1. Bichi Yehova anabona omu bantu bage?

YEHOVA MUNGU “asimire abantu bage.” (Zb. 149:4) Echola chirhusimisize bwenene! Yehova anabona engeso zerhu zinja, anabona oku nerhu rhwakaba bantu benja, n’okurhukulula emunda ali. Rhukagenderera kuba bimana embere zage, naye agenderera kuba mwira werhu wa hofi esiku n’amango!​—Yoh. 6:44.

2. Bulagurhe bantu baguma banabona oku biba bikomere okuyemera oku Yehova abazigiire?

² Baguma bakaderha mpu: ‘Imenyere oku Yehova ab’azigiire abantu bage nka chigusho; aliko si, gurhe nakachizera akw’anzigiire nyono bwani-bwani?’ Bichi byakarhuma omuntu achibaza echola chibazo? Oksana, * walilibukire bwenene achili mwana, aderhere ntya: “Nalisimire bwenene amango mbatizwa n’okuhwanza obupainiya. Aliko hagerere myaka 15, nahwanza kuyibuka ebibi byampikiraga amango nalichili mwana. Nabona oku ntacho nalimalire embere za Yehova n’okw’arhalinzigiire.” Mwali-werhu muguma oli painiya oyirikirwe Yua naye waligwerhe bibazo binene amango alichili mwana aderhere ntya: “Nahaanaga akalamo kani emwa Yehova bulala nalilonzeze imusimise. Aliko nalimenyere oku nta lusiku akafa anzigiire.”

3. Bichi rhwashambalako mu gunola mwazi?

³ Kuguma n’abala bali-berhu babiri bimana rhwamamala kushambalako, ozigiire Yehova bwenene aliko hali oku wakayinja wachibaza akaba kweri naye akuzigiire. Bulagurhe bihemere oyemere oku kweri akulagireko? Na bichi byakakurhabala ogale  kuhima amawazo mabi makayinja omu bwenge bwawe maderhere oku Yehova arhakuzigiire? Leka rhulole ebishubizo kw’ebyola bibazo.

4. Bulagurhe buli buhanya okugangana oku bilolere obuzigire Yehova arhugwerheko?

⁴ Obuzigire b’obunarhuha emisi. Akaba rhuyemerere oku kweri Yehova arhuzigiire n’oku anarhurhabala, rhwayunva rhushunikirwe okumukolera n’omurhima gwerhu goshi chiro akaba oku rhugwerhe ebibazo omu kalamo. Aliko nka rhuyinjire rhwagangana oku Mungu arharhulagireko, ‘emisi yerhu yageha.’ (Mez. 24:10) N’amango rhwamavunika omurhima n’okuheza obwemere omu buzigire bwa Mungu, rhwafarhwa omu mirhego ya Shetani.​—Efe. 6:16.

5. Bichi engangane oku bilolere obuzigire bwa Yehova zalilerheere bantu baguma ?

⁵ Engangane zarhumire Bakristu baguma bimana ba mu zinola siku bahola ekiroho. Mushamuka muguma oyirikirwe James aderhere ntya: “Chiro akaba oku naliri nakola oku Beteli n’oku nalisimire akasi kani naliri nakola omu chibaga ch’olwindi lulimi, naliri nachibaza akaba kweri Yehova anayemerere akasi naliri namukolera. Na nahwanza chiro kulema nachibaza akaba kweri Yehova anali ayunviriza amasala mani.” Eva naye oli wakola omu kasi k’amango moshi aderhere ntya: “Nalimenyere oku buli buhanya okuwaza oku Yehova arharhuzigiire bulala amola mawazo makarhuma orhachigenderera kukolera Yehova. Echola chakarhuma orhachigwarha enyorha y’okukola ebintu by’ekiroho n’okumala omwishingo gwawe g’okukolera Yehova.” Painiya muguma w’oku kahunda oyirikirwe Michael onali mushamuka, aderhere ntya: “Nk’orhayemerere oku Mungu akulagireko, wachihenula kuye.”

6. Bichi rhukwanene kujira amango engangane oku bilolere obuzigire bwa Mungu zamahwanza kuyinja omu bwenge bwerhu?

⁶ Ebila abala berhu Bakristu baderhere biyerekene nka gurhe okuwaza oku Yehova arharhuzigiire kwakamala obwemere bwerhu. Aliko si, bichi rhwakajira amango engangane oku bilolere obuzigire bwa Mungu zamahwanza kuyinja omu bwenge bwerhu? Rhukwanene okuzikabulira han’ahola! Obwire Yehova akurhabale ohindamule amola “mawazo malazize obwenge” mabe ‘murhula gwa Mungu gwalanga omurhima n’amawazo mawe.’ (Zb. 139:23; amahugulo m’eshishi; Flp. 4:6, 7) Onayibuke ok’orhali wenyine. Abandi bene-berhu na  bali-berhu bimana bali balwisa amawazo mabi. Chiro n’abakozi ba Yehova ba mira nabo baliri balwisa mwen’amola mawazo. Rhushambale oku by’omufano gw’entumwa Paulo gwakarhuyigiriza.

7. Bibazo bihe Paulo alihurene?

⁷ Mango maguma onachiyunva oku eby’oyumangiire bikulugireko n’oku bikukomerere okubikola byoshi? Akaba ntyo ku bili, omufano gwa Paulo gwakurhabala. Aliyunvirhe alagire, arhali mpu eju ya chibaga chiguma, si “eju y’ebibaga byoshi.” (2 Ko. 11:23-28) K’ebibazo by’amagala binazigana kumala omwishingo gwawe? Paulo aliri alwisa echibazo “ch’omushaki omu mubiri” chaligenderere, bwakaba eyi bwaliri bulwala b’omubiri, analilonzeze gumurhenge omu mubiri. (2 Ko. 12:7-10) Ka mango maguma onayunva ovunikire omurhima eju y’amagosa g’okurhashinganana kwawe? Byaliberere Paulo naye ntyo mango maguma. Alichiyirikire “muntu wa busha” bulala aligenderere kulwisa okurhashinganana kwage.​—Ro. 7:21-24.

8. Bichi byarhabalaga Paulo alembere ebibazo byage?

⁸ Chiro akaba oku Paulo alihurene ebigeregezo bikomeere n’ebibazo by’okuvuna omurhima, aligenderere kukolera Yehova. Bichi byamuhaga emisi y’okujira ntyo? Chiro akaba okw’alimenyere bwinja amagosa m’okurhashinganana kwage, alisezeze obwemere omu nchungu. Analimenyere echilagane cha Yesu chiderhere oku “buli yeshi wayerekana obwemere mu [Yesu] . . . agwarha akalamo k’esiku n’amango.” (Yoh. 3:16; Ro. 6:23) Kweri, Paulo aligwerhe obwemere omu nchungu. Alichizerere oku kweri Yehova ali juba-juba kubabalira chiro na balala bajirire ebyaha bikomeere nka bahungamire.​—Zb. 86:5.

9. Bichi ebinwa bya Paulo bili omu Wagalatia 2:20 birhuyigirize?

⁹ Paulo alishubire kugwarha obwemere oku Mungu alimuzigiire bwenene bulala arhumaga Kristu afe eju yage. (Osome Wagalatia 2:20.) Yunva ebinwa bihebere omurhima oku mustari g’obuzinda g’olola lwandiko. Paulo aderhere ntya: “Mugala wa Mungu . . . alinzigiire anachihaana eju yani.” Paulo arhaliri awaza oku Mungu aliri amubona nka muntu mubi bwenene orhakwanene obuzigire bwage. Arhayinjaga awaza mpu, ‘Imenyere bulagurhe Yehova azigiire bene-berhu, aliko birhakahashikana okw’anzigire nani.’ Paulo aliyibwise Abaroma ntya: “Amango rhwaliri banya-byaha, Kristu afa eju yerhu.” (Ro. 5:8) Obuzigire bwa Mungu burhajira lubibi!

10. Bichi olwandiko lwa Waroma 8:38, 39 lurhuyigirize?

 ¹⁰ Osome Waroma 8:38, 39. Paulo alimenyere bwinja kangana gurhe obuzigire bwa Mungu bugwerhe emisi. Ayandika oku ntacho “nji chagala kurhucha oku buzigire bwa Mungu.” Paulo alimenyere okuntu Yehova aliri ayerekeza eshanja lye Izraeli buzira kahidiko. Analimenyere okuntu Yehova amuyerekaga olukogo. Rhwakashuba derha oku bugeke oku Paulo aliri awaza ntya, ‘Bulala Yehova arhumire Omugala afe eju yani, nta mpanvu n’enguma nakagwarha yakarhuma nagangana eju y’obuzigire bwage?’​—Ro. 8:32.

11. Chiro akaba oku Paulo alijirire byaha bingana ntyo nk’oku biyerekenwe omu 1 Timoteo 1:12-15, bulagurhe alichizerere oku Mungu amuzigiire?

¹¹ Osome 1 Timoteo 1:12-15. Hakwanene kuba eyi haliri hagera amango Paulo achiyunva kubi eju y’eby’aliri akola embere abe Mukristu. Aliri achibona nka ye munya-byaha “murhanzi,” n’echola chirhakasomeza! Embere Paulo amenye okuli, aliri alibuza Abakristu vile oku yindi, aliri aheba baguma omu prizo n’okuyemera naye oku abandi bayirhwe. (Mdo. 26:10, 11) Gurhe si owazize Paulo akachiyunvirhe ey’akabuganire Omukristu ochili musole oyu ayemereraga abazere bage bayirhwe? Paulo aliri achiganya eju y’amagosa mage, aliko alimenyere okw’arhakagalire kuhindamula ebyagerere. Aliyemerere oku Kristu afaga eju yage, anayandika ntya oku bwizere: “Kugerera olukogo lwa Mungu lurhakwanenwe, indi nk’oku ndi.” (1 Ko. 15:3, 10) Bichi birhuyigirize? Oyemere oku Kristu afaga eju yawe anajira bishobokane y’ogwarha obwira bukomeere haguma na Yehova. (Mdo. 3:19) Ebi Yehova abona oku bili by’akamaro, bili bintu rhuli rhwakola zene n’ebi nji rhwakola omu siku zayinja, si arhali amagosa rhwakolaga omu mango magerere, rhube rhwaliri Bahamirizi ba Yehova mw’amola mango changwa nanga.​—Isa. 1:18.

12. Nka gurhe ebinwa bili omu 1 Yohana 3:19, 20 byakarhurhabala nka rhuchibwene oku rhuli ba busha changwa oku rhurhazigiirwe?

 ¹² Amango wamawaza oku lufu Yesu afaga y’afunika ebyaha byawe, wakaderha mpu, ‘Ntaliwazize oku nakapata oluhembo lw’akamaro ntyo.’ Bulagurhe wakachiyunva ntyo? Omurhima gwerhu gurhashinganene gwakarhurhebeka, n’okulema rhwachibona ba busha changwa nka rhurhazigiirwe. (Osome 1 Yo. 3:19, 20.) Omu bisanzi bili nk’ebyola, bihemere rhuyibuke oku “Mungu ali mukulu bwenene kulusha emirhima yerhu.” Obuzigire bwa Darha w’embingu n’obubabale bwage, bigwerhe emisi bwenene kulusha amawazo mabi moshi makaja omu mirhima yerhu. Bihemere rhuyinje rhwachiyemeza oku Yehova arhuzigiire. Yi rhugala kujira ntyo, rhukwanene okusoma Echinwa chage buli lusiku, okumusalira buzira kuleka, n’okugeza ebisanzi haguma na bene-berhu na bali-berhu. Bulagurhe okujira ntyo kuli kw’akamaro bwenene?

13. Nka gurhe okuyiga Echinwa cha Mungu kwakarhurhabala? (Olole echisanduku “ Okuntu Echinwa cha Mungu Chalirhaberebo.”)

¹³ Oyige Echinwa cha Mungu buli lusiku, waja wagenderera kuyunva bwinja engeso zinene zinja za Yehova. Wachibonera olukogo akugwerheko. Okukengeera oku Chinwa cha Mungu buli lusiku, kwakakurhabala ogwarhe amawazo menja, “kuheba ebintu oku mustari” omu mawazo n’omu murhima gwawe. (2 Ti. 3:16) Mushamuka muguma oyirikirwe Kevin waliri alwisa amawazo m’okuchibona nka ntacho amalire aderhere ntya: “Okusoma Zaburi 103 n’okukengeera oku bilimo, kwalintabere mpindamule enkengero zani n’okuja namenya bwinja amawazo Yehova agwerhe eju yani.” Eva, rhwabaga rhwashambereko aderhere ntya: “Buli golo nankengeera oku mawazo ma Yehova. Okujira ntyo kunantuleza omurhima n’okukomeza obwemere bwani.”

14. Nka gurhe okusalira kwakarhurhabala?

¹⁴ Osalire buzira kuleka. (1 Te. 5:17) Yi bantu babiri bagwarha obwira bukomeere, bihemere bayinje baganira buli mango n’okubwirana ebili oku murhima. Intyo kubihemere nerhu rhujirage oku bilolere obwira bwerhu haguma na Yehova. Amango rhwamamubwira omu sala okuntu rhuli rhwachiyunva, amawazo merhu n’ebi rhulazize, rhwanayerekana oku rhuchizerere ye n’okurhumenyere okw’arhuzigiire. (Zb. 94:17-19; 1 Yo. 5:14, 15) Yua, rhwabaga rhwaganirireko aderhere ntya: “Amango ndi nasalira, inanchihangana kujira binene olekere okufachakuderha ebi nagereremo omu lusiku konyine. Nanfungulira Yehova omurhima gwani goshi n’okumubwira okuntu ndi nachiyunva. Kubuya-buya, inanyinja hwanza kubona oku Yehova arhali nka shefu oyumangiire sosiete ndebe, si nka mulume ozigiire bwenene  abana bage.”—Olole echisanduku “ Wachigerere Kuchisoma si?”

15. Nka gurhe Yehova ayerekene okw’arhulagireko bwenene?

¹⁵ Ogeze ebisanzi haguma n’abera b’okuli; bali luhembo lurhengere emwa Yehova. (Yak. 1:17) Darha w’embingu ayerekene okw’arhulagireko omu kurhuhereza omulala gw’ekiroho gwa bene-berhu na bali-berhu bayerekana “obuzigire amango moshi.” (Mez. 17:17) Omu maruba Paulo ayandikiraga Abakolosayi, alihebere mw’amazino ma Bakristu baguma bamurhabalaga, anabayirika “nshoko y’echirhulirizo chinene.” (Kol. 4:10, 11) Chiro na Yesu Kristu alikenere analiyunvirhe asimire oburhabale aliri apata kurhenga ku bera bage, b’abantu na bamalaika.​—Lu. 22:28, 43.

16. Nka gurhe abera b’okuli bakarhurhabala rhuyegere Yehova?

¹⁶ K’onali wayunguka n’olola luhembo lwinja Yehova arhuhere lw’abera b’okuli? Okubwira omwira okulire ekiroho ebi rhulazize, burhali buhwinja; okujira ntyo kwakarhulanga. Yunva ebi James rhwaderhagako ashambere: “Okugwarha obwira n’abakulire ekiroho kwantabere bwenene. Amango amawazo mabi mamanyinjira, abola bera benja bananyunviriza buzira kumpidika n’okunyereka oku banzigiire. Kugerera bowe, nambona oku kweri Yehova anzigiire n’okw’andagireko.” Kweri kuli kw’akamaro bwenene okugwarha n’okugendereza obwira bukomeere haguma na bene-berhu na bali-berhu b’ekiroho!

17-18. Inde rhukwanene kuyunva na bulagurhe?

¹⁷ Shetani alonzeze rhuleke kuchihangana kujira amenja. Alonzeze rhuyemere oku Yehova arharhuzigiire, n’oku ntacho rhumalire chakarhuma Yehova arhuyokola. Aliko nk’oku rhwabwene, obola buli bubeshi.

¹⁸ Yehova akuzigiire. Oli w’akamaro bwenene embere zage. Okamukenga, “wabera omu buzigire bwage” esiku n’amango, kuguma na Yesu. (Yoh. 15:10) Che chirhumire orhayunvaga ebya Shetani changwa eby’omurhima gwawe guli gwakubwira. Ahubwe, oyunve Yehova, yewe obona ebinja mu buli muguma werhu. Ochizere oku kweri “asimire abantu bage,” kukuhebaho nawe!