1. Bichi byalirhengerere amango Yesu ajira echisomerene chage chirhanzi?

 OBE nka wawaza gurhe byaliri oku buzinda g’omwaka 29 N.K.Y. oku murhondero gw’akasi ka Yesu k’okuhubiri. Yesu, na nyina Mariya, na ziguma omu ntumwa zage balihamagerwe oku buhya e Kana omu vilaje y’enoro ye Nazareti, emunda Yesu akuliraga. Mariya aliri mwirakazi w’ogola mulala, na nkabaga aliri arhabala omu kushishikala abahisi. Aliko amango baliri omu fete y’obuhya, hali chintu chilebe ch’alirhengerere chakakozeze eshonyi bwenene omulala goshi n’abahya​—edivayi yahwere. b Nkabaga oluganjo lwabahisi lulugire bwenene kulusha okuntu baliwazize. Mariya amalibirha juba-juba emunda omugala ali nkabaga n’okumubwira ntya: “Nta divayi bagwerhe.” (Yoh. 2:1-3) Gurhe Yesu amaja jira? Yesu amajira echintu chisomeze bwenene, k’okuderha, echisomerene ch’okuhindula amenji “mw’edivayi nyinja bwenene.”​—Yoh. 2:9, 10.

2-3. a) Bisomerene bya nyabachi Yesu ajiraga? b) Nka gurhe rhwakayunguka amango rhuli rhwayiga oku bilolere ebisomerene bya Yesu?

² Yesu akajirire ebindi bisomerene binene amango m’akasi kage k’okuhubiri hanola oku gulu. c Yesu alikoleseze obuhashe bwage b’okujira ebisomerene omu kurhabala ebihumbi by’abantu. Omufano, bibiri omu bisomerene ajiraga kuli kulisa bantu 5 000 na buzinda bandi balume 4 000, oluganjo lwabo loshi lwakarhalukire bantu 27 000 kuhebamo abakazi n’abana boshi baliriho. (Mt. 14:15-21; 15:32-38) Mw’ebyola bihe byombi, Yesu ava afumya bantu banene balilwere. (Mt. 14:14; 15:30, 31) Waza okuntu  ebyola bigusho byombi byalisomerwe bwenene n’okuntu Yesu abafumyaga n’okubalisa omu njira y’echisomerene!

³ Rhwakayiga binene kugerera ebisomerene bya Yesu zene. Mu gunola mwazi, rhwaganira ku bintu biguma byakakomeza obwemere bwerhu oku birhwayigire, kugerera ebila bisomerene. Rhwaja rhwayiga nka gurhe rhwakayiganya obwirhohye bwa Yesu n’akababaro aliri ayerekana amango aliri ajira ebisomerene.

4. Ebisomerene bya Yesu birhuyigirize ebintu bikomeze obwemere bwerhu mu nde?

⁴ Ebisomerene Yesu ajiraga birhuyigirize ebintu by’akakomeza obwemere bwerhu, arhali mu yewe yenyine s’aliko n’oku bilolere Eshe. Echola chikwanene bulala Yehova yewaliri amuhereza emisi y’okujira ebyola bisomerene. Olwandiko lwa Matendo 10:38 lurhubwirire ntya: “Mungu amushiga amavurha kugerera eroho lyage lichesibwa n’emisi, kandi aliri agera omu chihugo choshi ey’ali ajira amenja n’okufumya boshi baliri balibuzwa na Ibilisi, bulala Mungu aliri haguma naye.” Kandi oyibuke oku, mu byoshi Yesu aliri aderha n’okujira, kuhebamo n’ebisomerene aliri ajira, aliri ayiganya oku bushinganyanya amawazo m’Eshe n’okuntu aliri achiyunva. (Yoh. 14:9) Rhuganirage oku bintu bisharhu ebisomerene bya Yesu byakarhuyigiriza.

5. Bichi byashunikaga Yesu kujira ebisomerene? (Matayo 20:30-34)

⁵ Ech’oburhanzi, Yesu n’Eshe barhuzigiire bwenene. Amango Yesu aliri oku gulu aliyerekere abantu obuzigire bunene omu kujira ebisomerene y’arhabala abantu baliri balibuka. Mango maguma, balume babiri b’empumi baliri bamulakirira mpu abarhabale. (Osome Matayo 20:30-34.) Obwene oku Yesu “alibayunvire obonjo” naho abafumya. Nk’oku chikolesezwe hano, echinwa ch’Echigiriki chitafusiribwe “abayunvira obonjo,” chiderhere akababaro kanene omuntu anayunva omu murhima. Akababaro kanene kali nk’akola, kanayerekana oku omuntu agwerhe obuzigire, kalishubire shunika Yesu alise abali nzara n’okufumya ababenzi-benzi. (Mt. 15:32; Mk. 1:41) Rhwakachizera oku Yehova Mungu “w’akababaro kanene,” n’Omugala barhuzigiire bwenene kandi banachiyunva kubi amango rhuli rhwalibuka. (Lu. 1:78; 1 Pe. 5:7) Bakwanene kugwarha nyorha nene bwenene y’okumala ebibazo byoshi bili by’arhindibuza abantu!

6. Buhashe buhe Mungu ahere Yesu?

⁶ Echa kabiri, Mungu ahere Yesu obuhashe b’okumala ebibazo byoshi by’abantu. Amango Yesu ajiraga ebisomerene, aliyerekene oku agwerhe obuhashe b’okumala ebibazo byoshi rhurhakagala kumala oku misi yerhu. Omufano, agwerhe obuhashe b’okumala loshi echinalerhera abantu ebibazo, k’okuderha, echaha rhwashokolaga, na buli ngaruka y’echola chaha kuhebamo obulwala n’olufu. (Mt. 9:1-6; Ro. 5:12, 18, 19) Ebisomerene ajiraga byaliyerekene oku akagala kufumya “obulwala bwa buli lubero” chiro n’okufuula abafire. (Mt. 4:23; Yoh. 11:43, 44) Kandi agwerhe obuhashe b’okuyumanza echiyaga chikomere, n’okufumya abagwerhe abazimu. (Mk. 4:37-39; Lu. 8:2) Bihebere omurhima bwenene okumenya oku Yehova ahere Omugala misi mingana aho!

7-8. a) Bwizere buhe rhwakagwarha kugerera ebisomerene bya Yesu? b) Chisomerene chihe olingirize oku nyorha nene omu gulu lihya-hya lyayinjire?

⁷ Echa kasharhu, rhwakachizera loshi oku emigisho y’ebintu binja Obwami bwa Mungu nji bwalerha nji yayenera. Ebisomerene Yesu ajiraga amango aliri muntu hanola oku gulu, birhuyigirize bingana gurhe nji ajira yewe nka Mwami w’Obwami bwa Mungu bw’embingu. Waza bingana gurhe nji rhwagwarha hano Yesu ahwanza kurhegeka egulu. Nji rhwasiimira amagala mashinganyanya, bulala nji akula amalwala moshi, n’obulema boshi bwalibwize abantu. (Isa. 33:24;  35:5, 6; Ufu. 21:3, 4) Rhurhakachiyunva nzara changwa mpu rhulibuke eju y’ebinjira. (Isa. 25:6; Mk. 4:41) Nji rhwagwarha busiime bunene b’okuyegereza abazigirwa berhu nji barhenga “omu mashinda m’olwibuko.” (Yoh. 5:28, 29) Chisomerene chihe oli walingiriza oku nyorha nene omu gulu lihyahya lyayinjire?

⁸ Amango Yesu ajiraga ebisomerene, aliyerekene bwirhohye bunene n’akababaro; engeso rhukwanene kuyiganya nerhu. Lekaga rhuganire ku mifano ebiri, rhwarhondera n’engani ederhere oku buhya bwabaga e Kana.

9. Bichi Yesu alijirire oku fete y’obuhya? (Yohana 2:6-10)

⁹ Osome Yohana 2:6-10. Amango edivayi ehwa oku buhya, byalihemere mpu mpaka Yesu ajire chintu chilebe si? Nanga. Nta bulebi bwe Biblia buyerekene oku Masiya akakolere echisomerene ch’okuhaana edivayi. Aliko bankawawaza gurhe nawe wakachiyunva nk’amavu m’amahwa oku buhya bwawe. Yesu aliyunvirhire obonjo ogola mulala ahanene kw’abola bashabene, analilonzeze kubarhabala. Nk’oku rhwanaganiraga oku murhondero Yesu alijirire echisomerene. Alihindamwire malitre 390 intya m’amenji mw’edivayi nyinja bwenene. Nkabaga Yesu ahanaga amola mavu mangana ntyo yihajira amayorha bamakolese obuhya bumala kuhwa changwa bamaguze babone olufuranga l’okurhabala abola bahya. Abola bahya balikwanene kugwarha shukrani nene!

10. Bintu bihe by’akamaro biderherwe omu chitabu cha Yohana sura ya 2? (Olole n’efoto.)

¹⁰ Rhuganire oku mafasiriyo maguma  m’akamaro oku bilolere engani eli omu Yohana sura ya 2. Ka wabwene oku Yesu arhalonzaga kuchiyerekana omu kuyunjuza amenji m’orhola rhubindi yewe yenyine? Ahali h’okuchiyerekana yewe yenyine abwira abakozi bayunjuze orhola rhubindi amenji. (Omustari gwa 6, n’ogwa 7) Enyuma w’okuhindamula amenji mw’edivayi, Yesu arharholaga kw’eyola divayi yewe yenyine mpu ahekere omwimangizi w’obuhya. Ahali h’okujira ntyo, abwira abakozi b’obajirage ntyo. (Omustari gwa 8) Kweri Yesu arharholaga echirahuli ch’edivayi ayumange embere w’abageni ahwanze kuchibanda omu chifuba, n’okuderha mpu ‘Muhonje kw’enola divayi n’amamala kukola!’

11. Bichi rhwakayiga kugerera echisomerene cha Yesu?

¹¹ Bichi rhwakayiga kugerera echisomerene cha Yesu ch’okuhindamula amenji mw’edivayi? Rhwayigire engeso y’obwirhohye. Yesu arhachihalaga eju y’echola chisomerene; olekere nantyo ntamango achigerere achishurha omu chifuba oku bilolere ebyajiraga. Ahali h’okujira ntyo, agenderera kuchirhohya n’okuleka Eshe y’ehabwage erenge n’obukuze bwoshi. (Yoh. 5:19, 30; 8:28) Rhukayiganya Yesu omu kugenderera kuba berhohye nerhu, rhurhachibanda omu chifuba nerhu oku bilolere ebi rhwajirire. Choshi-choshi rhwakaba yirhwayeneza omu kasi ka Yehova, rhurhachibandaga omu chifuba oku birhulolere rhwabo rhwenyine, s’aliko oku lukengo rhugwerhe l’okukolera Mungu mwinja bwenene. (Yer. 9:23, 24) Rhukwanene kumuhereza olukengo akwanene. Nta chintu n’echiguma chinja rhwakayeneza buzira oburhabale bwa Yehova.​—1 Ko. 1:26-31.

12. Yindi njira ehe rhwakayiganyamo obwirhohye bwa Yesu? Fasiriya.

¹² Rhulole eyindi njira rhwakayiganyamo obwirhohye bwa Yesu. Wazaga kw’enola hali: Mwene-werhu oli mushamuka ali ageza bisanzi binene eyi ali arhabala omugwasi wakasi ochili musole kurheganya ejambo lyage lirhanzi. Bulala oyola mushamuka ali murhabere, oyola mwene-werhu ochili musole amageza ejambo linja n’echibaga chamalisiimira. Enyuma w’embuganano, muntu muguma amayinja n’okubwira oyola mushamuka ntya: ‘Mwene-werhu, olira mwene-werhu ochili musole agezeze ejambo linja bwenene, arhali ntyo?’ Aliko si, oyola mushamuka anaderha mpu: ‘Nechi, naligezeze bisanzi binene eyindi namurhabala.’ Changwa akwanene kuderha oku bwirhohye mpu: ‘Nechi agezeze ejambo linja. Ndi nachivugira ye.’ Amango rhuli berhohye, rhurhalonza kuchiha erenge oku bintu binja rhwakolere abandi. Rhunayunva rhutoshekere n’okumenya oku Yehova ali abona n’okusiimiswa n’ebi rhuli rhwajira. (Huzanya na Matayo 6:2-4; Ebr. 13:16) Kweri, rhunasiimisa Yehova amango rhuli rhwayiganya Yesu omu kuyerekana obwirhohye.​—1 Pe. 5:6.

13. Bichi Yesu abonaga hofi n’evile ye Naini, na bichi alijirire? (Luka 7:11-15)

¹³ Osome Luka. 7:11-15. Waza kw’ebila byarhengereraga embere katyu eyi Yesu achili omu njira ali omu kasi k’amahubiri. Yesu ali abalamira e Naini, vile y’omu Galilaya, erhali hale n’Eshunemu emunda omulebi Elisha afulaga mugala wa mukazi muguma habaga hamagera myaka 900 ntya. (2 Fa. 4:32-37) Yesu amagera hofi n’omulyango gw’evile, amabona abantu bali bahuluka omu vile eyi bahekere omuntu wafire. Eyola hali ebabeze bwenene, bulala oyula mukazi afisize omwana muguma yenyine ali gwerhe. Aliko oyula mukazi ogwerhe kahinda kanene arhali yenyine, ali haguma n’echigusho chinene ch’abantu ba mw’eyola vile. Yesu amayumanza abantu bahekere oyola muntu wafire, amakolera oyola mukazi wafisize echintu chisomeze bwenene, k’okuderha amafula omugala! Oyula ali muntu w’oburhanzi omu bantu basharhu Yesu afulaga baganirirwe omu bitabu by’Enjili.

14. Bintu biguma bihe by’akamaro bili omu ngani eganirirwe omu chitabu cha Luka sura ya 7? (Olole nʼefoto.)

 ¹⁴ Rhuganire oku bintu biguma by’akamaro bili omu ngani eganirirwe omu chitabu cha Luka sura ya 7. Ka wabwene oku amango “Yesu alangiraga” oyola mukazi ogwerhe kahinda kanene naho “amuyunvira obonjo”? (Omustari gwe 13) Naho bichi alibwene, nkabaga abona oyola mukazi eyi ali alambagira ah’aburhambi bw’amayiti m’omwana wage eyi ali alira, naho amayunvira oyola mukazi obonjo omu murhima gwage. Yesu arhayunvirhire oyola mukazi obonjo konyine; s’ahubwe ajirire echintu chiyerekene akababaro. Abwira oyola mukazi, nkabaga n’omulenge gulimo obwizere, aderha ntya: “Olekeragaho kulira.” Naho ajira chintu chilebe ch’okumurhabala. Afuula omwana wage “amuhereza nyina.”​—Omustari gwe 14, 15.

15. Bichi rhwakayiga oku bilolere echisomerene cha Yesu?

¹⁵ Bichi rhwakayiga oku bilolere echisomerene cha Yesu ch’okufuula omugala w’oyola mukana? Hali echi rhwakayiga omu kuyereka olukogo ku balala bafisize. Okuderha okuli, rhurhakafula owafire nk’oku Yesu ajiraga. Aliko kuguma na Yesu, nerhu rhwakachihangana kuyereka abantu bafisize akabaro, omu kuba bantu b’okulolereza bwinja. Rhwakarhola entambu y’okubakolera oku lukogo omu kuderha n’okujira chintu choshi-choshi rhwakagala yi rhubarhabala n’okubarhuliriza. d (Mez. 17:17; 2 Ko. 1:3, 4; 1 Pe. 3:8) Chiro n’ebijiro bigeke changwa ebinwa binja byakabaheba omurhima n’okubarhuliriza bwenene.

16. Nk’oku biyerekenwe oku foto, bichi rhwayigire kugerera omufano gwa nyina w’abana wachizindiga kufisa omwana wage?

¹⁶ Rhushambale kw’eyila hali yarhengereraga. Hamagera myaka milebe amango mwali-werhu muguma abona nyina wabana waliri eburhambi bwage eyi ali alira amango baliri bayimpa eyi bali oku mbuganano z’echibaga. Olola lwimpo lwalishambere oku bilolere obulangalire b’obufuke, oyola nyina wabana arhaliza legama afisize omunyere wage. Bulala alimenyere echola, oyola mwali-werhu amuyegera  azungulusya oyola nyina w’abana okuboko bagenderera kuyimpa haguma olola lwimpo kugera oku buzinda. Buzinda oyola nyina w’abana ayibukire ntya: “Nachiyunva nzigiire bwenene bene-berhu na bali-berhu.” Aligwerhe shukurani nene bwenene bulala alijire oku mbuganano. Aderhere ntya: “Ahola harhunapata oburhabale, oku Chumbi ly’Obwami.” Rhwakachizera oku Yehova anabona n’okusiimiswa n’ebijiro bigeke rhunajira, omukuyereka akababaro balala bafisize, “abavunikire omurhima bwenene.”​—Zb. 34:18.

17. Bichi rhwayigire mu gunola mwazi?

¹⁷ Okuyiga oku bilolere ebisomerene bya Yesu, byakomeza obwemere bwerhu. Rhwakahebwa omurhima bwenene amango rhwamayiga engani zili omu Biblia, ziderhere oku bisomerene Yesu ajiraga. Zirhuyigirize oku Yehova na Yesu barhuzigiire bwenene banagwerhe emisi y’okumala ebibazo byoshi by’abantu. Kandi rhwakachizera oku ebilagane binja bwenene by’amango mayinjire nji byayenera amango Obwami bwa Mugu nji bwarhondera kurhegeka egulu. Amango rhuli rhwasuzuma ezola ngani, rhwakakengera oku kuntu rhwakayiganya engeso za Yesu. Bulagurhe orhakarhola eprogarame y’okuyiga omu funzo lyawe-lyawe changwa omu Buharamye b’Omulala, emyazi ederhere oku bindi bisomerene Yesu ajiraga? Orhegere bichi ebyola bikuyigirize naho wanaja washambala n’abandi oku biwayigire. Rhwagwarha enganiro haguma n’abandi zakabayumbaka amango rhwamajira ntyo!—Ro. 1:11, 12.

18. Bibazo bihe nji rhwashubizako omu mwazi gukulikireho?

¹⁸ Amango aliri hofi kumala akasi kage k’oku hubiri, Yesu ajira echisomerene chage cha kasharhu ch’okufula omuntu. Aliko echila chirhaliri kuguma n’ebindi, afuula mwira wage muzigirwa, wabaga amamala siku ene eyi afire. Bichi rhwakayiga oku bilolere engani eli omu chitabu ch’Enjili ederhere oku bilolere echola chisomerene? Na nka gurhe rhwakakomeza obwemere bwerhu omu bulangalire b’obufuuke? Nji rhwashubiza kw’ebyola bibazo omu mwazi gukulikireho.