MWAZI G’OKUYIGA 16
“Musheja-Wenyu Afuuka”!
“Yesu abwira [Marta]: ‘Musheja-wenyu afuuka.’”—YOH. 11:23.
OLWIMPO 151 Yehova Ataita (Yehova nj’Ahamagala)
OKU BUGEKE a
1. Nka gurhe murhabana muguma aliyerekene oku agwerhe obulangalire omu bufuuke?
AMANGO murhabana oyirikirwe Matthew aligwerhe myaka 7, yewe n’abantu b’omulala gwage baliri balola eprograme ya buli mwezi ya JW Télédiffusion. Hofi oku buzinda bwe programe, babona evideo y’omuziki ederhere oku bilolere okuyakira omuzigirwa wawe wamafuuka. b Enyuma w’eyola programe, Matthew ayegera abazere bage abafarha efune, n’okuderha ntya: “Papa na Mama, muyinji si? Chiro nji nafa nji nafuka amango m’obufuuke. Nji mwandingiriza, nji byaba bisiimisize; arhali ntyo!” Ba nka wawaza gurhe abola bazere bali kwanene kusiima bulala omwana wabo agwerhe obwemere bukomere omu bufuuke.
2-3. Bulagurhe kuli kwinja emwerhu rhuwaze oku chilagane ch’obufuuke?
2 Mango oku mandi, binarhusimisa amango rhwamawaza oku chilagane che Biblia ch’obufuuke bya mango mayinjire. (Yoh. 5:28, 29) Bulagurhe? Bulala rhurhenji mangochi rhwahurana obulwala bukomere omu kalamo, changwa okufisa omuntu rhwalizigire bwenene omu kasanzi rhurhaliwazize. (Muh. 9:11; Yak. 4:13, 14) Echilagane ch’obufuuke chakarhurhabala kulembera ebigeregezo bili nk’ebyola. (1 Te. 4:13) Ebiblia erhuyemezeze oku Darha w’embingu arhuyinji bwinja. (Lu. 12:7) Waza okuntu Yehova Mungu akwanene kuba eyi arhumenyere bwinja, okuntu nj’arhufuula n’oborhere bonobola rhwaligwerhe n’ebintu rhwalibikire omu bwenge. Yehova arhuzigire bwenene kandi arhumire byashobokana nji rhulame esiku n’amango, chiro rhwafa nj’arhufuula akaba bihemereko!
3 Ech’oburhanzi rhwaganirako mu gunola mwazi, rhwabona bulagurhe rhwakalangalira echilagane ch’obufuuke. Naho rhwaganira oku ngani ye Biblia ekomeze obwemere bwerhu eli mw’ebinwa olwandiko lwagunola mwazi guyumangireko: “Musheja-wenyu afuuka.” (Yoh. 11:23) Buzinda rhwayiga nka gurhe rhwakarhuma echilagane ch’obufuuke chaba ch’okuli emwerhu.
BULAGURHE RHWAKACHIZERA ECHILAGANE CH’OBUFUUKE?
4. Y’oyemera oku echilagane nji chayenera, bichi okwanene kuchizera? Lerha omufano.
4 Yirhuyemera echilagane, rhukwanene kuchizera oku owahanaga echola chilagane agwerhe enyorha n’emisi, changwa obuhashe b’okuyeneza echola chilagane. Omufano: Ba nka wawaza enju yawe yashandukire n’echiyaga. Naho mwira wawe anakulaganya ntya: ‘Nakurhabala nshube nkuyumbakire enju yawe.’ Ali akubwira obukweri, kandi onachizerere oku alonzeze akurhabale. Akaba ali muntu onayumbaka eyanagwerhe ebikoleso bikwanene, omenyere oku agwerhe obuhashe b’okukurhabala. K’okuderha ochizerere echilagane akuhere. Bobunola gurhe, oku bilolere echilagane cha Mungu ch’obufuuke? Ka kweri anagwerhe enyorha n’obuhashe b’okuchiyeneza?
5-6. Bulagurhe rhwakachizera oku Yehova agwerhe enyorha y’okufuula abafire?
5 Yehova agwerhe enyorha yokufuula abafire si? Buzira ngangane intyo kubinali. Alifuherere abayandikaga Ebiblia kugerera eroho lyage lichesibwa, bayandike echilagane chage ch’obufuuke chamango mayinjire. (Isa. 26:19; Ho. 13:14; Ufu. 20:11-13) Kandi amango Yehova amahana echilagane, buli mango anachiyeneza. (Yos. 23:14) Yehova agwerhe enyorha y’okufuula abafire. Bulagurhe rhwakaderha ntyo?
6 Waza oku bi Yobu aderhaga. Alichizerere oku nachiro afa, Yehova nj’amufuula anashuba kulama. (Yob. 14:14, 15) Intyo ku Yehova naye anachiyunva oku bilolere abakozi bage boshi bafire. Agwerhe enyorha y’okubafuula, bagwarhe amagala menja n’obusiime. Gurhe si oku bilolere amamiliare m’abantu bafire marhapataga orozo l’okuyiga okuli oku bilolere Yehova? Alonzeze kubafuula nabo. (Mdo. 24:15) Alonzeze oku nabo bagwarhe orozo l’okugwarha obwira haguma naye, n’okulama esiku n’amango oku gulu. (Yoh. 3:16) Kweri Yehova agwerhe enyorha nene y’okufuula abafire.
7-8. Bulagurhe rhwakachizera oku Yehova agwerhe obuhashe bokufuula abafire?
7 Yehova agwerhe obuhashe b’okufuula abafire si? Nechi intyo kubinali! Ali “Mugala byoshi.” (Ufu. 1:8) Bulala agwerhe misi minene bwenene y’okuhima buli mwanzi yeshi, chiro n’olufu. (1 Ko. 15:26) Rhunagwarha emisi n’echirhulirizo omu kumenya echola. Rhuganire oku mufano gwa Mwali-werhu Emma Arnold. Yewe n’omulala gwage balihurene ebigeregezo by’obwemere amango m’Evita ly’Akabiri ly’Egulu Lyoshi. Emma alirhulirize omwali bulala balifisize abantu balizigire omu nkambi y’amalibuko ya Banazi. Emma aderhere ntya: “Akaba abantu bafire barhakashuba kulama, k’okuderha oku, omwanzi werhu olufu agwerhe emisi minene kulusha Mungu, aliko obola burhali bukweri.” Kweri, nta chintu n’echiguma chigwerhe emisi kulusha Yehova! Mungu ogala byoshi walemaga akalamo, agwerhe emisi n’obuhashe b’okufuula abafire.
8 Eyindi mpanvu erhumire rhwabona oku Mungu agwerhe obuhashe b’okufuula abafire eli oku, agwerhe obwenge burhagwerhe mipaka. Anahamagala buli nyenyezi omu zino lyayo. (Isa. 40:26) Kandi, ayibukire boshi bafire. (Yob. 14:13; Lu. 20:37, 38) Byakamuyorohera kuyibuka orhwindi rhuntu rhugeke-geke oku bilolere abantu nj’afuula, kuhebamo n’okuntu baliri babonekana, k’okuderha esura yabo, ebintu baliyinji kukola omu kalamo, changwa oborhere bwabo.
9. Bulagurhe ochizere echilagane cha Yehova ch’obufuuke bw’amango mayinjire?
9 Okuderha okuli, rhukwanene kuchizera echilagane cha Yehova ch’obufuuke bw’amango mayinjire bulala rhuyinji oku agwerhe enyorha n’obuhashe b’okuchiyeneza. Waza oku yindi mpanvu yakarhuma wachizera echilagane cha Mungu ch’obufuuke: Yehova afuulire abantu. Omu mango ma mira, alihere abalume bemana obuhashe, kuhebamo na Yesu, bafuule abafire. Lekaga rhuje rhwaganira oku ngani nguma omu ngani z’obufuuke Yesu ajiraga, ebonekene omu chitabu cha Yohana sura ye 11.
YESU AMAFISA MWIRA WAGE MUZIGIRWA
10. Bichi byarhengereraga amango Yesu aliriri ahubiri oku lwindi lunda l’olwinji lwe Yordani kurhenga e Beteniya nagurhe alijirire? (Yohana 11:1-3)
10 Osome Yohana 11:1-3. Ba nka wawaza oku byarhengereraga omu Betaniya oku buzinda b’omwaka gwa 32 N.K.Y. Yesu aligwerhe abera b’okumurhima mw’eyola vilaje, k’okuderha, Lazaro na bali-babo babiri, Mariya na Marta. (Lu. 10:38-42) Aliko Lazaro abaga alwalire, na bali-babo bagwarha obuba. Barhumira Yesu oburhumwa, waliri eshira we Yordani ahakalambagirwa siku 2 kurhengerera e Betaniya. (Yoh. 10:40) Ech’okugayisa, Lazaro ava afa amango omurhumwa agera emunda Yesu ali. Ahoh’anaho Yesu arhegera oku mwira wage afire, arhanga kuyorha ahaliri zindi siku ebiri na buzinda aja abalamira Ebetaniya. Aliko amango Yesu ageraho, Lazaro abaga ey’amamala siku 4 ey’afire. Yesu alonzeze kujira echintu chilebe yi bera bage bayunguka nacho, chakanalerhera Mungu obukuuze.—Yoh. 11:4, 6, 11, 17.
11. Somo lihe rhwakayiga oku bilolere obwira rhwabwene mw’eyila ngani?
11 Eyila ngani erhuyigirize echintu chilebe oku bilolere obwira. Ba nka wawaza: Amango Mariya na Marta barhumaga oburhumwa ku Yesu, barhali mubwirire oku ayinje Ebetaniya. Bali mulibwirire konyine oku mwira wage muzigirwa alwere. (Yoh. 11:3) Amango Lazaro afa, Yesu akagalire kumufula ey’anali hale. Aliko Yesu achishoga kuja Ebetaniya, ah’abera bage bali Mariya na Marta. Ka ogwerhe mwira wawe wakurhabala buzira woyo kukuhema oburhabale? Naho ochizerere oku wakalangalira oku akuhereza oburhabale “omu mango m’ebibazo.” (Mez. 17:17) Kuguma na Yesu, rhwakaba bera bali ntyo oku bandi! Rhugaluke mweyola ngani rhulole bichi byajaga byaba.
12. Chilagane chihe Yesu alihere Marta, na bulagurhe alikwanene kuchizeracho? (Yohana 11:23-26)
12 Osome Yohana 11:23-26. Marta arhegera oku Yesu ali hofi n’Ebetaniya. Aho hanaho alibirhirayo kubuganana naye n’okumubwira ntya: “Waliha nka waliri hano musheja-werhu arhakafire.” (Yoh. 11:21) Okuderha okuli, akafumize Lazaro. Aliko Yesu alilonzeze kujira chintu chilebe. Abalaganya ntya: “Musheja-wenyu afuuka.” Kandi alihere Marta eyindi mpanvu y’okugwarha obwemere mw’echola chilagane omu kuderha ntya: “Nyono nye bufuuke n’akalamo.” Mungu alihere Yesu obuhashe b’okufuula abafire. Alifuulire, omwana w’obunyere nkabaga wali wamamala bisanzi bilebe eyi afire, kandi afuula omwana w’obusole, byakashobokana oku olola lusiku yanafaga. (Lu. 7:11-15; 8:49-55) Aliko si akagalire kufuula omuntu wamamala siku 4 afire ey’omubiri gwage gwahwanzize kubola?
“LAZARO, HULUKA!”
Yesu aliyunvirhe akababaro kanene ku bera bage baliri omu maganya (Olole echifungo che 13-14)
13. Nk’oku olwandiko lwa Yohana 11:32-35 luyerekene, gurhe Yesu alijirire amango abona Mariya n’abandi yibalira? (Olole n’efoto.)
13 Osome Yohana 11:32-35. Ba nka wawaza bichi byarhengereraga enyuma waho. Mariya na Marta, bali-babo Lazaro, bagenda kubuganana na Yesu. Mariya agalukira ebyola binwa mwali-wabo aderhaga: “Waliha, nka waliri hanola musheja-werhu arhakafire.” Yewe n’abandi bantu baliri omu maganya. Amango Yesu ayunva n’okubona gurhe yi balira, naye ayunva omugayo gunene bwenene. Bulala aligwerhe kababaro kanene ku bera bage, echola charhuma naye alira. Ayunva okuntu binaluma amango omuntu amaheza omuzigirwa wage. Okuderha okuli, aligwerhe enyorha y’okubakulira echaliri chabalerhera emiziga!
14. Bichi rhwakayiga oku bilolere Yehova eju y’echijiro Yesu akoleraga Mariya amango aliri alira?
14 Ebi Yesu ajiraga amango abonaga oku Mariya ali alira, birhuyigirize oku, Yehova ali Mungu wak’ababaro kanene. Bulagurhe rhwakaderha ntyo? Nk’oku rhwabonaga omu mwazi gugerere, Yesu anayiganya Eshe oku bushinganyanya omu nkengero n’okuchiheba omu hali y’abandi kuguma n’Eshe. (Yoh. 12:45) Bolola amango rhwasoma oku Yesu aliraga bulala aligwerhe akababaro kanene ku bera bage baliri omu maganya, rhwanamenya oku Yehova anachiyunva agwerhe akababaro kanene bwenene amango ali arhubona rhugwerhe emiziga y’amaganya. (Zb. 56:8) K’echola chirhakuhereze enyorha y’okugwarha obwira bwa hofi-hofi haguma na Mungu?
Yesu aliyerekene oku agwerhe obuhashe b’okufuula abantu (Olole echifungo che 15-16)
15. Nk’oku olwandiko lwa Yohana 11:41-44 luyerekene, bichi byabaga oku shinda ya Lazaro? (Olole n’efoto.)
15 Osome Yohana 11:41-44. Yesu agera oku shinda ya Lazaro, naho ahema bakule ebale lifunikire eshinda. Marta arhayemeraga, aderha oku omubiri gwage gukwanene kuba eyi gukala guli gwabaya. Yesu amushubiza ntya: “Nta likubwirire oku okagwarha obwemere wabona obukuuze bwa Mungu?” (Yoh. 11:39, 40) Yesu ayinamula amesho mage n’okusalira embere za bantu. Alonzeze kuhereza Yehova olukengo ku byoshi bikola kuba. Nahola Yesu ava ahamagala: “Lazaro, huluka!” Naho Lazaro ava ahuluka omu shinda! Yesu ajira chintu chilebe abantu baliri bawaza oku chirhakagalikana.—Olole omwazi “Kwa nini ilimchukua Yesu siku nne ili kufika kwenye kaburi la Lazaro?” (Bichi Byarhumaga Hagera Esiku Ene Embere Yesu Ahike oku Shinda ya Lazaro), omu Munara g’Omulanzi gwa Lusiku 1, Mwezi gwa 1, 2008.
16. Nka gurhe engani eli mu Yohana sura ye 11 ekomeze obwemere bwerhu omu bulangalire b’obufuuke?
16 Engani eli omu chitabu cha Yohana sura ye 11, ekomeze obulangalire bwerhu omu chilagane ch’obufuuke. Nka gurhe? Yibuka echi Yesu alaganyaga Marta: “Musheja-wenyu afuuka.” (Yoh. 11:23) Kuguma n’Eshe, Yesu agwerhe enyorha n’obuhashe b’okuyeneza echola chilagane. Emiziga asheshaga yaliyerekene oku agwerhe enyorha nene y’okumala olufu n’echishika lunalerha. Amango Lazaro ahulukaga omu shinda, kandi Yesu alishubire kuyerekana oku agwerhe obuhashe b’okufuula abafire. Shubaga owaze oku binwa Yesu abwiraga Marta: “Nta likubwirire oku okagwarha obwemere wabona obukuuze bwa Mungu?” (Yoh. 11:40) Rhugwerhe empanvu nyinja y’okuchizera oku, Mungu nj’ayeneza echilagane ch’okufuula abafire. Bichi rhwakajira yirhuyerekana oku echola chilagane chili ch’obukweri emwerhu?
NKA GURHE RHWAKABONA OBULANGALIRE B’OBUFUUKE OKU BULI B’OBUKWERI?
17. Bichi rhukwanene kubiika omu bwenge amango rhuli rhwasoma oku bilolere engani z’obufuuke zili omu Biblia?
17 Osome onakengere oku bilolere obufuuke bw’amango magerere. Omu Biblia hali ngani munane z’abantu bafuukire oku gulu. c Bulagurhe orhakayiga ezola ngani bwinja-bwinja? Amango oli wajira ntyo, oyibuke oku baliri bantu-nyabantu, haliri abalume, abakazi n’abana. Olole bichi ebyola byaka kuyigiriza. Okuwaza kubuli mufano guhanirwe, kwakurhabala kubona oku Mungu agwerhe enyorha n’obuhashe b’okufula abafire. Embere wabyoshi owaze oku bufuuke bw’akamaro bwenene k’okuderha obwa Yesu. Oyibuke oku obufuuke bwage bwaliyemezezwe n’ebihumbi by’Abahamirizi, kandi burhuhere omusingi gukomeere g’obwemere bwerhu b’ofuuke bwayinjire.—1 Ko. 15:3-6, 20-22.
18. Nkagurhe wakakolesa enyimpo zerhu bwinja oku bilolere echilagane ch’obufuuke? (Olole n’amafasiriyo m’eshishi.)
18 Okolese bwinja “enyimpo zerhu z’ekiroho” ziderhere oku bulangalire b’obufuuke. d (Efe. 5:19) Ezola nyimpo zinarhuma rhwabona obufuuke oku buli b’okuli n’okurhurhabala kukomeza obwemere bwerhu m’obola bulangalire bwinja bwenene orhakalola. Oziyunvirize onachihangane kuzimenya bwinja, onashambale oku mafasiriyo m’ebinwa bilimo omu buharamye b’omu mulala. Obike ebyola binwa omu bwenge n’okumurhima gwawe. Naho chiro waja wahurana ebigeregezo byakahanyagaza akalamo kawe, nk’okufisa omuzigirwa wawe, eroho lichesibwa lya Yehova lya kurhabala kuyibuka ezila nyimpo, zakurhuliriza n’okukuyereza emisi.
19. Bichi rhwakachapa omu bwenge oku bilolere obufuuke? (Olole echisanduku “ Bichi Nji Wababaza?”)
19 Ochape omu bwenge. Yehova arhuhere obushobozi b’okuchapa omu bwenge egulu lihya-hya. Mwali-werhu muguma afasiriye ntya: “Nagezeze bisanzi binene ey’indi nachapa omu bwenge egulu lihya-hya, kwanaba nka ndi nayunva empumulo yamauwa mali mashishagira omu Paradizo.” Ba nka wawaza wabuganana na balume na bakazi bemana balilamire omu mango ma mira. Inde ogwerhe enyorha y’okubuganana naye? Bibazo bihe nji wamubaza? Ba nka wawaza amango wabuganana n’abazigirwa bawe bafire. Ochape omu bwenge okuntu wakashuba kubonana nabo, ebinwa by’oburhanzi wakababwira, okuntu wakabahobera n’emiziga y’obusiime.
20. Omuhigo gwerhu gukwanene kuba guhe?
20 Rhugwerhe eshukrani nene bwenene emwa Yehova kw’echila chilagane ch’obufuuke! Rhwaka chizera kw’echola chilagane nji chayenera bulala, Yehova agwerhe enyorha n’obuhashe b’okuchiyeneza. Rhujage rhwahigirira kugenderera kukomeza obwemere bwerhu m’obula bulangalire bwinja bwenene orhakalola. Omu kujirantyo, rhwayorha rhuli hofi bwenene na Mungu walaganyize buli muguma werhu ntya: ‘Abazigirwa bawe nji bafuka!’
OLWIMPO 147 Ahadi ya Uzima wa Milele (Echilagane ch’Akalamo k’Esiku n’Amango)
a Akaba wachigerere kufisa omuzigirwa wawe, nta ngangane echilagane ch’obufuuke chakurhulirize bwenene. Nka gurhe wakafasiriya abandi babone bulagurhe ochizerere echola chilagane? Nka gurhe wakakomeza bwenene obwemere bwawe omu chilagane ch’obufuuke? Omuhigo gwa gunola mwazi kuli kurhurhabala rhweshi rhukomeze obwemere bwerhu omu bulangalire b’obu fuuke.
b Eyola video y’omuziki ederhere: Iko Karibu Sana (Egulu Lihya-hya Lili Hofi Bwenene) eli omu JW Télédiffusion y’Omwezi gwe 11, 2016.
c Olole echisanduku “Ufufuo Munane Wenye Kuzungumziwa katika Biblia” (Bufuuke Munane Buganirirwe omu Biblia) omu Munara g’Omulanzi, gwa Lusiku 1 Mwezi gwa 8, 2015 bukurasa 4.
d Olole ezila nyimpo omu chitabu cherhu ch’enyimpo “Tumuimbie Yehova kwa Furaha” (Rhuyimpire Yehova n’Omwishingo) “Wazia Uko mu Dunia Mupya” (Ba nka Wawaza Oli omu Gulu Lihya-hya) (Olwimpo 139), “Kaza Macho ku Zawadi!” (Oseze Amasu oku Luhembo) (Olwimpo 144), na “Yehova Ataita” (Yehova nj’Ahamagala) (Olwimpo 151). Olole n’oku jw.org enyimpo z’omu zindi nyimpo “Iko Karibu Sana” (Egulu Lihya-hya Liri Hofi) “Dunia Mupya Yenye Kuja” (Egulu Lihya-hya Lyayinjire), “Uone.” (Nji Wabona).
