omu nganda. Eyi nayibuka amola mango, nanabona oku nalihebere kugulu kuguma omu kuli n’okwindi omu gulu, aliko ebyola birhaliri byandaza chiro n’ehityu.

Hahwere nka myaka ebiri ntya, nageza na mwaliwerhu muguma bisanzi bigeke wajiraga ebintu buzira kumenya byarhumaga nahwanza kuwaza oku bilolere emunda akalamo kani kali kampeka. Nalilamire mu nju nguma haguma na bandi bali-berhu barhano babalamba, rhwava rhwahamagala omwimangizi w’omuzunguluko na mukage Tamara, bayinje babere mw’eyola nju yerhu mu boso liguma. Amango eba aliri ab’agwerhe binene by’okujira oku bilolere amaraporo m’echibaga, Tamara aliri ageza ebisanzi haguma nerhu n’okuyinja asheka nerhu. Echola chalinsimisize bwenene. Aliri ayunva abandi analiri juba-juba kuganira nabo. Byalisomeze okubona gurhe omuntu okulire ekiroho ntyo akav’aba wakushagalusa kangan’aho.

Tamara alishagalukire bwenene. Okuntu alisimire okuli n’akasi k’okuhubiri, kwalihumire oku murhima. Aligwerhe obusime b’okukolera Yehova okwage koshi akagala, oku nyono naliri nabula omwishingo eju y’okumuha ebisigaza omu kasi kage. Oborhere bwage b’okubona ebintu bwinja n’obusime bunene aligwerhe, byalihumire oku kalamo kani. Olwiganyo lwage lwalirhumire nashuba kuwaza ku bunola bukweri bw’akamaro: Yehova alonzeze buli muguma werhu amukolere ‘n’omwishingo n’empundu z’omwishingo.’​—Zb. 100:2.

Nalisimire nani mpate omwishingo guli nk’ogu Tamara aligwerhe, aliko y’impata obola busime, byalihemere mpindamule binene omu kalamo. Haligerere akasanzi, aliko buzinda narhondera kuhindamula bintu biguma. Nahwanza kuyinja nachirheganya embere nj’oku mahubiri, na nayinja naba painiya  mugwasi mango maguma-maguma. Okola kwantabala kumala obuba naligwerhe nanashuba kugwarha obushirhu. Oku naliri nazigana kukolesa Ebiblia bwenene omu mahubiri, nayunva nsimire akola kasi bwenene. Harhalegamaga, naba painiya mugwasi w’okugenderera.

Nahwanza kujira obwira n’abantu b’emyaka yoshi baliserere omu kuli banaligwerhe omwishingo omu kasi ka Yehova. Olwiganyo lwabo lwinja lwalintabere nshube ndole ebintu mpebere oku nafasi y’oburhanzi omu kalamo kani n’okushuba rhondera kusoma Ebiblia buli lusiku. Nahwanza kusima amahubiri bwenene kulusha, na buzinda naba painiya w’oku kahunda. Bwaliri burhanzi enyuma wa myaka minene nayunva omwishingo n’okurhulera omu chibaga.

Hagerere mwaka muguma, rhwabuganana na Alex, muntu mwinja bwenene, walisimire Yehova n’amahubiri. Aliri mugwasi w’akasi anabaga amamala myaka 6 ey’ali painiya. Kandi mango maguma Alex alijire kukolera omu eneo ekenere oburhabale ye Malawi. Amango aliri eyola munda aligezeze ebisanzi haguma na bamisyonere balimulekeere olwiganyo lwinja, banalimuhebere omurhima agenderere kuheba akasi ka Yehova oku nafasi y’oburhanzi omu kalamo kage.

Omu 2003, rhwashabana na Alex, rhwanagenderera kukola akasi k’amango moshi. Rhwaliyigire masomo manene na Yehova alirhugishire mu njira kamama.

Omu 2009, barhubwira oku rhuje kukola nka bamisyonere omu Timor-Leste, hihugo higeke hili omu bizimba bye Indonesie. Barhubwirire ntyo rhwasomerwa, rhwayunva obusime, rhwayunva n’obuba mw’akola kasanzi kan’ako. Hagerere myezi 5, rhwahika omu bwikalo bukulu bw’echola chihugo buyirikirwe Dili.

Okola kuhama kwalihindamwire binene omu kalamo kerhu. Byalihemere rhuchikoomeze okuntu abantu balamire, olulimi, ebilyo, n’ehali z’akalamo. Omu mahubiri namo rhwakazaga zigana kubugana abantu  bakenere bwenene, abasomaga higeke, chiro n’abarhahikaga oku masomo, n’abandi babonererwe. Rhwanaliri rhwabona abandi bagwerhe ebibazo kamama by’omubiri n’eby’amawazo bilerherwe n’evita n’obubandi. *

Amahubiri malinunire mw’echola chihe bwenene! Omufano, lusiku luguma nalibuganire munyere muguma olagire wa myaka 13 oyirikirwe Maria. * Habaga hamagera myaka migeke nyina afire n’eshe abaga amujahikire. Kuguma na bandi bana banene b’omu myaka yage, Maria arhalimenyere bichi akajira omu kalamo kage. Inyibukire mango maguma alakaga ey’ali anshambalira byoshi bimuli oku murhima. Aliko ntaliri nayunva bwinja eby’ali aderha bulala ntaliyinji kuderha bwinja olulimi lwage. Nasalira Yehova n’okumubwira antabale ngale kuheba oyola mwana w’obunyere omurhima; naja nahwanza kumusomera amandiko m’okuheba omurhima. Mu myaka migeke yakulikiraga, nabona okuntu okuli kwahindamwire oborhere bwa Maria, okuntu abonekene, n’akalamo kage. Abatizwa, na bunola akola agwerhe amage mafunzo me Biblia ali aongoza. Zene, Maria akola agwerhe omulala gugalihire gw’ekiroho anakola ali achiyunva okw’azigiirwe.

Yehova ali agisha akasi k’okuhubiri omu Timor-Leste. Chiro akaba oku bahubiri banene babatizwaga omu myaka ekumi yonyine ehwere, banene mu bo bakala bali bapainiya, bagwasi b’akasi changwa bashamuka. N’abandi bali bakola oku mabiro m’okutafsiri, na ntyo bali barhabala omu kasi k’okutafsiri ebitabu n’amavideo mayumangiire oku Biblia omu ndimi z’emwabo. Binansimisa bwenene okuyunva bali bayimpa oku mbuganano, okubabona bamwemweseze, n’okubona bali bahikira kuba bera ba Yehova.

Engabane yerhu y’omu Timor-Leste yalihindamwire bintu binene omu kalamo kerhu kulusha omu Australie, aliko ntalimenyere oku nakapatire mwishingo gungana ntyo omu kalamo. Mango maguma rhwaliri rhwagenda omu mutugari guyunjwire bantu, eyi muli n’efi ziyumire, n’emizigo y’eshogo y’arhenga omu soko. Hali amango byalirhuhemere rhuongoze efunzo lye Biblia omu kaju kageke kali mw’echuka eyi n’ahashi harhali sima chiro hanaganyire bwenene n’engoko zili zagera-gera eburhambi bwerhu. Chiro n’ebyola bibazo byoshi, naligenderere kuchibwira mpu, ‘Ebila bisomeze bwenene!’

Eyi nayibuka ebyagerere, nanaderha koko bwenene oku bazere bani bajiraga okwabo koshi omu kunyigiriza enjira za Yehova n’okuntambala, chiro n’omu myaka yani y’olubiriko byalikomeremo okujira ntyo. Nachibwenere obukweri bw’ebinwa bili omu Mezali 22:6. Nyama na darha banachishinga bwenene eju yani na Alex; basimire bwenene okubona gurhe Yehova ali arhukolesa omu kasi kage. Kurhenga omu 2016 eyi rhuli omu kasi k’omuzunguluko omu eneo y’omurhabi gwe Australie.

Bikomere okuyemera gurhe burhanzi naliri nabona akasi k’okuhubiri nka lukoba. Inkala nsimire bwenene amahubiri! Nayinja kubona oku, bibe bichi byakahikira omuntu omu kalamo, akapata omwishingo g’okuli nk’ali akolera Mungu n’omurhima goshi. Kweri, myaka 18 yamahwa indi nakolera Yehova haguma na Alex, napatire busime bunene omu kalamo. Inkala nyunvirhe bwinja obukweri bwa binola binwa Daudi abwiraga Yehova: “Balala boshi balibirhira emunda oli, bachishinga; buli mango babanda empundu z’omwishingo. . . . Na balala basima ezino lyawe, bachishiinga mu woyo”​—Zb. 5:11.